Ngaahi Mātuʻa, ʻOange ki Hoʻomou Fānaú ʻa e Faingamālie Lelei Taha ki he Lavameʻá

ʻOku fakaʻamu ʻa e ngaahi mātuʻa manavahē-ʻOtuá ke nau sio ki heʻenau fānaú ʻoku nau hoko ko e kau sevāniti faitōnunga ʻa Sihova. ʻOku lava ʻe he ngaahi mātuʻá ke tokoniʻi kinautolu ke nau fai pehē ʻaki hono ʻai ʻa e ngaahi akonaki ʻa e Tohi Tapú ke maongo ki he loto ʻo ʻenau fānaú mei heʻenau kei valevalé pē. (Teu. 6:7; Pal. 22:6) ʻOku fiemaʻu heni ha feilaulauʻi-kita? ʻAupito! Ka ʻoku tuha moʻoni ʻa e palé mo e feinga.—3 Sio. 4.

ʻOku lava ke ako lahi ʻa e ngaahi mātuʻá meia Siosifa mo Mele. “Naʻá na angaʻaki ʻa e ʻalu ʻi he taʻu ki he taʻu ki Selusalema ki he kātoanga ʻo e Pāsová,” neongo naʻe fiemaʻu heni ʻa e feinga mo e fakamole. (Luke 2:41) ʻOku hā mahino, naʻá na fakamuʻomuʻa ʻa e ngaahi fiemaʻu fakalaumālie ʻa hona fāmilí. ʻI he tuʻunga meimei tatau, ʻoku malava ke tataki ʻe he ngaahi mātuʻa he ʻaho ní ʻenau fānaú ʻi he hala ʻoku totonú ʻaki hono ngāueʻaki ʻa e faingamālie kotoa pē ke akoʻi ai kinautolu ʻi he lea mo e faʻifaʻitakiʻanga.—Saame 127:3-5.

SIO ʻI HE VITIŌ NAʻÁ NA NGĀUEʻAKI ʻA E FAINGAMĀLIE KOTOA PĒ, PEA TALI LEVA ʻA E NGAAHI FEHUʻI KO ENÍ:

• Naʻe anga-fēfē hono hanganaki fakamuʻomuʻa ʻe Jon mo Sharon Schiller ʻa e ngaahi meʻa ʻo e Puleʻangá lolotonga hono tauhi hake hona fāmilí?

• Ko e hā kuo pau ai ke ʻai ʻe he ngaahi mātuʻá ʻenau akonakí ke fehoanaki mo e fiemaʻu ki he kiʻi tama taki taha?

• ʻE lava fēfē ʻe he ngaahi mātuʻá ke teuʻi ʻenau fānaú ke nau matuʻuaki ʻa e ngaahi ʻahiʻahiʻi ʻo e tuí?

• Ko e hā ʻa e meʻangāue kuo tokonaki mai ʻe he kautaha ʻa Sihová ke ngāueʻaki ki hono tokoniʻi hoʻomou fānaú ke tupulaki fakalaumālié?