Maio

Matshigwana hwane, vathu nya vangi va tutumide tigoni gwawe va ya vbanya omu nya mambe mayigo kha nga valuveli. Khu ginani u gu mba hevbuleya gu losa khu lidimi lawe? Gimbe gambe, u nga hevbula malito nyo khaguri aya adzina ma nga va girago va ema va vbweta gu bhula nago. Khavbovbo, u nga va yeyedza dzivhidhiyu ni mabhuku ma gomogo omu nya jw.org khu lidimi lawe. Jehovha a ngu hi ninga esi khu lisine hi si vbwetago gasi gu hi dugeleya tepo hi tshumayelago. Khu giyeyedzo, esi hi si hevbulago avba Tshangano nya thumo ni mavbanyelo sa gu hi dongiseya gwadi gu gira maendro nya gubweleleye ni gu tula sihevbulo nya Bhibhiliya. Tepo hi endredwago khu vapfhumba mitshanganoni gwathu, va ngu oloveya gu samadziswa khu mihlamulo yi ningwago khu sanana sathu. Mu nga hevbudza sanana sanu gu hlamula khu malito yaso. Vathu nyo khaguri va ngu ndrindrwa vata lisineni khu gupwa sanana na si gu tshamuseya gukhodwa gwaso khu ndziya nyo pwale yi vbevbugago. — 1 Kor. 14:25. w18.06 22-23 ¶7-9

Gwadi gu dundruga gu khethu hatshavbo hi diri hwindzo ni Nungungulu. (Efes. 2:12) Ganiolu Jehovha hi ranide khu lihaladzo. (Hos. 11:4; Joh. 6:44) Nigu Kristo a hi hakhide khu mandza mavili. Uye giride gu si kodzega gu hi gira gipandre nya ndranga ya Nungungulu. Ambari olu hi nga mba vbeleya, Jesu a ngu hi hakha khu mandza mavili, khu kharato gima kha hi yeli gu manega ambari ni mapimo nya gu venge vambe! Kha nga olu hi hidzimeyago vbafuvbi ni mahegiso nya mafu yaya nyo vivbe, vathu va na engedzeya gu hambana, gihatheya, ni guvengana. (Gal. 5:19-21; 2 Thim. 3:13) Ganiolu kha nga vathu va Jehovha, hi yede gu vbweta “guti gutago khu ga Nungungulu,” ogu gu na hi phasago gu mba na gihatheya nigu bwe hi andrisa gurula. (Jak. 3:17, 18) Hi ngu tsaka khu gu gira wupari ni vathu nya mambe mayigo, hi dzumeya magirelo yawe nya silo, adzina hi bwe hi hevbula lidimi lawe. Tepo hi girago isoso, ha gu manega ni gurula gu gogago “kha nga tsongo” ni gululama “gu fanana[go] ni mavimbi nya linene.” — Isa. 48:17, 18. w18.06 14 ¶18-19

Lisotshwa nya muRoma li di si hongoli nyimbitunu nya mba na silato. Iso si di gu girwa khu lidowo li nga ba li petwa guraru, khu kharato si di tiyide ngudzu. Nigu silato soso si di gu tshamba migondroni, khu kharato musotshwa a di gu kodza gu gimbiya gwadi nya mba kwiriga. Kha nga olu silato nya masotshwa nya vaRoma si nga ba si va phasa gu dugeleya nyimbitunu, silato sathu nyo fananise hi ambalago sa gu hi phasa gu gimbiya hi “tivisa Mahungu nya Yadi nya gurule.” (Isa. 52:7; Rom. 10:15) Ambari ulolo, dzimbe dzitepo so lomba gutiya-hwambo nya gukhongolo gasi gu tshumayela. Bo, a gu na ni 20 myaga, wari khuye: “Nyi di gu thava gu tshumayela sihevbuli sikhwanu. Nyi di gu khala dzitshoni. Nya gu khedza hwane, kha nyi gi woni gighelo nya gu thave. Olu nyi ngu tsaka khu gu tshumayela sihevbuli sikhwanu.” Vaphya nya vangi va gu maKristo va wonide gu khavo va ngu tshumayela na va tshulegide va gu ba va dongisede khu tepo. w18.05 23-24 ¶9-11

Jesu a di embeya vapostoli vaye khuye: “Nyi ngu mi tshiyelani gurula.” (Joh. 14:27) Gurula ga Jesu go hi phasa kharini gu simama gu tshumayela? Tepo hi simamago gu tshumayela, ha gupwa gurula kholu hi ngu dziti gu khethu ha gu tsakisa Jehovha ni Jesu. (Ndzi. 149:4; Rom. 5:3, 4; Kol. 3:15) Hwane nyo ba na Jesu a embede vapostoli vaye gu khuye a di gu vbweta gu khuye va tsaka, a di va tshamuseya lisima nya gu va yeyedza lihaladzo nya lisine. (Joh. 15:11-13) Khavbovbo, a di khuye: “Nya gu mi rana dzipari dzangu.” Ina kamo khandri lithomo nya likhongolo gu khala pari ya Jesu? Ganiolu vapostoli va di hadzi simama kharini gu khala dzipari dza Jesu? Jesu tshamusede gu khuye gimbiyani mu ya ninga mihandro nya yingi nigu mihandro yanu yi na simame. (Joh. 15:14-16) Khu mambe maganelelo, simamani gu tshumayela. Tanga nya myaga milivi na si gu ganeyi isoso, Jesu embede vapizane vaye khuye: “Gimbilani na mu gu huwelela, khenu: ‘Wufumu wa Ndzadzini womo vbafuvbi.’” (Mat. 10:7) Khu kharato ga wutshigu waye nyo hegise mafuni, Jesu a di kutsa valandreyi vaye gu timiseya thumoni nyo tshumayele. — Mat. 24:13; Marko 3:14. w18.05 13-14 ¶15-16

