Hi nga simama kharini gu tiyisa lihaladzo hi gu nalo khu vambe?

1-2. a) Khu ginani Mupostoli Pawulo a nga ganeya gu khuye lihaladzo likhalelo nya “likhongolo”? b) Siwudziso muni hi na bhulago khiso?

TEPO Mupostoli Pawulo a nga ganeya khu gukhodwa, gutumba ni lihaladzo, uye a di hegisa khu gu khuye: “[Ga makhalelo yaya,] nya likhongolo lihaladzo.” (1 Kor. 13:13) Khu ginani Pawulo a nga ganeya isoso? Mindru watshigu, kha si na nga vbwetega gu hi khodwa avbo nya situmbiso sa Nungungulu maningano khu mafu nya maphya. Kholu silo sesi si na ba si tadzisegide, ganiolu tepo yatshavbo hi na ba hi yede gu haladza Jehovha ni vathu. Khu lisine, lihaladzo lathu khawe li na simama gu dandra kala gupindruga.

² Kha nga olu hi yedego gu yeyedza lihaladzo tepo yatshavbo, hi na bhula khu siwudziso siraru. Nyo pheye, khu ginani hi yedego gu haladzana? Nya wuvili, hi nga yeyedzana kharini lihaladzo? Nya wuraru, hi nga simama kharini gu tiyisa lihaladzo hi gu nalo khu vambe?

KHU GINANI HI YEDEGO GU HALADZANA?

3. Khu sevbini sighelo hi gu naso nya gu haladzani?

³ Khu ginani si gu na ni lisima gu haladzana? Tepo hi yeyedzago lihaladzo vandriyathu, ho yeyedza gu khethu hi Makristo nya lisine. Jesu a di embeya vapostoli vaye gu khuye: “Mwa gu haladzana, khavbo vathu va na dzitigo gu khavo mu vapizane vangu.” (Joh. 13:35) Vbavbandze nya isoso, gu haladzana si na hi phasa gu manega ni gupwanana. Pawulo a di khuye lihaladzo “la gu gira gu vathu vatshavbo va pwanana khu gu vbeleya.” (Kol. 3:14) Ganiolu, gu na ni gimbe gighelo nya lisima gi hi kutsago gu haladzana. Mupostoli Johane a di loveya vandriyaye gu khuye: “Oyu a haladzago Nungungulu gu vbwetega a haladza ndriyaye gambe.” (1 Joh. 4:21) Tepo hi haladzanago, ho yeyedza gu khethu hi ngu haladza Nungungulu.

4-5. Ninga giyeyedzo nya edzi lihaladzo lathu khu Nungungulu li pwananago khidzo ni lihaladzo hi yeyedzago vandriyathu.

⁴ Lihaladzo lathu khu Nungungulu la gu pwanana kharini ni lihaladzo hi yeyedzago vandriyathu? Khu giyeyedzo, wona gupwanana gu gomogo avbo nya monyo wathu ni simbe sivbango nya givili gyathu. Tepo dhokodheya a pharago pulsu yathu gasi gu wona gu khuye wu ngari wadi mwendro ne, uye a nga si kodza gu tugula gu khuye monyo wathu wu ngari wadi gani. Ginani hi nga gi hevbulago khu giyeyedzo gegi?

⁵ Tepo dhokodheya a pharago pulsu yathu, a nga tugula gu khuye monyo wathu wu ngari wadi mwendro ne. Khu ndziya nyo fane, hi nga tugula gu khethu lihaladzo lathu khu Nungungulu li tiyide ha gu wona edzi lihaladzo lathu khu vambe li gu idzo. Ha gu tugula gu khethu lihaladzo lathu khu vandriyathu li vbode, isoso adzina so thula gu khiso lihaladzo lathu khu Nungungulu la gu vbola. Ganiolu, tepo yatshavbo hi yeyedzago lihaladzo vandriyathu, hi na dziti gu khethu lihaladzo lathu khu Nungungulu li tiyide.

6. Khu ginani hi yedego gu gira gilogyo ha gu wona gu khethu lihaladzo hi gu nalo khu vandriyathu la gu vbola? (1 Johane 4:7-9, 11)

⁶ Hi yede gu gira gilogyo ha gu tugula gu khethu lihaladzo hi gu nalo khu vandriyathu la gu vbola. Khu ginani? Kholu isoso sa gu tshamuseya gu khiso wupari wathu ni Jehovha wa gu vbola. Mupostoli Johane a si vegide guagani tepo a nga khuye: “Kholu oyu a si haladzigo ndriyaye, a mu wonago, kha si kodzi gu haladza Nungungulu oyu a si mu wonigo.” (1 Joh. 4:20) Ginani hi gi hevbulago? Ha gu hevbula gu khethu Jehovha a na hi tsakeya basi ha gu “haladzana.” — Leri 1 Johane 4:7-9, 11.

