Takimuʻa ʻa e Kau ʻOvasiá—Kau Faiako ʻi he Ako Tohi ʻa e Fakatahaʻangá
1 Ko ha monū tuʻu-ki-muʻa ia ki ha tokotaha mātuʻa pe ha sevāniti fakafaifekau taau ke ngāue ko ha tokotaha faiako ʻi he Ako Tohi ʻa e Fakatahaʻangá. Ko hono tokangaʻi ʻo e ngaahi fiemaʻu fakalaumālie ʻa e faʻahinga ʻi heʻene kulupú ko ha fatongia mamafa ia. Ko hono ngaahi fatongiá ʻoku ʻi he ngaahi tuʻunga ʻe tolu.
2 Faiako Poto: ʻOku fiemaʻu ʻa e teuteu lelei ki he faiako ʻo e Ako Tohi ʻa e Fakatahaʻangá ke ne ʻoatu ʻa e mahino ki he kulupú ʻi he uike taki taha. ʻOkú ne fekumi ke fakalahi ange ʻa e houngaʻia ki he fakamatala ʻoku akoʻí. ʻI he ʻikai te ne fai ha fakamatala tōtuʻa he lolotonga ʻo e akó, ʻi he taimi ʻoku fiemaʻu aí te ne ʻohake ha ngaahi fehuʻi mahino ke tohoaki mai ʻaki ʻa e ngaahi poini tefito ʻo e lēsoní. Ko ʻene polé ke ʻai ke mohu ʻuhinga mo fakatupu-ʻilo ʻa e akó pea ke fakakau ʻa e tokotaha kotoa pē ʻi he fetalanoaʻakí. Ko ʻene taumuʻá ke langa hake fakalaumālie, ke fakaeʻa ʻa e ʻaonga mahuʻinga ʻo e akó, pea ke ʻai ʻa e fakamatalá ke aʻu fakatouʻosi ki he ʻatamaí mo e lotó.—1 Tes. 2:13.
3 Tauhi-Sipi Tokoni: Ko e tokotaha faiako ʻo e Ako Tohi ʻa e Fakatahaʻangá ʻokú ne “hange ha fakaū mei he matangi, mo e toitoiʻanga mei he ʻalotamaki.” (Ai. 32:2) ʻOkú ne tokanga moʻoni ki he faʻahinga kotoa ʻi heʻene kulupú peá ne sio ʻoku tokonaki ʻa e tokoni fakalaumālie ʻi he taimi ʻoku loto-siʻi ai ha taha ʻi he faʻahinga ʻokú ne tokangaʻí.—Isi. 34:15, 16; 1 Tes. 2:7, 8.
4 Ngāue Fakaʻevangeliō Faivelenga: Ko e tokotaha faiako ʻo e Ako Tohi ʻa e Fakatahaʻangá ʻokú ne tokanga loto-tōnunga fekauʻaki mo hono fai ha ngaahi fokotuʻutuʻu ʻaonga ki he faʻahinga kotoa ʻi heʻene kulupú ke kau kakato ki he ngāue fakamalangá. ʻOkú ne takimuʻa ʻi he ngāue fakaʻevangelioó, ʻo ʻiloʻi ko e kau maʻu peé, faivelengá, mo e loto-māfana ʻokú ne fakahā ki he ngāue fakamalangá ʻe tapua mai ia ʻi he toenga ʻo e kulupú. (Kol. 4:17; 2 Tes. 3:9) ʻI he faai mai ʻa e taimí, ʻokú ne feinga ke ngāue ʻi he ngāue fakamalangá fakataha mo e mēmipa taki taha ʻo ʻene kulupú. Kapau ʻoku tau fiemaʻu ke fakamāsila ʻetau pōtoʻi malanga mo faiako ʻi he ngāue fakafaifekaú, ʻoku lava ʻe he tokotaha faiako ʻo e Ako Tohi ʻa e Fakatahaʻangá ʻo tokoniʻi kitautolu ke aʻusia ʻetau taumuʻá.—1 Tim. 4:16; 2 Tim. 4:5.
5 ʻOku tāpuakiʻi moʻoni kitautolu ʻaki ʻa e ngaahi meʻaʻofa ko ʻeni ʻi he kau tangatá ʻa ia ʻoku nau tuʻu mateuteu ke ʻomai kiate kitautolu ʻa e tokoni fakalaumālie mo e poupou anga-ʻofa. (1 Tes. 5:14) ʻOfa ke tau fakahā ʻetau houngaʻia ki he tokonaki fakaofo ko ʻeni meia Sihová ʻaki ʻetau kau maʻu pē ki he ako tohí mo ʻetau poupou anga-tonu ki he ngāue fakaʻevangelioó.—Hep. 10:25.