ʻE Lava Fēfē Ke Tau Tokoniʻi ʻa e Ngaahi Hoa ʻIkai Fakamoʻoní?
1 Ko e kau sevāniti tokolahi ʻa Sihova ʻoku nau mali mo e faʻahinga tāutaha ʻa ia ʻoku nau anga-fakakaumeʻa ki he fanga tokouá pea mahuʻingaʻia ʻi he fakatahaʻangá ka ʻoku nau taʻotaʻofi kinautolu mei he hoko ko e kau sevāniti ʻa e ʻOtuá. Naʻe fakahaaʻi ʻe ha husepāniti ʻe taha: “Ko e fakakaukau ʻo e ʻalu ʻi he fale ki he falé ko ha fakafaingataʻaʻiaʻanga lahi ia kiate au.” Ko e niʻihi kehe ʻoku nau maʻu nai ha tōʻonga taʻefakatohitapu ʻoku fiemaʻu ke nau ikuʻi, pe ʻoku nau ongoʻi nai ʻe ʻikai ʻaupito lava ke nau tauhi ki he taimi-tēpile femoʻuekina fakateokalatí ʻoku maʻu ʻe honau hoá. ʻE lava fēfē ke tau tokoniʻi kinautolu?
2 Fakahaaʻi ʻa e Mahuʻingaʻia Fakafoʻituitui: Ko e mahuʻingaʻia fakafoʻituitui ʻi he niʻihi kehé mo hono fakatokangaʻi ʻenau ngaahi hohaʻá ʻe fakaʻatā nai ai ʻa e hala kia kinautolu ke nau tali ʻa e moʻoni ʻi he Tohi Tapú. (Fili. 2:4) Ko e faʻahinga ko ia naʻe ʻikai te nau kau ki muʻa ʻi he tui ʻa honau hoá ʻoku nau faʻa lave ki he mahuʻingaʻia anga-ʻofa naʻe fakahāhaaʻi ʻe he niʻihi kehé. “Ko José, ko ha mātuʻa ʻi he fakatahaʻangá, naʻá ne mahuʻingaʻia makehe ʻiate au,” ko e fakamatala ia ʻa e husepāniti naʻe lave ki ai ki muʻá. “ʻOku ou tui ko ʻene fakalototoʻá naʻe iku ʻo ne ʻai au ke u kamata ako fakamātoató.” Ko e husepāniti ʻe taha ʻokú ne manatu ko e fanga tokoua ne nau ʻaʻahi kiate iá naʻa nau fai ʻa e feinga ke talanoa fekauʻaki mo ʻene ngaahi mahuʻingaʻiá. “Naʻá ku kamata ke sio ki he tui [ʻa hoku uaifí] mei ha fakakaukau mātuʻaki kehe,” ko ʻene leá ia. “Ko hono ngaahi kaumeʻá ko e kakai poto ʻaupito ʻa ia ʻoku lava ke nau talanoa ki ha ngaahi kaveinga kehekehe.”—1 Kol. 9:20-23.
3 Fai ʻa e Tokoni ʻAonga: ʻE toe maongo nai ki he ngaahi hoa ʻikai Fakamoʻoní ʻa e tokoni anga-ʻofa ʻoku fai kia kinautolú. (Pal. 3:27; Kal. 6:10) ʻI he taimi naʻe maumau ai ʻa e kā ʻa ha husepāniti taʻetui, naʻe tokoniʻi ia ʻe ha talavou Fakamoʻoni. “Naʻe maongo moʻoni ia kiate au,” ko ʻene manatú ia. Naʻe fakamoleki ʻe ha tokoua ʻe taha ha ʻaho kakato ʻi he tokoni ki ha husepāniti taʻetui ʻo ha tuofefine, ʻi hono langa ha ʻā ʻi hono ʻapí. Lolotonga ʻa e ngāue fakataha mo e fetalanoaʻakí, naʻá na fakatupulekina ai ha kaungāmeʻa. ʻI he uike ʻe ua ki mui ai, naʻe fakaofiofi ai ʻa e tangatá ki he tokouá ʻo ne pehē ange: “Kuo taimi kiate au ke fai ha ngaahi liliu ʻi heʻeku moʻuí. Te ke ako Tohi Tapu mo au?” Naʻá ne fai ʻa e fakalakalaka vave pea ko ha Fakamoʻoni papitaiso ia he taimí ni.
4 ʻI heʻetau hoko atu ʻa e kumi ki he faʻahinga taau ʻi hotau feituʻu ngāué, tau hokohoko atu ʻa hono tokoniʻi ʻa e faʻahinga ʻoku nau mali ki hotau kaungātuí.—1 Tim. 2:1-4.