ʻOku Tui Nai ʻa e Kau Fakamoʻoni ʻa Sihová kia Sīsū?

MĀTUʻAKI MAHUʻINGA ʻA E TUI KIA SĪSUÚ

ʻAnitoni: Mālō ʻetau lava Timi. ʻOku ou fiefia ʻi heʻeta toe fetaulakí.

Timi: Ko ia ʻoku ou fiefia ʻi hoʻo toe haʻú.

ʻAnitoni: Ko e tatau fakamuimui taha eni ʻo e Taua Leʻo mo e Awake! ʻOku ou tui pē te ke saiʻia ʻaupito he ngaahi kupu ʻi he makasiní.

Timi: Mālō ʻaupito. Ko hono moʻoní, ʻoku ou fiefia ʻi hoʻo haʻu he ʻaho ní koeʻuhí ʻoku ʻi ai ha meʻa ʻoku ou loto ke ʻeke atu kiate koe.

ʻAnitoni: ʻIo, ko e hā nai ia?

Timi: ʻI he ʻaho atú, naʻá ku talanoa ai mo ha kaungāngāue. Naʻá ku talanoa ange kiate ia fekauʻaki mo e ʻū tohi naʻá ke ʻomaí pea mo e tōtōatu ʻa e ngaahi fakamatala aí. Ka naʻá ne tala mai naʻe totonu ke ʻoua te u lau ia koeʻuhí ʻoku ʻikai ke tui ʻa e Kau Fakamoʻoni ʻa Sihová kia Sīsū. Ko e moʻoni ia? Naʻá ku tala ange ki hoku kaungāngāué te u ʻeke atu ia ʻi he taimi te ke toe ʻaʻahi mai aí.

ʻAnitoni: Sai, ʻoku ou fiefia ʻi hoʻo ʻeke mai iá. Ko e meʻa lelei hoʻo ʻeke hangatonu mai ia kiate kimautolú. ʻIkai ko e founga lelei ia ke ʻiloʻi ʻa e meʻa ʻoku tui ki ai ha taha ka ko hono ʻeke kiate ia tonu?

Timi: Ko e meʻa ia naʻá ku fakakaukau ki aí.

ʻAnitoni: Ko hono moʻoní, ʻoku tui moʻoni ʻa e Kau Fakamoʻoni ʻa Sihová kia Sīsū. ʻI he taimi tatau, ʻoku mau ʻiloʻi ko hono ngāueʻi ʻa e tui kia Sīsuú ʻoku mātuʻaki mahuʻinga ia ki he fakamoʻuí.

Timi: Naʻá ku fakakaukau pehē, ka ʻi he taimi naʻe tala mai ai ʻe hoku kaungāngāué ʻoku ʻikai ke mou tui kia Sīsuú, naʻá ne ʻai au ke u fifili. ʻOku ou tui naʻe teʻeki ai ke ta lāulea ki he meʻá ni ki muʻa.

ʻAnitoni: ʻE sai pē ke u fakahaaʻi atu kiate koe ha ngaahi veesi ʻi he Tohi Tapú ʻa ia ʻoku fakamamafaʻi ai ʻa e mahuʻinga ʻo hono ngāueʻi ʻa e tui kia Sīsuú? Ko e ngaahi veesi eni ʻoku faʻa ngāueʻaki ʻe he Kau Fakamoʻoni ʻa Sihová ʻi heʻenau ngāue fakafaifekaú.

Timi: Sai ia.

ʻAnitoni: Te ta kamata pē ʻi he ngaahi lea tonu ʻa Sīsū ʻoku lēkooti ʻi he Sione 14:6. Ko e ngaahi lea ko ení ko e konga ia ʻo ha fetalanoaʻaki naʻe fai ʻe Sīsū mo e taha ʻo ʻene kau ʻapositoló. Ta lau leva: “Naʻe pehē ange ʻe Sīsū kiate ia: ‘Ko au ʻa e halá pea mo e moʻoní pea mo e moʻuí. ʻOku ʻikai haʻu ha taha ki he Tamaí ka ʻi heʻene fou pē ʻiate au.’” Fakatatau ki he veesi ko ení, ko e hā ʻa e founga pē taha ke fakaofiofi ai ki he Tamaí?

Timi: Fakafou ʻia Sīsū.

