Sio Atu ki he Ngataʻanga ʻo e Fokotuʻutuʻu ko Ení ʻi he Tuipau

Ko hono kātakiʻi ʻe Sihova ʻa e māmani ko ení ʻoku vavé ni ke ngata. Ko e lotu loí ʻe fakaʻauha, ko ha kulupu ʻo e ngaahi puleʻangá te nau ʻohofi e kakai ʻa e ʻOtuá, pea ʻe fakaʻauha ʻe Sihova ʻa e kau fulikivanú ʻi ʻĀmaketone. ʻOku fakatuʻotuʻa atu ʻa e kau Kalisitiané ki he ngaahi meʻa fakafiefia ko ení.

Ko e moʻoni ʻoku ʻikai ke tau ʻilo ʻa e fakaikiiki kotoa fekauʻaki mo e fuʻu mamahi lahí. Ko e fakatātaá, ʻoku ʻikai ke tau ʻiloʻi pau ʻa e taimi ʻe hoko aí. ʻOku ʻikai ke tau ʻiloʻi ʻa e ngaahi ʻuhinga ʻe ngāueʻaki ʻe he ngaahi mafai fakapolitikalé ke fakatonuhiaʻi ʻaki ʻenau ʻohofi ʻa e ngaahi lotú. ʻOku ʻikai ke tau ʻiloʻi pe ko e hā hono fuoloa ʻa e ʻohofi ʻe he ngaahi puleʻangá ʻa e kakai ʻa e ʻOtuá pea mo e meʻa ʻe kau ki aí. ʻOku ʻikai foki ke tau ʻiloʻi ʻa e founga tofu pē ʻe ngāueʻaki ʻe Sihova ke fakaʻauha ʻaki ʻa e fulikivanú ʻi ʻĀmaketoné.

Neongo ia, ʻoku ʻomai ʻe he Folofolá ʻa e ngaahi fakaikiiki kotoa ʻoku tau fiemaʻú ke fehangahangai mo e kahaʻú ʻi he tuipau mo e loto-toʻa. Ko e fakatātaá, ʻoku tau ʻiloʻi ʻoku tau lolotonga moʻui ʻi he ngataʻanga ʻo e “ngaahi ʻaho fakaʻosí.” (2 Tīm. 3:1) ʻOku tau ʻiloʻi ko hono ʻohofi ʻa e ngaahi lotú ʻe “fakanounou” koeʻuhi ke ʻoua ʻe fakaʻauha ʻa e lotu moʻoní. (Māt. 24:22) ʻOku tau ʻiloʻi ʻe fakahaofi ʻe Sihova hono kakaí. (2 Pita 2:9) Pea ʻoku tau ʻiloʻi ko e Tokotaha kuo fili ʻe Sihova ke ne fakaʻauha ʻa e fulikivanú pea fakahaofi ʻa e fuʻu kakai lahí lolotonga ʻa ʻĀmaketoné, ʻokú ne māʻoniʻoni mo mālohi.​—Fkh. 19:11, 15, 16.

Ko e ngaahi meʻa ʻe hoko ʻi he kahaʻú, te ne ʻai ke “pongia ʻa e kakaí koeʻuhi ko e manavaheé.” Neongo ia, ʻi he lau mo fakalaulauloto ki he ngaahi ngāue faifakahaofi ʻa Sihova ʻi he kuohilí pea mo e meʻa kuó ne fakaeʻa fekauʻaki mo e kahaʻú, ʻe lava ke tau “tuʻu hangatonu hake pea hiki hake [hotau] ʻulú,” ʻi he tuipau kuo ofi hotau fakahaofí.​—Luke 21:26, 28.