NDRIMA NYA GIHEVBULO 23
NDZIMO 2 Lina lago khuwe Jehovha
Lina la Jehovha li na ni lisima gwathu
“‘Enu mu dzifakazi dzangu,’ a ngu ganela Pfhumu Nungungulu.” — ISA. 43:10.
MAKUNGO NYA GIHEVBULO GEGI
Hi na wona esi hi nga girago gasi hi yeyedza gu khethu Jehovha agide nigu satshavbo Sathane a nga ganeya maningano khuye malipha.
1-2. Ho dziti kharini gu khethu lina la Jehovha li na ni lisima ga Jesu?
LINA la Jehovha li na ni lisima ngudzu ga Jesu. Ga vatshavbo, khuye nyo pheye a emeyago lina la Papayi waye. Ga ndrima yi vbindridego, hi hevbude gu khethu Jesu a di gu dzi emisede gufa khu lina la Jehovha ni esi li emeyago. (Marko 14:36; Hebh. 10:7-9) Nigu hwane nya Mufumo nya 1000 myaga, Jesu a na ba a dzi emisede gu ningeya watshavbo wufumo gasi gu agisa lina la Jehovha. (1 Kor. 15:26-28) Satshavbo esi Jesu a giredego Jehovha so yeyedza gu khiso uye a ngu mu haladza ngudzu.
2 Jesu a dita mafuni khu lina la Papayi waye. (Joh. 5:43; 12:13) Uye tivegiside lina la Papayi waye ga valandreyi vaye. (Joh. 17:6, 26) Uye hevbudzide khu lina la Jehovha a bwe a gira silewugiso khu lina leli. (Joh. 10:25) Nigu tepo Jesu a nga gombeya ga Jehovha gasi a woneleya vapizane vaye, uye a di mu lomba isoso “khu kotani nya lina [Laye].” (Joh. 17:11) Somo guagani gu khiso lina la Nungungulu li na ni lisima ngudzu ga Jesu guvbindra ni gevbini gilo. Khu kharato, muthu a nga si kodza kharini gu ganeya gu khuye a gu landra Jesu narigu kha liti nigu kha thumisi lina la Jehovha?
3. Hi na bhula khu ginani avba nya ndrima yeyi?
3 Khu kotani nya olu hi gu Makristo nya lisine, ethu ha gu pimedzeya Jesu khu gu yeyedza lihaladzo ni gu ninga githawo lina la Jehovha. (1 Ped. 2:21) Ga ndrima yeyi, hi na wona edzi lina la Jehovha li tivigisago khidzo vale va huweleyago ‘mahungu nya yadi nya Mufumo.’ (Mat. 24:14) Hi na wona gambe gu khethu, khu ginani lina la Jehovha li yedego gu khala nya lisima ga moyo ni moyo wathu.
“VATHU VA NGA HADZI GU RANWA KHU LINA LAYE”
4. a) Ginani Jesu a embedego vapizane vaye na si bweleyi ndzadzini? b) Giwudziso muni hi na bhulago khigyo?
4 Na si bweleyi ndzadzini, Jesu a di embeya vapizane vaye gu khuye: “Mu na hakha tshivba ni gu mu na khala dzifakazi dzangu Jerusalema, ni Judheya gwatshavbo ni Samariya kala mahegiso nya mafu.” (Mith. 1:8) Khu kharato, vapizane va Jesu va di hadzi gu tshumayela mahungu nya yadi ni ga wevbini wulanga nasiri basi Israyeli. Khu gu hegisa, vathu nya mayigo yatshavbo va di hadzi gu mana lithomo nya gu khale valandreyi va Jesu. (Mat. 28:19, 20) Ganiolu Jesu a di khuye: “Mu na khala dzifakazi dzangu.” Ina si di gu lombega gu vapizane vava nya vaphya vati lina la Jehovha mwendro gu khala basi dzifakazi dza Jesu? Sigiro si tshamusedwego ga libhuku la Mithumo gipimo 15 si na hi phasa gu hlamula giwudziso gegi.
5. Vapostoli ni madhota Jerusalema, va yeyedzide kharini gu khavo vatshavbo va di yede gu liti lina la Jehovha? (Wona fotu.)
