ʻE Ngata ʻa e Māmani ko Ení?

Ko e Hā ʻE ʻIkai Ngatá?

FAʻAHINGA ʻO E TANGATÁ

Meʻa ʻoku leaʻaki ʻe he Tohi Tapú: Ko e ʻOtuá “naʻe ʻikai te ne fakatupu [ʻa e māmaní] ke hoko ko e koto taʻeʻaonga, ka naʻá ne faʻu ia ke nofoʻi.”​—ʻAISEA 45:18.

PALANITE KO MĀMANÍ

Meʻa ʻoku leaʻaki ʻe he Tohi Tapú: “ʻOku mole atu ha toʻutangata, pea hoko mai ha toʻutangata, ka ʻoku kei tuʻu ai pē ʻa e foʻi māmaní ʻo taʻengata.”​—TANGATA MALANGA 1:4.

KO HONO ʻUHINGÁ: Fakatatau ki he Tohi Tapú, heʻikai ʻaupito ke fakaʻauha ʻa e foʻi māmaní pea ʻe nofoʻi maʻu pē. Ko ia ko e hā ʻoku ʻuhinga ki ai ʻa e ngata ʻa e māmaní?

FAKAKAUKAU ANGÉ: ʻOku fakahoa ʻe he Tohi Tapú ʻa e hoko mai ʻa e ngataʻanga ʻo e māmani ko ení ki he meʻa naʻe hoko ʻi he ʻaho ʻo Noá. ʻI he taimi ko iá, naʻe “fonu ʻa e māmaní ʻi he fakamālohí.” (Sēnesi 6:13) Kae kehe, naʻe māʻoniʻoni ʻa Noa. Ko ia naʻe fakahaofi ʻe he ʻOtuá ʻa Noa mo hono fāmilí, ka naʻá Ne fakaʻauha ʻa e kakai fulikivanú ʻi ha lōmaki. ʻI he lave ki he meʻa naʻe hoko ʻi he taimi ko iá, ʻoku pehē ʻe he Tohi Tapú: “Naʻe tofanga . . . ʻa e māmani ʻo e taimi ko iá ʻi he fakaʻauha ʻi he taimi naʻe lōmakiʻi ʻaki ai ʻa e vaí.” (2 Pita 3:6) Ko e ngataʻanga ia ʻo e māmani ko iá. Ka ko e hā naʻe fakaʻauhá? Naʻe ʻikai ko e foʻi māmaní, ka ko e kakai fulikivanu ʻi he foʻi māmaní. Ko ia ʻi he lave ʻa e Tohi Tapú ki he ngata ʻa e māmaní, ʻoku ʻikai ʻuhinga ia ki hono fakaʻauha ʻa e foʻi palanité. ʻI hono kehé, ʻoku ʻuhinga ia ki hono fakangata ʻa e kakai fulikivanu ʻi he foʻi māmaní pea mo e fokotuʻutuʻu ko eni kuo nau fakatahatahaʻí.

Ko e Hā ʻE Ngatá?

PALOPALEMÁ MO E FULIKIVANÚ

Meʻa ʻoku leaʻaki ʻe he Tohi Tapú: “ʻOku toe siʻi pē, pea ʻe ʻikai toe ʻi ai ʻa e kau fulikivanú; te ke fakasio ʻa e feituʻu naʻa nau ʻi aí, ka ʻe ʻikai te nau ʻi ai. Ka ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau.”​—SAAME 37:10, 11.

KO HONO ʻUHINGÁ: Ko e Lōmaki ʻi he ʻaho ʻo Noá naʻe ʻikai ke ne tafiʻi tā-tuʻo-taha atu ʻa e fulikivanú. Hili ʻa e Lōmakí, ko e kakai fulikivanú naʻa nau toe ʻai ke faingataʻa ʻa e moʻuí ki he tokotaha kotoa. Neongo ia, ʻoku vavé ni ke fakangata ʻe he ʻOtuá ʻa e fulikivanú. Hangē ko e lea ʻa e tokotaha-tohi-sāmé: “ʻE ʻikai toe ʻi ai ʻa e kau fulikivanú.” ʻE fakangata ʻe he ʻOtuá ʻa e fulikivanú fakafou ʻi hono Puleʻangá​—ko ha founga-pule ʻoku pule mei hēvani ki ha sōsaieti ʻo e faʻahinga māʻoniʻoni ʻo e tangatá.

