Gutumba gwago gu na tadzisega khu lisine

1. Khu ginani Abrahama a nga ba a yede gu tiyisega gu khuye a na velega gyanana?

JEHOVHA tumbiside pari yaye Abrahama gu khuye a na velega gyanana nigu vathu vatshavbo mafuni va na kategiswa khu kotani yagyo. (Gen. 15:5; 22:18) Abrahama a diri ni gukhodwa nyo tiye khu Nungungulu, khu kharato uye a di gu tiyisega gu khuye Nungungulu a na tadzisa gitumbiso gyaye. Gu di gu keneleya vbadugwana gasi Abrahama a enedza 100 myaga ni gu Sara a diri ni 90, ambari ulolo va di ngari mwalo gyanana. (Gen. 21:1-7) Ganiolu, Bhibhiliya yari, khiyo: “Khu kotani nya gutumba a nga ba ari nago, [Abrahama] a di gu khodwa gu khuye a di hadzi khala papayi nya mayigo nya mangi, khu guya khesi Nungungulu a ganedego.” (Rom. 4:18) Uwe u ngu dziti gu khuwe gitumbiso egi Abrahama a nga ba a gi vireya gi tadzisegide. Uye a khade papayi wa Isaki. Khu ginani Abrahama a nga ba a yede gu tumba Jehovha?

2. Khu ginani Abrahama a nga tiyisega gu khuye gitumbiso gya Jehovha gi na tadzisega?

² Kholu Abrahama a di gu muti gwadi Jehovha, khu kharato “uye a di gu tiyisega gu khuye Nungungulu a na ni makodzelo nyo gire esi a mu tumbisidego” nigu si di hadzi gu tadzisega. (Rom. 4:21) Abrahama a di gu tsakedwa khu Jehovha, nigu a mu wonide na lulamide khu kotani nya gukhodwa gwaye. (Jak. 2:23) Kha nga hi si wonidego ga libhuku la Varoma 4:18, gukhodwa ni gutumba ga Abrahama si di gu gimbileyana. Olu hi na wona esi Pawulo a ganeyago maningano ni gutumba omu ga Varoma gipimo 4.

3. Ginani egi Pawulo a ganedego maningano ni gutumba?

³ Pawulo a gu tshamuseya gu khuye “gutumba gwathu kha gu hi thesi dzitshoni.” (Rom. 5:5) Uye gambe a gu hi phasa gu pwisisa gu khethu gutumba gwathu gu nga engedzeya gu tiya. Hi na leri libhuku la Varoma 5:1-5, tepo hi girago isoso, dundrugeya khedzi gutumba gwago gu engedzeyago khidzo gu tiya khu gu gimbiya nya tepo. Esi Pawulo a lovedego Varoma si na gu phasa gambe gu wona dzindziya nya gu tiyise gukhodwa u gu nago muhuno. Ganiolu, gu pheya hongoleni hi wona gutumba nyo tsakise ogu Pawulo a ganedego gu khuye kha gu na nga hi theya dzitshoni.

GUTUMBA GWATHU NYO TSAKISE

4. Ginani hi gi hevbulago ga Varoma 5:1, 2?

⁴ Leri Varoma 5:1, 2. Pawulo lovede malito yaya libandla la Roma. Vandriyathu va libandla leli va di hevbude khu Jehovha ni Jesu, nigu va di hagulede gukhodwa va bwe va khala Makristo. Khu kharato, Nungungulu a va ‘wonide nga vathu nyo lulame khu kotani nya gukhodwa,’ nigu a va todzide khu liphuvbo nya guage. Avo va di hadzi gu vireya gu ningwa tshatshazelo nyo tsakise, nigu va di gu tiyisega gu khavo va na wu mana.

5. Gutumba muni ogu Makristo matodzidwego ma gu nago?

⁵ Khu gu landreya, Pawulo a di loveya Makristo matodzidwego ya Efeso maningano khu gutumba ogu Nungungulu a va ningidego. Gutumba gogu go pata “simbe a tumbisidego va nya guaga.” (Efes. 1:18) Nigu Pawulo tepo a nga loveya Makristo ya Kolosi a va yeyedzide omu Makristo matodzidwego ma na manago umo gutumba gwawe. Uye a di khuye: ‘Gutumba gwawe va vegedwe ndzadzini.’ (Kol. 1:4, 5) Gutumba va gu nago ava vatodzidwego khu gu wuswa va ya vbanya ndzadzini kala gupindruga, umo va na fumago ni Kristo. — 1 Tes. 4:13-17; Gutu. 20:6.

