Falala kia Sihova—Ko e ʻOtua ʻA Ia ko e Tokotaha Moʻoní
Kuó ke sio ki he langí ʻi ha pō tafitonga ʻo ke mamata ai ki ha ngaahi foʻi fetuʻu ʻe laui teau? ʻOku anga-fēfē hoʻo fakamatalaʻi ʻenau ʻi aí?
ʻI HE lōngonoa ʻo e poó, naʻe lea fakaefakatātā ai ʻa e ngaahi foʻi fetuʻú kia Tuʻi Tēvita ʻo ʻIsileli ʻo e kuonga muʻá, ʻo ueʻi ia ke ne tohi: “Ko e ngaahi langi ʻoku nau tala ʻa e nāunauʻia ʻo e ʻOtua; pea ʻoku fakaha ʻe he ʻatā ʻa e ngaue ʻa hono nima.” (Sāme 19:1) ʻIo, ko e Tokotaha-Fakatupú kae ʻikai ko e meʻa fakatupú ʻoku taau “ke lau ki ai ʻa e kololia, mo e fakaʻapaʻapa, mo e mafai.”—Fakahā 4:11; Loma 1:25.
“Ko ia naʻa ne langa ʻa e meʻa kotoa pe ko e ʻOtua,” ko e lau ia ʻa e Tohitapú. (Hepelu 3:4) Ko e moʻoni, ko e ʻOtua moʻoni ʻa ia, ‘ko hono huafa ʻoʻoná ko Jihova, ʻa e Fugani Maoluga i mamani kotoabe.’ (Sāme 83:18, PM) Pea ko iá ʻoku ʻikai ko ha foʻi fakakaukau hala—ko ha vai hola. Naʻe pehē ʻe Sīsū Kalaisi ʻo fekauʻaki mo ʻene Tamai fakahēvaní, ʻa Sihova: “ʻOku ʻi ai ha toko taha, ko e moʻoni, naʻa ne fekau mai au.”—Sione 7:28.
Sihova—Ko e Tokotaha-Fakahoko ʻo ʻEne Ngaahi Taumuʻá
Ko e huafa laulōtaha ʻo e ʻOtuá, ʻa e Sihová, ʻoku hā meimei tuʻo 7,000 ia ʻi he Ngaahi Konga Tohitapu Faka-Hepeluú ʻataʻatā pē. Ko e hingoa tonu ko iá ʻoku tuhu ia ki he moʻoniʻi meʻa ko ia ʻo ʻene hoko ko ha tokotaha moʻoní. Ko e huafa ʻo e ʻOtuá ʻoku ʻuhinga fakafoʻileá ko e “ʻOkú Ne Fakatupunga ke Hoko.” ʻOku fakamatalaʻi leva ai ʻe Sihova ko e ʻOtuá ʻa ia tonu ko e Tokotaha-Fakahoko ʻo ʻene ngaahi taumuʻá. ʻI hono ʻeke ʻe Mōsese ki he ʻOtuá ʻa hono huafá, naʻe fakahaaʻi fakaikiiki ʻe Sihova ʻa hono ʻuhingá ʻi he foungá ni: “Te u hoko ki ha meʻa pē ʻoku ou loto ke hoko ki aí.” (Ekisoto 3:14, NW) Ko e liliu ʻa Rotherham ʻoku fakamatalaʻi hangatonu ai: “Te U Hoko ki ha meʻa pē ʻoku ou finangalo ki ai.” ʻOku hoko ʻa Sihova, pe fili ke hoko, ki ha meʻa pē ʻoku fiemaʻu ke ʻai ke hoko ʻo moʻoni ʻa ʻene ngaahi taumuʻa māʻoniʻoní mo ʻene ngaahi talaʻofá. Ko ia ai, ʻokú ne maʻu ha ngaahi hingoa fakalakanga fakaueʻiloto lahi, hangē ko e Tokotaha-Fakatupu, Tamai, ʻEiki Hau, Tauhi-Sipi, Sihova ʻo e ngaahi kau tau, Tokotaha-Fanongo ki he lotú, Fakamaau, Faiako Maʻongoʻonga mo e Tokotaha-Fakatau.—Fakamaau 11:27; Sāme 23:1; 65:2; 73:28; 89:26; Aisea 8:13; 30:20; 40:28; 41:14.