HI NGA YEYEDZANA KHARINI LIHALADZO?

7-8. Khu dzevbini dzindziya nyo khaguri hi nga dzi thumisago gasi gu yeyedza lihaladzo vambe?

⁷ Tepo yatshavbo umo nya Lito la Nungungulu, hi ngu mana nayo wu gu khuwo “haladzanani.” (Joh. 15:12, 17; Rom. 13:8; 1 Tes. 4:9; 1 Ped. 1:22; 1 Joh. 4:11) Ganiolu, lihaladzo likhalelo li khugeyago monyoni, li gu mba wonwa khu muthu. Khu kharato, hi nga yeyedza kharini lihaladzo hi gu nalo khu vambe? Khu malito ni mithumo.

⁸ Hi na ni dzindziya nya dzingi hi nga dzi thumisago gasi gu yeyedza gu khethu hi ngu haladza vandriyathu. Edzi dzindziya nyo khaguri: “Ganelani lisine, muthu ni muthu ga muthu kwawe.” (Zak. 8:16) “Vbanya khu gurula ni vambe.” (Marko 9:50) “Dzi garadzeyeni gupheya khenu mu ninga githawo vambe.” (Rom. 12:10) “Hakhanani khu gyanu.” (Rom. 15:7) “Simamani gu . . . divaleyana.” (Kol. 3:13) “Rwaleyanani sigaradzo sanu.” (Gal. 6:2) “Simamani gu thaveleyana khu gyanu.” (1 Tes. 4:18) “Simamani gu . . . vbahana khu gyanu.” (1 Tes. 5:11) “Mu gombeleyana khu gyanu.”— Jak. 5:16.

9. Khu ginani gu thaveleya vandriyathu a gu ndziya nya lisima gasi gu yeyedza gu khethu hi ngu va haladza? (Wona fotu.)

⁹ Hongoleni hi wona mweyo nya dzindziya hi nga yi thumisago gasi gu yeyedza lihaladzo vambe. Pawulo a di khuye: “Simamani gu thaveleyana khu gyanu.” Khu ginani gu thaveleya vambe a gu ndziya nya lisima gasi gu yeyedza gu khethu hi ngu va haladza? Guya khu referensiya nyo khaguri nya Bhibhiliya, lito “gu thaveleya” Pawulo a li thumisidego la gu tshamuseya gu “khala vbafuvbi ni muthu a tshanganago ni gigaradzo nyo khaguri.” Khu kharato, tepo hi thaveleyago ndriyathu nyo khaguri a tshanisekago ha gu mu phasa gu simama gu thumeya Jehovha na tumbegide. Nigu tepo yatshavbo hi thaveleyago vandriyathu, ha gu va yeyedza gu khethu hi ngu va haladza. — 2 Kor. 7:6, 7, 13.

10. Khu gwevbini gupwanana gu gomogo avbo nya pweya-wusiwana ni gu thaveleya vambe?

¹⁰ Pweya-wusiwana ni gu thaveleya tapa ni likandharinya. Khu ndziya muni? Muthu a gu na ni pweya-wusiwana a gu kutsega gu thaveleya ni gu phasa vambe. Pawulo o tshamuseya gu khuye pweya-wusiwana owu Jehovha a yeyedzago vathu, khuwo wu mu girago a va thaveleya. Pawulo a gu rana Jehovha kha nga “Papayi a tadego khu wuhindzi ni Nungungulu nya guthaveleye gwatshavbo.” (2 Kor. 1:3) Avba Pawulo a gu thumisa lito “wuhindzi” gasi gu tshamuseya pweya-wusiwana hi yeyedzago vambe. Khu kharato, Nungungulu a gu ranwa gu pwani Papayi mwendro gifefe nya wuhindzi kholu a ngu yeyedza pweya-wusiwana vathu. Pweya-wusiwana wowo, wa gu mu kutsa gu thaveleya vambe “ni ga gevbini gilingo.” (2 Kor. 1:4) Kha nga gifefe nya mati gi dusago mati ma tshimago lidora, khu ndziya nyo fane Jehovha a gu gifefe nya pweya-wusiwana a ngu thaveleya ava va garadzegago. Hi nga pimedzeya kharini pweya-wusiwana wa Jehovha ni gu thaveleya vambe? Mweyo nya dzindziya yi nga girago khidzo isoso, khu gu haguleya makhalelo ma na hi phasago gu manega ni pweya-wusiwana ni gu thaveleya vambe. Khu yavbini makhalelo yakone?