ʻAnitoni: Lelei. Pea ʻoku tui papau ki ai ʻa e Kau Fakamoʻoni ʻa Sihová. Ke u kiʻi ʻeke atu eni: ʻI hoʻo ʻilo ko ia ʻa e ngaahi fiemaʻu pau ʻa e ʻOtuá ʻi he taimi ʻoku lotu ai ha taha, ko e hingoa ʻo hai ʻoku totonu ke fakafou ai ʻene lotú?

Timi: Ko e hingoa ʻo Sīsuú.

ʻAnitoni: Ko ia. Pea ko e ʻuhinga ia ʻoku fakafou ai ʻeku lotu kotoa pē ʻi he hingoa ʻo Sīsuú. ʻOku tatau pē mo e ngaahi lotu ʻoku fai ʻe he kotoa ʻo e Kau Fakamoʻoni ʻa Sihová.

Timi: ʻOku sai ke ʻiloʻi ia.

ʻAnitoni: Ko e toe konga Tohi Tapu ʻe taha ʻe lava ke ta lāulea ki aí ko e Sione 3:16. ʻOku mahuʻinga ʻaupito ʻa e veesi ko ení he kuo ui ia ko e Kōsipeli siʻisiʻi. Ko hono ʻuhingá kapau te ke ʻai kotoa ʻa e ngaahi meʻa naʻe tohi fekauʻaki pea mo e moʻui ʻa Sīsū ʻi māmaní mo ʻene ngāue fakafaifekaú ʻo fakatahaʻi ia ki he foʻi veesi ʻe taha, ko e veesi ia ko ení. Mahalo pē te ke saiʻia ke lau ʻa e konga Tohi Tapu ko ení.

Timi: ʻIo. ʻOku pehē: “He naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”

ʻAnitoni: Mālō. ʻOkú ke alāanga mo e veesi ko ení?

Timi: ʻIo, kuó u fanongo lahi ai, pea ʻoku ou faʻa sio ʻi hono tohi he ngaahi papa tuʻuakí.

ʻAnitoni: Ko e veesi ʻiloa eni. Kiʻi sio fakalelei angé pea fakatokangaʻi ʻa e meʻa naʻe leaʻaki ʻe Sīsuú. Naʻá ne pehē ko e ʻofa ʻa e ʻOtuá ʻokú ne ʻai ai ke malava ʻa e faʻahinga ʻo e tangatá ke nau fiefia ʻi hono maʻu ʻa e moʻui taʻengatá​—kapau pē te tau fai ʻa e hā?

Timi: Ngāueʻi ʻa e tuí.

ʻAnitoni: ʻIo. Tautefito ʻa e tui ki he ʻAlo tofu pē tahá, ʻa Sīsū Kalaisi. Pea ʻi he meʻá ni, ko e tui kia Sīsuú ʻoku fakaava ai ʻa e hala ki he moʻui taʻengatá​—ʻa ia ʻoku fakahaaʻi tonu ʻi he peesi 2 ʻo e makasini naʻá ku ʻoatú. ʻI he fekauʻaki mo e taumuʻa ʻo e Taua Leʻo, ko e taha ʻo e ngaahi meʻa ʻoku leaʻaki ʻi he makasini ko ení, “ʻoku pouaki ai ʻa e tui kia Sīsū Kalaisí, ʻa ia naʻá ne pekia koeʻuhí ka tau lava ai ʻo maʻu ʻa e moʻui taʻengatá pea ʻokú ne pule he taimí ni ko e Tuʻi ʻo e Puleʻanga ʻo e ʻOtuá.”

Timi: ʻIo, tā ko ia. He ʻoku fakamoʻoniʻi tonu pē ʻi hoʻomou makasiní ko e Kau Fakamoʻoni ʻa Sihová ʻoku nau tui kia Sīsū.

ʻAnitoni: Ko ia.

Timi: Ka ko e hā leva ʻa e ʻuhinga ʻoku pehē ai ʻe he kakaí ʻoku ʻikai ke mou tui kia Sīsuú?

ʻAnitoni: Ngalingali ʻoku lahi pē ʻenau ngaahi ʻuhinga ki ai. ʻI he ngaahi tuʻunga ʻe niʻihi, ʻoku nau fakakaukau pehē koeʻuhí ko ʻenau fanongo mei hono leaʻaki ia ʻe he niʻihi kehé. Pe ko hono akoʻi nai kinautolu ʻe heʻenau faifekaú ʻaki ʻa e ngaahi fakakaukau hala ko ení.

