LĒSONI 11

Founga ʻe Lava Ke Ke Maʻu ʻAonga Lahi Taha Ai mei he Tohi Tapú

Tatau Kuo Pulusi

Kuo ʻi ai nai ha taimi kuó ke ongoʻi lōmekina ai ʻi he fakakaukau atu ki hano kamataʻi ha fuʻu poloseki lahi? Ke ʻai ia ke hā ngali faingofua angé, te ke vahevahe nai ia ki ha ngaahi ngāue iiki ange. ʻOku tatau pē eni ʻi heʻene haʻu ko ia ki hono lau ʻa e Tohi Tapú. Te ke ʻeke nai, ‘Te u kamata ʻi fē?’ ʻI he lēsoni ko ení, te tau lāulea ai ki he ngaahi meʻa faingofua ʻe niʻihi ʻe lava ke ke fai ke tokoniʻi ai koe ke ke fiefia ʻi hono lau mo ako ʻa e Tohi Tapú.

1. Ko e hā ʻoku totonu ai ke tau lau maʻu pē ʻa e Tohi Tapú?

Ko ha tokotaha ʻokú ne lau maʻu pē ʻa e Tohi Tapú pe “lao ʻa Sihová,” te ne fakatou fiefia mo lavameʻa. (Lau ʻa e Saame 1:1-3.) Ke kamataʻakí, feinga ke lau ia ʻi ha ngaahi miniti siʻi pē ʻi he ʻaho taki taha. Ko e lahi ange hoʻo alāanga mo e Folofola ʻa e ʻOtuá, ko e lahi ange ia hoʻo fiefia ʻi hoʻo lau Tohi Tapú.

2. Ko e hā te ne tokoniʻi koe ke ke maʻu ʻaonga mei hono lau ʻa e Tohi Tapú?

Ke maʻu ʻa e ʻaonga lahi taha mei hono lau ʻa e Tohi Tapú, ʻoku fiemaʻu ke tau kiʻi tuʻu pea fakakaukau fekauʻaki mo e meʻa ʻoku tau laú. ʻOku totonu ke tau fakatou lau ia mo “fakalaulauloto ki ai.” (Siosiua 1:8, fakamatala ʻi lalo) ʻI hoʻo lau iá, ʻeke hifo kiate koe ʻa e ngaahi fehuʻi hangē ko e: ‘Ko e hā ʻoku tala mai heni kiate au fekauʻaki mo Sihova ko e ʻOtuá? ʻE lava fēfē ke u ngāueʻaki eni ʻi heʻeku moʻuí? ʻE lava fēfē ke u ngāueʻaki ʻa e ngaahi veesi ko ení ke tokoniʻi ai ʻa e niʻihi kehé?’

3. ʻE lava fēfē ke ke vaheʻi ʻa e taimi ke lau ai ʻa e Tohi Tapú?

ʻOkú ke fāinga ke maʻu ha taimi ki he lau Tohi Tapú? Ko e tokolahi ʻo kitautolu ʻoku pehē. Feinga ke “ngāue lelei taha ʻaki ho taimí.” (ʻEfesō 5:16) ʻE lava ke ke fai eni ʻaki hono vaheʻi ha taimi pau ke lau ai ʻa e Tohi Tapú ʻi he ʻaho taki taha. Ko e kakai ʻe niʻihi ʻoku nau vaheʻi ʻa e taimi ke lau ʻa e Tohi Tapú ʻi he taimi hengihengí. Ko e niʻihi ʻoku nau fili ha taimi ki mui ange ʻi he ʻahó, mahalo ʻi he lolotonga ʻenau mālōlō kai hoʻataá. Ka ko e niʻihi ia ʻoku nau lau ʻa e Tohi Tapú ʻi he houa efiafí ki muʻa ke nau mohé. Ko e hā ʻa e taimi lelei taha kiate koé?

KELI LOLOTO ANGE

Ako ki he founga ke ʻai ai hoʻo lau Tohi Tapú ke fakamānako ange. Sio ki he founga ke ke teuteu lelei ai koeʻuhi ke ke maʻu ʻa e ʻaonga lahi taha mei hoʻo ako Tohi Tapú.

Fakatātā: Ko ha kiʻi tamasiʻi ʻokú ne ako ke saiʻia ʻi ha meʻakai pau ʻi ha vahaʻa taimi. 1. ʻOku vaʻinga ʻaki ʻe he kiʻi tamasiʻí ʻa e meʻakaí. 2. Ki mui ange, ʻoku kai ʻe he kiʻi tamasiʻí ʻa e meʻakaí. 3. ʻI he fuʻu lahi haké, ʻoku saiʻia ʻa e kiʻi tamasiʻí ʻi he meʻakaí. — Hangē pē ko ʻetau ako ke saiʻia ʻi ha ngaahi meʻakai kehekehe, ʻe lava ke tau ako ke saiʻia ʻi hono lau ʻa e Tohi Tapú

4. Hoko ʻo fiefia ʻi hoʻo lau Tohi Tapú

ʻE ʻikai nai ke faingofua ke kamata lau ʻa e Tohi Tapú. Neongo ia, ʻe lava ke tau “fakatupu ha holi” ke fai pehē, ʻo hangē pē ko hano fakatupulekina ʻe ha taha ʻa e saiʻia ʻi ha meʻakai foʻou. Lau ʻa e 1 Pita 2:2, pea lāulea leva ki he fehuʻi ko ení:

ʻOkú ke fakakaukau kapau te ke lau ʻa e Tohi Tapú ʻi he ʻaho kotoa, ʻe lava ke hoko ia ko ha meʻa te ke fiefia ai pea fakatuʻotuʻa atu ki ai?