Ko e ʻOtua moʻoní pē ʻe lava ke ʻai totonu ki ai ʻa e huafa Sihová, he ʻe ʻikai ʻaupito lava ke fakapapauʻi ʻe he tangatá ʻe lavameʻa ʻenau ngaahi palaní. (Semisi 4:13, 14) Ko Sihova pē taha ʻoku lava ke ne folofola: “He hange ʻoku hifo ʻa e ʻuha mo e sinou mei langi, ʻo ʻikai te ne foki ki ai, kaeʻoua ke ne fakaviviku ʻa e fonua, ʻo ngaohi ia ke fakatupu meʻa, mo laku muka mai; ʻo ʻoua foki ke ai ha tenga maʻa e tangata tūtūʻi, mo ha meʻakai maʻa e fiekaia; ʻe pehe pe mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.”—Aisea 55:10, 11.
ʻOku fakahoko ʻe Sihova ʻa ʻene taumuʻá ʻaki ʻa e fakapapau pehē he naʻa mo e meʻa ʻoku hā ngali taʻemoʻoni ki he tangatá ʻoku moʻoni ia ʻi heʻene vakaí. ʻI he taimi fuoloa hili ʻa e mate ʻa ʻĒpalahame, ʻAisake mo Sēkopé, naʻe lave ʻa Sīsū kiate kinautolu ʻo ne pehē: “ʻOku ʻikai ko e ʻOtua ia [Sihova] ʻo e mate ka ʻo e moʻui: koeʻuhi ʻi heʻene ʻafio aʻana ʻoku nau māʻuʻui kotoa pe.” (Luke 20:37, 38) Naʻe mate ʻa e kau pēteliake loto-tōnunga ʻe toko tolú, ka ko e taumuʻa ʻa e ʻOtuá ke fokotuʻu hake kinautolú naʻe mātuʻaki pau ke fakahoko he naʻa nau moʻui pē kiate ia. Ko hono toe fakafoki ʻa e moʻuí ki he kau sevāniti loto-tōnunga ko eni ʻo e kuonga muʻá ʻoku ʻikai ke faingataʻa ia kia Sihova ʻo hangē pē ko ʻene fakatupu ʻa e ʻuluaki tangatá mei he efu ʻo e kelekelé.—Senesi 2:7.
ʻOku tokonaki mai ʻe he ʻapositolo ko Paulá ha toe fakatātā ʻo e moʻoniʻi meʻa ko ia ʻo hono fakatupunga ʻe he ʻOtuá ʻa e meʻa ʻokú ne taumuʻa ki ai ke fakahokó. ʻI he ngaahi Konga Tohitapú, ʻoku ui ai ʻa ʻĒpalahame “koe tamai ae gaahi kakai lahi.” (Loma 4:16, 17, PM) Lolotonga ʻa e teʻeki ke fanau ʻa ʻEpalamé, naʻe liliu ʻe Sihova hono hingoá ki he ʻĒpalahamé, ʻa ia ʻoku ʻuhingá ko e “Tamai ʻa ha Fuʻu Kakai (Fuʻu Tokolahi).” Naʻe fakatupunga ʻe Sihova ke hoko ʻa e ʻuhinga ʻo e hingoa ko iá ko ha foʻi moʻoni ʻaki hono toe fakafoki fakaemana mai ʻa e ngaahi mālohi fakafanau ʻo e taʻumotuʻa ko ʻĒpalahamé mo hono uaifi motuʻa ko Selá.—Hepelu 11:11, 12.
