Ngaahi Feilaulau ʻo e Fakafetaʻí ʻa Ia ʻOku Fakahōifua kia Sihová
“Mou atu ho mou jino koe feilaulau moui, mo maonioni, mo lelei ki he Otua.”—LOMA 12:1, PM.
1. Ko e hā ʻa e lau ʻa e Tohitapú ʻo fekauʻaki mo e mahuʻinga fakangatangata ʻo e ngaahi feilaulau ʻi he malumalu ʻo e Lao ʻa Mōsesé?
“KO E meʻa ʻi he maʻu ʻe he Lao ʻa e ʻata pe ʻo e ngaahi lelei ka hoko, ʻo ʻikai ko e imisi totonu ʻo e ngaahi meʻa, ko ia ʻi he fai hokohoko taʻu ʻaki ʻa e ngaahi feilaulau pe ko ia ʻa ia ʻoku nau ʻatu ʻo ʻikai ngata, ʻoku ʻikai te nau momoʻi lava ke fakahaohaoa ai ʻa e kakai ʻoku haʻu ki he ʻOtua.” (Hepelu 10:1) ʻI aí, ʻi he foʻi fakamatala mataʻāʻā pē ʻe taha, ʻoku fakapapauʻi mai ai ʻe he ʻapositolo ko Paulá ko e kotoa ʻo e ngaahi feilaulau naʻe foaki ʻi he malumalu ʻo e Lao ʻa Mōsesé naʻe ʻikai hano mahuʻinga tuʻuloa ʻi he fekauʻaki mo e fakamoʻui ʻo e tangatá.—Kolose 2:16, 17.
2. Ko e hā ʻoku ʻikai ko e koto kulanoa ai ke feinga ke mahinoʻi ʻa e fakamatala fakaikiiki ʻi he Tohitapú ʻo fekauʻaki mo e ngaahi foaki mo e ngaahi feilaulau ʻo e Laó?
2 ʻOku ʻuhinga ʻení ko e fakamatala ko ia ʻi he Penitātusí ʻo fekauʻaki mo e ngaahi foakí mo e ngaahi feilaulaú ʻoku ʻikai hano mahuʻinga ki he kau Kalisitiane ʻi he ʻaho ní? Ko hono moʻoní, laka siʻi hake ʻi he vahaʻa taimi ko e taʻu ʻe tahá, ko e faʻahinga tāutaha naʻe hū ki he Ako Fakafaifekau Fakateokalati ʻi he ngaahi fakatahaʻanga ʻi māmani lahi ʻa e Kau Fakamoʻoni ʻa Sihová ki mui ní, kuo nau lau kotoa ʻa e ʻuluaki ngaahi tohi ʻe nima ʻo e Tohitapú. Kuo fāinga ʻa e niʻihi ke lau mo mahinoʻi ʻa e kotoa ʻo e ngaahi fakaikiikí. Kuo kulanoa pē ʻa e kotoa ʻo ʻenau ngaahi feingá? Ko hono moʻoní, ʻoku ʻikai lava ke pehē ia, he “koe gaahi mea kotoabe nae tohi i muʻa, nae tohi ko ho tau akonaki, koeuhi koe mea i he faa kataki moe fakafiemalie oe gaahi tohi, ke tau maʻu ai ae amanaki lelei.” (Loma 15:4, PM) Ko e fehuʻí leva ʻeni, Ko e hā ʻa e “akonaki” mo e “fakafiemalie” ʻoku malava ke tau tātānaki mei he tānekinga fakamatala ʻi he Laó ʻo fekauʻaki mo e ngaahi foakí mo e ngaahi feilaulaú?
