Ina Jehovha a ngu hlamula milombelo yangu?

1-2. Khu ginani hi dzipwago nga khatshi Jehovha kha hlamuli milombelo yathu?

“VEGA ga [Jehovha] gutsaka gwago, uye a na gu ninga gugola nya monyo wago.” (Ndzi. 37:4) Egi gitumbiso nyo tsakise ngudzu! Ganiolu, ina hi yede gu vireya gu khethu Jehovha a hi ninga satshavbo esi hi mu lombago? Khu ginani si gu na ni lisima gu dzi gira giwudziso gegi? Wona siyeyedzo nyo khaguri. Ndriyathu nya nyamayi a si tshadhigo, a gu gombeya gasi a si kodza gu hongola Xikwatuno nya vavhangeli nya Mufumo. Ganiolu, ya gu vbindra myaga nya yingi nya mba ranwa. Ndriyathu nya muphya a gu lomba Jehovha gasi a mu phasa gu hawuluga madwali yaye gasi a si kodza gu gira nya singi libandlani. Ganiolu, madwali yaye kha ma vbindri. Vavelegi nyo khaguri nya Makristo, va gu gombeleya sanana sawe gasi si simama lisineni. Ganiolu, iso si hunga gu ema gu thumeya Jehovha.

² Adzina saye u di nga lomba gilo nyo khaguri Jehovha, ganiolu u si gi hakhi. Kha nga handro wakone, adzina u nga pimisa gu khuye Jehovha kha hlamule milombelo yago, ganiolu a gu hlamula basi milombelo ya vambe. Mwendro u nga pimisa gu khuwe gyomo nyo vivbe u giridego. Ndriyathu moyo nyo pwani khu Janiceb a dzipwide khu ndziya yeyi. Uye ni mwama waye va di gombede gasi guya thuma Bheteli. Uye wari, khuye: “Eni nyi di gu tiyisega gu kheni nya mba hweya hi di hadzi gu hongola Bheteli.” Ganiolu, avo va di vbedza myaga nya yingi nya mba ranwa. Janice wari, khuye: “Eni nyi di garadzega nyi bwe nyi dzudzega mapimo. Eni nyi di gu dzi wudzisa gu kheni, ginani nyi nga gira gi nga zangarisa Jehovha. Eni nyi di gombede ngudzu gasi nyi hongola Bheteli. Khu ginani Jehovha a gu mba hlamula nombelo wangu?”

3. Dzipontu muni hi na bhulago khidzo?

³ Dzimbe dzitepo hi nga dzi wudzisa gu khethu, ina Jehovha a ngu engiseya milombelo yathu? Vama nyo tumbege va vbanyidego gale, va dzi giride giwudziso gyagimwegyo. (Joba 30:20; Ndzi. 22:2; Habh. 1:2) Ginani gi nga gu tiyisegisago gu khigyo Jehovha a na hlamula milombelo yago? (Ndzi. 65:2) Gasi gu hlamula giwudziso gegi hongoleni hi wona mihlamulo nya siwudziso sesi: 1) Ginani a na girago Jehovha? 2) Jehovha o vireya gu khuye hi gira ginani? 3) Khu ginani hi yedego gu tshukwadzisa esi hi lombago umo nya milombelo yathu?

GINANI A NA GIRAGO JEHOVHA

4. Guya khu Jeremiya 29:12, ginani Jehovha a tumbisago gu gira?

⁴ Jehovha a gu tumbisa gu engiseya milombelo yathu. (Leri Jeremiya 29:12.) Nungungulu wathu a ngu hi haladza kholu hi mu thumeyago khu gu tumbega, khu kharato tepo yatshavbo a na engiseya milombelo yathu. (Ndzi. 10:17; 37:28) Ambari ulolo, isoso kha si thuli gu khiso uye a na hi ninga satshavbo hi si vbwetago. Adzina saye, hi na vireya kala mafuni nya maphya gasi gu hakha esi hi mu lombidego.