5 Khu mwaga nya 49 matshigoni yathu, vapostoli ni madhota ya Jerusalema ma di tshangana gasi gu ganeya khu mahungu ma gu khayo ava va gu siri Vajudha va di yede gu hana wugwera gasi va khala vapizane va Jesu. Gu hegisani nya mabhulo yaya, Jakobe ndriye wa Jesu a di khuye: “[Pedro] hi embede gu khuye olu Nungungulu a dzumede vanyamayigo gasi gu hatha vbakari gwawe vathu va nga hadzi ranwa khu lina laye.” A di gu ganeya khu mani Jakobe? Na gu ganeya khu muprofeti Amosi, a di engedza gu khuye: “Gasi ava va nga tshala va vbwetedzeya Jehovha khu monyo watshavbo gumogo ni vanyamayigo vatshavbo va ranwago khu lina laye, a ngu ganeya Jehovha.” (Mith. 15:14-18) Vapizane vava nya vaphya va di hadzi gu mba hevbula basi khu Jehovha, ganiolu va di hadzi gu ‘ranwa gambe khu lina laye.’ Isoso so thula gu khiso avo va di hadzi gu tivegisa lina la Jehovha ga vambe, nigu va di hadzi gu tidwa khu lina lolo.
Ga tshangano nya huwo nya guthangeye wu nga girwa khu lizana myaga nyo pheye, vama vale nyo tumbege va wonide gu khavo Makristo ma yede gu tidwa khu lina la Nungungulu (Wona paragrafu 5)
6-7. a) Khu ginani Jesu a ngata mafuni? b) Khu gevbini gimbe gighelo nya lisima ngudzu gi nga gira Jesu ata mafuni?
6 Lina la Jesu lo thula gu khilo “Jehovha muvbulugisi wathu,” nigu Jehovha thumiside Jesu gasi gu vbulugisa vathu vatshavbo va khodwago gwaye ni gu khodwa ga Gyanana gyaye. Jesu dzude mafuni a ta ningeya womi waye gasi gu vbulugisa vathu vatshavbo. (Mat. 20:28) Khu gu livba dzegiso, uye giride gu vathu vatshavbo va divaledwa sighoho ni gu manega ni gutumba nya gu vbanye kala gupindruga. — Joh. 3:16.
7 Ganiolu, khu ginani si nga ba si vbwetega gu vathu va dzegiswa? Khu kotani nya esi si nga girega thembweni ga Edheni. Kha nga hi nga si wona ga ndrima yi vbindridego, vavelegi vathu nyo pheye a gu Adhamu ni Evha, va di wugeya Nungungulu, khu kharato va di luza lithomo nya gu vbanye kala gupindruga. (Gen. 3:6, 24) Ganiolu, Jesu dzude mafuni gasi guta gira gilo nya lisima ngudzu gu vbindra gu vbulugisa basi situgulwana sa Adhamu ni Evha. Sathane ganede malipha nya makhongolo khu Jehovha. (Gen. 3:4, 5) Khu kharato, vathu va di yede gu dziti gu khavo gimwalo nyo vivbe Jehovha a giridego ni gu lina laye li agide. Nigu Jesu khuye muthu nya wadi a nga hadzi gu gira isoso, kholu uye a di gu emeya lina la Jehovha nigu giride satshavbo Jehovha a nga ba a vbweta gu khuye a gira.
Muthu a nga si kodza kharini gu ganeya gu khuye a gu landra Jesu narigu kha liti nigu kha thumisi lina la Jehovha?
8. Ginani valandreyi vatshavbo va Jesu va yedego gu gi pwisisa?
8 Vatshavbo va nga ba va khodwa ga Jesu, va di yede gu dzumeya gu khavo gifefe nya gu vbulugiswe gwawe khu Jehovha Nungungulu. (Joh. 17:3) Vbavbandze nya isoso, gu fana ni Jesu avo va di hadzi gu tidwa khu lina la Jehovha. Nigu va di yede gu pwisisa gambe lisima nya gu agise lina la Jehovha. Avo va di yede gu gira satshavbo sesi gasi va vbulugiswa. (Mith. 2:21, 22) Khu kharato, valandreyi vatshavbo nyo tumbege va Jesu va di yede gu hevbula khu Jehovha gufana naye. Kha hi hlamali khu gu ba Jesu a hegiside nombelo waye wu gomogo ga Johane gipimo 17 khu gu ganeya gu khuye: “Eni nyi va tiviside lina lago, nigu nyi na simama gu li tivegisa, gasi lihaladzo u nyi haladzidego khilo li khala navo, nigu aneni nyi pwanana navo.” — Joh. 17:26.