Ki Hotau Akonaki mo e Fakafiemālie
3. Ko e hā ʻa e fiemaʻu tefito ʻoku tau maʻú?
3 Neongo ʻoku ʻikai fiemaʻu ia ke fai ha ngaahi feilaulau moʻoni ʻi he founga naʻe tuʻutuʻuni ʻe he Laó, ʻoku kei fiemaʻu lahi moʻoni kiate kitautolu ʻa e meʻa naʻe fai ʻe he ngaahi feilaulaú ʻi ha tuʻunga siʻisiʻi ki he kau ʻIsilelí, ʻa ia, ko hono ʻai ke fakamolemoleʻi ʻetau ngaahi angahalá pea ke fiefia ʻi he hōifua mai ʻa e ʻOtuá. Koeʻuhi ʻoku ʻikai ke tau kei foaki ha ngaahi feilaulau moʻoni, ʻoku malava fēfē ke tau maʻu ha ngaahi ʻaonga pehē? ʻI he hili ʻa hono fakahaaʻi ʻa e ngaahi ngataʻanga ʻo e ngaahi feilaulau monumanú, ʻoku fanongonongo ʻe Paula: “ʻI he hoko ʻa [Sīsū] ki mamani, ʻoku ne meʻa, Naʻe ʻikai te ke tangi ki ha feilaulau pe ha foaki, ka kuo ke teuteu ha sino moʻoku: ko e ngaahi feilaulau [tutú], mo e ngaahi feilaulau he angahala naʻe ʻikai te ke hohóʻia ai. Pea u toki pehe, Ko eni kuo u haʻu (ʻi he takainga tohi kuo tohi kia au) ke fai hoʻo tuʻutuʻuni, ʻe ʻOtua.”—Hepelu 10:5-7.
4. ʻOku anga-fēfē hono ngāueʻaki ʻe Paula ʻa e Sāme 40:6-8 kia Sīsū Kalaisí?
4 ʻI hono hiki mei he Sāme 40:6-8, ʻoku fakahaaʻi mai ai ʻe Paula naʻe ʻikai ke haʻu ʻa Sīsuú ia ke ʻai ke tuʻuloa ʻa e “feilaulau pe ha foaki,” ʻa e “ngaahi feilaulau [tutú], mo e ngaahi feilaulau he angahala,” ʻa ia ko hono kotoa ʻo kinautolú ʻi he aʻu mai ki he taimi ʻo e hiki tohi ʻa Paulá naʻe ʻikai te nau kei maʻu ʻa e hōifua ʻa e ʻOtuá. Kae kehe, naʻe haʻu ʻa Sīsū mo ha sino naʻe teuteu ʻe heʻene Tamai fakahēvaní, ʻa e sino ko ia naʻe fehoanaki ʻi he tafaʻaki kotoa pē mo e sino ko ia naʻe teuteu ʻe he ʻOtuá ʻi Heʻene fakatupu ʻa ʻĀtamá. (Senesi 2:7; Luke 1:35; 1 Kolinito 15:22, 45) ʻI he tuʻunga ko e ʻAlo haohaoa ʻo e ʻOtuá, naʻe maʻu ʻe Sīsū ʻa e ngafa ʻo e “hako” ʻo e fefiné, ʻo hangē ko ia naʻe tomuʻa tala ʻi he Senesi 3:15. Te ne fou ʻi he ngaahi ʻalunga ko hono ‘laiki ʻo Sētane ʻi he foʻi ʻulú,’ neongo ko Sīsū tonu ʻe ‘fakavolu ia ʻi hono muivaʻé.’ ʻI he foungá ni, naʻe hoko ai ʻa Sīsū ko e founga ia naʻe tokonaki mai ʻe Sihova ki hono fakamoʻui ʻo e faʻahinga ʻo e tangatá, ʻa ē naʻe fakasio ki ai ʻa e kau tangata ʻo e tuí talu mei he ngaahi ʻaho ʻo ʻĒpelí.
5, 6. Ko e hā ʻa e founga māʻolunga ange ʻo e fakaofiofi ki he ʻOtuá ʻoku ʻatā ki he kau Kalisitiané?
5 ʻI he lea fekauʻaki mo e ngafa makehe ko ʻeni naʻe fakahoko ʻe Sīsuú, ʻoku pehē ʻe Paula: “Naʻa ne [ʻOtuá] ngaohi ko e koto angahala ʻa e Toko Taha ko ia naʻe ʻikai te ne ongona ha angahala, koeʻuhiā ko kitautolu; koeʻuhi ke tau hoko ai ʻiate ia ko e koto maʻoniʻoni fakaʻotua.” (2 Kolinito 5:21) Ko e kupuʻi lea “ngaohi ko e koto angahala” ʻoku malava ke toe liliu ko e ‘ngaohi ko ha feilaulau-angahala.’ ʻOku pehē ʻe he ʻapositolo ko Sioné: “Koe feilaulau totogi ia i he e tau gaahi agahala: bea ikai a tautolu be, ka koeuhi ko mamani kotoabe.” (1 Sione 2:2, PM) Ko ia ai, lolotonga naʻe maʻu ʻe he kau ʻIsilelí ha founga fakataimi ʻo e fakaofiofi ki he ʻOtuá ʻaki ʻenau ngaahi feilaulaú, ʻoku maʻu ʻe he kau Kalisitiané ia ha makatuʻunga māʻolunga ange ki he haʻu ki he ʻOtuá—ko e feilaulau ʻa Sīsū Kalaisí. (Sione 14:6; 1 Pita 3:18) Kapau te tau ngāueʻi ʻa e tui ki he feilaulau huhuʻi naʻe tokonaki mai ʻe he ʻOtuá pea talangofua kiate Ia, ko kitautolu foki ʻe malava ke fakamolemoleʻi ʻetau ngaahi angahalá pea fiefia ʻi he hōifua ʻa e ʻOtuá mo ʻene tāpuakí. (Sione 3:17, 18) ʻIkai ko ha matavai ia ʻo e fiemālie? Ka, ʻe malava fēfē ke tau fakahāhā ʻoku tau tui ki he feilaulau huhuʻí?
