5 ʻOku Mahuʻinga ʻa e Feituʻú mo e Taimí?

ʻOKU ʻikai ha veiveiua kuó ke fakatokangaʻi ko e lahi taha ʻo e ngaahi lotú ʻoku tō ʻenau fakamamafá ki he ngaahi fale lalahi faiʻanga lotú mo e ngaahi taimi pau ʻi he ʻahó ʻa ia ʻoku totonu ke fai ai ʻa e lotú. ʻOku fakangatangata ʻe he Tohi Tapú ʻetau ngaahi lotú ki ha feituʻu mo ha taimi pau?

ʻOku fakahaaʻi mai ʻe he Tohi Tapú ʻoku ʻi ai ʻa e ngaahi taimi totonu ki he lotú. Ko e fakatātaá, ki muʻa ke kai ʻa Sīsū mo hono kau muimuí, naʻá ne fakamālō ki he ʻOtuá ʻi he lotu. (Luke 22:17) Pea ʻi he taimi naʻe fakatahataha ai ʻene kau ākongá ke lotú, naʻa nau lotu fakataha. Ko ia naʻa nau hokohoko atu ʻi hono fai ʻa e meʻa naʻe ʻosi fuoloa pē hono faʻa fakahoko ʻi he ngaahi sinakoke ʻo e kau Siú mo e temipale ʻi Selusalemá. Naʻe loto ʻa e ʻOtuá ke hoko ʻa e temipalé “ko e fale faiʻanga lotu maʻá e ngaahi puleʻanga kotoa pē.”​—Maʻake 11:17.

ʻI he taimi ʻoku fakatahataha ai ʻa e kau sevāniti ʻa e ʻOtuá pea lotu fakatahá, ʻokú ne fanongo ki heʻenau ngaahi lotú. Kapau ʻoku fāʻūtaha ʻa e kulupú pea tapua mai mei heʻenau ngaahi lotú ʻa e ngaahi tefitoʻi moʻoni Fakatohitapú, ʻoku fakahōifua ia ki he ʻOtuá. ʻE aʻu ʻo ueʻi nai ia ʻe he lotú ke ne fai ha meʻa naʻe ʻikai ke ne mei fai. (Hepelū 13:18, 19) ʻOku lotu maʻu pē ʻa e Kau Fakamoʻoni ʻa Sihová ʻi heʻenau ngaahi fakatahá. ʻOku fakaafeʻi loto-māfana koe ke ke haʻu ki ha Fale Fakatahaʻanga ofi atu kiate koe pea fanongo tonu ki he ngaahi lotu hangē ko iá.

Kae kehe, ʻoku ʻikai ke fakangatangata ʻe he Tohi Tapú ʻa e lotú ki ha taimi pe feituʻu pau. ʻI he Tohi Tapú, ʻoku tau maʻu ai ha lēkooti ʻo e lotu ʻa e kau sevāniti ʻa Sihová ʻi ha faʻahinga taimi pē mo ha faʻahinga feituʻu pē. Naʻe pehē ʻe Sīsū: “ʻI haʻo lotu, hū ki hao loki ʻoku lilo, pea ʻi he hili hoʻo tāpuni ʻa e matapaá, lotu ki hoʻo Tamai ʻa ia ʻoku ʻi he liló. Pea ko hoʻo Tamaí leva ʻa ia ʻokú ne vakai mai ki ai mei he liló te ne totongi kiate koe.”​—Mātiu 6:6.

ʻIkai ko ha fakaafe fakamānako ia? ʻE lava moʻoni ke ke fakaofiofi ki he Hau ʻo e ʻunivēsí ʻi ha faʻahinga taimi pē, ʻi he taimi ʻokú ke toko taha aí, pea tuipau te ne fanongo mai kiate koe. Tāneʻineʻi ke faʻa kumi ʻe Sīsū ha taimi ke ne nofo toko taha ai koeʻuhi ke lotu! ʻI ha taimi ʻe taha, naʻá ne lotu ki he ʻOtuá ʻi ha pō kakato ʻe taha, koeʻuhi naʻá ne fiemaʻu ha tataki ki ha fili mātuʻaki mahuʻinga.​—Luke 6:​12, 13.

Ko e kau tangata mo e kau fefine ʻe niʻihi ʻi he Tohi Tapú naʻa nau lotu ʻi he taimi naʻa nau fehangahangai ai mo e ngaahi fili mahuʻingá pe ngaahi pole mafatukitukí. Naʻa nau lotu leʻo-lahi ʻi he taimi ʻe niʻihi pea lotu fakalongolongo ʻi he taimi ʻe niʻihi; naʻa nau lotu ʻi he tokolahí mo e taimi naʻa nau toko taha aí. Ko e meʻa mahuʻingá naʻa nau lotu. ʻOku toe fakaafeʻi foki ʻe he ʻOtuá ʻene kau sevānití ke: “Lotu maʻu pē.” (1 Tesalonaika 5:17) ʻOkú ne loto-lelei ke fanongo taʻemamotu ki he faʻahinga ʻoku nau fai hono finangaló. ʻIkai ko ha fakaafe anga-ʻofa ia?

Ko e moʻoni, ʻi he māmani siokita ko ení, ʻoku fifili ʻa e tokolahi fekauʻaki mo e mahuʻinga ʻo e lotú. Te ke ʻeke nai, ‘ʻE tokoniʻi moʻoni au ʻe he lotú?’