Ko e Hā ʻe Mole Atu ʻi he Hoko Mai ʻa e Puleʻanga ʻo e ʻOtuá?

1, 2. (a) ʻI he founga fē ʻoku meimei tatau ai ʻa e māmani fulikivanu ko ení mo e tokotaha faihia ʻoku teu ke fakapōngí? (Sio ki he ʻuluaki fakatātā ʻi he kupú ni.) (e) ʻE fēfē ʻa e ongoʻi ʻa e tokotaha kotoa ʻi hēvani mo māmani hili hono fakaʻauha ʻa e fokotuʻutuʻu fulikivanu ko ení?

SIOLOTO ATU ki he tuʻungá. ʻOku lue atu ha tokotaha faihia fakatuʻutāmaki ʻi he hala vahaʻa loki ʻo e pilīsoné lolotonga ia ʻoku kaila atu ʻa e kau kaʻaté, “ʻOku lue atu ha tangata mate!” Ko e hā ʻoku nau leaʻaki ai ení? Neongo ʻoku kei moʻui lelei pē ʻa e tokotaha faihiá, naʻe tautea mate ia pea ʻoku teu ke fakapoongi. ʻOku hangē ia naʻá ne ʻosi maté.a—Sio ki he fakamatala ʻi lalo.

² Ko e māmani fulikivanu ʻoku tau moʻui aí ʻoku meimei tatau ia mo e tokotaha faihia ko ia ʻoku teu ke fakapōngí. ʻOku pehē ʻe he Tohi Tapú: “ʻOku fakaʻaʻau ke mole atu ʻa e māmaní.” (1 Sio. 2:17) Kuo fakapapauʻi ʻe Sihova ke fakangata ʻa e fokotuʻutuʻu ko ení ʻi he vave tahá, ko ia ʻoku ʻikai ha veiveiua ʻe ngata ia. Ka ʻoku ʻi ai ʻa e faikehekehe mahuʻinga ʻe taha ʻi he ngataʻanga ʻo e fokotuʻutuʻu ko ení mo hono fakapoongi ʻo e tokotaha faihia ko iá. ʻOku ongoʻi nai ʻe he kakai ʻe niʻihi naʻe taʻetotonu hono fakamāuʻi ʻa e tokotaha faihiá pea te nau fakafepaki ʻo ʻamanaki ʻe ʻikai ke fakapoongi ia. Kae kehe, ko Sihová ko ha fakamaau haohaoa, pea ko ʻene fili ke fakaʻauha ʻa e fokotuʻutuʻu ko ení ʻoku tonu haohaoa. (Teu. 32:4) ʻE ʻikai ke toe toloi hono fakaʻauhá. Hili hono fakaʻauha ʻosi ʻa e fokotuʻutuʻu ko ení, ʻe loto-tatau ʻa e tokotaha kotoa ʻi hēvani mo māmani naʻe totonu ʻa e fakamaau ʻa Sihová. ʻE ʻi ai ʻa e fiemālie lahi ʻaupito!

3. Ko e hā ʻa e palopalema ʻe fā ʻe mole atu ʻi he hoko mai ʻa e Puleʻanga ʻo e ʻOtuá?

³ Ko e hā ʻa e ngaahi meʻa ʻi he “māmaní” ʻe “mole atu”? ʻOku kau ki ai ʻa e ngaahi meʻa ʻoku kovi ʻa ia ko e konga ia ʻo e moʻui ʻi he ʻaho ní. Ko e ngaahi meʻa kotoa ko iá ʻe vavé ni ke mole atu. Ko e moʻoni ko e konga eni ‘ʻo e ongoongo lelei ʻo e Puleʻangá.’ (Māt. 24:14) ʻI he kupu ko ení, te tau lāulea ai ki he palopalema ʻe fā ʻe mole atu ʻi he hoko mai ʻa e Puleʻanga ʻo e ʻOtuá: kakai fulikivanu, ngaahi kautaha taʻefaitotonu, ngaahi ngāue hala mo e ngaahi tuʻunga kovi. ʻI he ngaahi meʻa taki taha ko ení te tau ako ai ki he (1) anga ʻo ʻene uesia kitautolu ʻi he ʻaho ní, (2) meʻa ʻe fai ʻe Sihova ki aí, mo e (3) meʻa te ne fetongiʻaki iá.

KAKAI FULIKIVANU

4. ʻOku anga-fēfē hono uesia kitautolu ʻe he kakai fulikivanú ʻi he ʻahó ni?