6 ʻI he hili ʻa hono fakamatalaʻi ʻo pehē ʻoku maʻu ʻe he kau Kalisitiané ha makatuʻunga māʻolunga ange ke fakaofiofi ai ki he ʻOtuá, ʻoku fakaeʻa ʻe he ʻapositolo ko Paulá, ʻo hangē ko ia ʻoku tau lau ʻi he Hepelu 10:22-25, ʻa e ngaahi founga ʻe tolu ʻa ia ʻoku malava ke tau fakahāhā ai ʻetau tui mo e houngaʻia ki he tokonaki anga-ʻofa ʻa e ʻOtuá. Neongo naʻe fakahanga tefito ʻa e enginaki ʻa Paulá ki he faʻahinga ko ia ʻoku nau “hu ki he botu tabu”—ʻa ia, ko e kau Kalisitiane paní ʻoku nau maʻu ha ui fakahēvaní—ko hono moʻoní, ʻoku fiemaʻu ki he kotoa ʻo e faʻahinga ʻo e tangatá ke nau tokanga ki he ngaahi lea fakamānavaʻi ʻa Paulá kapau ʻoku nau loto ke nau maʻu ha ʻaonga mei he feilaulau fakalelei ʻa Sīsuú.—Hepelu 10:19, PM.
Foaki ʻa e Ngaahi Feilaulau Maʻa mo Taʻemele
7. (a) ʻOku anga-fēfē ʻa e tapua mei he Hepelu 10:22 ʻa e meʻa naʻe fai ʻi ha feilaulau? (e) Ko e hā naʻe pau ke fai ke fakapapauʻi ʻe ala tali ha feilaulau ʻe he ʻOtuá?
7 ʻUluakí, ʻoku naʻinaʻi mai ʻa Paula ki he kau Kalisitiané: “Ko ia ke tau ʻunuʻunu atu mo e loto moʻoni, kuo maʻumaʻuluta ʻetau tui, kuo luluku hotau loto ʻo fakamaʻa mei he konisenisi kovi, pea kuo palutu hotau sino ʻi he vai fakamaʻa.” (Hepelu 10:22) Ko e lea naʻe ngāueʻaki hení ʻokú tapua mahino mai ai ʻa e meʻa naʻe fai ʻi ha feilaulau fakaetaipe ʻi he malumalu ʻo e Laó. ʻOku feʻungamālie ʻeni koeʻuhi ke ala tali ha feilaulau, naʻe pau ke foaki ia ʻaki ʻa e fakaueʻiloto totonu pea faiʻaki ʻa e meʻa maʻa mo taʻemele. Ko e monumanu ʻo e feilaulaú naʻe toʻo ia mei he fanga pulu pe fanga sipi, ʻa ia naʻe pau ko e fanga monumanu maʻa, pea “ʻikai hano mele,” ʻo haohaoa. Kapau ko e feilaulaú naʻe fai ʻaki ʻa e fanga manupuná, naʻe pau ke toʻo ia mei he fanga foʻi kulukulu pe fanga kiʻi lupe mui. Kapau naʻe aʻusia ʻa e ngaahi tuʻunga ko iá, “[naʻe hoko ʻo] tali ia koeʻuhi ko e tangata, ko e fakalelei maʻana.” (Livitiko 1:2-4, 10, 14; 22:19-25) Ko e feilaulau-meʻakaí naʻe ʻikai ke kau ai ha lēvani, ʻa ia ko ha fakaʻilonga ia ʻo e fakameleʻi; naʻe ʻikai foki ke kau ai ha hone, ʻo ʻuhinga nai ko e huhuʻa melie ʻo e fuaʻiʻakaú, ʻa ia ʻoku hehema ke ne fakatupunga ʻa ʻene mafú. ʻI he taimi naʻe foaki ai ʻa e ongo feilaulau—monumanu pe meʻakaí—ʻi he ʻōlitá, naʻe tānaki ki ai ʻa e māsima, ko ha meʻa fakatolonga.—Livitiko 2:11-13.