5. Jehovha a gu wona ginani tepo a engiseyago milombelo yathu? Tshamuseya.

⁵ Jehovha a gu wona edzi milombelo yathu yi gimbeleyanago khidzo ni makungo yaye. (Isa. 55:8, 9) Gipandre nya makungo yaye, khu gu mafu yatshavbo ma tala khu vathu va mu engisago kha nga Pfhumu yawe. Ganiolu, Sathane a gu ganeya gu khuye silo si na duga gwadi vathu va gu dzi fuma vabune. (Gen. 3:1-5) Gasi gu yeyedza gu khuye Dhiyabhulosi a gu lipha, Jehovha a di dzumeleya gu khuye vathu va dzi fuma. Ambari ulolo, dzipfhumu nya vathu dza gu vanga sigaradzo nya singi hi tshanganago naso muhuno. (Muh. 8:9) Ethu hi ngu dziti gu khethu Jehovha kha na nga dusa sigaradzo sesi olu. Jehovha a gu dusa sigaradzo sesi olu, vathu va gu mba khodwa gwaye va na pimisa gu khavo, vathu va nga kodza gu lulamisa sigaradzo sawe.

6. Khu ginani hi yedego gu tiyisega gu khethu Jehovha tepo yatshavbo a na engiseya milombelo yathu khu ndziya nya lihaladzo ni gu lulama?

⁶ Jehovha a ngu hlamula milombelo nyo fane khu dzindziya nyo hambane. Khu giyeyedzo, tepo Pfhumu Ezekiya a nga dwala ngudzu, uye a di lomba Jehovha gasi gu mu hawulugisa. Jehovha a di hlamula milombelo yaye khu gu mu hawulugisa. (2 Dzipf. 20:1-6) Ga yimbe tepo, mupostoli Pawulo a di lomba Jehovha gasi a mu dusa “muba givilini,” adzina saye a gu madwali a nga ba ari nawo, ganiolu Jehovha kha mu duseya gigaradzo gyogyo. (2 Kor. 12:7-9) Wona giyeyedzo gya mupostoli Jakobe ni Pedro. Pfhumu Herodhi a di gu vbweta gu va songa. Libandla li di gombeleya Pedro adzina saye gambe ni Jakobe. Ambari ulolo, Jakobe a di songwa, ganiolu Pedro a di vbulugiswa khu ngilozi. (Mith. 12:1-11) Adzina hi nga dzi wudzisa gu khethu: ‘Khu ginani Jehovha a nga vbulugisa basi Pedro a diga Jakobe?’ Bhibhiliya kha yi ganeyi gu khiyo khu ginani.c Hi nga tiyisega gu khethu dzindziya dza Jehovha “dzi lulamide.” (Dhet. 32:4) Nigu hi ngu dziti gu khethu Pedro ni Jakobe va di gu tsakedwa khu Jehovha. (Gutu. 21:14) Dzimbe dzitepo, Jehovha kha hlamuli milombelo yathu khu ndziya hi nga ba hi yi vireya. Ganiolu, khu kotani nya olu hi gu na ni gutumba nya gu khethu Jehovha a na hlamula milombelo yathu khu ndziya nya lihaladzo ni gu lulama, kha hi ngurangureyi Jehovha khedzi a hlamulago khidzo milombelo yathu. — Joba 33:13.