“ENU, KHENU DZIFAKAZI DZANGU”
9. Ginani hi yedego gu gira gasi hi yeyedza gu khethu lina la Jehovha li na ni lisima gwathu?
9 Vatshavbo valandreyi va Jesu nya lisine, va yede gu ninga lisima gu agisa lina la Jehovha. (Mat. 6:9, 10) Avo va yede gu ninga lisima lina la Jehovha. Nigu va yede gu yeyedza isoso khu mithumo. Ganiolu, ginani hi yedego gu gira gasi hi agisa lina la Jehovha ni gu yeyedza gu khethu satshavbo esi Sathane a nga ganeya khu Jehovha malipha?
10. Ginani hi gi hevbulago ga libhuku la Isaya sipimo 42 kala 44? (Isaya 43:9; 44:7-9) (Wona fotu.)
10 Ga Isaya sipimo 42 kala 44, hi ngu si kodza gu wona esi hi yedego gu gira gasi hi agisa lina la Jehovha. Ga sipimo sesi, Jehovha o lomba ava va si mu khozeyigo gasi va yeyedza gu khavo ina vanungungulu vawe, vanungungulu nya lisine gani. Gu fana ni tribhunali yi lamulago mahungu nyo khaguri, uye o wudzisa gu khuye ina dzomo dzifakazi dzi fakazago isoso. Ganiolu, mwalo a nga si kodza gu gira isoso! — Leri Isaya 43:9; 44:7-9.
Ga satshavbo hi girago, hi ngu yeyedza gu khethu mwalo mumbe Nungungulu nya lisine vbavbandze ga Jehovha (Wona dziparagrafu 10-11)
11. Guya khu Isaya 43:10-12, ginani Jehovha a nga embeya vathu vaye?
11 Leri Isaya 43:10-12. Na gu ganeya khu vathu vaye, Jehovha a di khuye: “Enu, khenu dzifakazi dzangu, . . . eni kheni Nungungulu [wanu.]” Jehovha a gu va lomba gasi gu hlamula giwudziso gegi: “Womo mumbe Nungungulu vbavbandze ga Eni, gani?” (Isa. 44:8) Ethu hi na ni lithomo nya likhongolo nya gu hlamuli giwudziso gegi. Khu malito ni sigiro sathu, hi ngu si kodza gu yeyedza gu khethu mwalo mumbe Nungungulu vbavbandzi ga Jehovha a gu Nungungulu nya lisine. Lina laye li khugegide guvbindra yatshavbo malina. Nigu khu mavbanyelo yathu hi ngu yeyedza gu khethu khu lisine hi ngu mu haladza Jehovha nigu hi ngu tumbega gwaye ambari olu Sathane a zamago khenu ni enu gu lemedziseya womi wathu. Khu ndziya yoyo, hi na ni lithomo nya gu phasedzeye gu agisa lina la Jehovha.
12. Gi tadzisegide kharini giprofeto gi gomogo ga Isaya 40:3, 5?
12 Tepo hi emeyago mwendro gu agisa lina la Jehovha, ha gu pimedzeya Jesu Kristo. Isaya profetide gambe gu khuye, muthu nyo khaguri a di hadzi gu ‘dongiseya, ndziya ya Pfhumu Nungungulu.’ (Isa. 40:3) Si tadzisegide kharini isoso? Johane Mubhabhatisi a dongisede ndziya Jesu, oyu a ngata emeya ni gu ganeya khu lina la Jehovha. (Mat. 3:3; Marko 1:2-4; Luka 3:3-6) Giprofeto gyagimwegyo gi di ganeya gambe khigyo: “Vathu vatshavbo va na wona wudhumo wa Pfhumu Nungungulu.” (Isa. 40:5) Si giregide kharini isoso? Tepo Jesu a ngata mafuni, uye a di emeya khu gu vbeleya Jehovha, khu kharato si di gira gu khatshi khuye kamo Jehovha a ngata mafuni. — Joh. 12:45.
