Ko e Faʻahinga Laumālie Fēfē ʻOkú Ke Fakahāhaá?

¹ Naʻe fakaʻosiʻaki ʻe Paula ʻa ʻene tohi ki he fakatahaʻanga ʻi Filipaí ʻa e akonaki ko ʻení: “Ko e Kelesi ʻa e ʻEiki ko Sīsū Kalaisi, ʻofa ke ʻi homou laumalie ia.” (Fili. 4:23) Naʻá ne fakaongoongoleleiʻi kinautolu ki heʻenau mahuʻingaʻia moʻoni ʻi hono malangaʻi ʻa e ongoongo leleí pea pehē ki heʻenau fetokangaʻaki ʻofa māfana ki heʻenau leleí.​—Fili. 1:​3-5; 4:​15, 16.

² ʻOku totonu ko ʻetau holí ia ke fakahāhā ʻa e laumālie tatau pē ʻi heʻetau fakatahaʻangá. ʻI hono fakahāhā ʻe he tokotaha kotoa ʻa e faivelenga, anga-lelei, mo e anga-ʻofa ʻi he tali kakaí, ʻoku fakatupu ai ʻa e laumālie ʻoku hoko ʻo hā mahino ki he kau mamatá. Ko e fakakaukau paú mo e ʻofá ʻoku hoko ai ʻa e fāʻūtaha mo e fakalakalaka fakalaumālié. (1 Kol. 1:10) ʻOku hoko mei he ʻikai ke fakakaukau paú ʻa e fakalotosiʻi mo e fakapāpākū.​—Fkh. 3:​15, 16.

³ Takimuʻa ʻa e Kau Mātuʻá: Ko e fatongia ʻo e kau mātuʻá ke tauhi ha laumālie lelei mo pau ʻi honau lotolotongá pea mo ʻenau fakatahaʻangá. Ko e hā ʻa hono ʻuhingá? Koeʻuhi he ʻe lava ke tākiekina ʻa e fakatahaʻangá ʻe honau ʻulungaangá mo ʻenau fakakaukaú. ʻOku tau houngaʻia ʻi hono maʻu ha kau mātuʻa ʻoku nau faivelenga ʻi he ngāue fakamalangá, ʻoku nau talitali kitautolu ʻaki ha malimali māfana mo ha lea anga-ʻofa, pea ʻoku pau mo fakatupu langa hake ʻa ʻenau akonakí, tatau ai pē pe ʻoku fai fakafoʻituitui mai, pe fai mei he peletifoomú.​—Hep. 13:7.

⁴ Ko e moʻoni, ʻoku totonu kiate kitautolu hono kotoa ke tau kau ki hono ʻai ʻa e fakatahaʻangá ke anga-fakakaumeʻa, anga-ʻofa ʻi he tali kakaí, faivelenga, mo fakakaukau fakalaumālie. ʻOku lava ke tau fakahāhā fakafoʻituitui ʻa e māfana mo e ʻofa ʻi heʻetau feohi mo e niʻihi kehé. (1 Kol. 16:14) ʻOku totonu ke ʻoua ʻe ʻi ai ha mavahevahe ʻi he taʻumotuʻa, faʻahinga, ako pe ngaahi tuʻunga fakaʻekonōmika ʻi hotau lotolotongá. (Fakafehoanaki mo ʻEfesō 2:21.) Pea koeʻuhi ko ʻetau ʻamanakí, ʻoku lava ke tau fakahāhā ʻa e laumālie ʻo e fiefia, anga-ʻofa ʻi he tali kakaí, mo e faivelenga ʻi he ngāue fakamalangá.​—Loma 12:​13; Kol. 3:​22, 23.

⁵ Ko kinautolu kotoa ʻoku tau feohí, kau ki ai mo e faʻahinga foʻoú, ʻoku totonu ke ʻai ke nau ongoʻi ʻoku talitali lelei pea nau ongoʻi ʻa e ʻofa mo e mateaki ʻo e fetokouaʻakí. ʻI heʻetau ngāue fakamalangá mo ʻetau fakahāhā ʻa e ngaahi ʻulungaanga faka-Kalisitiane leleí, ʻoku tau fai ai ha fakamoʻoni ko e fakatahaʻangá ko e “pou mo e tuʻunga ʻo e Moʻoni.” (1 Tīm. 3:15) ʻOku tau hokosia ai foki ʻa e malu fakalaumālie ʻo fakafou mai ʻi he “nonga ʻa e ʻOtua” ʻokú ne maluʻi ʻa hotau lotó mo ʻetau ngaahi fakakaukaú. (Fili. 4:​6, 7) ʻOfa ke tau feinga fakamākukanga hono kotoa ke fakahāhā ʻa e faʻahinga laumālie te ne fakapapauʻi kitautolu ke tau maʻu ʻa e ʻofa maʻataʻatā ʻa Sihová fakafou mai ʻi he ʻEiki ko Sīsū Kalaisí.​—2 Tīm. 4:22.