Tohi Tohi Tapu Fika 64—3 Sione
Tokotaha-Tohí: ʻApositolo ko Sioné
Feituʻu Naʻe Tohi Aí: ʻEfesō, pe ofi ki ai
Kakato Hono Tohí: 98 T.S. nai
KO E tohí ni ʻoku fai ia kia Keio, ko ha Kalisitiane faitōnunga ʻa ia naʻe ʻofa moʻoni ai ʻa Sione. Ko e hingoa Keió ko ha hingoa anga-maheni ia ʻi he ngaahi ʻaho ʻo e muʻaki fakatahaʻangá. ʻOku hā tuʻo fā ia ʻi he ngaahi konga kehe ʻo e Ngaahi Konga Tohi Tapu Faka-Kalisi Kalisitiané, ʻi he lave ki he kau tangata kehekehe ʻe toko tolu nai pe toko fā. (Ng. 19:29; 20:4; Loma 16:23; 1 Kol. 1:14) ʻOku ʻikai ha fakamatala ʻe ala maʻu ʻa ia ʻoku fakapapauʻi ʻaupito ai ko Keio ko ia naʻe tohi ki ai ʻa Sioné ko e taha ia he kau tangata ko ení. Ko e meʻa pē ʻoku tau ʻilo fekauʻaki mo Keió ko ha mēmipa ia ʻo ha fakatahaʻanga Kalisitiane, ko ha kaumeʻa fafale ia ʻo Sione, pea ko e tohí naʻe fai kiate ia fakafoʻituitui, ʻa ia ko e ʻuhinga ia ʻoku hā maʻu pē ai ʻa e foʻi lea “koe.”
2 Koeʻuhi ko e sīpinga ʻo e talamonū ʻi he kamatá mo e fakaʻosí ʻoku tatau ia mo ia ʻi he Ua Sioné pea ʻoku toe fakahaaʻi ai ia tonu ʻe he tokotaha-tohí ko e “motua,” ʻoku ʻikai toe fehuʻia ko e ʻapositolo ko Sioné naʻá ne toe fai ʻa e tohí ni. (2 Sione 1, PM) Ko e meimei tatau ʻa e meʻa ʻi lotó mo e leá ʻoku toe fakahuʻunga ai naʻe tohi ia, ʻo hangē pē ko e tuʻunga ʻo e ongo tohi kehe ʻe uá, ʻi ʻEfesō pe ofi ki ai, ʻi he 98 T.S nai. Koeʻuhi ko ʻene nounoú, naʻe tātātaha ke hiki lea mei ai ʻa e muʻaki kau faʻu-tohí, ka ʻoku maʻu ia fakataha mo e Ua Sioné ʻi he muʻaki ngaahi katiloka ʻo e Tohi Tapu fakamānavaʻí.
3 ʻI heʻene tohí ʻoku fakahaaʻi ai ʻe Sione ʻa e houngaʻia ki he anga-talitali kakai ʻa Keio ʻoku fakahaaʻi ki he fanga tokoua fefonongaʻakí, pea ʻokú ne lave ki ha palopalema ʻi ha tangata kumi tuʻunga ʻe taha ko Taiotifi. Ko Temetelio ko ia naʻe lave ki aí ʻoku hā ngali ko e tokotaha ia naʻá ne ʻave ʻa e tohí ni kia Keió, ko ia ʻoku malava ke pehē naʻe fekauʻi atu ia ʻe Sione pea naʻá ne fiemaʻu ʻa e anga-talitali kakai ʻa Keió ʻi heʻene fonongá, ʻa ia ʻoku totonu ke fakapapauʻi ʻi he tohí. Hangē pē ko e tuʻunga ʻo Keió, ʻoku ʻikai ke tau ʻilo ha meʻa fekauʻaki mo Taiotifi pea mo Temetelio ʻo mahulu atu he meʻa ʻoku tau lau ʻi hení. Kae kehe, ko e tohí ʻokú ne ʻomai ha fakalika mahuʻinga fekauʻaki mo e fetokouaʻaki fakavahaʻapuleʻanga vāofi ʻa e muʻaki kau Kalisitiané. ʻOku kau heni ʻi he lotolotonga ʻo e ngaahi meʻa kehe, ʻa e tōʻonga ʻo hono fai ʻa e anga-talitali kakai ki he faʻahinga ʻoku fefonongaʻaki “koeʻuhi pe ko e Huafa,” neongo ko e faʻahingá ni naʻe ʻikai nai ke ʻiloʻi fakafoʻituitui kinautolu ʻe he faʻahinga naʻa nau fai ʻa e talitalí.—V. 7.
ʻUHINGA ʻOKU ʻAONGA AÍ
5 ʻOku fakahaaʻi ʻe he ʻapositolo ko Sioné ʻa ia tonu ko ha ʻovasia alafalalaʻanga ʻi heʻene faivelenga ke maluʻi ʻa e fakatahaʻangá mei he ngaahi tākiekina fakameleʻí. Ko e laumālie ʻo e ʻofa mo e anga-talitali kakai naʻe hūhū ʻi he fakatahaʻangá naʻe taau ke fakaongoongoleleiʻi, pea ko e moʻoni ko ʻenau taumuʻá ia ke fakatolonga ʻa e tuʻunga fiefia ko ení, koeʻuhi ke lava ai ʻa e fanga tokoua fakalotofonuá mo e “ʻāunofo” (faʻahinga tāutaha naʻe ʻikai ʻiloʻi ki muʻa ʻe honau tokotaha talitali Kalisitiané) ʻa ia naʻa nau ʻi honau haʻohaʻongá ʻo ngāue fakataha ko e ‘kaungāngaue ki he moʻoní.’ (V. 5, 8) Kae kehe, naʻe maʻu ʻe Taiotifi ʻa e mata-hihiki, ko ha meʻa naʻe fehiʻa lahi ai ʻa Sihova, pea naʻá ne taʻefakaʻapaʻapa ki he tuʻunga mafai fakateokalatí, naʻa mo ʻene lau kovi fekauʻaki mo e ʻapositolo ko Sioné. (Pal. 6:16, 17) Naʻá ne fokotuʻu ha taʻofiʻanga ki he anga-talitali kakai ʻa e fakatahaʻanga Kalisitiané. ʻOku ʻikai ha ofo ʻi he lea hangatonu ʻa Sione fekauʻaki mo e kovi ko ení pea ʻi heʻene fakaongoongoleleiʻi ʻa e ʻofa faka-Kalisitiane ʻi he fakatahaʻangá. ʻOku totonu ke tau faivelenga tatau he ʻahó ni ʻi hono tauhi maʻu ʻa e anga-fakatōkilaló, ʻaʻeva ʻi he moʻoní, pea mo hono fai ʻa e ʻofa fakaʻotuá mo e nima-homó, ʻo fakatatau ki he tefitoʻi moʻoni naʻe fakahaaʻi ʻe Sioné: “Ko ia ʻoku fai lelei ko e tupu mei he ʻOtua ia: ko ia ʻoku fai kovi kuo teʻeki ke ne mamata ki he ʻOtua.”—3 Sione 11.