ʻI hono foaki ki ai ʻa e mālohi mo e mafai lahí, naʻe lea ai ʻa Sīsū Kalaisi ʻo fekauʻaki mo e ngaahi meʻa moʻoni mei ha vakai māʻolunga mamaʻo ange ʻi he vakai ʻa e tangatá. Neongo ne mate ʻa hono kaumeʻa ofi ko Lāsalosí, naʻe tala ʻe Sīsū ki heʻene kau ākongá: “Ko siʻota[u] kaumeʻa ko Lasalosi kuo mohe; ka ko ʻeku ʻalu ni ke u fafangu ia.” (Sione 11:11) Ko e hā ne lea ai ʻa Sīsū ʻo fekauʻaki mo ha tangata kuo mate ʻo pehē ko ʻene mohe peé?
ʻI he aʻu atu ʻa Sīsū ki he kolo tupuʻanga ʻo Lāsalosi ko Pētaní, naʻá ne ʻalu ai ki he fonualotó ʻo fakahinohino ke toʻo ʻa e fuʻu maka naʻá ne tāpuni ʻa e hūʻangá. Hili haʻane lotu leʻo-lahi, naʻá ne fekau atu: “Lasalosi, tuʻu mai kituʻa.” Pea ʻi he sio fakamamaʻu ʻa e kau mamatá ki he fonualotó, naʻe “hū kituʻa ʻa e pekia, kuo haʻi hono ongo vaʻe mo [hono ongo nima ʻaki ʻa e ngaahi noʻo; pea ko hono fofonga naʻe takai aki ha holoholo.” Naʻe pehē leva ʻe Sīsū: “Vete ia, pea tukuange ke ne ʻalu.” (Sione 11:43, 44) Naʻe fokotuʻu hake ʻe Sīsū ʻa Lāsalosi—ʻo toe fakafoki mai ʻa e moʻuí ki ha tangata ʻa ia naʻe mate ʻo feʻunga mo e ʻaho ʻe fā! Naʻe ʻikai ke talahalaʻi ʻe Kalaisi ʻa e moʻoní ʻi heʻene pehē naʻe mohe ʻa hono kaumeʻá. Mei he vakai ʻa Sihova mo Sīsuú, ko Lāsalosi ne maté ne hangē pē naʻá ne mohé. ʻIo, ko Sīsū mo ʻene Tamai fakahēvaní naʻá na feangai mo e ngaahi meʻa ʻoku moʻoni.
ʻE Lava ke ʻAi ʻe Sihova ʻEtau ʻAmanakí ko e Ngaahi Meʻa Moʻoni
Ko ha faikehekehe ē ʻoku ʻi ai ʻi he vahaʻa ʻo e ngaahi ʻaitoli takihalaʻí pea mo e ʻOtua moʻoní! ʻOku taku halaʻi ʻe he kau lotu ʻaitolí ʻa e ngaahi mālohi mahulu hake ʻi he tangatá ki heʻenau ngaahi meʻa ko ia ʻoku fakalāngilangiʻí. Neongo ia, ʻoku ʻikai ha lahi ʻo e fakalāngilangi ko iá ʻe lava ke ne ʻomai ha ngaahi malava fakaemana ki he ngaahi ʻaitoli ko ení. ʻI he tafaʻaki ʻe tahá, ʻoku lava ke lave tonu ʻa Sihova ko e ʻOtuá ki heʻene kau sevāniti kuo fuoloa ʻenau maté ʻo hangē ʻoku nau kei moʻuí, he ʻokú ne malava ke toe ʻoange kiate kinautolu ʻa e moʻuí. “Ko Sihova ko e ʻOtua moʻoni” ia, pea ʻoku ʻikai ʻaupito te ne kākaaʻi hono kakaí.— Selemaia 10:10.
