Ko Hono Maʻu ʻa e Ngaahi Fakatahá​—Ko ha Fatongia Mafatukituki Ia

¹ Ko ha meʻa mafatukituki kiate koe ʻa hono maʻu ʻa e ngaahi fakatahá? Ko e fehuʻi fakatupu fakakaukau ia, ʻikai ko ia? ʻOku ʻikai ha veiveiua ko e tokolahi taha ʻo kitautolu ʻoku tau pehē ʻoku tau houngaʻia ʻi he ngaahi fakatahá. Kae kehe, ʻoku fakahā mei he ngaahi lipootí ko e maʻu ʻo e ngaahi fakataha ʻa e fakatahaʻangá kuo holo ki muí ni mai. Ko e hā nai hono tupuʻangá? ʻOku fakaʻatā ʻe ha niʻihi ʻo kitautolu ʻa e ngaahi ngāue fakamāmani ʻoku ʻikai fie maʻú, helaʻiá, homueká, ko ha ongoʻi meimei puke, pe ko e ʻea kovi siʻisiʻí ke ne uesia hotau fatongia ke maʻu maʻu pē ʻa e ngaahi fakatahá? (Teu. 31:12) Koeʻuhi ʻoku fie maʻu ʻe he Tohi Tapú ke fai ʻa e meʻá ni, ʻoku totonu ki he toko taha kotoa ʻo kitautolu ke fai ha fakakaukau ʻi he faʻa lotu ʻo kau ki he fehuʻi, Ko ha meʻa mafatukituki kiate au ʻa hono maʻu ʻa e ngaahi fakatahá?

² ʻOku ʻi ai ʻa e niʻihi ʻo hotau ngaahi tokouá ʻoku nau lue lalo ʻo laulau houa ʻi he ngaahi hala efua mo kolosi atu ʻi he ngaahi vaitafe ʻoku fele ai ʻa e fanga kalokatailé ke nau maʻu ʻa e ngaahi fakatahá. ʻI hoʻo fakatahaʻangá tonu, ʻoku ʻi ai nai ʻa e faʻahinga loto-tōnunga ʻoku “ʻikai pē ke nau liʻaki” ʻe kinautolu hono maʻu ʻa e ngaahi fakatahá neongo ʻa e ngaahi palōpalema mamafa ʻo kau ki he moʻui fakasinó, faingataʻaʻia fakasinó, pe ko e mātuʻaki lahi ʻa e ngāue ʻi he ngāueʻangá pe ngaahi fie maʻu lahi ki he ngaahi lesoni ʻi he ʻapi akó. (Luke 2:37) Ko e hā ʻoku nau fai ai ʻa e feinga ke maʻu ʻa e ngaahi fakatahá? Koeʻuhi ʻoku nau ʻiloʻi he ʻikai te nau malava ke lavaʻi ʻa e ngaahi palōpalema ʻo e māmani ko ʻeni ʻoku fonu he ngaahi kulukiá ʻaki pē honau mālohí. Kuo pau ke nau falala ki he mālohi ʻoku tokonaki mai ʻe he ʻOtuá.​—2 Kol. 12:​9, 10.

³ ʻOku tau muimui ʻi he ʻahó ni ʻi he sīpinga naʻe fokotuʻu ʻe he muʻaki kau Kalisitiané, ʻa ia naʻa nau fakatahataha fakataha maʻu pē ke lotu, fetalanoaʻaki ʻi he ngaahi meʻa naʻe hokosia, mo ako ʻa e Folofola ʻa e ʻOtuá. (Ng. 4:​23-30; 11:​4-18; Kol. 4:16) ʻOku akoʻi kitautolu ʻo kau ki he kikite mo e tokāteline ʻa e Tohi Tapú, pea pehē foki mo e tōʻonga fakaʻotuá mo e ʻulungāanga maʻa faka-Kalisitiané, pea fakataha mo e akonaki faingatonu ki hono fakaleleiʻi ʻetau moʻuí he taimí ni ʻi hono ngāueʻaki tokanga ʻa e ngaahi tefitoʻi moʻoni mei he Tohi Tapú. (1 Tīm. 4:8) Tānaki atu ki ai, ʻoku fakamanatuʻi mai ʻetau ʻamanaki ʻe ʻi ai ʻa e ʻaho ʻe ngata ai ʻa e ngaahi palōpalemá mo e mamahí. ʻOku mātuʻaki mahuʻinga ke tauhi ke moʻui ai pē ʻa e ʻamanaki ko iá.​—Hep. 6:19.