13. Hi nga pimedzeya kharini Jesu?
13 Gufana ni Jesu, ethu hi Dzifakazi dza Jehovha. Hi ngu ranwa khu lina laye, nigu hi ngu bhuleya vambe esi hi sitigo khu mithumo yaye nyo hlamadzise. Ganiolu, gasi hi khala dzifakazi nya dzadi dza Jehovha, hi yede gu phasa vambe gu siti satshavbo Jesu a nga gira gasi gu agisa lina la Jehovha. (Mith. 1:8) Jesu khuye Fakazi nyo pheye ya Jehovha, nigu ethu hi ngu pimedzeya giyeyedzo gyaye ni gu landra sileletelo saye. (Gutu. 1:5) Ganiolu, moyo ni moyo wathu a nga yeyedza kharini gu khuye lina la Jehovha li na ni lisima gwaye?
DZIMBE DZINDZIYA YI NGA YEYEDZAGO GU KHETHU LINA LA JEHOVHA LI NA NI LISIMA GWATHU
14. Guya khu Ndzimo 105:3, ho dzipwa kharini khu lina la Jehovha?
14 Hi ngu dzi khusedza khu lina la Jehovha. (Leri Ndzimo 105:3.) Jehovha a ngu tsaka ngudzu tepo hi dzi khusedzago khu kotani nya lina laye. (Jer. 9:23, 24; 1 Kor. 1:31; 2 Kor. 10:17) Gu dzi ‘khusedza khu Jehovha,’ so thula gu dzipwa matshandza khu gu ba Jehovha ari Nungungulu wathu. Hi ngu wona kha nga lithomo nya likhongolo gu agisa ni gu emeya lina laye. Nigu gima kha hi yeli gu dzipwa dzitshoni gu ganeya ga sithumi khwathu, sihevbuli khwathu, vavhizinyu ni vambe vathu gu khethu hi Dzifakazi dza Jehovha! Sathane a ngu dzina ngudzu gu hi wona na hi gu diga gu bhuleya vambe khu lina la Jehovha. (Jer. 11:21; Gutu. 12:17) Nigu esi Sathane ni vaprofeti vaye nya malipha va si vbwetago ngudzu, khu gu vathu va divaledwa khu lina la Jehovha. (Jer. 23:26, 27) Ganiolu, kha nga olu hi golago ngudzu lina la Jehovha hi dzi emisede gu mu dhumisa “matshigu yatshavbo.” — Ndzi. 5:11; 89:16.
15. So thula ginani gu rana lina la Jehovha?
15 Hi ngu simama gu rana lina la Jehovha. (Joy. 2:32; Rom. 10:13, 14) Gu rana lina la Jehovha so pata silo nya singi vbavbandze nya guti ni gu thumisa lina laye basi. So pata gambe guti gwadi Nungungulu kha nga muthu, gu mu tumba ni gu mu lomba giphaso ni sileletelo saye. (Ndzi. 20:7; 99:6; 116:4; 145:18) Gu rana Jehovha, so pata gambe gu bhuleya vambe khu lina laye ni makhalelo yaye nyo hlamadzise. Nigu hi ngu phasa vathu gu vbindrugedza womi wawe gasi va kodza gu tsakisa Jehovha ni gu vbulugiswa. — Isa. 12:4; Mith. 2:21, 38.
