‘ʻE Fēfē Haʻanau Fanongo?’
1 Naʻe fakamamafaʻi ʻe Sīsū ʻo pehē: “Kuo pau ke tomuʻa fanongonongo ʻa e ongoongolelei ki he ngaahi kakai kotoa pē.” (Mk. 13:10) Neongo ʻetau ngaahi feinga tōtōiví, ʻoku kei laui teau miliona ʻa e kakai kuo teʻeki ke nau maʻu ha fakamoʻoni fakafoʻituitui. ʻOku fakangatangata ʻe he ngaahi puleʻanga ʻe niʻihi ʻetau ngāué. Ko e ngaahi fonua lahi ʻoku tokolahi ʻaupito honau kakaí ʻa ia ʻoku tupulekina vave maʻu pē. Ko ia ai, ‘ʻe fēfē haʻanau fanongo?’—Loma 10:14, NW.
2 Falala kia Sihova: Kuo pau ke tau manatuʻi ʻoku ʻafioʻi ʻe Sihova ʻa e tuʻunga ʻoku ʻi ai ʻa e loto ʻo e kakai kotoa pē. Tatau ai pē pe ko e hā ʻa e tuʻunga ʻoku ʻi ai ha taha, kapau ʻokú ne fekumi loto-moʻoni ki he moʻoni fekauʻaki mo e ʻOtuá, te ne maʻu ia.—1 Kal. 28:9.
3 Naʻe hohaʻa ʻa ʻĒpalahame fekauʻaki mo e kakai ʻo Sōtoma mo Komolá. Ka naʻe fakapapauʻi ange ʻe he ʻOtuá kiate ia heʻikai ke fakaʻauha ʻa Sōtoma kapau ko ha kakai māʻoniʻoni pē ʻe toko hongofulu ʻe maʻu aí. (Sen. 18:20, 23, 25, 32) Kuo ʻikai ʻaupito ke fakaʻauha ʻe Sihova ʻa e māʻoniʻoní fakataha mo e fulikivanú, ʻo hangē ko ia naʻe hā ʻi hono fakahaofi ʻo Lote pea mo hono ongo ʻofefiné.—2 Pita 2:6-9.
4 Naʻe fakakaukau ʻa ʻIlaisiā ʻi ha taimi ʻe taha naʻá ne tokotaha pē ʻi hono tauhi ʻa e ʻOtua moʻoní. Kae kehe, naʻe fakapapauʻi ange ʻe Sihova kiate ia naʻe ʻikai moʻoni ke ne tokotaha pē, pea ko e ngāue naʻá ne kamatá ʻe fakaʻosi ia. (1 Tuʻi 19:14-18) Fēfē ʻa e tuʻunga ko eni ʻi hotau ʻahó?
5 Hanganaki Femoʻuekina ʻi he Ngāue ʻa e ʻOtuá: Ko e lahi ʻo e ngāue fakaefakamoʻoni ʻoku kei toe ke fakahokó, ʻoku ʻikai ke tau ʻilo. Ko Sihova ʻoku ʻaʻana ʻa e ngāue ko ʻení pea ʻokú ne ngāueʻaki ʻene kau ʻāngeló ke tokangaʻi ia. (Fkh. 14:6, 7) Ko ia ʻa e tokotaha ke ne fakapapauʻi ʻa e lahi ʻo e faifakamoʻoni ke fai ki he kotoa ʻo e ngaahi puleʻangá. Kapau ʻe fili ʻe Sihova, ʻoku malava ke ne ʻafioʻi ʻoku mafola ʻa e pōpoaki ʻo e Puleʻangá ʻi he ngaahi founga ʻoku teʻeki malava ke tau fakaʻuta atu ki ai koeʻuhi ke lava nai ai ʻa e kakai tokolahi ange ʻo “fanongo ki he lea ʻo e ongoongo leleí pea tui.” (Ng. 15:7, NW) Ko e meʻa ʻoku fai ʻe Sihová ʻe fehoanaki kakato ia mo hono tuʻungá—ko ha ʻOtua ʻofa, poto mo fakamaau totonu.
6 Ko hotau monū ia ke ngāue ʻo fehoanaki mo e finangalo ʻo Sihová, ʻo fai hotau lelei tahá ke ʻai ʻa e tokotaha kotoa pē ke fanongo ki he ongoongo leleí.—1 Kol. 9:16.