11. Guya khu Vakolosi 3:12 ni 1 Pedro 3:8, makhalelo muni ma nga hi phasago gu yeyedzana lihaladzo ni gu thaveleyana khu gyathu?

¹¹ Ginani gi na hi phasago gu ‘simama gu thaveleyana khu gyathu” tshigu ni tshigu? Hi yede gu haguleya makhalelo nya nga pweya-wusiwana, lihaladzo nya wundruye ni wuwadi. (Leri Vakolosi 3:12; 1 Pedro 3:8.) Makhalelo yaya ma nga hi phasa kharini? Tepo hi yeyedzago pweya-wusiwana vandriyathu ni gu yeyedza gu khethu hi ngu khathala khavo, hi na manega ni gudogoreya nya gukhongolo nya gu thaveleye ava va tshanganago ni sigaradzo. Kha nga Jesu a ganedego, “likana lo ganeya esi si tadego monyoni. Muthu nya wadi a gu dusa silo nya sadi khu thombani gwaye nya yadi.” (Mat. 12:34, 35) Gu thaveleya vandriyathu va vbwetago giphaso, mweyo nya dzindziya nya lisima hi nga dzi thumisago gasi gu yeyedza gu khethu hi ngu va haladza.

HI NGA SIMAMA KHARINI GU TIYISA LIHALADZO HI GU NALO KHU VAMBE?

12. a) Khu ginani hi yedego gu dzi woneya gasi lihaladzo lathu khu vandriyathu li si vboli? b) Giwudziso muni hi na bhulago khigyo?

¹² Hatshavbo hi ngu dzina gu simama “gu haladzana.” (1 Joh. 4:7) Khu kharato, si na ni lisima gu dundruga gu khethu Jesu a hi gengedzide gu khuye: “Lihaladzo nya vathu nya vangi li [di hadzi gu] dzidziya.” (Mat. 24:12) Jesu kha nga ba a vbweta gu ganeya gu khuye vapizane vaye nya vangi va di hadzi gu ema gu yeyedzana lihaladzo. Ganiolu, hi yede gu dzi woneya gasi hi si kutsedzedwe khu vathu nya litigo leli gu mba yeyedzana lihaladzo. Na hi gu dundrugeya khesi, hongoleni hi bhula khu giwudziso gegi: Ginani gi na nyi phasago guti gu kheni lihaladzo nyi gu nalo khu vandriyango li tiyide?

13. Ginani gi na hi phasago guti gu khethu lihaladzo hi gu nalo khu vandriyathu li tiyide mwendro ne?

¹³ Mweyo nya dzindziya hi nga dzi thumisago gasi gu wona gu khethu lihaladzo lathu li tiyide, khu gu wona esi hi girago tepo hi tshanganago ni siemo nyo khaguri guvbanyani gwathu. (2 Kor. 8:8) Gimwegyo nya siemo soso gi khumbugidwe khu Mupostoli Pedro tepo a nga khuye: “Ganiolu ga silo satshavbo, haladzanani ngudzu kholu lihaladzo li ngu fenengedza sighoho nya singi.” (1 Ped. 4:8) Khu kharato, esi hi girago tepo vandriyathu va hi ghoheyago mwendro va hi gandrago ginyalana si na hi phasa guti gu khethu lihaladzo lathu li tiyide mwendro ne.

14. Guya khu 1 Pedro 4:8, lihaladzo muni hi yedego gu manega nalo? Tshamuseya.

¹⁴ Hongoleni hi dundrugeya gwadi khu malito ya Pedro. Gipandre nyo pheye nya livhesi 8 lo tshamuseya lihaladzo hi yedego gu manega nalo, a gu ‘gu haladzana ngudzu.’ Lito “ngudzu” Pedro a li thumisidego, khu mambe maganelelo li nga tshamuseya gilo gi “thawuludzidwego.” Gipandre nya wuvili nya livhesi leli, gya gu tshamuseya esi lihaladzo lolo nya likhongolo li girago. Ilo la gu fenengedza sighoho sa vandriyathu. Khu giyeyedzo, dundrugeya khu meza yi nga rweregeya nigu yi gu na ni sivbalana. Si nga kodzega gu dzega panu u yi thawuludza gasi gu yi fenengedza, ganiolu nasiri sivbalana nya sidugwana basi ganiolu satshavbo. “Gu fenengedza” sa gu fana ni gu divaleya. Khu ndziya nyo fane, ha gu ba hiri ni lihaladzo nya likhongolo khu vandriyathu hi nga si kodza gu fenengedza sighoho sawe, nasiri gimwegyo mwendro sivili, ganiolu “nya singi”.