7. Ginani hi potsago gu gira, nigu khu ginani?

⁷ Hi ngu potsa gu fananisa giemo gyathu ni egi gya vambe. Khu giyeyedzo, hi nga lomba Jehovha a hi phasa khu ndziya nyo kongome, ganiolu a si hi hlamuli. Ganiolu, khu gu gimbiya nya tepo hi tugula gu khethu Jehovha a hlamude mumbe muthu a nga gira gilombo nyo fane. Ndriyathu nyo pwani khu Anna a tshanganide ni giemo nyo fane. Uye a di gombeleya mwama waye Matthew gasi gu hawuluga ga madwali nya câncer. Khu tepo yayimweyo, vandriyathu vavili va dandridego khu tanga anavo va diri ni madwali nya câncer. Anna a gombelede mwama waye Matthew ni vandriyathu vava vavavili. Vandriyathu vava va hawulugide, ganiolu Matthew a difa. Gupheyani Anna a di gu dzi wudzisa gu khuye, vandriyathu vava va di hawuluga kholu Jehovha a nga va phasa, ganiolu khu ginani Jehovha a nga mba hawulugisa mwama waye? Khu lisine, ethu kha hi dziti gu khethu khu ginani vandriyathu vale va nga hawuluga. Ganiolu, hi ngu dziti gu khethu Jehovha a na fuvisa gutshaniseka gwatshavbo khu gu vbeleya, nigu a na wusa dzipari dzaye dzi fudego. — Joba 14:15.

8. a) Guya khu Isaya 43:2, Jehovha a na hi phasa kharini? b) Nombelo wu nga hi phasa kharini tepo hi tshanganago ni sigaradzo? (Wona vhidhyu yi gu khiyo Nombelo wu ngu hi phasa gu emisana ni sigaradzo.)

⁸ Jehovha a na hi phasa tepo yatshavbo. Jehovha, kha nga Papayi nya lihaladzo kha vbweti gu hi wona na hi gu tshaniseka. (Isa. 63:9) Ambari ulolo, kha na nga hi vhikeya ga sigaradzo sathu si fanago ni mitshongo ni malavbelavbe nya nilo. (Leri Isaya 43:2.) Ganiolu, a gu tumbisa gu hi phasa tepo hi tshanganago naso. Nigu kha na nga dzumeleya gu khuye sigaradzo sathu si hi vbedza ngudzu tshivba. Khu gu thumisa liphuvbo laye nya guage, Jehovha a na hi ninga tshivba gasi gu timiseya. (Luka 11:13; Filp. 4:13) Kha nga handro wakone, hi nga tiyisega gu khethu tepo yatshavbo, Jehovha, a na hi ninga esi hi si vbwetago gasi gu timiseya ni gu simama gu tumbega gwaye.d

JEHOVHA O VIREYA GU KHUYE HI GIRA GINANI?

9. Guya khu Jakobe 1:6, 7, khu ginani hi yedego gu tumba gu khethu Jehovha a na hi phasa?

⁹ Jehovha o vireya gu khuye hi mu tumba. (Hebh. 11:6) Dzimbe dzitepo, hi nga dzipwa na hi gu lemeledwa khu sigaradzo sathu. Adzina hi nga pheya gu kanakana gu khethu Jehovha a na hi phasa. Ganiolu, Bhibhiliya ya gu hi tiyisegisa gu khiyo khu tshivba ya Nungungulu hi nga si kodza gu “ndraga mabhiyo.” (Ndzi. 18:29) Ganiolu, wulangani nya gu dige gu kanakana gwathu gu tsitsa mikhamba, hi yede gu gombeya khu gukhodwa na hi gu tiyisega gu khethu Jehovha a na hlamula milombelo yathu.— Leri Jakobe 1:6, 7.

10. Ninga giyeyedzo nya esi hi yedego gu gira hwane nya gu ba hi gombede hi lomba giphaso Jehovha.

¹⁰ Jehovha o vireya gu khuye hi gira esi si gimbeleyanago ni milombelo yathu. Khu giyeyedzo, ndriyathu nyo khaguri a gu lomba giphaso Jehovha gasi a mana tepo thumoni gwaye nya gu hongole kongresu. Jehovha a di hadzi gu hlamula kharini nombelo wowu? Adzina a nga ninga gutiya-hwambo ndriyathu yoyo gasi a ganeya ni patrawu waye. Ganiolu, ndriyathu yoyo a yede gu gira gilombo gyaye khu gu phindra-phindra. Uye adzina a nga dzi ningedza gasi gu thuma limbe litshigu nigu sa gu lombega uye a nga dusa folga, ganiolu a si hakhiswi.