⁴ ʻOku anga-fēfē hono uesia kitautolu ʻe he kakai fulikivanú ʻi he ʻahó ni? Naʻe pehē ʻe he ʻapositolo ko Paulá ʻi he ngaahi ʻaho fakaʻosí, ʻe ʻi ai ʻa e “ngaahi taimi fakalilifu ʻa ia ʻe faingataʻa ke fekuki mo ia.” Naʻá ne tānaki mai leva: “Ko e kau tangata fulikivanú mo e kau kākaá te nau ʻalu mei he kovi ki he kovi ange.” (2 Tīm. 3:1-5, 13) Kuó ke siotonu heni? Ko e tokolahi ʻo kitautolu kuo hoko ʻo maʻukovia koeʻuhi ko e kakai fulikivanú ʻo hangē ko e kau houtamaki anga-fakamālohí, kau lau lanu loto-tāufehiʻa mo e kau faihia anga-fakamamahí. Ko e niʻihi ʻo kinautolu ʻoku ʻikai ke nau feinga ke fūfuuʻi ʻa e ngaahi tōʻonga kovi ʻoku nau faí. ʻOku fakangalingali ʻa e niʻihi ʻoku nau tokoniʻi ʻa e kakaí, ka ko hono moʻoní ʻoku nau fulikivanu. Neongo ia, kapau ʻoku ʻikai ke maʻukovia kitautolu ʻe ha faihia, ʻoku kei uesia pē kitautolu ʻe he kakai fulikivanú. ʻOku tau loto-mamahi lahi ʻi he fanongo ki heʻenau fakafeangai anga-fakamamahi ki he fānaú, kau taʻumotuʻá mo e niʻihi kehe ʻoku ʻikai lava ke nau maluʻi kinautolú. Ko e kakai fulikivanu ko ení ʻoku nau tōʻongafai ʻi ha founga ʻoku ʻai ai kinautolu ke hangē ko e fanga manu kaivaó pe fanga tēmenioó. (Sēm. 3:15) Ko e meʻa fakafiefiá, ʻoku ʻomai ʻe he Folofola ʻa e ʻOtuá ʻa e ʻamanaki.

5. (a) Ko e hā ʻa e faingamālie ʻoku kei maʻu ʻe he kakai fulikivanú? (e) Ko e hā ʻe hoko ki he faʻahinga ʻoku nau fakafisi ke liliú?

⁵ Ko e hā ʻe fai ʻe Sihová? ʻI he taimi ní ʻoku ʻoange ʻe Sihova ki he kakai fulikivanú ʻa e faingamālie ke nau liliu. (ʻAi. 55:7) Neongo ʻe vavé ni ke fakaʻauha ʻa e fokotuʻutuʻu ko ení, ʻoku teʻeki ai ke fai honau fakamāuʻi fakaʻosí. Ka, ko e hā ʻe hoko ki he faʻahinga ʻoku nau fakafisi ke liliú mo e faʻahinga ʻoku nau poupou ki he fokotuʻutuʻu ko ení ʻo aʻu atu ki he taimi ʻo e fuʻu mamahi lahí? Kuo talaʻofa ʻe Sihova ke toʻo atu ʻa e kakai fulikivanu kotoa pē mei he māmaní. (Lau ʻa e Saame 37:10.) ʻI he ʻahó ni, kuo pōtoʻi ʻa e tokolahi ʻi hono fūfuuʻi ʻenau ngaahi tōʻonga koví, pea ʻi he taimi ʻe niʻihi ʻoku nau hao mei hono tauteaʻi kinautolú. (Siope 21:7, 9) Ka ʻoku fakamanatu mai ʻa e Tohi Tapú: “Ko hono ongo foʻi fofonga ʻoku ʻi he ʻalunga ʻo e tangata taki taha, pea ʻoku ne ʻafioʻi ʻene taulaka kotoa. ʻOku ʻikai ha poʻuli, pea ʻoku ʻikai ha malu matolu, ke toi ʻo fufu ai ʻa e kakai faikovi.” (Siope 34:21, 22) Ko ia heʻikai ʻaupito puli kinautolu meia Sihova. ʻE lava ke ne ʻafioʻi ʻa e meʻa kotoa ʻoku fai ʻe he kau fulikivanú. Hili ʻa ʻĀmaketoné, te tau fakasio ʻa e feituʻu naʻa nau ʻi aí, ka ʻe ʻikai te tau sio kiate kinautolu. Te nau mole atu ʻo taʻengata!—Saame 37:12-15.