Vaphya, dzi garadzeyeni gu tsakisa Jehovha ni gu dzi vegeya misuwo nya liphuvbo. Ganiolu vaphya nya vangi nya melana wago vo vbweta gu hagana basi. Nigu adzina va na gu raneya gu gira esi va girago. Gu hweya ni gu mba hweya, gu na vbwetega gu u yeyedza vambe edzi si gu sa lisima khidzo gwago gu tadzisa misuwo yago. U nga dzumeleyi muthu a gu gira u divala misuwo yago. Khu kharato, ginani u nga girago gasi gu simama nu tiyide tepo vambe va gu kutsedzeyago gu gira esi avo va girago? Potsa siemo si na gu garadzeyago gu timiseya mikutsedzelo. (Mavingu 22:3) Dundrugeya khu mihandro nyo vivbe yi manwago khu gu gira silo nyo vivbe. Nigu khu gu dzi nogisa, dzumeya gu khuwe u ngu vbweta wusingalagadzi. Engisa esi u embedwago khu vavelegi vago ni vandriyathu nyo vidzwe va gomogo libandlani. (1 Ped. 5:5, 6) Ina u muthu nya gu dzi nogise gasi gu dzumeya wusingalagadzi? w18.04 31 ¶14-16

Omu nya malangaliya a nga loveya mabandla ya Aziya menor, Jesu yeyedzide gubonga khu thumo wu nga ba wu girwa khu valandreyi vaye. Khu giyeyedzo, ga lidangaliya a lovedego libandla la Tiyatira phede khu malito yaya: “Nyi ngu siti sigiro sago, ni lihaladzo Iago, ni mithumo yago, ni gukhodwa gwago, ni gutimisela gwago, ni gusimamisa gwago; mithumo yago ya olu yi ngu vbindra eyi nya guhegule.” (Gutu. 2:19) Jesu kha ganeya basi khu gu dandra nya thumo wawe, ganiolu va zundzide gambe khu makhalelo nya yadi ma va kutsidego gu gira isoso. Ambari olu Jesu a nga ba a yede gu phasa vathu nyo khaguri Tiyatira, uye phede ni gu hegisa lidangaliya laye khu malito nyo tiyise. (Gutu. 2:27, 28) Nga dundrugeya khu thumo nya wungi wa Jesu kha nga hungo nya libandla. Mwalo gighelo nya gu hi bonge khu thumo hi mu gireyago. Ambari ulolo, yeyedzide gubonga. Ina khandri giyeyedzo nya gyadi a vegedego madhota? w19.02 16-17 ¶10

Ga lizana myaga nyo pheye, Jehovha thumiside huwo nya guthangeye gasi gu tiyisa maKristo yatshavbo, gupata ni ava va nga ba va thangeya mabandla. Yi di rumeya sivbango sivili nya huwo, Pedro ni Johane, gasi gu ya gombeleya maKristo nya maphya gasi gu ma hakha liphuvbo nya guage. (Mith. 8:5, 14-17) Filipi ni vandriyaye nya vaphya va tiyisidwe ngudzu khu giphaso va ningidwego khu huwo nya guthangeye! Muhuno nugo, Huwo nya guthangeye nya Dzifakazi dza Jehovha yi ngu tiyisa sithumi sa Bheteli ni vambe va gomogo thumoni nya guhathege nya tepo yatshavbo, ni ethu hatshavbo. Kha nga vandriyathu va lizana myaga nyo pheye, anethu hi ngu tsaka khu gutiyiswa gogo! Nigu, gasi gu kutsa ava va digidego lisine gu va wuya, khu 2015 Huwo nya Guthangeye yi duside bruxura yi gu khiyo Wuya ga Jehovha, khu giThwa. w18.04 20 ¶18-20

Vathu nyo khaguri vo pimisa gu khavo gu manega ni gutshulega nya mba na mivbingano si di hadzi tsakisa. Ganiolu si di hadzi tsakisa kamo? Nga dundrugeya khedzi li nga hadzi khala khidzo litigo leli nari khatshi gu diri mwalo mivbingano! Enciclopédia Delta Universal yari khiyo milayo nya dzi hengeledzano dzatshavbo nya vathu yi ngu garadza kholu yi yede gu vhikeya yi bwe yi vega mivbingano avba nya gutshulega nya vathu. Isoso kha si vbevbugi tepo yatshavbo. Khu gighelo gyogyo, gu na ni milayo nya yingi ngudzu ni vaadhivhogadhu ni valamuli nya vangi va zamago gu yi tshamuseya ni gu yi thumisa. Khu kharato gasi gu hi mana gutshulega nya lisine, gu vbwetega hi gira silo sivili. Nyo pheye, gu vbwetega hi dzumeya lisine li hevbudzidwego khu Jesu. Nya wuvili, gu vbwetega gu hi khala vapizane vaye. Ho gira isoso si na hi ninga gutshulega nya lisine. Ganiolu gutshulega avba nya ginani? Jesu a di khuye: “Muthu watshavbo a ghohago, khumbi nya gighoho.” A engedza khuye: “Mwa gu tshudwa khu gyanana, mu na bani mu tshulegide khu lisine.” — Joh. 8:34, 36. w18.04 7-8 ¶13-14

