“ʻOku Ou Fie Vete!”
ʻOku hā ʻi ha fale fengataliaki ha fakaʻilonga ʻo hono liʻaki. ʻI he faai mai ʻa e ngaahi taʻú, kuó ne matuʻuaki ai ha ngaahi afā, kae ʻikai ke lavameʻa kotoa. ʻI he taimi ní ko hono faʻungá ʻoku ngāvaivai, pea ʻoku hā ngali vave ke holafa ʻa e falé.
KO E fakatātā ko iá ʻoku fakamatalaʻi ai ʻa e tuʻunga ʻo e ngaahi nofo mali lahi he ʻahó ni. Kuo faifai ange peá ke ongoʻi ʻoku huʻu nai ʻa hoʻo nofo malí tonu ki he tuʻunga tatau? Kapau ko ia, fakapapauʻi ange ʻoku ʻikai ha hoa mali ʻe hao mei he palopalemá. Ko hono moʻoní, ʻoku fakahaaʻi totonu ʻe he Tohi Tapú ko e faʻahinga ʻoku malí ʻoku ngalingali te nau maʻu ʻa e “langa mo e mamahi.”—1 Kolinito 7:28, The New English Bible.
ʻI hono fakamamafaʻi ʻa e moʻoni ʻo e ngaahi lea ko iá, ʻoku fakamatalaʻi ʻe ha timi fakatotolo ʻa e nofo malí, “ko e ngāue fakatuʻutāmaki taha ia kuo fou hokohoko ai ʻa e tokolahi taha ʻo e kakai ʻi hotau sōsaietí.” ʻOku nau hoko atu: “Ko e meʻa ʻoku kamata ko ha vahaʻangatae ʻo e fiefia lahi mo e palōmesí ʻoku lava ke hoko ia ko e feinga fakatupu feifeitamaki taha mo fakamamahi ʻi he moʻui ʻa ha taha.”
Fēfē ʻa hoʻo nofo malí? ʻOku ʻasi ai ʻa e taha pe lahi ange ʻo e ngaahi tōʻonga ko ení?
● Toutou fakakikihi
● Lea kona
● Taʻemateaki
● Loto-mamahi
Kapau ʻoku hā ngali ngāvaivai ʻa hoʻo nofo malí pea hā ngali vave ke holafa, ko e hā ʻoku totonu ke ke faí? Ko e veté ʻa e fakaleleiʻangá?
[Puha/Fakatātā ʻi he peesi 3]
“MEI HE ʻIKAI LOKO FAÍ KI HONO FAILAHIA”
ʻI he ngaahi fonua ʻe niʻihi, kuo ʻalu ai he ʻataá ʻa e veté. Vakai angé ki ʻAmelika, ʻa ia naʻe ʻikai loko fai ai ʻi he ngaahi taʻu lahi ʻa e veté. Hili ʻa e 1960, ko e tohi ia ʻa Barbara Dafoe Whitehead ʻi heʻene tohi The Divorce Culture, “ʻoku fakautuutu ʻi ha tuʻunga vave fakaʻohovale ʻa hono lahí.” ʻOkú ne pehē: “Naʻe liunga ua ʻi ha hongofuluʻi taʻu nai pea hokohoko atu ʻa ʻene ʻalu ki ʻolungá ʻo aʻu mai ki he konga ki muʻa ʻo e 1980 tupú, ʻa ia naʻe tuʻumaʻu ai ʻi he tuʻunga māʻolunga tahá ʻi he lotolotonga ʻo e ngaahi sōsaieti fakalakalaka ʻo e Hihifó. Ko ha nunuʻa ʻo e mahiki fakafokifā lahi mo hokohoko ko ení, kuo ʻalu ai ʻa e veté ʻi he taʻu pē ʻe tolungofulu mei he ʻikai loko faí ki hono failahia.”