8. (a) Ko e hā naʻe fiemaʻu mei ha taha ʻokú ne fai ha foaki? (e) ʻOku malava fēfē ke tau fakapapauʻi ʻoku ala tali ʻe Sihova ʻetau lotú?
8 Fēfē ʻa e tokotaha ʻokú ne fai ʻa e foakí? Naʻe fakahaaʻi ʻe he Laó ko ha taha pē ʻoku haʻu ki he ʻao ʻo Sihová naʻe pau ke ne maʻa mo taʻemele. Ko ha taha naʻe hoko ʻo ʻuli ʻi ha faʻahinga ʻuhinga naʻe pau ke ne ʻuluaki foaki ha feilaulau-angahala pe feilaulau-halaia ke toe fakafoki mai hono tuʻunga maʻa ʻi he ʻao ʻo Sihová koeʻuhi kae malava ke Ne ala tali ʻa ʻene feilaulau tutú pe feilaulau-ʻofá. (Livitiko 5:1-6, 15, 17) Ko ia ai, ʻoku tau houngaʻia ʻi he mahuʻinga ʻo hono tauhi maʻu maʻu pē ha tuʻunga maʻa ʻi he ʻao ʻo Sihová? Kapau ʻoku tau loto ke ala tali ʻe he ʻOtuá ʻetau lotú, kuo pau ke tau fakavave ʻaupito fekauʻaki mo hano fakatonutonu ha faʻahinga maumauʻi pē ʻo e ngaahi lao ʻa e ʻOtuá. ʻOku totonu ke tau fakavave ke fakafaingamālieʻi kitautolu ki he ngaahi founga ki he tokoní kuo ʻomai ʻe he ʻOtuá—“ko e kau tangata matuʻotuʻa ʻo e fakatahaʻangá” pea mo e “feilaulau totogi . . . e tau gaahi agahala,” ko Sīsū Kalaisi.—Semisi 5:14, NW; 1 Sione 2:1, 2, PM.
9. Ko e hā ha faikehekehe tefito ʻi he vahaʻa ʻo e ngaahi feilaulau naʻe fai kia Sihová mo ia naʻe fai ki he ngaahi ʻotua loí?
9 Ko hono moʻoní, ko e fakamamafaʻi ʻo e ʻataʻatā mei ha ʻuli ʻo ha faʻahinga founga peé, ko e kehekehe tefito ia ʻi he vahaʻa ʻo e ngaahi feilaulau naʻe foaki kia Sihová pea mo ia naʻe foaki ki he ngaahi ʻotua loí ʻe he kakai ʻi he ngaahi puleʻanga takatakai ki ʻIsilelí. ʻI he fakamatala ki he tafaʻaki makehe ʻo e ngaahi feilaulau ʻi he Lao ʻa Mōsesé, ʻoku pehē ʻe he tohi ʻe taha: “ʻOku tau fakatokangaʻi nai ʻoku ʻikai ha fehokotaki mo e tongafisí pe talotaló; ʻikai ha fakasesele fakalotu, ʻikai ha ngaahi tafatafaʻi ai ʻo hoto sinó, pe paʻumutu toputapu, ko e ngaahi ouau fakakakano mo e fakafiefia fakaefehokotaki fakasino tōtuʻá naʻe tapui fakaʻaufuli; ʻikai ha ngaahi feilaulau fakaetangata; ʻikai ha ngaahi feilaulau ki he kau maté.” Ko e meʻá ni kotoa ʻokú ne fakahanga ʻa e tokangá ki he moʻoniʻi meʻa ʻe taha: Ko Sihová ʻoku māʻoniʻoni, pea ʻoku ʻikai te ne fakangofua pe hōifua ki he angahalá pe fakameleʻí ʻi ha faʻahinga founga pē. (Hapakuke 1:13) Ko e lotu mo e ngaahi feilaulau naʻe fai kiate iá naʻe pau ke maʻa mo taʻemele—fakaesino, fakaeʻulungaanga, mo e fakalaumālie.—Livitiko 19:2; 1 Pita 1:14-16.