Si ngu hi tsakisa ngudzu gu manega vbakari nya vathu va khathalago khu gudzipwa gwathu ni gukhadzisega gwathu. Vo zama gu dzi vega wulangani wathu gasi gu wona esi hi si pimisago ni edzi hi dzipwago khidzo. Va gu vbiredza gu tugula esi hi si vbwetago, khavbovbo va hi phasa — dzimbe dzitepo na hi nga si va lombi giphaso. Hi ngu va bonga ngudzu ava va ‘theyago kota’ khethu. Kha nga maKristo, hatshavbo gu vbwetega hi theya kota khu vambe. Ganiolu, khandri tepo yatshavbo si vbevbugago gu gira isoso. Khu ginani? Hi vathu nya mba vbeleya. (Rom. 3:23) Ha gu oloveya gu khathala khu silo sathu basi tepo yatshavbo. Khu kharato, gu vbwetega hi dzi garadzeya gambe gu khathala khu vambe. Nigu vambe gwathu, adzina si ngu va garadzeya gu theya kota khu vambe khu kotani nya edzi va dandrisidwego khidzo mwendro khesi va si vbanyidego womini gwawe. Gimbe gambe, khu gu hi nga kutsedzedwa khu mavbanyelo nya vathu va hi randredego. Matshiguni yaya nyo hegise, vathu nya vangi kha va theyi kota khu vambe. Vbavbandze nya isoso, vo dzi haladza guvbindra pimo. (2 Thim. 3:1, 2) Ambari ulolo, hi nga engedzeya gu theya kota khu vambe khu gu pimedzeya Jehovha Nungungulu ni Gyanana gyaye, Jesu Kristo. w19.03 14-15 ¶1-3

Nayo nyo hegise nya Milayo nya Likhumi wu di gu himbedzeya gu dogoreya sa vane, mwendro gu haguleya gudogoreya nyo vivbe khu silo si lumbago vambe. (Dhet. 5:21; Rom. 7:7) Jehovha ningide nayo wowo gasi gu ninga gihevbudzo nya lisima — vathu vaye va di yede gu sayisa monyo wawe, ma gu mapimo, ni gudzipwa gwawe. A di gu dziti gu khuye sigiro nyo vivbe so pheya khu mapimo ni gudzipwa nyo vivbe. Khu giyeyedzo, Pfhumu Dhavhidhe thegede naphwini wowo. Uye khu lisine a diri muthu nya wadi. Ganiolu ga tepo nyo khaguri, a di dogoreya ngadza-vane. Gudogoreya gwaye gu mu yiside gighohoni. (Jak. 1:14, 15) Dhavhidhe a di gira wubhayi, a bwe a zama gu kanganyisa mwama wa nyamayi wule, a hegisa khu gu mu songa. (2 Sam. 11:2-4; 12:7-11) Jehovha a gu wona silo nyo vbindre esi si wonegago khu vbavbandze nya muthu. Uye a ngu wona edzi hi khadego khidzo khu ndrani, monyoni gwathu. (1 Sam. 16:7) Kha si kanakanisi gu khiso gu mwalo mapimo, ambari sigiro si sihadego mahoni gwaye. Uye a gu khedza a bwe a hi kutsa gu gira silo nya sadi. Ganiolu a gu vbweta gu khuye hi tugula hi bwe woneleya mapimo nyo vivbe na ma si gu hi bedzi mhangoni. — 2 Dzik. 16:9; Mat. 5:27-30. w19.02 22 ¶9, 11

Bhibhiliya yari khiyo Mosi a “diri muthu nya gurule ngudzu, guvbindra vathu vatshavbo va mafuni.” (Mite. 12:3) Ina isoso so thula gu khiso a diri muthu nya mba na tshivba, nyo thave gu hunga esi a na girago, mwendro nyo ndrendremeye dzikhingimidzi a gu wugedwa khu vathu? Vambe va gu mu wona khu ndziya yoyo muthu nya gurule. Ganiolu mapimiselo yoyo khandri lisine. Mosi a diri ni tshivba, a di gu kodza gu hunga silo, nigu a diri githumi gya Nungungulu nyo tiye hwambo. Khu gu phaswa khu Jehovha, emisanide ni pfhumu nya tshivba ya Egipito, a thangeya tanga nya 3000 000 vathu giwulani, a bwe a phasa vaIsrayeli gu pala valala vawe. Lisine gu ethu kha hi emisani ni sigaradzo nya nga esi si padwego khu Mosi, ganiolu tshigu ni tshigu hi ngu emisana ni vathu mwendro siemo si lingago gurula gwathu. Ambari ulolo, gyomo gi hi ningago tshivba nyo simame gu haguleya likhalelo leli. Jehovha a gu tumbisa gu khuye “va nya gurula va na fumela litigo.” (Ndzi. 37:11) Uwe ke, ina u ngu dzi wona nuri muthu nya gurule? Ahati vambe ke, va gu gu wona kharini? w19.02 8 ¶1-2

Jehovha ningide vathu gilo nyo hathege. A gu livhalo. Livhalo gilo gi hi girago hi hambana ni sirengo. Ha gu dziti kharini gu khethu Adhamu ni Evha va diri ni livhalo? Hwane nyo ba va ghohede Nungungulu, va di mu sihaleya. Va di vetwa khu livhalo lawe. Livhalo gilo gi gomogo ndrani gwathu, gi hi phasago gu hambanisa silo nya sadi niso nyo vivbe, gi kodzago gu hi gimbidzisa guvbanyani gwathu. Muthu a gu na ni livhalo nya mba hevbudzwa gwadi a nga fananiswa ni navhiyu yi ghohekidego lemi. Mavimbi ni tshivba nya linene si nga pengisa navhiyu yoyo. Ganiolu lemi yi thumago gwadi yi nga phasa mugimbidzisi nya navhiyu gu yi gimbidzisa ndziyani nya yadi. Khu ndziya nyo fane, ha gu hevbudza gwadi livhalo lathu li nga hi thangeya gwadi. Livhalo lathu lo mba hevbudzwa gwadi, kha li na nga hi tivisa ho ba hi vbweta gu gira silo nyo vivbe. (1 Thim. 4:1, 2, NM) Li nga bwe li hi gira hi pimisa gu khethu “guvivba . . . khwadi.” w18.06 15-16 ¶1-3

