Hoko ʻo Fakakaukau Fakapotopoto ʻi he Ofi ʻa e Ngataʻangá
1 ʻOku toutou fakamatalaʻi ʻe he Folofola ʻa e ʻOtuá ʻa e ʻaho ʻo Sihová ʻoku hoko mai “ʻo hange ha kaihaʻa”—ʻa ia ʻoku haʻu fakafokifā, fakavavevave mo fakafufū. (1 Tes. 5:2; Mt. 24:43; 2 Pita 3:10; Fkh. 3:3; 16:15) “Ko ia,” ko e lea ia ʻa Sīsuú, “ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mt. 24:44) ʻE lava fēfē ke tau tauhi maʻu ʻetau mateuteu fakalaumālié ʻi he ofi mai ʻa e ngataʻangá? ʻOku maʻu ha kī ʻi he ekinaki fakamānavaʻi: “Hoko ʻo fakakaukau fakapotopoto.”—1 Pita 4:7, NW.
2 Ko e fakakaukau fakapotopotó ʻoku kau ki ai ʻa e vakai ki he ngaahi meʻá mei he tuʻunga ʻa Sihová. (Ef. 5:17) ʻOkú ne tokoniʻi kitautolu ke tau vakai kia kitautolu ko e “ʻāunofo mo e muli” ʻi he lotolotonga ʻo e fokotuʻutuʻu lolotonga ʻo e ngaahi meʻá. (1 Pita 2:11) ʻOkú ne ʻai ke tau malava ʻo ʻiloʻi ʻa e meʻa ʻoku mahuʻinga moʻoní, ke fokotuʻu ʻa e ngaahi meʻa ke muʻomuʻá, pea ke fai ha ngaahi fili lelei.—Fili. 1:10.
3 Fokotuʻu ha Ngaahi Taumuʻa Fakalaumālie: Ko hono fokotuʻu mo hono aʻusia ʻa e ngaahi taumuʻa fakalaumālié ʻoku tokoniʻi ai kitautolu ke tau hoko ʻo fakakaukau fakapotopoto. ʻOku ʻi ai haʻo ngaahi taumuʻa fakalaumālie ʻokú ke lolotonga tuli ki ai? ʻOkú ke feinga ke lau ʻa e Tohitapú ʻi he ʻaho kotoa pē, maʻu ʻa e ngaahi fakataha faka-Kalisitiané kotoa, lau ʻa e ʻīsiu taki taha ʻo e Taua Leʻo mo e ʻĀ Hake!, pe ko hono fakalahi nai ʻa hoʻo kau ki he ngāue fakafaifekaú? Kapau te ke fokotuʻu ʻa e ngaahi taumuʻa ʻoku feʻunga kia koé, kīvoi ʻi he tuli ki aí, pea kole kia Sihova ke ne tāpuakiʻi hoʻo ngaahi feingá, te ke ʻohovale nai ʻi he ngaahi olá.
4 Naʻe ʻeke ʻe ha tokotaha mātuʻa ki ha ongo meʻa mali kei siʻi fekauʻaki mo ʻena ngaahi taumuʻa fakalaumālié. Naʻe ʻai ʻe he fehuʻí ke na ʻiloʻi kapau naʻá na fakafaingofuaʻi ʻena moʻuí pea fakangata ʻa e moʻua fakamafasiá, naʻe lava ke na tāimuʻa. Naʻá na fili ke ʻai ia ko ʻena taumuʻa. Naʻá na totongi tōtōivi ʻo ʻosi ʻa e moʻuá pea maʻu ʻa e ngaahi founga ke fakasiʻisiʻi ai ʻa e ngaahi ngāue naʻe ʻikai fiemaʻu ʻa ia naʻá ne toʻo ʻa hona taimí mo e iví. ʻI ha taʻu pē ʻe taha mei ai, naʻá na aʻusia ai ʻena taumuʻá. Ko e hā hono olá? ʻOku pehē ʻe he husepānití: “Ka ne taʻeʻoua ʻa e ngaahi taumuʻá naʻe ʻikai te ma ʻi he tuʻunga ʻokú ma ʻi ai he taimi ní. ʻOkú ma fiefia ange. ʻOku nonga ange mo lelei ange ʻema moʻuí. ʻOku ʻi ai hono ʻuhinga mo e taumuʻa moʻoni.”
5 ʻI heʻetau tatali ki he ʻaho ʻo Sihová, ʻofa ke tau tauhi maʻu ʻetau mateuteu fakalaumālié ʻaki ʻetau moʻui fakataha mo e fakakaukau fakapotopotó, ʻo hanganaki hangataha ki hono fai ʻa e finangalo ʻo e ʻOtuá.—Tai. 2:11-13.