10. ʻI he fehoanaki mo e akonaki ʻa Paula ʻoku lēkooti ʻi he Loma 12:1, 2, ko e hā ʻa e sivi fakalautelau fakaekita ʻoku totonu ke tau faí?
10 ʻI he vakai atu ki he meʻá ni, ʻoku totonu ke tau sivi fakalautelau kitautolu ʻi he ngaahi tafaʻaki kotoa pē ʻo e moʻuí ke fakapapauʻi ko ʻetau ngāue kia Sihová ʻokú ne ala tali. ʻOku totonu ke ʻoua ʻaupito te tau fakakaukau ʻo pehē ko e kehe pē ke tau kau ʻi he ngaahi fakataha faka-Kalisitiané pea ʻi he ngāue fakafaifekaú, ʻoku ʻikai ko ha fuʻu loko meʻa ʻa e meʻa ia ʻoku tau fai ʻi heʻetau moʻui fakafoʻituituí. ʻOku toe totonu ke ʻoua te tau ongoʻi ko e kau ʻi he ngaahi ngāue faka-Kalisitiané ʻi ha founga ko ha kalofanga ia kiate kitautolu mei he fiemaʻu ke fai ki he ngaahi lao ʻa e ʻOtuá ʻi he ngaahi tafaʻaki kehe ʻo ʻetau moʻuí. (Loma 2:21, 22) Heʻikai malava ke tau ʻamanekina ʻa e tāpuaki mo e hōifua ʻa e ʻOtuá kapau ʻoku tau fakaʻatā ha meʻa taʻemaʻa pe mele ʻi heʻene vakaí ke ne ʻuliʻi ʻetau fakakaukaú pe ngaahi ngāué. Fakakaukau atu ki he ngaahi lea ʻa Paulá: “Oku ou kole ai kiate kimoutolu, koe mea i he gaahi aloofa ogogofua ae Otua, ke mou atu ho mou jino koe feilaulau moui, mo maonioni, mo lelei ki he Otua, aia koe gaue oku tau mo kimoutolu ke fai. Bea oua naa fakatatau akimoutolu ki he mamani: ka ke matuaki liliu akimoutolu i he fakafoou o ho mou loto, koeuhi ke mou ilo bau ae finagalo koia oe Otua, a hono lelei, mo hono aoga, mo hono haohaoa.”—Loma 12:1, 2, PM.
Fai Loto-ʻAufuatō ʻa e Ngaahi Feilaulau ʻo e Fakafetaʻí
11. Ko e hā ʻoku kau ki he foʻi lea “fai fakaha,” naʻe lave ki ai ʻi he Hepelu 10:23?
11 ʻI he tohi ki he kau Hepeluú, ʻoku hoko atu hono fakahanga ʻe Paula ʻa e tokangá ki ha tafaʻaki mātuʻaki mahuʻinga ʻo e lotu moʻoní: “Ke tau kuku maʻu, taʻengaúe, ʻa e fai fakaha o ʻetau fakatuʻamelie, (seuke, ko ia naʻa ne tala ʻa e ngaahi palomesi ko e toko taha ʻoku fai ki heʻene lea).” (Hepelu 10:23) Ko e kupuʻi lea “fai fakaha” ʻoku ʻuhinga fakaefoʻilea ko e “vete,” pea ʻoku toe lea ʻa Paula ʻo fekauʻaki mo “ha feilaulau fakafetaʻi.” (Hepelu 13:15) ʻOku fakamanatu mai ʻe he meʻá ni kiate kitautolu ʻa e faʻahinga feilaulau naʻe foaki ʻe he kau tangata hangē ko ʻĒpeli, Noa, mo ʻĒpalahamé.
12, 13. Ko e hā naʻe fakamoʻoni ki ai ha tokotaha ʻIsileli ʻi he taimi naʻá ne foaki ai ha feilaulau tutú, pea ko e hā ʻoku malava ke tau fai ke tapua mei ai ʻa e laumālie tatau?