⁴ Ko ha meʻa mafatukituki ki ho fāmilí ʻa hono maʻu ʻa e ngaahi fakatahá? ʻOku hoko ia ko e konga ia ʻo e ngaahi meʻa kuó ke vaheʻi ke fai ʻo hangē ko e taimi kaí pe ko e taimi ke ʻalu ai ki he ngāué? ʻI he ngaahi efiafi ʻoku fai ai ʻa e fakatahá, ʻokú ke fakatokangaʻi ʻokú ke fakakaukau pe te ke maʻu ʻa e fakatahá pe ʻikai, pe ʻoku hoko ʻa e feohi maʻu pē mo ho ngaahi tokouá ʻo ʻikai ko ha meʻa faʻiteliha pē ia ʻa ho fāmilí? ʻOku manatuʻi ʻe he kau malanga tokolahi ʻa e faʻifaʻitakiʻanga ʻa ʻenau ngaahi mātuʻa fakatapuí ʻi heʻenau tupu haké. ʻOku manatuʻi ʻe ha taha ʻo e kau mātuʻá: “Ko e meʻa naʻe faʻa fai ʻe he ʻeku tamaí naʻá ne fakapapauʻi maʻu pē ʻoku ʻalu ʻa e fāmilí ki he ngaahi fakatahá. Kapau naʻe ʻi ai ha taha ʻe puke, ko ha taha ʻo kimautolu ʻe lava ke nofo ʻi ʻapi mo ia, ka ko hono toengá te nau ʻalu ki he fakatahá!”

⁵ ʻI he ngaahi tatau hoko mai ʻo e Ko ʻEtau Ngāue Fakafaifekau ʻo e Puleʻangá, te tau lāulea ai ki he ʻaonga ʻo e ngaahi fakataha taki taha ʻa e fakatahaʻangá ʻi he taumuʻa ke tokoni ke langa hake ʻa e loto-hounga ki he ngaahi tokonaki fakalaumālie ko iá. Kapau ʻe fie maʻu ke ʻai ʻa hoʻo maʻu ʻa e ngaahi fakatahá ke ʻoua ʻe tō mokosi, ʻoku mau tui ko e ngaahi kupu ko iá te nau tokoniʻi koe ke ke ʻilo ʻa e ngaahi meʻa ʻaonga ʻoku ʻikai te ke maʻú. ʻE fakakau ki ai mo e ngaahi fakamanatu ke tokoni kiate kinautolu ʻoku nau fakahoko ʻa e ngaahi fakatahá, pea toe pehē ki he ngaahi fokotuʻu ʻe malava ke tau ngāueʻaki ʻe kitautolu kātoa ʻi heʻetau teuteu ke kau ki he ngaahi fakatahá. Fēfē ke fai ʻe ho fāmilí ha fakakaukau ki ai ʻaki ʻa e faʻa lotu ʻo kau ki he anga ʻo hoʻomou maʻu ʻa e ngaahi fakatahá? Pea fai leva ha liliu ʻoku mātuʻaki fie maʻu ʻi hoʻo taimi-tēpilé. Ko e maʻu maʻu pē ʻa e ngaahi fakatahá ko e konga taʻe ala tuku ia ʻo ʻetau ako fakateokalatí pea ʻoku totonu ke hoko ko ha meʻa mātuʻaki mafatukituki moʻoni ia.