Maʻu ʻa e ʻAmanaki ki he Taʻu 2024—Ko e Hā ʻa e Lau ʻa e Tohi Tapú?

ʻI he ʻahó ni, ʻoku fakakaukau ʻa e tokolahi ʻoku ʻikai ha fakaleleiʻanga ki he ngaahi palopalema ʻoku fehangahangai mo e māmaní ʻi he taʻu 2024. Neongo ia, ʻe lava ke tau maʻu ʻa e ʻamanaki ki he kahaʻú. Te tau maʻu ia mei fē?

ʻOku ʻomai ʻi he Tohi Tapú ʻa e ʻamanaki

ʻOku talaʻofa mai ʻe he Tohi Tapú ko e ʻOtuá te ne fakaleleiʻi ʻa e ngaahi palopalema ʻokú ne ʻai ke siva ʻetau ʻamanakí. ʻI he vavé ni maí, ko e ʻOtuá “te ne holoholo ʻa e loʻimata kotoa pē mei [hotau] matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:4.

Ke ako lahi ange fekauʻaki mo e ngaahi talaʻofa ʻi he Tohi Tapú ki he kahaʻú, lau ʻa e kupu “Ko ha ʻAmanaki Moʻoni ki ha Kahaʻu Lelei Ange.”

Founga ʻe lava ke tokoniʻi ai koe ʻe he Tohi Tapú ʻi he taimí ni

ʻOku ʻomai ʻi he Tohi Tapú ʻa e ʻamanaki ki he kahaʻú ʻa ia ʻe lava ke ne tokoniʻi koe ke ikuʻi ʻaki ʻa e ngaahi ongoʻi ʻikai leleí pea maʻu ha vakai ʻoku lelei ange. (Loma 15:13) Ko e faleʻi ʻaonga ʻi he Tohi Tapú ʻe lava ke ne toe tokoniʻi koe ke fekuki mo e ngaahi palopalema ʻokú ke fāinga nai mo iá, ʻo hangē ko e masivá, fakamaau taʻetotonú mo e puké.

Sio ki he founga hono tokoniʻi ʻe he ʻamanaki ʻi he Tohi Tapú ha tangata ke ne maʻu ʻa e nonga mo e fiefia neongo naʻá ne tupu masiva. Sio ʻi he vitiō Juan Pablo Zermeño: Naʻe ʻOmai ʻe Sihova Kiate Au ha Moʻui Mohu ʻUhinga.
Kumi ki he founga ʻe lava ke tokoniʻi ai koe ʻe he Tohi Tapú ke fekuki mo e ngaahi ongoʻi halaiá, mamahí, loto-moʻuá mo e mate ha taha ʻofeina. Lau ʻa e kupu “ʻE Lava Ke U Maʻu ha Fakafiemālie mei he Tohi Tapú?”
Sio ki he founga hono maʻu ʻe ha fefine naʻe sōtia ki muʻa ʻa ia naʻá ne “fakapoʻuli mo taʻeʻofa” ʻa e ʻamanaki koeʻuhi ko ʻene ʻako ʻa e Tohi Tapú. Sio ʻi he vitiō Naʻe ʻIkai Ke U Toe Ngāueʻaki ʻEku Meʻafaná.

ʻAi ke hoko ʻa e taʻu 2024 ko ha taʻu lelei ia kiate koe mo ho fāmilí. Ako lahi ange ki he founga ʻe lava ke tokoniʻi ai koe ʻe he Tohi Tapú. ʻAhiʻahiʻi ʻemau founga ako Tohi Tapu mo ha faiako ʻa ia ko ha fetalanoaʻaki taʻetotongi ia. Ako ki he founga ʻe lava ke foaki atu ai ʻe he ʻOtuá kiate koe ʻa e “ngaahi fakakaukau ʻo e melino” ʻi he taimí ni kae pehē foki ki ha “kahaʻu pea mo ha ʻamanaki.”—Selemaia 29:11.