Hi yede gu tugula hi bwe hi potsa mawonelo nya litigo ma kutsedzedwago khu dzindziya nya mba wonega gwadi. Khu giyeyedzo, mambe mahungu ma ganedwago omu dziradhiyu ni dzitelevhizawu ma gu ema ni mawonelo nyo khaguri nya politika. Nigu mambe matimo nya maphya nya vathu ma gu kutsedzeya misuwo ni sigiro si samadwago khu litigo. Dzimbe dzifilmu ni mabhuku ma gu kutsedzeya vathu gu yeyedza liphuvbo nya gu thangise gugola gwawe basi, khu ndziya nya gu li wonega na liri liphuvbo nya ladi ni gu tsakisa. Ambari ulolo, mawonelo yoyo kha ma pwanani ni Bhibhiliya. Kholu iyo yari khiyo ethu ni dzindranga dzathu hi na tsaka khu lisine ho haladza Jehovha guvbindra satshavbo. (Mat. 22:36-39) Isoso kha si thuli gu khiso si vivbide gu vbungadza. Ganiolu hi yede gu dzi wudzisa esi: ‘Ina nyi ngu si kodza gu tugula mawonelo nya litigo ambari mo ba ma sihade? Ina nyi ngu dzi vhikeya gumogo ni sanana sangu ga milongoloko nyo khaguri nya Televhizawu mwendro ga mabhuku nyo khaguri nyo vivbe? Ina nyi ngu phasa sanana sangu gu wona silo khu mawonelo ya Jehovha gasi gu si si kutsedzedwi khu mawonelo nya litigo si ma pwago ni gu ma wona?’ w18.11 26 ¶18-19

Jehovha a gu yeyedza gu khuye a na ni ethu khu gu hi khathaleya ni gu hi sayisa gwadi. Nga wona edzi a yeyedzago khidzo gudzipwa gwaye khethu! Jehovha wari khuye: “Uwe u [ngu] golega mahoni gwangu.” U ngu “zundzega, gambe nyi gu gode.” (Isa. 43:4) Yi mwalo tshivba mafuni ni ndzadzini yi kodzago gu vbedza lihaladzo eli Jehovha a gu nalo khu vale va mu thumeyago; gutumbega gwaye avbo gwathu gu tiyide ngudzu. (Isa. 54:10) Jehovha kha tumbisi gu dusa sigaradzo si hi tshanisago, ganiolu uye kha na nga dzumeleya gu khuye hi dzama omu nya “mitsongo” nya sigaradzo mwendro gu vbiswa khu “malavbelavbe” nya sigaradzo kala gupindruga. Uye a gu hi tumbisa gu khuye a na ba ari ni ethu, a na hi phasa “guvbindra” khu sigaradzoni sathu. Ginani egi Jehovha a na girago? A na hi phasa gu rula, hi si thavi gasi gu hi si kodza gu simama na hi tumbegide gwaye, ambari ha gu emisana ni gufa. (Isa. 41:13; 43:2) Ha gu tumba gitumbiso gya Nungungulu nya gu khigyo “Eni nyi nago,” anethu hi na tiya hwambo hi bwe hi manega ni tshivba tepo hi timiseyago sigaradzo sathu. w19.01 2 ¶4-6

Wa gu ba uri muphya, adzina u ngu ningwa wusingalagadzi khu vahevbudzi, vasingalagadzi va xikwatunu, mwendro vambe gasi gu hevbula univherisidhadhi mwendro gu vbweta thumo wu na gu phasago gu mana dzitsapawu nya dzingi. Ganiolu Jehovha a ngu gu ninga wusingalagadzi nyo hambane. Khu lisine, uye o vbweta gu khuye u hevbula xikola gasi u kodza gu dzi sayisa. (Kol. 3:23) Ganiolu uye gambe a ngu dziti gu khuye kha nga olu u gu muphya, gu vbwetega u hunga gu khuwe ginani u na girago khu wumindru wago. Khu kharato, a ngu gu ninga matshina nya milayo gasi gu gu thangeya ni gu gu phasa gu vbanya khu ndziya yi na mu tsakisago matshiguni yaya nya guhegise. (Mat. 24:14) Jehovha a ngu siti esi si na dugeleyago mindru wa tshigu, nigu a ngu yiti gwadi tepo yi tshadego gasi gu litigo leli li vbindra. (Isa. 46:10; Mat. 24:3, 36) Jehovha gambe a ngu guti nuwe. A ngu siti esi si na gu tsakisago ni esi si na gu mba gu tsakisa. Wusingalagadzi nya vathu adzina wu nga wonega nari wadi, ganiolu wa gu ba wu si seketedwi khu Bhibhiliya, khandri wa gilo. w18.12 15-16 ¶1-2