6. Ko hai pē ʻe toé ʻi he mole atu ʻa e kakai fulikivanú, pea ko e hā ko ha ongoongo lelei ai iá?

⁶ Ko hai pē ʻe toé ʻi he mole atu ʻa e kakai fulikivanú? ʻOku talaʻofa mai ʻe Sihova: “Koe agamalu te nau maʻu ae fonua; o nau fakafiemalieʻi akinautolu i hono lahi oe melino.” Ki mui ʻi he saame tatau, ʻoku tau lau ai: “E maʻu e he maonioni ae fonua, bea te nau nofo ai o taegata.” (Saame 37:11, 29, PM) Ko hai ʻa e kau “agamalu” mo e kau “maonioni”? Ko e kau anga-maluú ko e faʻahinga anga-fakatōkilalo ia ʻoku nau ako kia Sihova mo talangofua kiate ia. Ko e kau māʻoniʻoní ko e faʻahinga ia ʻoku nau saiʻia ke fai ʻa e meʻa ʻoku pehē ʻe he ʻOtuá ʻoku tonú. ʻI he māmaní he ʻahó ni, ʻoku tokolahi ange ʻa e kakai fulikivanú ʻi he kau māʻoniʻoní. Ka ʻi he māmani foʻoú, ko e kau anga-maluú mo e kau māʻoniʻoní pē ʻe ʻi aí, pea te nau ʻai ʻa e māmaní ko ha palataisi!

NGAAHI KAUTAHA TAʻEFAITOTONU

7. ʻOku anga-fēfē hono uesia kitautolu he ʻahó ni ʻe he ngaahi kautaha taʻefaitotonú?

⁷ ʻOku anga-fēfē hono uesia kitautolu he ʻahó ni ʻe he ngaahi kautaha taʻefaitotonú? Ko e lahi ʻo e kovi ʻoku hoko ʻi he māmaní he ʻahó ni ʻoku ʻikai ko e fakatupunga ia ʻe he faʻahinga tāutaha ka ko e ngaahi kautahá. ʻOku takihalaʻi ʻe he ngaahi kautaha fakalotú ʻa e kakai ʻe laui miliona. Ko e fakatātaá, ʻoku nau loi fekauʻaki mo e ʻOtuá, ʻoku nau pehē ʻoku ʻikai ke falalaʻanga ʻa e Tohi Tapú, pea ʻoku nau takihalaʻi ʻa e kakaí fekauʻaki mo e kahaʻu ʻo e māmaní mo e faʻahinga ʻo e tangatá. ʻOku pouaki ʻe he ngaahi founga-pule taʻefaitotonú ʻa e taú mo e fakamālohi fakamatakalí pea ngaohikoviʻi ʻa e masivá mo e tukuhāusiá. ʻOku hoko ʻo tuʻumālie mo mālohi ange ʻa e ngaahi founga-pule ko iá ʻi heʻenau filifilimānakó pe tali ʻa e ngaahi totongi fufuú. Ko e ngaahi kautaha mānumanú ʻoku nau ʻuliʻi ʻa e ʻātakaí, fakaʻauha ʻa e ngaahi koloa ʻo natulá, pea ngāuekoviʻaki ʻa e kakaí koeʻuhí ke lava ʻo koloaʻia ai ha niʻihi tokosiʻi. ʻOku hā mahino, ko e ngaahi kautaha taʻefaitotonú ʻoku tukuakiʻi ki he lahi ʻo e faingataʻa ʻi he māmaní he ʻahó ni.

8. Ko e hā ʻoku leaʻaki ʻe he Tohi Tapú ʻe hoko ki he ngaahi kautaha ʻoku hā ngali mālohi ki he kakai tokolahi ʻi he ʻahó ni?