Timi: ʻOku ou fakakaukau au—mahalo ʻoku pehē ʻe he kakai ʻe niʻihi ʻoku ʻikai ke mou tui kia Sīsuú koeʻuhí ko hono ui kimoutolu ko e Kau Fakamoʻoni ʻa Sihova kae ʻikai ko e Kau Fakamoʻoni ʻa Sīsū.

ʻAnitoni: Ko e toe ʻuhinga mo ia ʻe taha.

Timi: Ko e hā e ʻuhinga ʻoku lahi ange ai hoʻomou talanoa fekauʻaki mo Sihová?

“KUÓ U FAKAEʻA HO HUAFÁ”

ʻAnitoni: Ko e taha, ʻoku mau tui ʻoku mahuʻinga ke ngāueʻaki ʻa e huafa fakafoʻituitui ʻo e ʻOtuá, ʻa Sihova—ʻo hangē pē ko ia naʻe fai ʻe hono ʻAló ʻa Sīsū. Fakakaukau ki he meʻa naʻe leaʻaki ʻe Sīsū ʻi heʻene lotu ki heʻene Tamaí. ʻOku lēkooti ia ʻi he Sione 17:26. Kātaki te ke fie lau mai ʻa e veesi ko iá?

Timi: ʻIo. “Kuó u ʻai ke nau ʻilo ho huafá pea te u ʻai ia ke ʻiloa, koeʻuhi ke ʻiate kinautolu ʻa e ʻofa naʻá ke ʻofa ʻaki kiate aú pea ʻoku ou fāʻūtaha mo kinautolu.”

ʻAnitoni: Mālō ʻaupito. Fakatokangaʻi naʻe pehē ʻe Sīsū kuó ne ʻai ʻa e huafa ʻo e ʻOtuá ke ʻiloa. ʻOkú ke pehē ko e hā naʻá ne fai ai iá?

Timi: ʻIkai tama ke u fakapapauʻi.

ʻAnitoni: Mahalo ʻoku sai ke ta toe sio ki ha potu folofola ʻe taha ke ne fakamaama ʻa e meʻá ni. ʻOku ou fakakaukau ki he tohi ʻa Ngāue 2:21. ʻOku pehē ai: “Ko e tokotaha kotoa pē ʻoku ui ki he huafa ʻo Sihová ʻe fakahaofi.” ʻOku ou tui te ke loto-tatau mo au ko e ui ki he huafa ʻo Sihová ko ha fiemaʻu pau ia kae maʻu ʻa e fakamoʻuí, pea naʻe ʻikai ha veiveiua ʻa Sīsū fekauʻaki mo e fiemaʻu pau ko ení.

Timi: ʻIo ʻoku moʻoni ia.

ʻAnitoni: Ko ia ko e ʻuhinga ia ʻe taha naʻe mahuʻinga ai kia Sīsū ke ʻiloʻi mo ngāueʻaki ʻe hono kau muimuí ʻa e huafa ʻo e ʻOtuá kae maʻu ai ʻa e fakamoʻuí. Pea ko e taha ia ʻo e ʻuhinga tefito ʻoku mau faʻa talanoa ai fekauʻaki mo Sihová. ʻOku mau tui ʻoku mahuʻinga ke ʻai ke ʻiloa ʻa e huafa fakafoʻituitui ʻo e ʻOtuá pea tokoniʻi ʻa e niʻihi kehé ke nau ui ki he huafa ko iá.

Timi: Ka neongo ʻoku ʻikai ke ʻiloʻi ʻe he kakaí ʻa e huafa ʻo e ʻOtuá pe ngāueʻaki ia, ʻoku nau kei ʻiloʻi pē ʻa e tokotaha ʻoku nau talanoa ki aí ʻi he taimi ʻoku nau talanoa ai ʻo felāveʻi mo e ʻOtuá.

ʻAnitoni: ʻE moʻoni nai eni. Neongo ia, ʻoku ʻai ʻe he ʻOtuá ke faingofua ange ʻetau ʻunuʻunu ofi kiate iá ʻaki ʻene fakahaaʻi mai kiate kitautolu hono huafa fakafoʻituituí.

Timi: Ko e hā hoʻo ʻuhingá?