Wulangani nya isoso, “va nya gurula va na fumela litigo, va na nengela khu gurula nya gungi.” Dhavidhe profetide gambe khuye: “Va nya gululama va na fumela litigo, va na vbanya umo kala gupindruga.” (Ndzi. 37:11, 29; 2 Sam. 23:2) Wo pimisa gu khuwe situmbiso sesi si va khuhide kharini vathu va nga ba va vbweta gu gira gugola ga Nungungulu? Va diri ni gighelo nyo tumbe gu khavo litshigu limwedo mafu ma na manega ni vathu nya gululame basi ma bwe ma khala gambe Paradhesi nga lithembwe la Edheni. Teponi ya gale, vaIsrayeli nya vangi va nga ba va khavo va ngu khozeya Jehovha va mu digide va bwe va diga wukhozeyi nya lisine. Khu kharato, Nungungulu a di dzumeleya gu khuye vaBhabhiloni va pala vathu vaye, va tshungunula litigo lawe, va bwe va mola nya vangi va va yisa wugumbini. (2 Dzik. 36:15-21; Jer. 4:22-27) Ganiolu vaprofeti va Nungungulu va profetide gu khavo vathu vaye va di hadzi bweleya tigoni gwawe hwane nya 70 myaga. Nigu siprofeto soso si tadzisegide. Ganiolu si na ni lisima avba gwathu nethu muhuno. Tepo hi ganeyago khu simbe sakona, hi ngu wona edzi si hi ningago khidzo gighelo nya gu vireye paradhesi mindru wa tshigu mafuni. w18.12 5 ¶9-10

Wusingalagadzi nya litigo wu ngu dwanisana ni esi Bhibhiliya yi si hevbudzago. Ganiolu wusingalagadzi nya litigo ni owu wa Jehovha khu wevbini wu gu wadi ngudzu muhuno? Jesu a di khuye: “Guti gwa gu dzi yeyedza khu mithumo yaye.” (Mat. 11:19) Ambari olu litigo li yago li andra khu tekinolojiya, kha li si kodzi gu lulamisa sigaradzo nya singi si hi tandregisago gu tsaka, nya nga dzinyimbi, gihatheya nya mafumbo ni wughevenga. Nigu litigo gambe la gu wona wubhayi nari gilo nyo olovelege. Ganiolu vathu nya vangi va ngu dzumeya gu khavo wubhayi wu ngu tshungunula dzindranga, wu vanga madwali, ni simbe sigaradzo. Ahati Jehovha ke, a gu si wona kharini? Makristo ma dzumeyago mawonelo ya Jehovha ma ngu tsaka dzindrangani gwawo, ma na ni womi nya wadi, nigu ma ngu pwanana ni vandriyawe mafuni gwatshavbo. (Isa. 2:4; Mith. 10:34, 35; 1 Kor. 6:9-11) Isoso so yeyedza gwadi gu khiso mapimo ya Jehovha ma khugegide ngudzu guvbindra aya nya litigo. w18.11 23-24 ¶9-10

Lisine gu hi ngu gira satshavbo hi si kodzago gasi gu pwanana ni valongo vathu ni gu va gireya wuwadi. Ganiolu kha hi yeli gu ndraga milayo ya Jehovha gasi gu va tsakisa. Ambari hi na simamago gu pwanana ni valongo vathu, gu vbwetega ava hi pwanago navo ngudzu nari vathu va thumeyago Jehovha. Gasi gu gimbiya lisineni, gu vbwetega gu hi simama na hi handzegide, mwendro na hi agide mahoni ga Jehovha. (Isa. 35:8; 1 Ped. 1:14-16) Tepo hi nga hevbula lisine, hi vbindrugedzide silo nyo khaguri guvbanyani gwathu gasi gu landreya milayo nya Bhibhiliya. Vambe va vbindrugedzide silo nya sikhongolo ngudzu. Ganiolu gu ngo vbwetega gu hi dzi woneya gasi gu hi si vbindrugedzi mavbanyelo yathu ma agidego khu mavbanelo nyo vivbe. Ginani gi na hi phasago gu pala kutsedzelo nyo gire gilo nyo vivbe? Dundrugeya khesi Jehovha a hi ningidego gasi gu hi manega na hi agide. Hi ningide womi nyo hathege wa Gyanana gyaye nya gigodwa, Jesu Kristo! (1 Ped. 1:18, 19) Gasi gu hi phasa gu simama na hi agide mahoni ga Jehovha, gu vbwetega gu tepo yatshavbo hi dundruga lisima nya muphaso wa Jesu. w18.11 12-13 ¶10-11

Nya vangi va gomogo thumoni nya tepo yatshavbo vari khavo gu vega gupima thumoni wawe nya gutshumayele si ngu va phasa gu simama na va tsakide ni gu manega ni mawonelo nya yadi ambari tepo silo si vbindrugedzago. Wulangani nyo khale gaya na va garadzega basi, avo va hungide gu pharega thumoni nya gutshumayele. Mafuni momu, womi wathu wu nga vbindrugedza khavba ni avba. Si nga gira hi vbindrugedzwa malungelo thumoni wa Jehovha, hi beledwa khu madwali, mwendro gu si lomba gu hi sayisa nongo khu ndziya nyo hambane. Ganiolu ambari gu dugeleya ginani, tumba gu khuwe Jehovha a ngu khathala khuwe nigu a na gu phasa khu tepo yi vbwetegago. (Hebh. 4:16; 1 Ped. 5:6, 7) Gukhugeya olu gira satshavbo u si kodzago ga giemo u gu ga igyo. Gombeya ga Babe wago, Jehovha, u bwe u hevbula gu mu tumba khu guvbeleya. Khu ndziya yoyo, ambari silo sa gu vbindrugedza kharini, tepo yatshavbo u na manega ni gurula monyoni gu tago khiyo ga Jehovha. w18.10 26 ¶17, ¶19; 27 ¶22