⁸ Ko e hā ʻe fai ʻe Sihová? ʻE kamata ʻa e fuʻu mamahi lahí ʻi he taimi ʻe ʻohofi ai ʻe he ngaahi mafai fakapolitikalé ʻa e kotoa ʻo e ngaahi kautaha fakalotu loí, ʻa ia ʻoku fakamatalaʻi ʻe he Tohi Tapú ko ha fefine paʻumutu ʻoku ui ko Pāpilone ko e Lahi. (Fkh. 17:1, 2, 16; 18:1-4) Ko e ngaahi kautaha fakalotu ko iá ʻe fakaʻauha ʻosi. Ka ko e hā ʻe hoko ki he kotoa ʻo e ngaahi kautaha taʻefaitotonu kehé? ʻOku fakahoa kinautolu ʻe he Tohi Tapú ki he ngaahi moʻunga mo e ngaahi motu koeʻuhí ʻoku nau hā ngali mālohi mo fefeka. (Lau ʻa e Fakahā 6:14.) Ka ʻoku toe pehē ai ʻe fakaʻauha ʻa e ngaahi founga-pule mo e ngaahi kautaha kehe kotoa ʻoku ʻikai ke nau poupouʻi ʻa e Puleʻanga ʻo e ʻOtuá. ʻE hoko eni ko e konga fakaʻosi ʻo e fuʻu mamahi lahí. (Sel. 25:31-33) Hili iá, ʻe ʻikai ʻaupito ke toe ʻi ai ha ngaahi kautaha taʻefaitotonu!

9. Ko e hā ʻoku lava ai ke tau fakapapauʻi ʻe fokotuʻutuʻu maau ʻa e māmani foʻoú?

⁹ Ko e hā ʻe fetongiʻaki ʻa e ngaahi kautaha taʻefaitotonú? Hili ʻa ʻĀmaketoné, ʻe toe ʻi ai ha kautaha ʻi he māmaní? ʻOku pehē ʻe he Tohi Tapú: “ʻOku ʻi ai ʻa e ngaahi langi foʻou mo ha māmani foʻou ʻa ia ʻoku tau nofoʻaki tali ki ai ʻo fakatatau ki heʻene talaʻofá, pea ʻe lotolotoi ai ʻa e māʻoniʻoní.” (2 Pita 3:13) Ko e ngaahi langi motuʻá mo e māmani motuʻá ʻoku ʻuhinga ia ki he ngaahi founga-pule taʻefaitotonú pea pehē ki he kakai ʻoku nau puleʻí. Hili ʻenau mole atú, ko e hā ʻe fetongiʻaki kinautolú? Ko e “ngaahi langi foʻou mo ha māmani foʻou.” Ko e ngaahi langi foʻoú ʻoku ʻuhinga iá ki ha founga-pule foʻou, ko e Puleʻanga ʻoku faʻuʻaki ʻa Sīsū Kalaisi mo hono kaungāpule ʻe toko 144,000. Ko e māmani foʻoú ʻoku ʻuhinga iá ki he kakai ʻoku pule mai ki ai ʻa e Puleʻanga ʻo e ʻOtuá. ʻE faʻifaʻitaki haohaoa ʻa Sīsū mo hono ngaahi kaungāpulé kia Sihova ko e ʻOtuá, ʻa ia ko e ʻOtua ʻo e maau. (1 Kol. 14:33) Ko ia ko e “māmani foʻou” ʻe fokotuʻutuʻu maau. ʻE ʻi ai ʻa e kau tangata lelei te nau tokangaʻi ʻa e ngaahi meʻá. (Saame 45:16) Ko e kau tangata ko iá ʻe tataki kinautolu ʻe Kalaisi mo e toko 144,000. Sioloto atu ki ha taimi ʻe fetongi ai ʻa e kotoa ʻo e ngaahi kautaha taʻefaitotonú ʻe ha kautaha pē ʻe taha ʻa ia ʻoku fāʻūtaha ʻo ʻikai ʻaupito lava ke taʻefaitotonu!

NGAAHI NGĀUE HALA

10. Ko e hā ʻa e faʻahinga ngāue hala ʻoku failahia ʻi he feituʻu ʻokú ke nofo aí, pea ʻoku anga-fēfē hono uesia koe mo ho fāmilí?

¹⁰ ʻOku anga-fēfē hono uesia kitautolu he ʻahó ni ʻe he ngaahi ngāue halá? ʻOku tau moʻui ʻi ha māmani ʻoku failahia ai ʻa e ʻulungaanga taʻetāú, taʻefaitotonú mo e fakamālohi anga-kakahá. ʻOku ʻai ʻe he fakafiefia ʻa e māmaní ʻa e ngaahi meʻa ko iá ke hā fakamānako lolotonga ia ʻoku nau fakakataʻaki ʻa e ngaahi tuʻunga ʻa Sihova ki he tonú mo e halá. (ʻAi. 5:20) ʻOku tautefito ki he ngaahi mātuʻá ʻa e pau ke nau faitau ke maluʻi ʻenau fānaú mei he ngaahi tākiekina kovi peheé. Ko e moʻoni, ko e kotoa ʻo e kau Kalisitiane moʻoni kuo nau ngāue mālohi ke maluʻi honau vahaʻangatae mo Sihová ʻi ha māmani ʻoku ʻikai ke nau tokaʻi ʻa e ngaahi tuʻunga ʻa e ʻOtuá.