12 ʻI he taimi naʻe fai ai ʻe ha taha ʻIsileli ha feilaulau tutu, naʻe fai ia “i hono loto lelei be . . . i he ao o Jihova.” (Livitiko 1:3, PM) ʻAki ha feilaulau pehē, naʻá ne fai fakahāhā ai ʻi hono lotó, pe fakamoʻoni, fekauʻaki mo e ngaahi tāpuaki lahi fau mo e anga-ʻofa ʻa Sihova ki hono kakaí. Manatuʻi ko ha tafaʻaki naʻe makehe ai ʻa e feilaulau tutú he naʻe fakakaʻanga ʻa e feilaulaú fakakātoa ia ʻi he ʻōlitá—ko ha fakaʻilonga feʻungamālie ʻo e anga-līʻoa mo e fakatapui kakato. ʻI he fehoanaki mo iá, ʻoku tau fakahāhā ʻetau tui ki he feilaulau huhuʻí mo ʻetau houngaʻia ki he tokonaki ko iá ʻi he taimi ʻoku tau ʻoatu loto-lelei ai mo loto-ʻaufuatō ʻetau “feilaulau fakafetaʻi . . . ʻa é ko e fua ʻo e loungutu” kia Sihova.
13 Neongo ʻoku ʻikai ke fai ʻe he kau Kalisitiané ia ha ngaahi feilaulau moʻoni—monumanu pe vesitapolo—ʻoku nau maʻu ha fatongia ke faifakamoʻoni ki he ongoongo lelei ʻo e Puleʻangá pea ke ngaohi ʻa e kau ākonga ʻa Sīsū Kalaisí. (Mātiu 24:14; 28:19, 20) ʻOkú ke ngāueleleiʻaki ʻa e ngaahi faingamālié ke kau ʻi hono talaki fakahāhā ʻa e ongoongo lelei ʻo e Puleʻanga ʻo e ʻOtuá koeʻuhi ke malava ke ʻilo ha kakai tokolahi ange ki he ngaahi meʻa fakaofo kuo tukutauhi mai ʻe he ʻOtuá maʻá e faʻahinga talangofua ʻo e tangatá? ʻOkú ke fakamoleki loto-lelei atu ho taimí mo ho iví ʻi hono akoʻi ʻa e faʻahinga mahuʻingaʻiá mo tokoniʻi kinautolu ke nau hoko ko e kau ākonga ʻa Sīsū Kalaisi? Ko ʻetau kau faivelenga ʻi he ngāue fakafaifekaú, hangē ko e nanamu fakafiemālie ʻo ha feilaulau tutú, ʻoku fakahōifua lelei ia ki he ʻOtuá.—1 Kolinito 15:58.
Fiefia ʻi he Feohi mo e ʻOtuá pea mo e Tangatá
14. ʻOku anga-fēfē ʻa e faitatau ʻa e ngaahi lea ʻa Paula ʻi he Hepelu 10:24, 25 pea mo e foʻi fakakaukau ʻo e feilaulau-ʻofá?
14 Fakaʻosí, ʻoku fakahanga ʻe Paula ʻa e tokangá ki hotau vahaʻangatae mo e kaungā Kalisitiané ʻi heʻetau lotu ki he ʻOtuá. “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho.” (Hepelu 10:24, 25) Ko e ngaahi kupuʻi lea “ke fefakaʻaiʻaiʻaki ʻa kitautolu ki he feʻofaʻaki mo e ngaue lelei,” “ʻetau ngaahi fakataha,” mo e “feenginakiʻaki” ʻoku nau fakamanatu kotoa mai kiate kitautolu ʻa e meʻa naʻe fai ʻe he feilaulau-ʻofá maʻá e kakai ʻa e ʻOtuá ʻi ʻIsilelí.