Omu nya Bhibhiliya, ha gu hevbula edzi Jehovha a khathalago khidzo khu vathu vaye. Khu giyeyedzo, nga dundrugeya khedzi Jehovha a phasidego khidzo gikhwathana Samuweli gu ya bikeya gulamudwa ga Muphasi nya Khongolo nya Mhamba Eli, kha nga hi si wonago omu ga 1 Samuweli 3:1-18. Nayo wa Jehovha wu di gu ruma sanana gu ninga githawo vathu vakhongolo, ngudzungudzu ava va thangeyago. (Ekiso. 22:28; Levhi 19:32) Khu kharato, si ngu garadza gu dundrugeya gyanana nya nga Samuweli na gi hongola ga Eli dzimindrudzile, gi ya tiya gu mu bikeya mahungu nyo lemeye nya gu lamudwe gwaye ma tago khu ga Nungungulu. Bhibhiliya yari khiyo Samuweli “a di khala hwanga gu embeledzela giwoniso ga Eli.” Ambari ulolo, Nungungulu giride gu Eli a tugula gu khuye gu diri Uye a nga ba a rana Samuweli. Kha nga handro wakone, Eli embede Samuweli gu mba mu siheya gilo ga esi Nungungulu a mu embedego. Samuweli a di engisa Eli a “mu embeledzela satshavbo nyamba siha ni gimwegyo” nigu malito yaye ma di gu yelana ni aya nyo pheye. (1 Sam. 2:27-36) Matimo yaya ma gu hi hevbudza edzi Jehovha a khathalago khidzo khethu ni wugengeyi a gu nawo. w18.09 21-22 ¶2, 4-5

Muhuno, khandri vathangeyi basi va liphago. Ndrima nya revhista National Geographic yi gu khiyo “Khu ginani hi liphago,” yari khiyo “malipha mo tidwa nga giolovedzo guvbanyani nya vathu.” Khu mambe maganelelo, vathu va gu pimisa gu khavo gu lipha khandri gigaradzo. Gutala nya dzitepo vathu vo lipha gasi gu dzi vhikeya, adzina gasi gu siha gihoso mwendro gighoho nya gikhongolo va nga gira. Va ngu lipha gambe gasi gu mana dzitsapawu mwendro gu wuyedwa khu ndziya nyo khaguri. Ndrima yoyo yo ganeya gambe khiyo vambe va ngu tiya gu lipheya “vathu va si va tigo, sithumi-kwawe, dzipari, ni ava va va haladzago.” Khu wevbini handro nya malipha yaya yatshavbo? Gu mwalo gambe gu tumbana ni gupwanana vbakari nya vathu. Muembi nya dzindzimo Dhavhidhe gombede ga Jehovha khuye: “Uwe u ngu gola muthu nya lisine monyoni gwaye.” (Ndzi. 51:6) Dhavhidhe a di gu dziti gu khuye gu ganeya lisine so khugeya monyoni. Makristo nya lisine ma gu ‘ganeya lisine muthu ni muthu ga muthu kwawe’ siemoni satshavbo nya guvbanya.— Zak. 8:16. w18.10 5 ¶9-10; 8 ¶19

Adzina gu diri ni vaIsrayeli nyo vbindre dzimiliyoni dziraru va dugidego khu Egipito khu mwaga nya 1513 na si guti Kristo. Ga tsawa wowo gu diri ni sanana, sikhosane, adzina ni vambe va nga ba va dwala mwendro silima. Tsawa wowo nya wukhongolo nya vathu wu di gu vbweta muthangeyi a khathalago ni gu pwisisa. Nigu khiso kamo Jehovha a giridego khu gu thumisa Mosi. Kha nga handro wakone, vaIsrayeli va dzi pwide na va vhikedwe ambari olu va nga ba va diga dzindranga va nga ba va vbanyide umo womi watshavbo. (Ndzi. 78:52) Jehovha vhikede kharini vathu vaye? Uye a di sasamedza va na Israyeli guya “khu mabutho yawe” tepo va nga duga khu Egipito. (Ekiso. 13:18) Kha nga olu va nga ba va sasamedzidwe khu ndziya yoyo, si di gu wonega guagani gu khiso khu Nungungulu wawe a nga ba a va thangeya. “Mihani a di va gimbidzisa khu lipfhi” wutshigu a va “gimbidzisa khu nilo” gasi gu va dundrugisa gu khuye a diri navo gasi gu va thangeya ni gu va vhikeya. (Ndzi. 78:14 ) Nigu si di gu vbwetega kamo gu vaIsrayeli va tiyisega khu kotani nya esi si nga dugeleya khu gulandreya. w18.09 24-25 ¶11-12

Dziteponi nya gulowe nya Bhibhiliya, simbe sithumi sa Nungungulu si garadzegide ngudzu khu sigaradzo saso nyo bwe si vbweta ni gufa. Khu giyeyedzo, Joba a di gupwa guvbisa nyo bwe khuye: “Nyi garade. Kha nyi nga gu khathala gambe khu womi wangu.” (Joba 7:16) Jona a di vbeya ngudzu tshivba nyo bwe khuye: “Khu guralo, uwe PFHUMU Nungungulu, nyi ngu gu lomba u nyi songe, kholu i tshukwana gufa guvbindra guvbanya.” (Jona 4:3) Muprofeti Eliya vbeledwe khu gutumba nyo bwe khuye: “Olu basi, PFHUMU Nungungulu! Dusa womi wangu.” (1 Dzipf. 19:4) Jehovha a di gu si gola sithumi soso nyo tumbege nigu a di gu vbweta gu khuye si vbanya. Kha va ninga nandru khu gu ba va dzi pwide kharato. Wulangani nya isoso, a di va phasa gu va vbweta gu simama gu vbanya gasi gu va simama gu mu thumeya khu gutumbega. w18.09 9 ¶4

