Khu ginani lina la Jehovha li gu na ni lisima ga Jesu?

1-2. a) Ginani Jesu a nga gira ga wutshigu waye nyo hegise na si gufi? b) Ginani hi na gi wonago avba nya ndrima yeyi?

KHU 14 nya Nisani nya mwaga nya 33 matshigoni yathu, vbawutshigutunu, Jesu a di gira Gilalelo gya Pfhumu ni vapostoli vaye nyo tumbege. Uye a di gu dziti gu khuye nya mba hweya, Judha a di hadzi gu mu ningeya gasi a tshaniswa khu gu landreya a songwa khu valala vaye. Khu kharato, tepo gilalelo gi nga vbeya, Jesu a di ganeya malito nyo khaguri gasi gu tiyisa vapostoli vaye. Nigu na gu keneleya vbadugwana gasi va duga khomu nya sala va nga ba va romo umo, Jesu a di emanyana a gira nombelo nya lisima ngudzu. Nigu mupostoli Johane lovide nombelo wowo, nigu hi nga wu mana omu ga Johane gipimo 17.

² Ga ndrima yeyi, hi na wona esi hi nga si hevbulago khu nombelo wa Jesu ni gu hevbula gu khethu khu ginani a nga ba a garadzega na si gufi. Hi na wona gambe esi a nga ba a si ninga ngudzu lisima tepo khiyo a nga ba a romo mafuni.

“ENI NYI VA TIVISIDE LINA LAGO”

3. Ginani Jesu a nga ganeya khu lina la Jehovha, nigu a di gu vbweta gu khuye ginani khu isoso? (Johane 17:6, 26)

³ Ga nombelo waye, Jesu a di khuye: “Eni nyi va tiviside lina lago.” Gasi gu ganeya lisine, uye ganede guvili gu khuye tiviside lina la Jehovha ga vapizane vaye. (Leri Johane 17:6, 26.) Ganiolu, a di gu vbweta gu khuye ginani? Ina uye a di gu va tiviside lina va nga ba va si liti? Vapizane va Jesu va diri Vajudha, khu kharato avo va di gu dziti gu khavo lina la Nungungulu khu Jehovha. Nigu lina leli li khumbugidwe 7000 nya ugo omu nya Milowo nya Gihebheru. Khu kharato, Jesu kha nga ba a ganeya khu lina la Nungungulu khu gu kongoma, ganiolu a di gu ganeya khesi lina lolo li emeyago. Jesu a phaside vapizane vaye guti gwadi Jehovha, gupata makungo yaye, mithumo ni makhalelo yaye, nigu uye giride isoso khu ndziya nya yadi kholu a ngu muti gwadi Jehovha guvbindra ni wevbini muthu.

4-5. a) Lina la muthu nyo khaguri li nga khala kharini nya lisima gwathu? Ninga giyeyedzo. b) Vapizane va Jesu va tide lina la Jehovha khu ndziya muni?

⁴ Khu giyeyedzo, nga dundrugeya nari khatshi libandlani gwago lomo lidhota nyo pwani khu David nigu li thumago kha nga dhogodheya. Nigu u ngu muti ndriyathu yoyo khu myaga nya yingi. Ganiolu, ga litshigu nyo khaguri u dwala ngudzu, khu kharato si lombega gu u vbweta dhogodheya gasi a gu phasa. Khavbovbo, u hongola ospitali a thumago ndriyathu yoyo, uye a dzegeya gu thumisa makodzelo a gu nawo gasi gu gu hawulugisa. Khu lisine, olu u na engedzeya gu haladza ndriyathu yoyo guvbindra gale nigu tepo upwago lina laye, u na dundruga basi esi a nga gu gireya. Gu diga isoso, kha wu na nga wona David kha nga lidhota lago basi, ganiolu u na mu wona gambe kha nga dhogodheya a nga gu vbanyisa.

⁵ Khu ndziya nyo fane, vapizane va Jesu va di gu liti lina la Nungungulu, Jehovha. Ganiolu, lina lolo li di khala nya lisima ngudzu gwawe kholu Jesu a nga va phasa gu muti gwadi Jehovha. Khu ginani hi ganeyago isoso? Kholu Jesu a di gu yeyedza makhalelo ya Papayi waye ga satshavbo a nga ba a gira ni gu ganeya. Khu kharato, tepo vapizane va nga ba va engiseya ni gu wona edzi Jesu a nga ba a phara khidzo vambe, isoso si va phaside gu muti gwadi Jehovha. — Joh. 14:9; 17:3.