15. Ko e hā ʻa e faitatau ʻoku tau sio ki ai ʻi he vahaʻa ʻo e feilaulau-ʻofá pea mo e ngaahi fakataha faka-Kalisitiané?
15 Ko e kupuʻi lea “ngaahi feilaulau-ʻofa” ʻoku liliu ʻi he taimi ʻe niʻihi ko e “ngaahi feilaulau fakamelino.” Ko e foʻi lea faka-Hepelū ki he “melino” ko ʻení ʻoku ʻi he tuʻunga pululá ia, ʻokú ne fakahaaʻi nai ko e kau ʻi he ngaahi feilaulau peheé ʻoku iku ai ki he melino mo e ʻOtuá pea mo e melino mo e kaungālotú. ʻI he fekauʻaki mo e feilaulau-ʻofá, ʻoku pehē ʻe ha mataotao ʻe taha: “Ko e moʻoni, naʻe hoko ʻeni ko ha foʻi taimi ʻo e feohi fiefia mo e ʻOtua ʻo e Fuakavá, ʻa ia naʻá Ne afeitaulalo ke ne hoko ai ko e Tokotaha-Fakaafe ʻa ʻIsileli ʻi he houa kai fakaefeilaulaú, naʻa mo ʻEne hoko maʻu pē ko honau Tokotaha-Talitali.” ʻOku fakamanatu mai ʻe he meʻá ni kiate kitautolu ʻa e talaʻofa ʻa Sīsū: “Ko e potu kuo fakataha ai ha toko ua pe ha toko tolu ki hoku hingoa, ʻoku ou ʻi he potu ko ia au ʻi honau lotolotonga.” (Mātiu 18:20) ʻI he taimi kotoa pē ʻoku tau maʻu ai ha fakataha faka-Kalisitiane, ʻoku tau maʻu ai ʻa e ʻaonga mei he feohi fakatupu langa hake, ko e fakahinohino fakalototoʻa, pea mei he fakakaukau ʻoku ʻi ai ʻa hotau ʻEiki ko Sīsū Kalaisí fakataha mo kitautolu. ʻOku ʻai ʻe he meʻa ko iá ha fakataha faka-Kalisitiane ʻo hoko ko ha taimi fakafiefia mo fakatupu tui mālohi moʻoni.
16. ʻI he fakakaukau atu ki he feilaulau-ʻofá, ko e hā ʻokú ne ʻai ʻa e ngaahi fakataha faka-Kalisitiané ke tautefito ʻene fakafiefiá?
16 ʻI he feilaulau-ʻofá, ko e kotoa ʻo e ngakó—ʻoku takatakai ʻi he ngaahi ngākaú, ko e ongo kofuuá, ko e konga ʻi he funga ʻaté, pea mo e ngaahi kongalotó, pea pehē ki he hiku ngako ʻo e sipí—naʻe foaki ia kia Sihova ʻaki hono tutu, ke kohu hake ʻi he ʻōlitá. (Livitiko 3:3-16) Naʻe pehē ko e ngakó ʻa e konga fakatupu-sino taha mo lelei taha ʻo ha monumanu. Ko hono foaki hake ia ʻi he ʻōlitá naʻá ne fakaʻilongaʻi ʻa hono ʻoatu ʻo e lelei tahá kia Sihová. Ko e meʻa ʻokú ne ʻai ʻa e ngaahi fakataha faka-Kalisitiané ke tautefito ʻene fakafiefiá ko e ʻikai ngata pē ʻi heʻetau maʻu ʻa e fakahinohinó ka ko e toe foaki atu ʻo e fakafetaʻi kia Sihová. ʻOku tau fai ʻeni ʻaki ʻa e kau ki ai—ʻaki ʻetau feinga anga-fakatōkilalo ka ko e lelei tahá ia—ʻi he hiva loto-moʻoni, fanongo tokanga, mo fai ha poupou ʻo ka malava. “Mou [fakafetaʻi] kia Jihova”! ko e kalanga ia ʻa e tokotaha-tohi-sāmé. “Hiva kia Jihova aki ae hiva foou, moe [fakafetaʻi] kiate ia i he fakataha oe kakai maonioni.”—Sāme 149:1, PM.
Ngaahi Tāpuaki Lahi Fau Meia Sihova ʻOku Fakatatali Mai Kiate Kitautolu
17, 18. (a) Ko e hā ʻa e feilaulau maʻongoʻonga naʻe fai ʻe Solomone ʻi hono huufi ʻo e temipale ʻi Selusalemá? (e) Ko e hā ʻa e ngaahi tāpuaki ki he kakaí naʻe tupu mei he kātoanga ʻi hono huufi ʻo e temipalé?
17 ʻI hono huufi ʻo e temipale ʻi Selusalemá, ʻi he māhina hono fitu ʻo e taʻu 1026 K.M., naʻe foaki ai ʻe Tuʻi Solomone ha “lavaki fai feilaulau ki he ʻao ʻo Sihova,” ʻo kau ai ʻa e “[feilaulau tutu] mo e feilaulau-meʻakai, mo e ngako ʻo e feilaulau-ʻofa.” Tānaki atu ki he meʻa naʻe foaki ʻi he ngaahi feilaulau-meʻakaí, ko hono fakakātoá ko e fanga pulu ʻe 22,000 mo e fanga sipi ʻe 120,000 naʻe feilaulauʻaki ʻi he kātoanga ko iá.—1 Tuʻi 8:62-65.
