Ko e Hā ʻEne ʻUhinga Kiate Koe Hono ʻIloʻi ʻo e ʻOtuá?
Kuo aʻu mai eni, ʻo tau ʻiloʻi ʻa e tali ki he fehuʻi, Ko hai ʻa e ʻOtuá? Naʻa tau kamata ʻi heʻetau ako mei he Tohi Tapú ko hono huafá ko Sihova pea pehē ki hono ʻulungaanga-tuʻu-ki-muʻa ko e ʻofá. Naʻa tau lāulea foki ki he meʻa kuó ne fai mo e meʻa te ne fai ke maʻu ʻaonga ai ʻa e kotoa ʻo e faʻahinga ʻo e tangatá. Neongo ʻoku lahi ange ʻa e meʻa ke ako ʻo fekauʻaki mo e ʻOtuá, te ke fifili nai pe te ke maʻu ʻaonga fēfē ʻi he hoko ʻo ako lahi ange ki aí.
ʻOku talaʻofa ʻa Sihova “kapau te ke kumi kiate ia, te ne fakaʻatā atu ke ke ʻiloʻi ia.” (1 Kalonikali 28:9) Sioloto atu ki he meʻaʻofa mahuʻinga ʻoku fakatatali mai kiate koe ʻi hoʻo hoko ʻo ʻiloʻi ʻa e ʻOtuá—ko ha ‘kaumeʻa ofi mo Sihova!’ (Saame 25:14) ʻOku mahuʻinga fēfē ʻa e kaumeʻa ko ení kiate koe?
Fiefia moʻoni. ʻOku fakamatalaʻi ʻa Sihova ko e “ʻOtua fiefiá.” (1 Tīmote 1:11) ʻI he hoko ʻo ofi kiate iá pea faʻifaʻitaki ki heʻene ngaahi foungá te ke maʻu ai ʻa e fiefia moʻoni, ʻa ia ʻe lava ke ke maʻu ʻaonga fakaeongo, fakaʻatamai mo fakaesino mei ai. (Saame 33:12) ʻOku lava ke toe tokoniʻi koe ʻe he ʻOtuá ke ke maʻu ha moʻui fiefia ʻaki ʻa e fakaʻehiʻehi mei he ngaahi founga moʻui fakatupu maumaú, fakatupulekina ha ngaahi tōʻonga lelei, pea tauhi maʻu ʻa e vahaʻangatae lelei mo e niʻihi kehé. Te ke loto-tatau ai mo e meʻa naʻe leaʻaki ʻe he tokotaha-tohi-sāmé: “Ko e fakaofiofi ki he ʻOtuá ʻoku lelei ia kiate au.”—Saame 73:28.
Tokangaekina Fakafoʻituitui. Naʻe talaʻofa ʻe Sihova ki heʻene kau sevānití: “Te u ʻoatu kiate koe ʻa e faleʻi pea ʻe ʻiate koe ʻa hoku fofongá.” (Saame 32:8) ʻOku ʻuhinga iá ʻe ʻoatu ʻe Sihova ki heʻene kau sevānití ʻa e tokanga fakafoʻituitui pea feʻunuʻaki ʻene tokangaekiná ke fehoanaki mo ʻenau ngaahi fiemaʻu fakafoʻituituí. (Saame 139:1, 2) ʻI hoʻo fakatupulekina pē ʻa e vahaʻangatae lelei mo Sihová, te ke ʻiloʻi ai ʻokú ne ʻi ai maʻu pē kiate koe.
Ko ha kahaʻu fakaofo. Tānaki atu ki heʻene ʻoatu kiate koe ʻa e kī ki he moʻui fiefia mo fiemālie ʻi he taimi ní, ʻoku toe fakaava atu ʻe Sihova ko e ʻOtuá ha kahaʻu fakaofo. (ʻAisea 48:17, 18) ʻOku pehē ʻe he Tohi Tapú: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.” (Sione 17:3) ʻI he ngaahi taimi faingataʻa ko ení, ko e ʻamanaki ʻoku tokonaki mai ʻe he ʻOtuá ʻoku hoko ia ko ha taula ʻokú ne tauhi kitautolu ke tau hoko ʻo “pau mo mālohi.”—Hepelū 6:19.
Ko e ngaahi meʻa pē eni ʻe niʻihi ka ʻoku lahi ʻa e ngaahi ʻuhinga mahuʻinga ke hoko ai ʻo ʻiloʻi lelei ange ʻa e ʻOtuá pea fakatupulekina ha vahaʻangatae fakafoʻituitui mo ia. ʻOku talitali lelei koe ke talanoa ki ha taha ʻo e Kau Fakamoʻoni ʻa Sihová pe ʻaʻahi ki he jw.org ki ha fakamatala lahi ange.