ʻAnitoni: Fakakaukau ki heni: Naʻe ʻikai fiemaʻu ke tau ʻiloʻi ʻa e hingoa fakafoʻituitui ʻo Mōsesé. Naʻe mei lava ke tau ʻiloʻi pē ia ko e tangata naʻá ne taaʻi ʻa e Tahi Kulokulá pe ko e tangata ia naʻá ne maʻu ʻa e Fekau ʻe Hongofulú. Hangē ko Noá—ko e hā ke ʻiloʻi ai hono hingoá? ʻE lava ke lave pē ki ai ko e tangata ia naʻá ne foʻu ʻa e ʻaʻaké pea fakahaofi hono fāmilí mo e fanga manú. ʻI he tuʻunga ko iá, naʻa mo Sīsū Kalaisi ʻoku lava ke ʻiloʻi ia ko ha tangata pē naʻe haʻu mei hēvani pea pekia koeʻuhí ko ʻetau ngaahi angahalá. ʻIkai ko iá?

Timi: ʻOku ou tui ko ia.

ʻAnitoni: Ka ʻoku fiemaʻu mai ʻe he ʻOtuá ke tau ʻiloʻi ʻa e hingoa fakafoʻituitui ʻo e faʻahinga tāutaha ko iá. Ko hono ʻiloʻi honau hingoa fakafoʻituituí ʻoku toe hoko ʻo moʻoni ange ʻa e ngaahi fakamatalá kia kitautolu. Neongo kuo teʻeki ai ʻaupito ke tau fetaulaki mo Mōsese, Noa pe ko Sīsū, ka ko hono ʻiloʻi pē honau hingoá ʻoku hoko ai ʻa e kau tangata ko ení ʻo moʻoni ange kiate kitautolu.

Timi: Naʻe ʻikai ke u fakakaukau ki he meʻa ko ení ki muʻa, ka ʻoku ʻuhinga lelei!

ʻAnitoni: Pea ko e toe ʻuhinga ia ʻe taha ʻoku ngāuelahiʻaki ai ʻe he Kau Fakamoʻoni ʻa Sihová ʻa e huafa fakafoʻituitui ʻo e ʻOtuá. ʻOku mau loto ke tokoniʻi ʻa e kakaí ke langa hake ʻenau tui kia Sihova ko e ʻOtuá ʻa ia ko e Tokotaha moʻoni ia ʻoku lava ke nau ʻunuʻunu ofi kiate ia. ʻI he taimi tatau, ʻoku mau faʻa fakamamafaʻi ʻa e ngafa ʻo Sīsuú ke maʻu ai hotau fakamoʻuí. Mahalo ʻe lava ke ta lau ha potu folofola ʻe taha ke toe mahino ange ʻa e poini ko ení.

Timi: Sai ia.

ʻAnitoni: Ki muʻá, naʻá ta lau ai ʻa e Sione 14:6. Manatuʻi naʻe pehē ʻe Sīsū ko ia pē “ʻa e halá pea mo e moʻoní pea mo e moʻuí.” Ta toe foki angé ki he ngaahi lea ʻoku hā ʻi he Sione 14:1. Kātaki te ke lau mai ʻa e meʻa naʻe leaʻaki ʻe Sīsū ʻi he konga ki mui ʻo e veesi ko iá?

Timi: ʻIo. ʻOku pehē ai: “Ngāueʻi ʻa e tui ki he ʻOtuá, ngāueʻi foki ʻa e tui kiate aú.”

ʻAnitoni: Mālō. Te ke pehē leva, ko e tui moʻoní te ke fakahāhā ia ki ha taha pē ʻiate kinaua, kia Sīsū pe ko Sihova?

Timi: ʻIkai. Naʻe pehē ʻe Sīsū ʻoku tau fiemaʻu fakatouʻosi kinaua.

ʻAnitoni: Moʻoni. Pea ʻoku ou tui te ke loto-tatau mo ia ʻoku ʻikai feʻunga pē ke leaʻaki ʻoku tau tui ki he ʻOtuá pea mo Sīsū. Ko hono moʻoní, ʻoku fiemaʻu ke tau moʻui ʻi ha founga ʻoku fakamoʻoniʻi ai ʻa e meʻa ʻoku tau taukaveʻí.

Timi: Ko e moʻoni ia.

ʻAnitoni: Ka ʻoku anga-fēfē ke fakahāhaaʻi ʻe ha taha ʻokú ne maʻu ʻa e tui moʻoni ki he ʻOtuá mo Sīsū? Te u saiʻia ke ta toki talanoa ki he fehuʻi ko iá ʻi he ʻaʻahi hokó.a

Timi: Te u saiʻia ai.