15. Lihaladzo lathu khu vandriyathu la gu ba li tiyide, ginani hi na gi kodzago gu gira? (Vakolosi 3:13)

¹⁵ Lihaladzo hi gu nalo khu vambe li yede gu tiya gasi hi si kodza gu divaleya sihoso hi giredwago khu vandriyathu ambari isoso sa gu ba si garadza. (Leri Vakolosi 3:13.) Tepo hi divaleyago vambe ha gu yeyedza gu khethu lihaladzo lathu li tiyide nigu ha gu vbweta gu tsakisa Jehovha. Ginani gi na hi phasago gu divaleya sihoso hi giredwago khu vambe ni gu potsa gu vega gupima avbo nya sihoso va hi gireyago?

16-17. Ginani gi na hi phasago gu mba vega gupima ga silo nya mba sadi hi giredwego khu vambe? Tshamuseya. (Wona fotu.)

¹⁶ Vega gupima avbo nya makhalelo nya yadi ya vandriyathu nasiri ga ayo nya mba yadi. Wona gipimaniso gegi. Dzi dundrugeyi na wu romo ni vandriyathu avbo nya tshangano nyo khaguri. Uwe u tsakide ngudzu nigu gu hegisani nya tshangano wa gu dusa fotu ni vatshavbo. Uwe wa gu dusa dzifotu dzimbili kholu eyi nyo pheye kha ya khala. Olu u duside dzifotu dziraru. Ganiolu, u tugula gu khuwe avbo nya fotu mweyo ndriyathu kha hega. Fotu yoyo u na yi rini? Uwe u na yi pfhuta kholu u na ni dzifotu dzimbili u nga dusa ni vatshavbo nigu ndriyathu wule na gu hega.

¹⁷ Hi nga fananisa dzifotu dzedzi ni esi hi si dundrugago khu vandriyathu. Khu lisine, ethu hi ngu dundruga dzitepo nya dzadi hi dzi vbedzidego ni vandriyathu. Ganiolu, ga dzitepo dzedzi nga dundrugeya ndriyathu nyo khaguri na ganede mwendro gu gira silo nyo khaguri si nga mba gu tsakisa. Ginani hi yedego gu gira ha gu dundruga silo nya nga isoso? Hi yede gu divala silo sesi gu fana ni edzi hi nga hadzi gu pfhuta fotu yile. (Mav. 19:11; Efes. 4:32) Ethu hi nga dzi garadzeya gu divala silo nya mba sadi si giridwego khu ndriyathu yoyo kholu hi ngu dundruga silo nya sadi a giridego tepo hi nga ba hiri hatshavbo. Esi silo nya sadi hi vbwetago gu simama gu si dundruga.

KHU GINANI MUHUNO SI GU NA NI LISIMA GU YEYEDZANA LIHALADZO?

18. Silo muni hi hevbudego khiso avba nya ndrima yeyi?

¹⁸ Khu ginani hi vbwetago gu simama gu tiyisa lihaladzo hi gu nalo khu vambe? Kha nga hi si hevbudego, tepo hi yeyedzago lihaladzo vandriyathu ha gu yeyedza gu khethu hi ngu haladza Jehovha. Ha gu yeyedza kharini lihaladzo vandriyathu? Khu gu va thaveleya. Hi na si kodza gu “thaveleyana khu gyathu” ha gu ba hiri ni pweya-wusiwana. Hi nga simama kharini gu tiyisa lihaladzo hi gu nalo khu vambe? Khu gu divaleya vandriyathu ambari sa gu ba si garadza.

19. Khu ginani muhuno si gu na ni lisima gu hi yeyedzana lihaladzo?

¹⁹ Khu ginani si gu na ni lisima muhuno watshigu gu yeyedzana lihaladzo? Wona gighelo gi khumbugidwego khu Pedro: “Mahegiso nya silo satshavbo momo vbafuvbi. Khu kharato, . . . haladzanani ngudzu.” (1 Ped. 4:7, 8) Kha nga olu ma vbohago mahegiso nya litigo leli nya guvbivbe, ginani hi nga gi vireyago? Na gu ganeya khu valandreyi vaye, Jesu a di khuye: “Mu na nyenywa khu mayigo yatshavbo khu kotani nya lina langu.” (Mat. 24:9) Gasi hi simama na hi tumbegide ga Jehovha, hi yede gu simama gu pwanana. Ha gu gira isoso, makungo ya Sathane kha ma na nga pfoledwa khu lidambo kholu lihaladzo la gu hi gira hi “pwanana khu gu vbeleya.” — Kol. 3:14; Filp. 2:1, 2.