Ongoongo Lelei ki he Faʻahinga Kotoa ʻo e Tangatá

Ko e toetuʻu ʻa Sīsuú naʻe ʻai ai ʻene kau ākongá ke nau tuipau mo faivelenga. Ko e ʻapositolo ko Paulá naʻá ne folau ʻi he kotoa ʻo ʻĒsia Maina mo e Metiteleniané, ʻo fokotuʻutuʻu maau ʻa e ngaahi fakatahaʻangá pea mo fakaivimālohiʻi ʻa e kau Kalisitiané ke nau tuʻumaʻu ʻi he fehangahangai mo e ngaahi tenge fakaeʻulungāngá mo e fakafepaki fakamālohí. Neongo ʻa e ngaahi pole ko iá, ko e kau Kalisitiané naʻa nau lakalakaimonū mo tokolahi ange.

Ko Paula tonu naʻe tuku pilīsone. Neongo ia, naʻa mo ʻene ʻi he pilīsoné naʻá ne hiki ha ngaahi tohi fakalototoʻa mo e akonaki ki he ngaahi fakatahaʻanga Kalisitiané. Naʻá ne fakatokanga ki ha fakamanamana lahi ange ko e—tafoki ʻo fakafepaki ki he moʻoní. ʻI hono tataki ʻe he laumālie māʻoniʻoni ʻo e ʻOtuá, naʻe tomuʻa sio ʻa Paula ki he fanga “ulofi fekai” ʻoku nau leaʻaki ʻa e “ngaahi meʻa kuo mioʻi” te nau hū mai ki honau lotolotongá ʻo “tohoakiʻi atu ai ʻa e kau ākongá ke muimui ʻiate kinautolu.”—Ngāue 20:29, 30.

ʻI he ngataʻanga ʻo e ʻuluaki senitulí, naʻe kamata ai ʻa e tafoki ko eni ʻo fakafepaki ki he moʻoní. Fakafuofua ki he taimi ko iá naʻe ʻoange ai ʻe Sīsū kuo toetuʻú ki he ʻapositolo ko Sioné ʻa e meʻa Fakahā, ko ha vakai fakaefakatātā ki he kahaʻú. Hangē ko ia naʻe tohi ʻe Sioné, naʻa mo e kau fakafepakí pe kau faiako loí ʻe ʻikai ke nau lava ke taʻofi ʻa e ʻOtuá mei hono fakahoko kakato ʻa ʻene ʻuluaki taumuʻa ki he māmaní mo e faʻahinga ʻo e tangatá. Ko e “puleʻanga mo e matakali mo e lea mo e kakai kotoa pē” te nau fanongo ki he ongoongo lelei fekauʻaki mo e Puleʻanga ʻo e ʻOtuá. (Fakahā 14:6) ʻE fakafoki mai ʻa e palataisí ki he māmaní pea ko ha taha pē ʻe fakaʻamu ke fai ʻa e finangalo ʻo e ʻOtuá ʻe lava ke hoko ʻo kau ki ai!

ʻOku ongo eni ʻo hangē ko ha “ongoongo lelei” kiate koe? Kapau ko ia, ako lahi ange fekauʻaki mo e pōpoaki ʻa e ʻOtuá ki he faʻahinga ʻo e tangatá hangē ko ia ʻoku maʻu ʻi he Tohi Tapú mo e founga ʻe lava ke ʻaonga ai kiate koe ʻi he ʻahó ni pea ʻi he kahaʻú.

ʻE lava ke ke lau ʻa e Tohi Tapú ʻiate koe pē ʻi he ʻinitanetí ʻi he www.jw.org. ʻI he Uepisaití, ʻe lava ke ke vakaiʻi ʻa e ongo polosiua The Bible—What Is Its Message? mo e Ongoongo Lelei mei he ʻOtuá! pea pehē ki he tohi Ko e Hā ʻOku Akoʻi Moʻoni ʻe he Tohi Tapú? fakataha mo e ʻū tohi kehe ʻoku lāulea ki he ʻuhinga ʻe lava ai ke tau falala ki he Tohi Tapú pea mo e founga ʻe lava ke tau ngāueʻaki ai ʻa ʻene akonaki ʻaongá ʻi hotau fāmilí mo e moʻui fakafoʻituituí. Pe kole ki ha taha ʻo e Kau Fakamoʻoni ʻa Sihová ki ha fakamatala lahi ange.

—Makatuʻunga ʻi he Ngāue, ʻEfesō, Filipai, Kolose, Filimone, 1 Sione, Fakahā.