11. Ko e hā ʻoku tau ako mei hono fakamāuʻi ʻe Sihova ʻa Sōtoma mo Komolá?

¹¹ Ko e hā ʻe fai ʻe Sihova ki he ngaahi ngāue halá? Fakakaukau ki he meʻa naʻe fai ʻe Sihova ki he ngaahi tōʻonga kovi naʻe hoko ʻi he kolo ko Sōtoma mo Komolá. (Lau ʻa e 2 Pita 2:6-8.) Ko Loté ko ha tangata māʻoniʻoni, pea naʻá ne faingataʻaʻia lahi mo hono fāmilí koeʻuhí ko e ngaahi tōʻonga kovi kotoa naʻe fai ʻe he kakai takatakai ʻiate kinautolú. Naʻe fakaʻauha ʻe Sihova ʻa e kotoa ʻo e feituʻú ke fakangata ʻa e ngaahi meʻa fulikivanu naʻe hoko aí. Ka naʻá ne toe “fokotuʻu ai ha sīpinga” ki he kakai fulikivanu ʻi he ʻaho ní. Hangē pē ko hono fakangata ʻe Sihova ʻa e ngaahi tōʻonga taʻetaau kotoa ʻi he kuohilí, te ne toe fakangata ia ʻi he ʻahó ni ʻi he taimi te ne fakaʻauha ai ʻa e fokotuʻutuʻu lolotonga ko ʻení.

12. Ko e hā ʻa e niʻihi ʻo e ngaahi ngāue te tau fakatuʻotuʻa atu ki ai ʻi he taimi ʻe mole atu ai ʻa e fokotuʻutuʻu ko ení?

¹² Ko e hā ʻe fetongiʻaki ʻa e ngaahi ngāue halá? ʻI he māmani foʻoú, ʻe lahi ʻa e ngaahi ngāue fakafiefia te tau femoʻuekina ai. Ko e fakatātaá, te tau liliu ai ʻa e māmaní ko ha palataisi pea langa ʻa e ngaahi fale maʻatautolu mo hotau ngaahi ʻofaʻangá. Te tau toe talitali lelei mai ai ʻa e laui miliona ʻo e faʻahinga ʻe toetuʻú pea akoʻi kinautolu fekauʻaki mo Sihova mo e meʻa kotoa kuó ne fai maʻá e faʻahinga ʻo e tangatá. (ʻAi. 65:21, 22; Ngā. 24:15) ʻI he taimi ko iá, te tau femoʻuekina ai ʻi he ngaahi ngāue te ne ʻai ai kitautolu ke tau fiefia pea ʻoatu ai ʻa e fakahīkihiki kia Sihova!

NGAAHI TUʻUNGA KOVI

13. Ko e hā ʻa e ola ʻo e angatuʻu ʻi ʻĪtení?

¹³ ʻOku anga-fēfē hono uesia kitautolu ʻi he ʻahó ni ʻe he ngaahi tuʻunga koví? ʻI he fonu ʻa e māmaní ʻi he kakai fulikivanú, ngaahi kautaha taʻefaitotonú, mo e ngaahi ngāue halá kuo iku atu ai ki he ngaahi tuʻunga kovi ʻo e moʻuí. ʻOku uesia kotoa kitautolu ʻe he ngaahi meʻa hangē ko e taú, masiva ʻangoʻangó, lau-lanú, mahamahakí mo e maté. Ko e ngaahi tuʻunga kovi ko ení naʻe kamata ia ʻi he angatuʻu kia Sihova ʻa Sētane, ʻĀtama mo ʻIví. Pea kuo uesia kotoa kitautolu koeʻuhí ko ʻenau angatuʻú.