“LINA LAGO, LINA U NYI NINGIDEGO”

6. Ginani Jesu a nga ba a vbweta gu ganeya tepo a nga khuye Jehovha a mu ningide lina laye? (Johane 17:11, 12)

⁶ Ga nombelo waye, Jesu a di gombeleya vapizane vaye, khuye: “Va woneleye khu kotani nya lina lago, lina u nyi ningidego.” (Leri Johane 17:11, 12.) Ina isoso so thula gu khiso olu Jesu a di hadzi gu ranwa khu lina la Jehovha? Ahihi. Wona gu khuwe ga nombelo waye, Jesu a di khuye “lina lago,” na gu thula Jehovha. Khu kharato, lina Jehovha kha la khala lina la Jesu. Ganiolu, a di gu vbweta gu khuye ginani Jesu tepo a nga khuye Nungungulu a mu ningide lina laye? Nyo pheye, Jehovha a di rumeya Jesu gasi a khala muemeyi ni Lito laye. Uye dzude mafuni khu lina la Papayi waye gasi guta gira mithumo nyo hlamadzise khu lina laye. (Joh. 5:43; 10:25) Nya wuvili, lina la Jesu lo thula gu khilo, “Jehovha muvbulugisi wathu.” Khu kharato, tshamuselo nya lina la Jesu wa gu pata lina la Jehovha.

7. Khu ginani Jesu a nga ba ari ni fanelo nya gu ganeye khu lina la Jehovha? Ninga giyeyedzo.

⁷ Khu giyeyedzo, pfhumu nyo khaguri yi nga ruma muthu gasi aya ganeya ni vambe khu lina laye. Khu kharato, tepo muthu yoyo a ganeyago, uye a na ni wuthangeyi nyo fane ni owu wa pfhumu yoyo yi nga mu ruma. Khu ndziya nyo fane, Jesu a diri ni wuthangeyi gasi a ganeya khu lina la Jehovha kholu khuye a nga mu ruma.

8. Lina la Jehovha li di romo ga Jesu khu ndziya muni ambari na si guti mafuni? (Ekisodha 23:20, 21)

⁸ Bhibhiliya yo rana Jesu kha nga “Lito,” kholu Jehovha a mu thumiside gasi gu ninga sileletelo dzingilozi ni vathu. (Joh. 1:1-3) So wonega gu khatshi Jesu ngilozi yile Jehovha a nga yi thumisa gasi gu khathaleya Vaisrayeli giwulani. Na gu embeya Vaisrayeli gasi gu engisa ngilozi yile Jehovha a di khuye: “Yi na thuma khu lina langu.”a (Leri Ekisodha 23:20, 21.) Jehovha a di ganeya isoso kholu Jesu a gu mu emeya nigu khuye nyo pheye a agisago lina la Papayi waye.

“PAPAYI, DHUMISA LINA LAGO”

9. Jesu a di gu ninga kharini lisima lina la Jehovha? Tshamuseya.

⁹ Kha nga olu hi nga si wona, ambari kamo na si guti mafuni, Jesu a di gu ninga ngudzu lisima lina la Jehovha. Nigu tepo a nga ba a romo mafuni, uye yeyedzide khu sigiro saye satshavbo gu khuye lina la Jehovha li diri ni lisima gwaye. Gu hegisani nya thumo waye, Jesu a di lomba Jehovha gu khuye: “Papayi, dhumisa lina lago.” Khavbovbo, Papayi waye a di mu hlamula khu ndzadzini khu lito nya tshivba khuye: “Eni nyi li dhumiside nigu nyi nga na gu li dhumisa.” — Joh. 12:28.

10-11. a) Jesu dhumiside kharini lina la Jehovha? (Wona fotu.) b) Khu ginani lina la Jehovha li yedwego gu agiswa?

¹⁰ Jesu dhumiside gambe lina la Papayi waye. Khu ndziya muni? Mweyo nya dzindziya a nga gira isoso, khu gu a bhuleya vambe khu makhalelo ni sigiro nyo hlamadzise sa Papayi waye. Ganiolu, uye giride gambe gimbe gilo. Jesu a di yede gu yeyedza gu khuye Jehovha a di gu giride esi nya sadi ni gu lina laye li agide. Uye yeyedzide gu khuye a di gu ninga lisima isoso khu gu hevbudza valandreyi edzi va nga gombeyago khidzo. Uye a di khuye: “Papayi wathu u gu romo ndzadzini, lina lago li na agiswe.” — Mat. 6:9.