Sithumi sikwawe sa Nungungulu so tidwa khu gu hakha gwadi vapfhumba. (Hebh. 13:2) Omu nya Lito la Nungungulu, hi ngu mana siyeyedzo si hi hevbudzago edzi hi nga yeyedzago khidzo wuwadi wowu. (Gen. 18:1-5) Hi yede gu phasa vambe ni yevbini tepo hi tulegedwago khu ndziya nyo gire isoso, gani “vandriyathu gukhodwani” mwendro ne. (Gal. 6:10) Ina u nga thuma ni Jehovha khu gu hakha gwadi vandriyathu va gomogo thumoni nya tepo yatshavbo va vbwetago wulanga nyo khale? (3 Joh. 5, 8) Tepo hi girago isoso, va gu phasega avo gumogo ni ethu. Bhibhiliya ya gu si rana khiyo ‘gutiyiselana hatshavbo.’ (Rom. 1:11, 12) Lito la Nungungulu li ngu kutsa vama mabandlani gu thuma ni Jehovha khu gu thumeya vambe kha nga vaphasedzeyi nya libandla mwendro madhota. (1 Thim. 3:1, 8, 9; 1 Ped. 5:2, 3) Ava va girago isoso va gu vbweta gu phasa vambe khu silo si va keneleyago ni gu va phasa khu liphuvboni. (Mith. 6:1-4) Vandriyathu va phasedzeyago omu nya mithumo nyo khaguri libandlani vari khavo va ngu tsaka ngudzu khu gu gira isoso. w18.08 23 ¶6-7; 24 ¶10

Ambari olu Thimoti a nga ba ari ni malungelo nyo thangeye vandriyathu nyo dandre khu tanga, uye tepo yatshavbo a di yede gu va pweya wusiwana ni gu va ninga githawo. Ahati a gu tshuka muthu nyo khaguri a dandridego khu tanga a ghoha khu nya gigwenye mwendro gu khutsedzeya gu gira gilo gi gu mba tsakisa Jehovha? Jehovha kha na nga divaleya gighohi gi ghohago khu nya gigwenye, ambari a gu ba ari muthu a dandridego khu tanga ni gu ningwa githawo. Wona litshina nya nayo li gomogo ga Isaya 65:20, NM: “Gighohi gi na vadwa, ambari gya gu ba giri ni lizana myaga.” Omu nya giwoniso gya Ezekiyeli hi ngu mana litshina nyo fane ni eli. (Ezek. 9:5-7) Gilo nya lisima ngudzu, gu ninga githawo Jehovha, oyu a gu Lidhota khu Gale. (Dhan. 7:9, 10, 13, 14) Githawo gyathu khuye gi na hi ninga tshivba nyo kawuke muthu si lombago gu a kawukwa, ambari nari wa tanga muni. — Gal. 6:1. w18.08 13 ¶13-14

Kha nga maKristo nya lisine gu vbwetega hi hevbula ndziya nyo gevisise gwadi mahungu hi bwe hi vboheya mahegiso nya lisine. (Mav. 3:21-23; 8:4, 5) Ho mba gira isoso, si na vbevbuga gu Sathane ni litigo laye va hi pengisa. (Efes. 5:6; Kol. 2:8) Khu lisine, gasi gu hi vboheya mahegiso nya lisine, gu vbwetega gu hiti satshavbo si pategago. Muhuno, hi ngu hakha mahungu khu dzikhona dzatshavbo. Hi ngu ma mana khu interneti, televhizawu, ni yimbe mitshini. Nigu dzipari dzathu gambe dzi ngu hi rumeleya dziemail nya dzingi, dzimesaji, ni mambe matshango. Dzimbe dzitepo mahungu yoyo ma gu ya khu gu vbalageya. Khu kharato gu vbwetega gu hi dzi woneya. Gu tala nya dzitepo dzipari dzathu adzina dzi mwalo makungo nyo vivbe tepo dzi hi rumeleyago mahungu yoyo, ganiolu gu na ni vambe vathu va dzinago va phalalegiseya mahungu nyo vivbe mwendro nya mba na lisine. w18.08 3-4 ¶1, 3

Jehovha a di hatha nyamahegyane nya gu dzi nogise nya pwani khu Mariya gasi gu khala mamayi wa Gyanana gyaye, Jesu. Mariya a di gu vbanya gidhoropanani nya pwani Nazareta, hwindzo ngudzu ni Jerusalema gumogo ni tempele yakona nyo mbure. (Luka 1:26-33) Si ngu wonega gu khiso a diri pari nya yikhongolo ya Jehovha khesi a nga ya embeya nongo waye Elizabheta. (Luka 1:46-55) Jehovha a di gu mu khedziseya Mariya, a bwe a mu ninga makategwa a nga ba a sa ma vireya kholu a nga ba a tumbegide gwaye. Tepo Jesu a nga velegwa, khu mani oyu Jehovha a mu bhuledego khu gu velegwa gwaye? Ne mweyo nya dzipfhumu mwendro vafumeli nya lisima va Jerusalema ni Bhetlehema. Wulangani nya isoso, a di rumeya dzingilozi dzi hongola ga vahavisi va nga ba va havisa dzinvuta thembweni ga Bhetlehema. (Luka 2:8-14) Khavbovbo, vahavisi vovo va di endreya gyanana Jesu. (Luka 2:15-17) Si nga gira Mariya ni Josefe na va samade ngudzu khu gu wona Jesu na gu zundzwa khu ndziya yoyo. w18.07 6 ¶11-12

