ʻE Hoko Fakakū ʻa e Ngataʻangá? Lea ʻa Sīsū

VAKAI KI HE LEA ʻE UA ʻA SĪSŪ FEKAUʻAKI MO E NGATAʻANGÁ:

“Ko ia ai, mou hanganaki leʻo, koeʻuhi ʻoku ʻikai te mou ʻiloʻi ʻa e ʻahó pe ko e houá.”​—MĀTIU 25:13.

“Hanganaki fakasio, hanganaki ʻā, he ʻoku ʻikai te mou ʻilo pe ko fē ʻa e taimi kuo kotofá.”​—MAʻAKE 13:33.

Ko ia ʻoku ʻikai ke ʻiloʻi ʻe ha tokotaha he māmaní ʻa e taimi tofu pē ʻe ngata ai ʻa e fokotuʻutuʻu ko ení. Kae kehe, kuo fokotuʻu ʻe he ʻOtuá ʻa e “taimi kuo kotofá”​—ʻa e “ʻaho mo e houa” pau​—ʻe hoko mai ai ʻa e ngataʻangá. (Mātiu 24:36) ʻOku ʻuhinga ení ʻoku ʻikai ʻaupito pē ke ʻi ai ha founga ke ʻiloʻi ai ʻa e ofi mai ʻa e ngataʻangá? ʻIkai ʻaupito. Naʻe tala ʻe Sīsū ki heʻene kau ākongá ke nau vakai ki he ngaahi meʻa ʻe hoko ʻe fakahaaʻi ai ʻoku ofi ʻa e ngataʻangá.

FAKAʻILONGA

Ko e ngaahi meʻa ko ení ʻe hoko ko e fakaʻilonga ia ʻo e “fakaʻosiʻosi ʻo e fokotuʻutuʻu lolotongá.” Naʻe pehē ʻe Sīsū: “ʻE tuʻu ʻa e fonua ki he fonua mo e puleʻanga ki he puleʻanga, pea ʻe ʻi ai ʻa e ngaahi nounou fakameʻatokoni mo e ngaahi mofuike ʻi he feituʻu ki he feituʻu.” (Mātiu 24:3, 7) Naʻá ne toe pehē ʻe ʻi ai ʻa e “ngaahi mahaki fakaʻauha”​—ngaahi mahaki ʻe mafolalahia. (Luke 21:11) ʻOkú ke sio ki hono fakahoko ʻa e ngaahi meʻa naʻe kikiteʻi ʻe Sīsuú?

Ko e ngaahi tau fakatupu maumau, honge mo e mofuike pehē foki ki he ngaahi mahaki mafola vave kuó ne fakaʻauha ʻa e māmaní ʻi hotau taimí. Ko e fakatātaá, ʻi he 2004, ko ha mofuike lahi ʻi he ʻŌseni ʻInitiá naʻá ne fakatupunga ha peau kula naʻe mate ai ʻa e toko 225,000. ‘I he taʻu ʻe tolu, ko e mahaki fakaʻauha COVID-19 naʻe mate ai ʻa e kakai ʻe toko 6.9 miliona ʻi māmani lahi. Naʻe pehē ʻe Sīsū ko e hoko ʻa e ngaahi meʻa hangē ko ení ʻe fakahaaʻi ai ʻoku ofi ʻa e ngataʻanga ʻo e fokotuʻutuʻu ko ení.

“NGAAHI ʻAHO FAKAʻOSÍ”

ʻOku fakamatalaʻi ʻe he Tohi Tapú ʻa e vahaʻa taimi ki muʻa pē ʻi he ngataʻangá ko e “ngaahi ʻaho fakaʻosí.” (2 Pita 3:3, 4) ʻOku pehē ʻi he 2 Tīmote 3:1-5, ko e ngaahi ʻaho fakaʻosí ʻe fakaʻilongaʻiʻaki ʻa e mātuʻaki tōlalo fakaeʻulungaanga. (Sio ki he puha “Ki Muʻa Pē ke Ngata ʻa e Māmaní.”) ʻOkú ke vakai ki he kakaí ʻi he ʻahó ni ʻoku nau tōʻonga siokita, mānumanu, anga-kakaha mo taʻeʻofa? Ko e toe fakamoʻoni eni ʻoku tau moʻui ʻo ofi ʻaupito ki he ngataʻanga ʻo e māmaní.

Ko e hā hono fuoloa ʻo e ngaahi ʻaho fakaʻosí? Fakatatau ki he Tohi Tapú, “ʻoku toe siʻi pē [ʻa e] taimí.” Pea ʻe fakaʻauha leva ʻe he ʻOtuá “ʻa e faʻahinga ʻoku nau fakaʻauha ʻa e māmaní.”​—Fakahā 11:15-18; 12:12.

ʻOKU OFI ʻA E MĀMANI PALATAISÍ!

Kuo ʻosi kotofa ʻe he ʻOtuá ʻa e ʻaho mo e houa te ne fakangata ai ʻa e fokotuʻutuʻu fulikivanu lolotonga ko ení. (Mātiu 24:36) Neongo ia, ʻoku toe ʻi ai mo ha ongoongo lelei​—ko e ʻOtuá “ʻoku ʻikai te ne finangalo ke fakaʻauha ha taha.” (2 Pita 3:9) ʻOkú ne ʻoange ʻa e faingamālie ki he faʻahinga ʻo e tangatá ke nau muimui ki heʻene ngaahi tuʻungá. Ko e hā hono ʻuhingá? Koeʻuhí ʻokú ne loto ke tau hao ʻi he ngataʻanga ʻo e māmani ko ení pea moʻui ʻi heʻene māmani foʻoú, ʻi he hoko ʻa e māmaní ko ha palataisi.

Kuo fokotuʻutuʻu ʻe he ʻOtuá ha polokalama ako fakamāmanilahi ke tokoniʻi ʻa e kakaí ke nau ako ki he founga ke nau moʻui ai ʻi he māmani foʻou ʻi he malumalu hono Puleʻangá. Naʻe pehē ʻe Sīsū ko e ongoongo lelei fekauʻaki mo e Puleʻanga ʻo e ʻOtuá ʻe malangaʻi “ʻi he kotoa ʻo e māmani kuo nofoʻí.” (Mātiu 24:14) ʻI māmani lahi, ʻoku fakamoleki ʻe he Kau Fakamoʻoni ʻa Sihová ʻa e houa ʻe laui piliona ʻi he malanga mo akoʻi ʻa e kakaí fekauʻaki mo e pōpoaki ʻo e ʻamanaki ʻi he Tohi Tapú. Naʻe pehē ʻe Sīsū ko e feingangāue fakamalanga ko ení ʻe fakahoko ia ʻi he kotoa ʻo e māmaní ki muʻa ke hoko mai ʻa e ngataʻangá.

Kuo mei ngata ʻa e pule ʻa e tangatá. Ka ko e ongoongo leleí ʻe lava ke ke hao ʻi he ngataʻanga ʻo e māmaní pea moʻui ʻi he māmani Palataisi kuo talaʻofa ʻe he ʻOtuá. ʻE lāulea ʻa e kupu hokó ki he founga ʻe lava ke ke moʻui ai ʻi he māmani foʻou ko iá.