16. Hi nga yeyedza kharini gu khethu Sathane muliphi?
16 Hi dzi emisede gu tshaniseka khu kotani nya lina la Jehovha. (Jak. 5:10, 11) Tepo hi simamago gu tumbega ga Jehovha ndrani nya sigaradzo, ha gu yeyedza gu khethu Sathane muliphi nya khongolo. Matshigoni ya Joba, Sathane singedzide sithumi sa Jehovha khuye: “Muthu a ngu dzi kodza gu ningela satshavbo a gu naso, gasi gu kodza gu vbanyisa womi waye.” (Joba 2:4) Sathane a di gu vbweta gu ganeya gu khuye muthu a nga thumeya Jehovha basi sa gu mu gimbileya gwadi, nigu a di hadzi gu pfhurareya Jehovha a gu tshangana ni sigaradzo. Githumi nyo tumbege Joba, yeyedzide gu khuye ayoyo malipha nya makhongolo ngudzu. Anethu muhuno, hi ngu si kodza gu yeyedza gu khethu ambari ha gu tshangana ni sigaradzo nyo khaguri mwendro Sathane a zama gu hi vbedza tshivba, ethu gima kha hi na nga diga gu thumeya Jehovha. Nigu hi nga tumba gu khethu Jehovha a na hi khathaleya khu kotani nya lina laye. — Joh. 17:11.
17. Guya 1 Pedro 2:12 khu yevbini yimbe ndziya yi nga dhumisago khiyo lina la Jehovha?
17 Hi ngu ninga githawo lina la Jehovha. (Mav. 30:9; Jer. 7:8-11) Khu kotani nya olu vathu va dzitigo gu khavo hi Dzifakazi dza Jehovha, hi nga agisa lina laye mwendro gu li tsundzisa. (Leri 1 Pedro 2:12.) Khu kharato, ho vbweta gu dhumisa Jehovha khu maganelelo ni sigiro sathu. Tepo hi girago isoso, ambari olu hi gu vathu nya mba vbeleya hi na si kodza gu dhumisa lina la Jehovha.
18. Khu yevbini yimbe ndziya yi nga yeyedzago gu khethu lina la Jehovha li na ni lisima gwathu? (Wona tshamuselo wa vbavbatshi.)
18 Hi ngu ninga lisima lina la Jehovha ambari vathu va gu pimisa ni gevbini khethu. (Ndzi. 138:2) Khu ginani isoso si gu na ni lisima ngudzu? Kholu tepo hi girago silo si tsakisago Jehovha, gu tala nya dzitepo vathu kha va na nga hi tsakeya, nigu va nga ganeya guvivba khethu.a Tepo Jesu a ngafa, vathu va di gu mu wona kha nga gighohi nigu kha va nga ba va mu ninga lisima. Ganiolu, Jesu a di gu dzi emisede gufa khu ndziya yeyi gasi gu dhumisa Jehovha. Uye a di si “theyi kota khu dzitshoni” kholu a di si garadzegi ngudzu khesi vathu va nga ba va pimisa khuye. (Hebh. 12:2-4) Esi a nga ba a si vbweta basi, gu gira gugola ga Jehovha. — Mat. 26:39.
19. Wo dzipwa kharini khu kotani nya lina la Jehovha, nigu khu ginani?
19 Hi ngu tsaka ngudzu khu gu thumeya Jehovha, nigu hi ngu dzi khusedza khu gu ranwa Dzifakazi dza Jehovha. Khu kotani nya olu lina la Jehovha li gu na ni lisima gwathu, hi dzi emisede gu simama gu mu dhumisa ambari vathu va gu mba hi ninga lisima. Lina la Jehovha li na ni lisima gwathu guvbindra satshavbo. Khu kharato, ambari Sathane a gu zama kharini gu hi vbedza tshivba, hongoleni hi dzi emiseya gu simama gu dhumisa lina la Jehovha. Ha gu gira isoso, gufana ni Jesu Kristo, hi na yeyedza gu khethu lina la Jehovha li na ni lisima gwathu.
NDZIMO 10 Rungudza Jehovha Nungungulu wathu!
a Ambari mwama nyo tumbege Joba, a di pheya gu garadzega vbagudwana khu kotani nya esi vathu va nga ba va pimisa khuye, kholu vama vale nya vararu va di ganeya gu khavo uye giride gilo nyo vivbe. Gupheya, tepo a nga luza sanana saye ni satshavbo a nga ba ari naso, “Joba kha gira ni gighoho gimwegyo, gambe kha singedza gilo Nungungulu.” (Joba 1:22; 2:10) Ganiolu, tepo a nga singedzwa, uye a di pheya gu dzi emeya a bwe a ‘vbiredzeya gu ganeya.’ Uye a di vbweta gu agisa lina laye vbavbandze nya gu agise lina la Jehovha. — Joba 6:3; 13:4, 5; 32:2; 34:5.