ʻOkú Ke Maʻu ‘ha Tolounua ʻi he Kakanó’?

¹ ʻOku tau holi vēkeveke ke fakahoko hotau fatongia ke malangaʻi ʻa e ongoongo leleí ki he lelei taha ʻo ʻetau malavá. Kae kehe, ko e tokolahi ʻo siʻotau ngaahi tokoua mo e tuofāfiné, ʻoku nau ʻilo ʻoku faingataʻa ke kau kakato koeʻuhí ko ha ngaahi alangamahaki fakaesino mafatukitukí pe ngaahi taʻemalavá, ʻoku nau ʻai ke faingataʻa ke fai ʻa e meʻa lahi ange ʻo hangē ko ia ʻoku nau saiʻia ke faí. Kiate kinautolú, ko ha pole nai ia ke hoko ʻo fekuki mo e ngaahi ongoʻi ʻo e loto-siʻí, tautefito ki he taimi ʻoku nau sio ai ki he niʻihi kehe takatakai ʻiate kinautolú ʻoku ngāue lahi ʻi he ngāue fakafaifekaú.​—1 Kol. 9:16.

² Ko ha Faʻifaʻitakiʻanga ke Faʻifaʻitaki ki Ai: Naʻe pau ke fekuki ʻa e ʻapositolo ko Paulá mo ‘ha foto [“tolounua,” NW] ʻi hono kakanó.’ Naʻá ne kōlenga tuʻo tolu kia Sihova ke toʻo atu ʻa e fakafaingataʻaʻiaʻanga fakamamahí, ʻa ia naʻá ne fakamatalaʻi “ko e angelo ʻa Setane” ʻokú ne toutou sipiʻi ia. Ka neongo iá, naʻe kātaki pē ʻa Paula pea tutui atu ʻi heʻene ngāue fakafaifekaú. Naʻe ʻikai te ne fakaʻofaʻia ʻiate ia pe hoko ko ha tokotaha lāunga tuʻumaʻu. Naʻá ne ʻoatu ʻa ʻene lelei tahá. Ko e fakapulipuli ki heʻene lavameʻa ʻi he fekukí ko e fakapapau ko ʻeni mei he ʻOtuá: ‘ʻOku fuʻu lahi ʻeku kelesí ki hoʻo meʻá; he ʻoku toki ha hoku iví kotoa he tuʻu ʻi he vaivaí.’ Ko e vaivai ʻa Paulá naʻe hoko ko ha fakaivimālohi ʻi he taimi naʻá ne ako ai ke tali ʻa hono tuʻungá pea ke falala kia Sihova mo e laumālie māʻoniʻoní ke ne malava ke kātaki.​—2 Kol. 12:​7-10.

³ Founga ʻe Lava ke Ke Kātaki Aí: ʻOku ʻai ʻe he ngāvaivai fakaetangatá ha ngaahi fakangatangata ki hoʻo ngāue ki he ʻOtuá? Kapau ko ia, faʻifaʻitaki ki he fakakaukau ʻa Paulá. Kapau ko ho mahakí pe taʻemalavá ʻoku ʻikai hano faitoʻo tuʻuloa ʻi he fokotuʻutuʻu ʻo e ngaahi meʻa ʻoku tuʻu ní, ʻe lava ke ke tuku hoʻo falala kakató kia Sihova, ʻa ia ʻokú ne mahinoʻi hoʻo ngaahi fiemaʻú pea te ne tokonaki “ʻa e makehe atu ʻo e mafai.” (2 Kol. 4:7) Ngāueleleiʻaki ʻa e tokoni ʻoku ala maʻu kiate koe ʻi he fakatahaʻangá, ʻo ʻoua ʻe fakamavaheʻi koe. (Pal. 18:1) Kapau ʻokú ke ʻilo ʻoku faingataʻa ke ke kau ki he ngāue matapā-ki-he-matapaá, kumi ki ha ngaahi founga ʻaonga ke fai ai ha fakamoʻoni ʻikai ʻi he founga anga-mahení, pe faifakamoʻoni he telefoní.

⁴ Neongo ko ha tolounua ʻi he kakanó ʻokú ne fakangatangata ʻa e meʻa ʻoku malava ke ke fai ʻi he ngāue fakafaifekaú, ʻoku fiemaʻu ke ʻoua te ke ongoʻi ʻoku ʻikai te ke kau ki ai. Hangē ko Paulá, ʻe lava mo koe foki “ke talatalatonu ʻa e Kosipeli ʻo e kelesi ʻa e ʻOtua,” ʻo fai ʻa e meʻa ʻoku fakaʻatā ʻe ho mālohí mo ho ngaahi tuʻungá. (Ng. 20:24) ʻI hoʻo fai ʻa e feinga ke fakahoko hoʻo ngāue fakafaifekaú, ʻiloʻi ʻoku fakahōifua ia kia Sihova.​—Hep. 6:10.