Ngaahi Fehuʻi mei he Kau Lautohí

Naʻe anga-fēfē hono ʻoange ʻe he ngata ʻi he ngoue ʻo ʻĪtení kia ʻIvi ʻa e fakakaukau ke maumauʻi ʻa e lao ʻa e ʻOtuá fekauʻaki mo e ʻakau ʻo e ʻilo ʻo e leleí mo e koví?

ʻOku pehē ʻe he Senesi 3:1: “Pea ko e Ngata naʻe olopoto lahi ʻi he manu kotoa pe ʻo e fonua, ʻa ia ne ngaohi ʻe Sihova Elohimi. Pea ne huhū ange ki he fefine, ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” ʻOku ʻi ai ʻa e ngaahi fokotuʻu kehekehe ki he founga naʻe fetuʻutaki nai ai ʻa e ngatá mo ʻIví. Ko e fakakaukau ʻe taha ʻoku pehē naʻe fakafou ia ʻi he ngaue ʻo e sinó. Ko e fakatātaá, naʻe fakamatala ha faifekau ʻIngilani ko Joseph Benson: “ʻOku ngalingali hā lahi tahá ko ha ngaahi faʻahinga fakaʻilonga. Ko e moʻoni, kuo fakakaukau ʻa e niʻihi ko e malava fakaefakakaukau mo e lea ko iá ko e ngaahi tōʻonga ʻiloa ia ʻa e fanga ngatá ʻi he taimi ko iá, . . . ka ki he meʻá ni ʻoku ʻikai ha fakamoʻoni.”

Kae kehe, ʻi hono ngāueʻaki pē ʻa e ngaue ʻo e sinó, naʻe malava fēfē ke ʻoatu ai ʻe he ngatá kia ʻIvi ʻa e fakakaukau ʻo pehē ko hono kai ʻa e fuaʻiʻakau naʻe tapuí te ne hoko ai ʻo hangē ko e ʻOtuá, ʻo malava ke fili ʻa e meʻa ʻoku leleí pea mo e meʻa ʻoku koví? ʻIkai ko ia pē, naʻe kau ʻa ʻIvi ʻi he fetalanoaʻakí, ʻo tali ʻa e fehuʻi naʻe langaʻi hake ʻe he ngatá. (Senesi 3:​2-5) Ko e fakakaukau ʻo pehē naʻe fetuʻutaki ʻa e ngatá ʻaki pē ʻa e ngaahi fakaʻilonga pe ngaue ʻo e sinó ʻe taki atu ia ki he fakamulituku naʻe tali ʻa ʻIvi ʻaki ʻa hono ngāueʻaki ʻa e ngaue ʻo e sinó, neongo ʻoku pehē ʻe he Tohitapú naʻá ne lea.

ʻI he lave ki he meʻa ko ʻeni naʻe hokó, naʻe fakatokanga ai ʻa e ʻapositolo ko Paulá ki he kaungā Kalisitiané: “Oku ou manavahe telia naa hage ko hono oloa e he gata i he ene kākāʻi a Ivi, e behe ae fakahala ho mou loto.” Ko e fakatuʻutāmaki naʻe leaʻaki ʻe Paulá naʻe haʻu ia mei he “kau abosetolo loi akinautolu, koe kau gaue fakakākā.” Ko e fakamanamana naʻe ʻomai ʻe he kau “fakakehe” peheé naʻe ʻikai ke fakangatangata ia ki he ngaue ʻo e sinó. Naʻe kau ai ʻenau leá​—ʻenau ngaahi lea kākaá, ʻo lea ke takihalaʻi ʻa e niʻihi kehé.​—2 Kolinito 11:​3-5, 13, PM.

Neongo naʻe ngāueʻaki ʻa e leá ke takihalaʻi ʻa ʻIvi ʻi he ngoue ʻo ʻĪtení, ʻoku ʻikai ke fokotuʻu mai ai ʻo pehē naʻe maʻu ʻe he ngata moʻoni ko ení ha ngaahi afo fakaelea. Naʻe ʻikai moʻoni ke fiemaʻu ia. ʻI he taimi naʻe lea ai ha ʻāngelo ʻa e ʻOtuá kia Pēlami ʻo fakafou ʻi ha ʻasí, naʻe ʻikai ke fiemaʻu ki he manú ha puha lea fihi ʻo meimei tatau mo ia ʻoku maʻu ʻe he faʻahinga ʻo e tangatá. (Nomipa 22:​26-31) ʻOku hā mahino, ʻi he ‘lea fakatangata mai [ko ʻeni] ʻe ha meʻa taʻelea, ko e manu ngaué,’ ko e mālohi ki he leá naʻe haʻu ia mei he nofoʻanga laumālié.​—2 Pita 2:16.

Ko e meʻamoʻui laumālie naʻe ʻi mui ʻi he ngata naʻe lea kia ʻIví ʻoku fakapapauʻi mai ia ʻi he Tohitapú ko e “Ngata ʻo ono ʻaho, ʻa e toko taha ʻoku ui ko e Tevolo mo Setane.” (Fakahā 12:9) Ko e ngaahi lea naʻe fanongo ki ai mo tali ʻe ʻIví naʻe fakaʻaiʻai ia ʻe Sētane, ʻa ia ʻokú ne “ʻai ʻa e anga ʻo ha angelo mei he maama.”​—2 Kolinito 11:14.

[Fakatātā ʻi he peesi 27]

“Te mo hoko ke hange ko e ʻOtua, hoʻomo ʻilo ʻa e lelei mo e kovi”