Hanganaki “Fua Lahi”
1 ʻI hono ngāueʻaki ʻa e ngaahi lea fakaefakatātaá, naʻe fakatatau ai ʻe Sīsū ʻa ia tonu ki ha fuʻu vaine moʻonia, ko ʻene Tamaí ko e Tauhi-Ngoué ia, pea ko hono kau muimui pani ʻe he laumālié ko e ngaahi vaʻa fua ia ʻo e fuʻu vainé. ʻI hono fakamatalaʻi ʻa e ngāue ʻa e Tauhi-Ngoue fakaefakatātaá, naʻe fakamamafaʻi ai ʻe Sīsū ʻa e mahuʻinga ʻo e pipiki maʻu pē ki he fuʻu vainé. (Sione 15:1-4) Ko e lēsoní leva, ko e tokotaha kotoa pē ʻokú ne maʻu ha vahaʻangatae fakafoʻituitui vāofi mo Sihova, kuo pau ke ne hangē ko e vaʻa fua ʻo e fuʻu “vaine moʻonia,” ʻa ia ko Sīsū Kalaisi. Kuo pau ke tau hanganaki fua lahi maʻu pē fakatouʻosi ʻi he “fua ʻo e Laumalie” mo e fua ʻi he ngāue ʻo e Puleʻangá.—Kal. 5:22, 23; Mt. 24:14; 28:19, 20.
2 Fua ʻo e Laumālié: Ko ʻetau laka ki muʻa fakalaumālié ʻoku fakatuʻunga tefito ia ʻi he lahi ʻo ʻetau fakahāhā ʻa e fua ʻo e laumālié. ʻOkú ke ngāue ke fakatupulekina ʻa e fua ʻo e laumālie ʻo e ʻOtuá ʻaki ʻa e ako maʻu pē mo fakalaulauloto ki heʻene Folofolá? (Fili. 1:9-11) ʻOua ʻe toumoua ke lotu ʻo kole ʻa e laumālie māʻoniʻoní, ʻa ia te ne fakatupulekina ʻa e ngaahi ʻulungāanga ʻoku fakalāngilangiʻi ai ʻa Sihová pea ʻe lava ke tokoniʻi ai koe ke ke laka ki muʻa fakalaumālie ai pē.—Luke 11:13; Sione 13:35.
3 Ko hono fakatupulekina ʻa e fua ʻo e laumālié ʻe toe tokoniʻi ai kitautolu ke tau hoko ko e kau faifekau faivelenga ange. Ko e fakatātaá, ʻoku ueʻi kitautolu ʻe he ʻofá mo e tuí ke tau vaheʻi ha taimi mei heʻetau taimi-tēpile moʻumoʻuá ke kau maʻu pē ki he ngāue fakafaifekaú. Ko e ngaahi ʻulungāanga hangē ko e melino, kātaki-fuoloa, anga-lelei, anga-malū, mo e mapuleʻi-kitá ʻe tokoniʻi ai kitautolu ke fakafeangai totonu ki he kau fakafepakí. ʻOku fakamafeia kitautolu ʻe he fiefiá ke tau maʻu ʻa e fiemālie ʻi he ngāue fakafaifekaú naʻa mo e taimi ʻoku taʻefiefanongo mai ai ʻa e kakaí.
4 Fua ʻi he Ngāue ʻo e Puleʻangá: ʻOku tau toe loto ke fakatupulekina ʻa e fua ʻi he ngāue ʻo e Puleʻangá. ʻOku kau ki ai ʻa hono ʻoatu “ha feilaulau fakafetaʻi . . . ʻa é ko e fua ʻo e loungutu ʻoku takua [ʻa e huafa ʻo Sihová].” (Hep. 13:15) ʻOku tau fai ʻeni ʻaki hono talaki faivelenga mo tuʻumaʻu ʻa e ongoongo leleí. ʻOkú ke feinga ke fakatupulekina ha fua lahi ange ʻi he ngāue ʻo e Puleʻangá ʻaki hono fakaleleiʻi hoʻo ngāue fakafaifekau fakafoʻituituí?
5 Naʻe fakahaaʻi ʻe Sīsū ko hono kau muimui faitōnungá te nau fakatupulekina ʻa e fua lahi kehekehe. (Mt. 13:23) Ko ia ai, ʻoku totonu ke ʻoua te tau fakahoa kitautolu ki he niʻihi kehé kae ʻave kia Sihova ʻetau lelei tahá. (Kal. 6:4) Ko hono sivisiviʻi faitotonu ʻa hotau ngaahi tuʻunga fakafoʻituituí ʻaki hono ngāueʻaki ʻa e Folofola ʻa e ʻOtuá ʻe tokoniʻi ai kitautolu ke tau fakalāngilangiʻi hokohoko ʻa Sihova ʻaki ʻa e “fua lahi.”—Sione 15:8.