11. Khu ginani hi yedego gu gombeya khu gu phindra-phindra khesi hi si vbwetago?

¹¹ Jehovha o vireya gu khuye hi gombeya khu gu phindra-phindra khesi hi si vbwetago. (1 Tes. 5:17) Jesu a di ganeya gu khuye, simbe silombo sathu kha si na nga hlamudwa khavba ni avba. (Luka 11:9) Ganiolu, kha hi yeli gu vbeya tshivba. Gombeya khu monyo wago watshavbo nigu khu gu phindra-phindra. (Luka 18:1-7) Tepo hi simamago gu gombeya khesi hi si vbwetago, ha gu yeyedza Jehovha gu khethu esi hi si gombeleyago si na ni lisima ngudzu. Ha gu yeyedza gambe gu khethu hi ngu tumba giphaso gyaye.

KHU GINANI HI YEDEGO GU TSHUKWADZISA ESI HI LOMBAGO UMO NYA MILOMBELO YATHU?

12. a) Khu gevbini giwudziso hi yedego gu dzi gira maningano khesi hi lombago nigu khu ginani? b) Hi nga tiyisega kharini gu khethu milombelo yathu yi ngu yeyedza githawo Jehovha? (Wona kwadru yi gu khiyo: “Ina esi nyi lombago umo nya milombelo yangu si ngu yeyedza githawo Jehovha?”)

¹² Milombelo yathu ya gu mba hlamudwa, adzina hi nga dzi gira siwudziso siraru. Nyo pheye: “Ina nya gu gombeya khu silo nya sadi?” Dzimbe dzitepo, hi ngu pimisa gu khethu hi ngu siti esi si gu sadi gwathu. Ganiolu, esi hi lombago adzina kha si na nga hi phasa. Abari gu ha gu gombeya khu gigaradzo nyo khaguri, adzina saye yomo ndziya nya tshukwana gasi gu gi lulamisa guvbindra eyi hi gombeyago khiyo. Nigu simbe silo hi lombago kha si gimbeleyani ni gugola ga Jehovha. (1 Joh. 5:14) Hongoleni hi wona giyeyedzo nya vavelegi nyo khaguri va khumbugidwego gupheyani. Avo va di lomba Jehovha gasi sanana sawe si simama lisineni. Egi gi nga gira gu khatshi gilombo nya gyadi. Ganiolu, Jehovha kha gurumedzi muthu gasi gu mu thumeya. Uye a gu vbweta gu khuye hatshavbo gumogo ni sanana sathu hi hatha gu mu khozeya. (Dhet. 10:12, 13; 30:19, 20) Khu kharato, vavelegi vava na va lombide Jehovha a va phasa gu kuha myonyo ya sanana sawe gasi gu mu haladza ni gu khala dzipari Dzaye. — Mav. 22:6; Efes. 6:4.

13. Guya khu Vahebheru 4:16, Jehovha a na hi phasa khu tepo muni? Tshamuseya.

¹³ Giwudziso nya wuvili khigyo gi gu khigyo: ‘Ina eyi tepo nya yadi gasi Jehovha a hlamula gilombo gyangu?’ Adzina hi nga pimisa gu khethu milombelo yathu yi yedwe gu hlamudwa khavba ni avba. Ganiolu, Jehovha a ngu yiti tepo nya yadi gasi gu hi phasa. (Leri Vahebheru 4:16.) Tepo milombelo yathu yi girago gu khatshi ya gu hweya gu hlamudwa, ethu hi nga pimisa gu khethu Jehovha kha dzumeleyani ni gilombo hi giridego. Ganiolu, adzina yi si vbohi tepo yakone gasi gu hi hlamula. Khu giyeyedzo, dundrugeya khu muphya wule a nga gombeya ga Jehovha gasi a mu hawulugisa ga madwali yaye. Nari khatshi Jehovha a di mu hawulugiside, Sathane na ganede gu khuye muphya yoyo a di simama gu thumeya Jehovha kholu basi a nga mu hawulugisa. (Joba 1:9-11; 2:4) Gu diga isoso, Jehovha vegide tepo nya yadi gasi gu fuvisa madwali yatshavbo. (Isa. 33:24; Gutu. 21:3, 4) Na yi si vbohi tepo yoyo, kha hi yeli gu vireya gu khethu Jehovha a hi hawulugisa khu gu gira gilewugiso. Khu kharato, ndriyathu yoyo na lombide Jehovha gasi a mu ninga gurula ni tshivba nya gu timiseye ni gu simama gu mu thumeya na tumbegide. — Ndzi. 29:11.