FAKAKAUKAU ANGÉ: ʻE talitali lelei ʻe he faʻahinga ʻoku lolotonga pule ʻi he māmaní ʻa e pule ʻa e Puleʻanga ʻo e ʻOtuá? ʻOku fakahaaʻi ʻi he Tohi Tapú ʻe ʻikai ke pehē. Ko e meʻa pangó, te nau fakafepakiʻi ʻa e Puleʻanga ʻo e ʻOtuá. (Saame 2:2) Ko e hā hono olá? Ko e Puleʻanga ʻo e ʻOtuá te ne fetongi ʻa e ngaahi puleʻanga fakaetangatá kotoa, pea “ʻe tuʻu toko taha pē ia ʻo taʻengata.” (Taniela 2:44) Ka ko e hā ʻoku fiemaʻu ai ke fakangata ʻa e founga-pule ʻa e tangatá?

FIEMAʻU​—Fakangata ʻa e Founga-Pule ʻa e Tangatá

Meʻa ʻoku leaʻaki ʻe he Tohi Tapú: “ʻOku ʻikai ʻi he tangata ʻoku ʻaʻevá ke ne tataki ʻa ʻene laká.”​—SELEMAIA 10:23.

KO HONO ʻUHINGÁ: Naʻe ʻikai ke fakatupu ʻa e tangatá ke nau pule pē kiate kinautolu. ʻOku ʻikai ke nau lava ʻo puleʻi ʻa e kakaí mo fakaleleiʻi ʻenau palopalemá.

FAKAKAUKAU ANGÉ: ʻOku pehē ʻi he Britannica Academic ko e ngaahi puleʻanga tāutahá ʻoku ʻikai malava ke nau “fakaleleiʻi ʻa e fili fakamāmanilahi hangē ko e masiva, fiekaia, mahaki, fakatamaki fakanatula mo e tau pe ko ha fakamālohi kehe.” ʻOku hoko atu ʻo pehē: “Ko e niʻihi . . . ʻoku nau tui ko ha founga-pule pē ʻi he māmaní ʻe lava ke ne ʻomi ha fakaleleiʻanga tuʻuloa ki he ngaahi palopalema ko iá.” Kae kehe, neongo kapau ʻe fakatahataha kotoa ʻa e ngaahi puleʻanga fakaetangatá, ko e māmaní ʻe kei puleʻi pē ia ʻe he faʻahinga taʻehaohaoa ʻo e tangatá ʻa ia ʻoku ʻikai malava ke nau fakaleleiʻi ʻa e ngaahi faingataʻa naʻe lave ki ai ʻi ʻolungá. Ko e Puleʻanga ʻo e ʻOtuá ʻa e founga-pule pē taha ʻokú ne maʻu ʻa e mālohi ke fakaleleiʻi tuʻuloa ʻa e ngaahi palopalema kotoa ʻi he māmaní.

Ko ia ai, fakatatau ki he Tohi Tapú, ko e ngataʻanga ʻo e māmaní​—ʻa e fokotuʻutuʻu fulikivanu lolotongá​—ʻoku ʻikai ko ha meʻa ia ʻoku totonu ke ilifia ki ai ʻa e kakai leleí. ʻI hono kehé, ko ha meʻa ia ke fakatuʻotuʻa atu ki ai koeʻuhi ko e māmani motuʻa maumau ko ení ʻe fetongiʻaki ʻa e māmani foʻou fisifisimuʻa ʻa e ʻOtuá!

ʻE hoko fakakū ʻa e ngaahi meʻá ni kotoa? ʻI he kupu hono hokó ʻe lāulea ai ki he tali ʻa e Tohi Tapú.