¹¹ Khu ginani lina la Jehovha li nga ba li yedwe gu agiswa? Kholu thembweni ga Edheni, Sathane a di ganeya malipha nya makhongolo khu Jehovha Nungungulu. Uye a di khuye Jehovha muliphi nigu a di gu himbedzeya Adhamu ni Evha gu dzi buza khu silo nya sadi. (Gen. 3:1-5) Uye a di ganeya gambe gu khuye ndziya eyi Jehovha a girago khiyo silo khandri yadi. Khu kotani nya malipha ya Sathane, vathu va di hadzi gu pimisa gu khavo Nungungulu khandri wadi. Khu gu landreya, matshigoni ya Joba, Sathane a di khuye ava va thumeyago Jehovha va gu gira isoso kholu Nungungulu a va kategisago. Uye gambe ganede gu khuye mwalo muthu a nga hadzi gu si kodza gu haladza Jehovha khu lisine na gu emisana ni sigaradzo. (Joba 1:9-11; 2:4) Si di gu lombega tepo gasi gu tugula oyu a gu muliphi, Jehovha mwendro Sathane.

“ENI NYA GU NINGEYA WOMI WANGU”

12. Ginani Jesu a nga ba a dzi emisede gu gira khu kotani nya lihaladzo a gu nalo khu lina la Jehovha?

¹² Khu kotani nya lihaladzo laye khu Jehovha, Jesu a di gu vbweta gu gira satshavbo a si kodzago gasi gu dhumisa ni gu agisa lina la Jehovha. Jesu a di khuye: “Eni nya gu ningeya womi wangu.” (Joh. 10:17, 18) Jesu a di gu dzi emisede gufa khu kotani nya lina la Jehovha.b Vathu nyo pheye nyo vbeleye, a gu Adhamu ni Evha, va di pfhurareya Jehovha va engisa Sathane. Gu hambana navo, Jesu a di gu dzi emisede guta mafuni gasi gu yeyedza lihaladzo a gu nalo khu Jehovha. Jesu giride isoso khu gu tumbega ga Jehovha ga satshavbo a nga ba a gira ni gu ganeya. (Hebh. 4:15; 5:7-10) Jesu a simamide na tumbegide womini waye watshavbo kala litshigu a nga songwa avbo nya simbo nya tshanisa. (Hebh. 12:2) Khu ndziya yeyi, uye a di gu yeyedza gu khuye a di gu haladza Jehovha ni lina Laye.

13. Khu ginani Jesu a nga ba ari muthu nya wadi gasi gu yeyedza gu khuye Sathane muliphi? (Wona fotu.)

¹³ Womini waye watshavbo, Jesu a si kodzide gu yeyedza gu khuye Sathane muliphi, nasiri Jehovha! (Joh. 8:44) Jesu a di gu muti gwadi Jehovha guvbindra ni wevbini muthu a vbanyidego. Khu kharato, nari khatshi gimwegyo nya esi Sathane a ganedego maningano khu Jehovha lisine, Jesu a di hadzi gu siti isoso. Ganiolu Jesu, a di gu dzi emisede gu vhikeya ni gu agisa lina la Jehovha. Ambari dzimbe dzitepo si nga ba si wonega gu khatshi Jehovha a mu digide, Jesu a di gu dzi emisede gufa vbavbandze nya gu pfhurareyi Papayi waye nya lihaladzo. — Mat. 27:46.c

“NYI VBEDZIDE THUMO U NYI RUMIDEGO GU GIRA”

14. Jehovha kategiside kharini Jesu khu kotani nya gu tumbege gwaye?

¹⁴ Ga nombelo a nga gira ga wutshigu waye nya gu hegise, Jesu a di khuye: “Nyi vbedzide thumo u nyi rumidego gu gira.” Uye a di gu tumba gu khuye Jehovha a di hadzi gu mu kategisa khu gu tumbega gwaye. (Joh. 17:4, 5) Jesu a di gu gira gwadi khu gu tumba Papayi waye. Jehovha kha dzumeleya gu khuye a simama thowoni. (Mith. 2:23, 24) Uye a di mu wusa khu gufani a bwe a mu ninga gikhalo nyo khugege ndzadzini. (Filp. 2:8, 9) Khu gu landreya, Jesu a di pheya gu fuma kha nga Pfhumu nya Mufumo wa Nungungulu. Ginani Mufumo wowo wu na girago? Gipandre nya wuvili nya nombelo owu Jesu a nga hevbudza valandreyi vaye wari khuwo: “Mufumo wago wu nate, gugola ga [Jehovha] gu na girege mafuni kha nga edzi gu giregago khidzo ndzadzini.” — Mat. 6:10.

