Feʻao mo ha Mahaki Tauhi—ʻE Lava ke Tokoni ʻa e Tohi Tapú?
Tali ʻa e Tohi Tapú
ʻIo. ʻOku tokanga ʻa e ʻOtuá ki heʻene kau sevāniti ʻoku puke. ʻOku pehē ʻe he Tohi Tapú ʻo fekauʻaki mo ha sevāniti faitōnunga: “ʻE tokoniʻi ia ʻe Sihova ʻi heʻene ʻi he mohenga ʻo e mamahí.” (Saame 41:3) Kapau ʻokú ke fāinga mo ha mahaki tauhi ko e ngaahi meʻa ʻe tolu ko ení ʻe lava ke ne ʻomai ʻa e fakafiemālie:
Lotu ki ha mālohi ke kātaki. ʻE lava ke ke maʻu ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.” ʻE tokoniʻi ai koe ke hokohoko atu neongo ʻa e ngaahi faingataʻá.—Filipai 4:6, 7.
Fakakaukau ki he ngaahi meʻa leleí. ʻOku pehē ʻe he Tohi Tapú: “Ko e loto fiefia ko e faitoʻo lelei: Ka ko e laumalie maumau ʻoku ne fakamaha ʻa e ivi.” (Palōveepi 17:22, Paʻaki Foʻou) ʻAi ke ke anga-fakakata. ʻE tokoni eni ke fakasiʻisiʻi hoʻo loto-mamahí pea ʻe ʻaonga foki ki hoʻo tuʻunga moʻui leleí.
Fakatupulekina hoʻo tui ki he ngaahi talaʻofa ʻa e ʻOtuá. Ko ha ʻamanaki papau ʻe lava ke ne tokoniʻi koe ke ke fiefia neongo ʻa e fāinga mo e mahaki tauhí. (Loma 12:12) ʻOku tomuʻa tala ʻe he Tohi Tapú ʻe ʻi ai ha taimi “ʻe ʻikai ha taha ʻoku nofo ai te ne pehē: ‘ʻOku ou puke.’” (ʻAisea 33:24) ʻE fakamoʻui leva ʻe he ʻOtuá ha taha ʻokú ne maʻu ha mahaki mafatukituki ʻa ia ʻoku ʻikai lava ʻe he poto ʻo e tangatá ke faitoʻo. Ko e fakatātā, ʻoku fakamatalaʻi ʻe he Tohi Tapú ʻe toe foki ʻa e motuʻá ʻo talavou mo moʻui lelei: “Tuku ke hoko ʻa hono kakanó ʻo foʻou ange ia ʻi he taimi ʻo ʻene kei talavoú; tuku ke ne toe foki ki he ngaahi ʻaho ʻo hono mālohi fakatalavoú.”—Siope 33:25.
Fakatokangaʻi: Neongo ʻoku tui ʻa e Kau Fakamoʻoni ʻa Sihová ʻoku tokonaki mai ʻe he ʻOtuá ʻa e tokoni, ka ʻi he taimi tatau ʻoku nau toe fekumi ki ha tokoni fakafaitoʻo ki heʻenau mahaki tauhí. (Maʻake 2:17) Kae kehe, ʻoku ʻikai ke mau poupouʻi ha founga fakafaitoʻo pau he ʻoku mau tui ko e tokotaha taki taha ʻoku totonu ke ne fai ʻene fili fakafoʻituitui ki heʻene tuʻunga moʻui lelei.