14. Ko e hā ʻe fai ʻe Sihova ki he ngaahi tuʻunga koví?

¹⁴ Ko e hā ʻe fai ʻe Sihova ki he ngaahi tuʻunga koví? Fakakaukau ki he fakatātā ʻe niʻihi. ʻOku talaʻofa mai ʻe Sihova te ne fakangata ʻa e kotoa ʻo e ngaahi taú. (Lau ʻa e Saame 46:8, 9.) Te ne toʻo ʻosi atu ʻa e mahamahakí. (ʻAi. 33:24) Te ne folofua ʻa mate ʻo taʻengata. (ʻAi. 25:8) Te ne fakangata ʻa e masivá. (Saame 72:12-16) Pea ʻe toʻo atu ʻe Sihova ʻa e kotoa ʻo e ngaahi tuʻunga kovi ʻokú ne ʻai ke fakamamahi ʻa e moʻuí ʻi he ʻaho ní. ʻE aʻu ʻo ne toʻo atu ʻa e tākiekina kovi ʻa Sētane mo ʻene fanga tēmenioó!—ʻEf. 2:2.

15. Ko e hā ʻa e niʻihi ʻo e ngaahi meʻa ʻe mole atu ʻo taʻengata ʻi he hili ʻa ʻĀmaketoné?

¹⁵ Sioloto atu ki he moʻui ʻi ha māmani ʻoku ʻikai ke toe ʻi ai ʻa e tau, mahamahaki, pe mate! ʻE ʻikai ke toe ʻi ai ha kau tau, ngaahi meʻatau, pe fakamanatu ʻa e kau mate ʻi he taú. ʻE ʻikai ke toe fiemaʻu ha falemahaki, kau toketā, kau neesi, fale mate pe ngaahi faʻitoka. ʻE ʻikai ha faihia, ko ia ʻe ʻikai ke toe fiemaʻu ha kau polisi, ngaahi meʻa fakaongo fili, pe naʻa mo e ngaahi loka pe kī! Ko e kotoa ʻo e ngaahi tuʻunga kovi ʻokú ne fakatupunga ke tau loto-moʻua lahi aí ʻe mole atu ia ʻo taʻengata.

16, 17. (a) Ko e hā ʻa e ongoʻi ʻa e faʻahinga te nau hao atu ʻi ʻĀmaketoné? Fakatātaaʻi. (e) ʻE lava fēfē ke tau fakapapauʻi te tau moʻui ai pē hili ʻa e mole atu ʻa e māmani motuʻa ko ení?

¹⁶ ʻE fēfē ʻa e moʻuí ʻi he taimi ʻe mole atu ai ʻa e ngaahi tuʻunga koví? ʻOku faingataʻa ke sioloto atu ki ai. Kuo fuoloa mai eni ʻetau fehangahangai mo e ngaahi tuʻunga koví ʻo ʻikai ai ke tau fakatokangaʻi ʻa e lahi ʻo e faingataʻa ʻoku nau fakatupungá. Ke fakatātāʻí, ko e kakai ʻoku nau nofo ʻo ofi ki ha tauʻanga lēlue femoʻuekina ʻoku ʻikai nai ke nau kei fakatokangaʻi ʻa e longoaʻá. Pea ko e kakai ʻoku nau nofo ʻo ofi ki ha lingiʻanga veve ʻoku ʻikai nai ke nau kei fakatokangaʻi ʻa ʻene nanamú. Ka ʻi he taimi ʻe toʻo atu ai ʻe Sihova ʻa e kotoa ʻo e ngaahi tuʻunga koví, ʻe hoko ia ko ha fakafiemālie lahi!

¹⁷ Ko e hā te ne fetongi ʻa e ngaahi fakamafasia kotoa ʻoku tau hokosia ʻi he ʻaho ní? ʻOku pehē ʻe he Saame 37:11 (PM): “[Te] nau fakafiemalieʻi akinautolu i hono lahi oe melino.” He fakafiemālie ē ke ʻiloʻi ko e meʻa eni naʻe fiemaʻu ʻe Sihova maʻa kitautolú! Lolotonga ʻa e ngaahi taimi fakamafasia ko ení, fai ʻa e meʻa kotoa te ke malavá ke nofo ofi kia Sihova mo ʻene kautahá. Ko hoʻo ʻamanaki ki he kahaʻú ʻoku mahuʻinga, ko ia fakakaukau fakamātoato ki ai, fakapapauʻi ʻoku moʻoni ia kiate koe, pea vahevahe atu ia ki he niʻihi kehé. (1 Tīm. 4:15, 16; 1 Pita 3:15) ʻI he founga ko iá, ʻe lava ai ke ke fakapapauʻi te ke moʻui ai pē pea fiefia ʻo taʻengata ʻi he taimi ʻe ngata ai ʻa e fokotuʻutuʻu ko ení!