14. Wa gu hevbula ginani khu giyeyedzo gya Janice?

¹⁴ Dundrugeya khu giyeyedzo gya Janice a nga gombeya gasi gu hongola Bheteli. Hwane nya 5 myaga, uye a di tugula gu khuye Jehovha a di gu hlamude milombelo yaye khu ndziya nyo hambane. Uye wari, khuye: “Jehovha thumiside tepo yeyi gasi gu nyi hevbudza nya singi ni gu nyi phasa gu khala Mukristo nya wadi. Gutumba nyi nga ba nyiri nago khuye gu di engedzeya gu tiya. Eni nyi di yede gu hevbula gwadi Bhibhiliya. Eni nyi hevbude gu kheni nyi nga tsaka khu gu thumeya Jehovha ni wevbini wulanga.” Khu gu landreya, Janice ni mwama waye va di kovhidharwi gasi guya thuma kha nga vawoneleyi nya sirkwitu. Janice wari, khuye: “Jehovha hlamude milombelo yangu khu ndziya nyi nga ba nyi si yi vireyi. Nyi vbedzide tepo nyo laphe na nyi si wu woni hlamulo, ganiolu nyi ngu bonga ngudzu khu gu ba nyi manide lithomo nya gupwi lihaladzo ni wuwadi waye.”

15. Khu ginani hi yedego gu tshukwadzisa milombelo yathu? (Wona fotu.)

¹⁵ Nya wuraru, dzi wudzise gu khuwe: ‘Nyi yede gu gombeya khu gimbe gilo?’ Khyadi gu gira nombelo nyo kongome, ganiolu dzimbe dzitepo si na ba siri sadi gu tshukwadzisa milombelo yathu gasi gu tugula esi Jehovha a si vireyago gwathu. Wona giyeyedzo gya ndriyathu nya nyamayi a si tshadhigu, a nga gombeya gasi a si kodza gu hongola Xikwatuno nya vavhangeli nya Mufumo. Uye a di gu vbweta gu hongola ga xikola yeyi gasi a si kodza guya phasedzeya ga malanga va vbwetegago vahuweleyi nya vangi. Khu kharato, tepo a nga ba a gombeya gasi gu ranwa xikwatuno, uye na lombide Jehovha gasi a mu phasa gu wona dzimbe dzindziya nya gu andrise thumo waye. (Mith. 16:9, 10) Hwane nya gu ba a gombede khu mahungu yoyo, na wudziside muwoneleyi nya sirkwitu gu khuye, ina lomo limbe libandla la vbafuvbyana li vbwetago vapiyoneru? Mwendro na lovede lidangaliya bheteli na wudzisa gu khuye, womo wulanga wu vbwetegago vahuweleyi nya vangi?e

16. Ginani hi nga tiyisegago khigyo?

¹⁶ Kha nga hi hevbudego hi nga tiyisega gu khethu Jehovha a na engisa milombelo yathu khu ndziya nya lihaladzo ni gu lulama. (Ndzi. 4:3; Isa. 30:18) Dzimbe dzitepo, hi nga mana hlamulo hi nga mba wu vireya. Ganiolu, Jehovha kha veti khu lisabi milombelo yathu. Uye a ngu hi haladza ngudzu nigu gima kha na nga hi diga. (Ndzi. 9:10) Khu kharato, simama gu ‘tumba Nungungulu dzitepo dzatshavbo’ u mu embeya satshavbo si gomogo monyoni gwago khu nombelo. — Ndzi. 62:8.