Khu ginani Jehovha a zangaredego Solomoni? Bhibhiliya yari khiyo: “[Jehovha, NM] a di goroga khu Solomoni, kholu monyo waye wu nga pfhurarela [Jehovha, NM].” Nungungulu zamide gu phasa Solomoni. Jehovha a dzi wonegiside “nyondro mbili avbo gwaye, a mu leletela gukhuye a si dzi ningedzeli ga vambe vanungungulu. Aholu uye kha nga vegisa sileletelo sa [Jehovha, NM].” Kha nga handro wakona, uye a di luza gutsakedwa ni giphaso gya Jehovha. Jehovha kha dzumeleya situgulwana sa Solomoni gu fuma litigo latshavbo la Israyeli, nigu si emisanide ni sigaradzo nya sikhongolo khu myaga nya yingi. (1 Dzipf. 11:9-13) Ha gu hatha dzipari dzi gu mba pwisisa mwendro guti milayo ya Nungungulu, dzi nga pengisa mapimo yathu dzi bwe dzi hi luzisa wupari wathu ni Jehovha. Si nga gira nari dza libandlani, ganiolu na dziri mwalo wupari nyo tiye ni Jehovha. Mwendro nari valongo, vavhizinyu, sithumi-khwathu, sihevbuli-kwathu va si khozeyigo Jehovha. Abari gu vathu hi vbungadzago navo kha va vbanyi khu milayo ya Jehovha, avo va nga hi gira hi vbeledwa khu wupari wathu nya wadi ni Nungungulu. w18.07 17-18 ¶9-10

Sathane a gu thumisa dzifilimi ni milongoloko nya televhizawu gasi gu swayela mapimo yaye. Uye a ngu dziti gwadi gu khuye silo nya guye khu gu si sixitiri kha si na nga hi vbungadzeya basi, ganiolu si na hevbudza mapimiselo, mavbanyelo ni gudzipwa gwathu. Jesu hevbudzide khu ndziya nyo fane ni iyoyo. Nga dundrugeya khu gipimaniso gile nya muSamariya nya wuhindzi ni egi nya gyanana gile nya gikhwathana gi nga khuga khu ndrangani gi ya phalalegiseya thomba yagyo yatshavbo. (Mat. 13:34; Luka 10:29-37; 15:11-32) Ambari ulolo, vale va pengisidwego khu mapimo ya Sathane va ngu thumisa navo silo nya nga dzifilimi ni milongoloko nya televhizawu gasi gu hi pengisa. Gu vbwetega hi kodza gu hatha gwadi. Si ngu kodzega gu dzifilimi ni milongoloko nya televhizawu si hi vbungadzeya si bwe si hi hevbudza nya mba nyenyezisa mapimo yathu. Ganiolu gu vbwetega gu hi dzi woneya. Tepo hi hathago sivbungadzo, gwadi gu hi dzi wudzisa esi: ‘Ina filimi yeyi mwendro longoloko wowu nya televhizawu kha wu nyi kutsedzeyi gu landriseya gudogoreya gwangu nya nyama?’ (Gal. 5:19-21; Efes. 2:1-3) Ginani u yedego gu gira wa gu tugula gu khuwe longoloko nyo khaguri wu ngu kutsedzeya mapimo ya Sathane? Dzi vhikeye gwawo nga edzi u nga hadzi dzi vhikeya khidzo ga madwali ma thapheyanago! w19.01 14 ¶7

Kha nga olu gihugo gi vhikeyago wuluvi nya lisotshwa, “gutumba nya guvbanyiswe” gwathu gu ngu vhikeya mapimo yathu. (1 Tes. 5:8; Mav. 3:21) Sathane a nga hi kutsedzeya kharini gu tshula gihugo gyathu? Dundrugeya khesi a zamidego gu gira Jesu. Sathane a di gu dziti gu khuye Jesu a na khala mufumeli nya vathu vatshavbo. Ganiolu, gupheya a di yede gu tshaniseka a bwe afa. A bwe a vireya kala yi vboha tepo nya gu Jehovha a mu gira Pfhumu. Khu kharato Sathane a di mu ninga lithomo nyo dzegeye gu pheya gu fuma. Sathane a di tumbisa Jesu gu khuye a gu mu khozeya gumogo basi, a di hadzi dzegeya gu khala mufumeli nya mafu. (Luka 4:5-7) Sathane a ngu dziti gambe gu khuye Jehovha tumbiside gu hi ninga silo nyo tsakise mafuni nya maphya. Ganiolu gu vbwetega gu hi vireya gutadzisega nya gitumbiso gyogyo, ambari ulolo hi na emisana ni sigaradzo nya singi. Khu kharato, Sathane a gu hi ninga lithomo nya gu vbanye womi nya wadi olu. Uye o vbweta gu khuye hi vega gukhadzisega gwathu wulangani nyo pheye, Mufumo wa Jehovha hi wu vega wulangani nya wuvili. — Mat. 6:31-33. w18.05 25 ¶16-17

Jehovha o vbweta gu khuye u tsaka nu ngari muphya. Simama gu vega gupima gwago avba nya misuwo yago nya liphuvbo ni gu landreya wusingalagadzi wa Jehovha omu nya makungo yago yatshavbo. Wa gu heguleya gu gira isoso womini wago, u na vbiredza gu wona edzi Jehovha a na gu thangeyago khidzo, a gu vhikeya, ni gu gu kategisa. Dundrugeya khu wusingalagadzi watshavbo a gu ningago khu gu thumisa Lito laye, ni gu thumisa wusingalagadzi wu gu khuwo: “Alakanya muvangi wago na u ngari [muphya, NM]. (Muh. 12:1) Vaphya mu ngu ninganedwa khu gu zundzwa khu lisine kholu mu ngu dzi garadzeya gu thumeya Jehovha. Mu ngu dzi vegeya misuwo nya liphuvbo, nigu mu ngu wona gutshumayela kha nga gilo nya lisima ga satshavbo womini gwanu. Gimbe gambe, kha mu dzumeleyi gu khenu litigo leli li mi gira mu divala misuwo yanu. Tiyisegani gu khenu thumo wanu khandri wa mahala. Mu na ni vandriyanu va mi haladzago ni gu mi seketeya. Khu kharato “tumba [Jehovha, NM] ga mithumo yago yatshavbo, gasi makungo yago ma na mana gudugelela.” w18.04 31-32 ¶17, 19