15. Ginani gambe Jesu a na girago?

¹⁵ Nya mba hweya, Jesu a na dwana ni valala va Nungungulu a bwe a fuvisa vatshavbo nya gu vivbedwe khu monyo avba nya nyimbi ya Arimagedhoni. (Gutu. 16:14, 16; 19:11-16) Khu gu landreya, a na rinya Sathane umo nya “liphala nya likhongolo ngudzu” omu nya gu kha na nga si kodza gu gira gilo. (Gutu. 20:1-3) Jesu a na wusedza gurula a bwe a gira vathu vatshavbo va vbeleya avba nya Mufumo waye nya 1000 myaga. Uye a na wusa gambe ava va fudego a bwe a gira litigo latshavbo li khala paradhesi. Khu gu hegisa, makungo ya Jehovha ma na tadzisega! — Gutu. 21:1-4.

16. Ginani gi na ba gi giregide hwane nya Mufumo nya 1000 myaga?

¹⁶ Womi wu na khala kharini hwane nya Mufumo nya 1000 myaga? Gighoho ni gu mba vbeleya kha si nga manega gambe. Vathu kha va na nga lomba gambe divalelo nya sighoho sawe na va gu seketedwa khu muphaso wa Jesu; ne kha va na nga vbweta gambe Vaprista. Nigu “nala nya guhegise, a gu gufa [hi nga gu mana ga Adhamu], a na ba a fuvisidwe.” Mathowo ma na ba mari maphanga kholu vathu va na ba va wusidwe khu gufani. Vatshavbo mafuni va na ba va vbelede. — 1 Kor. 15:25, 26.

17-18. a) Ginani gi na giregago gu hegisani nya Mufumo nya 1000 myaga? b) Ginani Jesu a na girago tepo mufumo waye wu na vbohago mahegiso? (1 Vakorinto 15:24, 28) (Wona fotu.)

¹⁷ Ginani gambe gi na giregago guhegisani nya Mufumo nya 1000 myaga? Khu lisine, gu na girega gilo nyo tsakise ngudzu. Mwalo gambe a na kanakanago gu khuye Jehovha, Nungungulu agidego nigu nya gu lulame. Khu ginani? Thembweni ga Edheni, Sathane a di khuye Jehovha muliphi nigu uye kha fume khu lihaladzo. Gukhugeya iyoyo, sithumi sa Jehovha si ngu gira satshavbo si si kodzago gasi gu yeyedza gu khiso Jehovha Mufumeli nya wadi ga vatshavbo. Khu kharato, gu hegisani nya Mufumo nya 1000 myaga, Lina la Jehovha li na agiswa khu gu vbeleya. Nigu uye a na ba a yeyedzide gu khuye nya mba kanakana Papayi nya lihaladzo.

¹⁸ Khu gu hegisa, vatshavbo va na dziti gu khavo satshavbo esi Sathane a nga ganeya maningano khu Jehovha malipha. Ginani Jesu a na girago tepo mufumo waye wu na vbohago mahegiso? Ina a na pimedzeya giyeyedzo gya Sathane, a wugeya Jehovha? Ahihi. (Leri 1 Vakorinto 15:24, 28.) Jesu a na bweledza Mufumo ga Papayi waye. Nigu uye a na dzinogisa ga Mufumo wa Jehovha. Khu lisine, gu hambana ni Sathane, Jesu a dzi emisede gu diga satshavbo khu kotani nya olu a haladzago Jehovha.

19. Lina la Jehovha li di gu thula ginani ga Jesu?

¹⁹ Kha hi hlamali khu gu ba Jehovha a dzi emisede gu ninga lina Laye Jesu! Jesu yeyedzide gu khuye muemeyi nyo vbeleye wa Papayi waye. Ganiolu, lina la Jehovha la gu thula ginani ga Jesu? Ilo li na ni lisima ngudzu ga Jesu guvbindra satshavbo. Uye a di gu dzi emisede gufa khu kotani nya lina lolo, nigu a dzi emisede gu bweledza satshavbo ga Jehovha guvbeyani nya Mufumo nya 1000 myaga. Ethu ke, hi nga pimedzeya kharini giyeyedzo gyaye? Hi na wona hlamulo nya giwudziso gegi ga ndrima yi landreyago.