He fakafiemālie ē ke ʻilo ʻi he taimi kotofa ʻa Sihová, ko e kau mate ʻoku ʻi heʻene manatú ʻe toe fokotuʻu hake—ʻo fakafoki ki he moʻuí! (Ngāue 24:15) ʻIo, ʻoku kau ki he toetuʻú ha toe fakafoki mai ʻa e sīpinga moʻui ʻa e tokotaha tāutaha. Ko hono manatuʻi ʻa e ngaahi sīpinga moʻui ʻa e faʻahinga kuo maté pea mo hono fokotuʻu hake kinautolú ʻoku ʻikai ko ha palopalema ia ki he Tokotaha-Fakatupú, ʻa ia ʻoku taʻehanongataʻanga hono potó mo e mālohí. (Siope 12:13; Aisea 40:26) Koeʻuhi ʻoku lahi ʻa e ʻofa ʻa Sihová, te ne ngāueʻaki ʻa ʻene manatu haohaoá ke toe fakafoki mai ʻa e kau maté ke moʻui ʻi ha māmani palataisi fakataha mo e angaʻitangata naʻa nau maʻu ki muʻa ke nau maté.—1 Sione 4:8.
ʻI he ofi ʻa e ngataʻanga ʻo e māmani ʻo Sētané, ʻoku ngingila moʻoni ai ʻa e kahaʻú ki he faʻahinga ʻoku nau falala ki he ʻOtua moʻoní. (Palovepi 2:21, 22; Taniela 2:44; 1 Sione 5:19) ʻOku fakapapauʻi mai ʻe he tokotaha-tohi-sāmé kiate kitautolu: “ʻIo ʻoku toe siʻi pea mole ʻa ia ʻoku faikovi; . . . ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.” (Sāme 37:10, 11) ʻE hoko ʻa e faihiá mo e fakamālohí ko e meʻa pē ʻo e kuohilí. ʻE ikuna ʻa e fakamaau totonú, pea ʻe mole atu ʻa e ngaahi faingataʻaʻia fakaʻekonōmiká. (Sāme 37:6; 72:12, 13; Aisea 65:21-23) ʻE toʻo ʻa e toetoenga kotoa ʻo e fakafaikehekehe fakasōsialé, fakamatakalí, fakafaʻahingá mo e fakakulupú. (Ngāue 10:34, 35) Ko e ngaahi taú mo e ngaahi meʻataú ʻe ʻikai ke toe ʻi ai. (Sāme 46:9) ʻI he taimi ko iá “ʻoku ʻikai ha nofo ai te ne pehe, ʻOku ou mahaki.” (Aisea 33:24) ʻE maʻu ʻe he tokotaha kotoa ʻa e moʻui haohaoa mo longomoʻui. (Fakahā 21:3, 4) ʻE vave ʻa e hoko ko ha meʻa moʻoni ʻa e palataisi ʻi he māmaní. Kuo ʻosi fakataumuʻa ia ʻe Sihova!
ʻIo, ko e ngaahi ʻamanaki kotoa ʻoku makatuʻunga he Tohitapú kuo vavé ni ke fakahoko. Ko e hā ke tau fakaʻatā ai ke kākaaʻi kitautolu ʻe he meʻa ʻoku ʻotuaʻaki ʻi he māmani ko ení lolotonga ia ʻoku lava ke tau tuku ʻetau tuipau kakató kia Sihova? Ko hono finangaló ia ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Timote 2:3, 4) ʻI he ʻikai ke tuku hotau taimí mo e koloá ki he fakakaukau halá, pe ngaahi vai hola ʻo e fokotuʻutuʻu ʻo e ngaahi meʻa ko ení mo hono ngaahi ʻotuá, ʻai ke tau tupulaki ʻi hono ʻiloʻi ʻa e ʻOtua ʻoku moʻoní pea falala kiate ia ʻaki ʻa e kotoa ʻo hotau lotó.—Palovepi 3:1-6; Sione 17:3.
[Fakatātā ʻi he peesi 6]
Mei he vakai ʻa Sihova mo Sīsuú, naʻe mohe pē ʻa Lāsalosi
[Fakatātā ʻi he peesi 7]
Ko e palataisi ʻi he māmaní kuo vavé ni ke hoko ko ha meʻa moʻoni