ʻOku Tau Fiefia ke Tōtōivi ʻi he Ngāue ʻa Sihová!
1 Naʻe fiefia ʻa e ʻapositolo ko Paulá ke ‘atu ʻene mouí’ koeʻuhi ke fakahokoʻaki ʻene ngāue fakafaifekau faka-Kalisitiané. (2 Kol. 12:15, PM) ʻI he tuʻunga meimei tatau he ʻahó ni, ʻoku ngāue mālohi ai ʻa e kau Kalisitiane tokolahi ko e kau tāimuʻa. Ko e niʻihi ʻoku lahi honau ngaahi fatongia fakafāmilí ʻoku nau vaheʻi ha taimi mei heʻenau taimi-tēpile moʻumoʻuá ke kau atu ai ʻi he ngāue fakafaifekaú ʻi he uike taki taha. Ko e niʻihi ʻoku mahamahakí ʻoku nau ngāueʻaki ʻa e toenga ʻo honau iví ke pouaki ʻa e ngaahi meʻa ʻo e Puleʻangá. He fakalototoʻa ē ke sio ki he kakai ʻa Sihová, ʻo tatau ai pē pe ko e hā honau taʻumotuʻá pe ngaahi tuʻungá, ʻoku nau tōtōivi ʻi he ngāue ʻa Sihová!
2 ʻOfa ki he Kaungāʻapí: Ko hono fai ʻa e meʻa kotoa te tau lava ke tauhi ai kia Sihová, ʻo fakahāhā ʻa e ʻofa ki he ʻOtuá mo e kaungāʻapí, ʻoku tau maʻu ai ʻa e konisēnisi maʻa. Koeʻuhi naʻe ʻatu ʻe Paula ʻa ʻene moʻuí ʻi hono vahevahe ʻa e ongoongo leleí, naʻe lava ke ne leaʻaki fiefia: “Oku ou fakababau fakamoomooni atu kiate kimoutolu he aho ni, oku ou maa au mei he toto oe kakai kotoabe.” (Ng. 20:24, 26, PM; 1 Tes. 2:8) Ko e kau ki he ngāue fakafaifekaú ʻi he lahi taha ʻoku fakaʻatā ʻe hotau ngaahi tuʻungá, ʻe maluʻi ai kitautolu mei he halaia ʻi he totó.—Isi. 3:18-21.
3 Ko e feinga tōtōivi ke tokoniʻi ʻa e niʻihi kehé ʻoku tau maʻu ai ʻa e fiefia. (Ng. 20:35) Naʻe pehē ʻe ha tokoua ʻe taha: “ʻI heʻeku foki ki ʻapi he efiafí, ʻi he hili ha ʻaho ngāue kia Sihová, ko e moʻoni ʻoku ou ongoʻi helaʻia. Ka ʻoku ou fiefia, peá u fakamālō kia Sihova ʻi heʻene ʻomai kiate au ʻa e fiefia ʻa ia ʻe ʻikai lava ke toʻo ʻe ha taha.”
4 ʻOfa ki he ʻOtuá: Ko e ʻuhinga mahuʻinga taha ki heʻetau tōtōivi ʻi he ngāue kia Sihová koeʻuhí he ʻoku fakahōifua ia ki heʻetau Tamai fakahēvaní. ʻOku ueʻi kitautolu ʻe he ʻofa ki he ʻOtuá ke tau tauhi ʻene ngaahi tuʻutuʻuní, ʻa ia ʻoku kau ai ʻa e ngāue fakamalangá mo e ngaohi ākongá. (1 Sione 5:3) Naʻa mo e taimi ʻoku taʻemahuʻingaʻia ai pe fakafepaki ʻa e kakaí, ʻoku tau fiefia maʻu pē ke ngāue mālohi kia Sihova.
5 ʻOku ʻikai ko e taimi ʻeni ke tau foʻi ai. ʻOku tau moʻui he lolotonga ʻo e utu-taʻú. (Mt. 9:37) ʻOku faʻa ngāue ha tokotaha ngoue ʻi he houa lahi he lolotonga ʻo ha utu-taʻu koeʻuhí he ʻoku siʻisiʻi pē ʻa e taimi ke tānaki ai ʻa e ngoué ki muʻa ke maumaú. Ko e taimi ʻoku fakaʻatā mai ki he ngāue utu-taʻu fakalaumālié ʻoku toe siʻi mo ia foki. ʻI hono manatuʻi ʻa e vahaʻa taimi ʻoku tau moʻui aí, tau hokohoko kotoa atu ai ke tōtōivi ʻi he ngāue fakafaifekaú.—Luke 13:24; 1 Kol. 7:29-31.