Ko e Kau Kalisitiane ʻa e Kau Fakamoʻoni ʻa Sihová?
ʻIo. Ko e kau Kalisitiane kimautolu ʻi he ngaahi ʻuhinga ko ení:
ʻOku mau feinga ke muimui ofi ki he ngaahi akonaki mo e faʻifaʻitakiʻanga ʻa Sīsū Kalaisi.—1 Pita 2:21.
ʻOku mau tui ko Sīsū ʻa e kī ki he fakamoʻuí, he “ʻoku ʻikai mo ha toe hingoa ʻi he lalo langí kuo tuku mai ki he haʻohaʻonga ʻo e tangatá ʻa ia kuo pau ke tau maʻu ai ʻa e moʻuí.”—Ngāue 4:12.
ʻI he taimi ʻoku hoko ai ʻa e kakaí ko e Kau Fakamoʻoni ʻa Sihová, ʻoku nau papitaiso ʻi he huafa ʻo Sīsuú.—Mātiu 28:18, 19.
ʻOku mau lotu ʻo fakafou ʻi he huafa ʻo Sīsuú.—Sione 15:16.
ʻOku mau tui ko Sīsū ʻa e ʻUlú, pe ko e tokotaha kuo fakanofo ke maʻu ʻa e mafai ki he tangata kotoa.—1 Kolinitō 11:3.
Kae kehe, ʻi he ngaahi founga lahi, ʻoku mau kehe mei he ngaahi lotu lahi ʻoku ui ko e kau Kalisitiané. Ko e fakatātaá, ʻoku mau tui ʻoku akoʻi ʻe he Tohi Tapú ko Sīsū ʻa e ʻAlo ʻo e ʻOtuá, ʻo ʻikai ko ha konga ʻo ha Tolu-Tahaʻi-ʻOtua. (Maʻake 12:29) ʻOku ʻikai ke mau tui ʻoku taʻefaʻamate ʻa e laumālié, ʻoku ʻi ai ha faʻahinga makatuʻunga ʻi he Folofolá ʻoku pehē ai ʻoku fakamamahiʻi ʻe he ʻOtuá ʻa e kakaí ʻi heli ʻo taʻengata, pe ʻoku totonu ki he kau taki ʻi he ngaahi ngāue fakalotú ke maʻu ha ngaahi hingoa fakalakanga ʻo māʻolunga ange ai ʻi he niʻihi kehé.—Koheleti 9:5; ʻIsikeli 18:4; Mātiu 23:8-10.