18 ʻOku lava ke ke fakaʻuta atu ki he fakamole pea mo e lahi ʻo e ngāue naʻe fai ʻi ha fuʻu kātoanga lahi fau pehē? Neongo ia, ʻoku hā mahino naʻe laka mamaʻo ʻaupito ʻa e ngaahi tāpuaki ia naʻe maʻu ʻe ʻIsilelí ʻi he fakamole naʻe faí. ʻI he ngataʻanga ʻo e ngaahi kātoangá, naʻe hanga ʻe Solomone ʻo “tukuange ʻa e kakai, pea naʻa nau talamonu ki he tuʻi, ʻo nau ō ki honau ngaahi teniti ʻoku nau fiefia, pea lelei honau loto ʻi he fuʻu lelei kuo fai ʻe he ʻEiki ki heʻene tamaioʻeiki ko Tevita, pea mo Isileli ko hono kakai.” (1 Tuʻi 8:66) ʻOku moʻoni, hangē pē ko hono fakalea ʻe Solomoné, “ko e tapuaki ʻa Sihova, ko ia ia ʻoku fakakoloa: pea ʻoku ʻikai te ne ʻatu mo ia ha mamahi.”—Palovepi 10:22 (Lea Fakatātā, PM).
19. Ko e hā ʻoku malava ke tau fai ke tau maʻu ai ʻa e ngaahi tāpuaki maʻongoʻonga meia Sihová he taimí ni pea aʻu ʻo taʻengata?
19 ʻOku tau lolotonga moʻui ʻi he taimi ʻa ia ko e “ʻata pe ʻo e ngaahi lelei ka hoko” kuo fetongi ia ʻe he “imisi totonu ʻo e ngaahi meʻa.” (Hepelu 10:1) Ko Sīsū Kalaisi, ʻi hono ngafa ko e Taulaʻeiki Lahi ʻikai fakaetaipé, kuó ne ʻosi hū ki hēvani tonu pea ʻoatu ʻa e mahuʻinga ʻo hono taʻataʻá tonu ke fai ʻa e fakalelei maʻá e faʻahinga kotoa ʻoku nau ngāueʻi ʻa e tui ki heʻene feilaulaú. (Hepelu 9:10, 11, 24-26) Makatuʻunga ʻi he feilaulau lahi ko iá pea ʻi he foaki loto-ʻaufuatō ki he ʻOtuá ʻetau ngaahi feilaulau ʻo e fakafetaʻí ʻa ia ʻoku maʻa mo taʻemelé, ʻoku malava mo kitautolu ke laka atu ‘fiefia, pea lelei hotau lotó,’ ʻo hanga atu ki muʻa ki he ngaahi tāpuaki hulu fau meia Sihová.—Malakai 3:10.
ʻE Anga-Fēfē Haʻo Tali?
• Ko e hā ʻa e akonaki mo e fakafiemālie ʻoku malava ke tau tātānaki mei he fakamatala ʻi he Laó ʻo fekauʻaki mo e ngaahi feilaulaú mo e ngaahi foakí?
• Ko e hā ʻa e ʻuluaki fiemaʻu ki ha feilaulau ke hoko ʻo ala talí, pea ko e hā ʻa e ʻuhinga ʻoku ʻomai ʻe he meʻa ko iá kiate kitautolú?
• Ko e hā ʻoku malava ke tau foaki ʻa ia ʻoku ala fakatatau ia ki ha feilaulau tutu mei hotau lotó?
• ʻI he ngaahi founga fē ʻoku malava ke fakatatau ai ʻa e ngaahi fakataha faka-Kalisitiané ki ha feilaulau-ʻofá?
[Fakatātā ʻi he peesi 18]
Ko e feilaulau huhuʻi ʻa Sīsuú naʻe tokonaki mai ʻe Sihova ki he fakamoʻui ʻo e faʻahinga ʻo e tangatá
[Fakatātā ʻi he peesi 20]
Ke ala tali ʻe Sihova ʻetau ngāué, kuo pau ke tau ʻatā mei he mele ʻi ha faʻahinga founga pē
[Fakatātā ʻi he peesi 21]
ʻOku tau fakamoʻoni fakahāhā ki he anga-lelei ʻa Sihová ʻi heʻetau kau ʻi he ngāue fakafaifekaú