Huluʻi ʻa e VITIOÓ ke sio ki he founga naʻe kamata ke fiefia ai ʻa e kakai ʻe niʻihi ʻi hono lau ʻa e Tohi Tapú. Lāulea leva ki he ngaahi fehuʻi hokó.

VITIŌ: Fakatupulekina ʻe he Toʻutupú ʻa e ʻOfa ki he Folofola ʻa e ʻOtuá (5:33)

ʻI he vitioó, ko e hā ʻa e ngaahi pole naʻe ikuʻi ʻe he toʻutupú?
Ko e hā naʻá ne tokoniʻi kinautolu ke pipiki ki heʻenau taumuʻa ko hono lau ʻa e Tohi Tapú?
Naʻe anga-fēfē ʻenau ʻai ʻenau lau Tohi Tapú ke fakamānako angé?

Ngaahi fokotuʻu ke tokoniʻi koe ke kamatá:

Fili ha liliu Tohi Tapu ʻoku falalaʻanga pea ʻoku fakalea ʻi he lea ʻi onopōní. Vakaiʻi ʻa e Liliu Tohi Tapu Māmani Foʻoú kapau ʻoku ala maʻu ʻi hoʻo leá.
ʻUluaki lau ʻa e ngaahi konga ʻoku fakamānako taha kiate koé. Ki ha ngaahi fokotuʻu, sio ki he saati “Kamata Hono Lau ʻa e Tohi Tapú.”
Tauhi ha lēkooti ʻo e meʻa ʻokú ke laú. Ngāueʻaki ʻa e saati “Lēkooti Hoʻo Lau Tohi Tapú” ʻi he tohi ko ení.
Ngāueʻaki ʻa e JW Library^® app. ʻE lava ke ke lau mo fanongo ai ki he Tohi Tapú ʻi he ngaahi lea lahi ʻi ha feituʻu pē ʻo ngāueʻaki ha telefoni toʻotoʻo pe ko ha toe meʻangāue fakaʻilekitulōnika kehe.
Ngāueʻaki ʻa e fakamatala fakalahi ʻi he Liliu Tohi Tapu Māmani Foʻoú. ʻOku kau ai ʻa e ngaahi mape, saati, pea mo e lea mo hono ʻuhinga ʻa ia ʻe ʻai ai hoʻo lau Tohi Tapú ke fakamānako ange.

5. Teuteu ki hoʻo ako Tohi Tapú

Lau ʻa e Saame 119:34, pea lāulea leva ki he fehuʻi ko ení:

Ko e hā ʻoku lelei ai ke lotu ki muʻa ke lau ʻa e Tohi Tapú pe teuteu ki hoʻo ako Tohi Tapú?

ʻE lava fēfē ke ke maʻu ʻa e ʻaonga lahi taha mei hoʻo taimi ako taki taha? ʻI hoʻo teuteu ha lēsoni ʻi he ako ko ení, feinga ke muimui ki he founga ko ení:

A. Lau ʻa e ngaahi palakalafi ʻoku kamataʻaki ʻa e lēsoní.
E. Kumi pea lau ʻa e ngaahi konga Tohi Tapú, pea feinga ke mahinoʻi ʻa e anga ʻo ʻenau fekauʻaki mo e fakamatalá.
F. Fakaʻilongaʻi ʻa e ngaahi foʻi lea pe kupuʻi lea ʻokú ne tali ʻa e fehuʻi taki taha; ʻe tokoniʻi ai heni koe ke lāulea ki he lēsoní mo hoʻo faiakó.

Fakatātā: Ko ha fefine ʻokú ne teuteu ki heʻene taimi ako Tohi Tapú. A. ʻOkú ne lau ʻa e peesi ʻuluaki ʻo e lēsoní. E. ʻOkú ne lau ʻa e ngaahi konga Tohi Tapu ʻoku haá. F. ʻOkú ne fakaʻilongaʻi ʻa e ngaahi foʻi lea mo e kupuʻi lea tefito ʻi he lēsoní.

Naʻá ke ʻiloʻi?

Kuo ngāueʻaki ʻe he Kau Fakamoʻoni ʻa Sihová ʻa e ngaahi liliu Tohi Tapu kehekehe. Neongo ia, ʻoku tautefito ʻemau houngaʻiá ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní koeʻuhi ʻoku tonu mātē, ʻoku māʻalaʻala pea ʻokú ne ngāueʻaki ʻa e huafa ʻo e ʻOtuá.—Sio ki he kupu ʻi he Uepisaití “ʻOku ʻi Ai Tonu ha Tohi Tapu ʻa e Kau Fakamoʻoni ʻa Sihová?”

ʻOKU PEHĒ ʻE HE NIʻIHI: “Ko hono ako ʻa e Tohi Tapú ko ha fuʻu ngāue lahi ia. ʻOku ʻikai ke ʻi ai haʻaku taimi pe ivi ki ai.”

Ko e hā hoʻo fakakaukaú?

FAKANOUNOU

Ke maʻu ʻa e ʻaonga lahi taha mei he Tohi Tapú, vaheʻi ʻa e taimi ke lau ai iá, lotu ke ke mahinoʻi ʻa e meʻa ʻokú ke laú pea teuteu ki hoʻo taimi ako Tohi Tapú.