6. Ginani egi ndriyathu moyo a todzidwego a ganedego khu gutumba gwaye?

⁶ Makristo matodzidwego ma ngu ninga ngudzu lisima gutumba ma gu nago. Moyo nya vandriyathu vovo, Frederick Franz ganede edzi a dzipwago khidzo khu gutumba gogo, uye a di khuye: “Gutumba gwathu gu tiyide nigu gu na tadzisega ga moyo ni moyo a wumbago tsawa nya 144 000 nya tshambi-dugwana. Nigu tshatshazelo wowu wu na ba wuri nya gu tsakise ngudzu guvbindra ni wevbini hi wu hakhidego.” Ndriyathu Franz hwane nya gu ba a thumede Jehovha khu gu tumbega khu myaga nya yingi, khu 1991 a di ganeya gu khuye: “Ethu hi ngo simama gu ninga lisima gutumba gogu . . . Tepo hi simamago gu vireya, ha gu engedzeya gu bonga khu gutumba gogu. Hi dzi emisede gu vireya ambari sa gu dzega myaga nya yingi. Eni nyi ngu ninga ngudzu lisima gutumba hi gu nago.”

7-8. Gutumba muni ogu sithumi nya singi sa Jehovha si gu nago? (Varoma 8:20, 21)

⁷ Nya vangi va khozeyago Jehovha muhuno, va na ni gutumba nyo hambane. Gutumba ga gumogo gu nga ba guri ni Abrahama, nya gu vbanye mafuni kala gupindruga vbavbatshi nya Mufumo wa Nungungulu. (Hebh. 11:8-10, 13) Pawulo lovide maningano khu gutumba gogo nyo tsakise. (Leri Varoma 8:20, 21.) Tepo nyo pheye u nga hevbula khu gutumba gogu nyo tsakise, ginani gi nga gu drindra gupima? Ina kholu u nga ba u dziti gu khuwe litshigu limwedo u na vbeleya u bwe u si manegi ni gighoho? Mwendro khu guti gu khuwe ava va fudego va na wuswa va vbanya gambe paradhesini mafuni? Khu kotani nya gutumba gogu, hi ngu dziti gu khethu ha gu vireya silo nya singi nyo tsakise.

⁸ Gani gutumba gwathu kha gu vbanya kala gupindruga ndzadzini mwendro paradhesini mafuni, hatshavbo hi na ni sighelo nya singi nyo tsake. Nigu gutumba gogu nyo tsakise gu nga engedzeya gu tiya. Pawulo o tshamuseya gu khuye isoso si nga kodzega kharini. Hongoleni hi wona esi a lovidego maningano khu gutumba hi gu nago. Malito yaya ma ngu hi phasa gu engedzeya gutumba gu khethu esi hi si vireyago si na tadzisega.

GUTUMBA GWATHU GU NGA ENGEDZEYA GU TIYA

9-10. Guya khu giyeyedzo gya Pawulo, Makristo ma nga vireya ginani? (Varoma 5:3) (Wona dzifotu.)

⁹ Leri Varoma 5:3. Pawulo a di khuye gutshaniseka hi tshanganago nago olu gu nga hi phasa gu tiyisa gutumba gwathu. Adzina saye isoso si nga hi hlamadzisa. Lisine khu gu vatshavbo valandreyi va Jesu va na tshangana ni sigaradzo. Wona giyeyedzo gya Pawulo. Uye a di embeya Makristo ya Tesalonika khuye: “Tepo hi nga ba hiri nanu hi di gu oloveya gu mi embeya gu khethu hi na emisana ni dzitshanisa nigu khiso kamo si giregago kha nga mu dzitigo.” (1 Tes. 3:4) Nigu a di loveya Vakorinto khuye: “Vandriyathu, ho vbweta gu khethu muti gutshaniseka hi tshanganidego nago . . . avba nyo bwe hi pimisa gu khethu hi nafa.” — 2 Kor. 1:8; 11:23-27.

¹⁰ Anayo Makristo muhuno ma yede gu vireya gu tshangana ni tshanisa nyo khaguri. (2 Thim. 3:12) Ahati uwe? Ina u di nga wugedwa khu kotani nya olu u khodwago ga Jesu? U di nga tsorodzedwa khu dzipari dzago mwendro valongo? Adzina saye avo va gu pharide khu ndziya nya mba yadi. Adzina u di nga wugedwa thumotuno khu kotani nya gutumbege gwago. (Hebh. 13:18) Mwendro u di nga wugedwa khu mifumo khu kotani nya olu u tshumayelago vambe khu gutumba u gu nago. Na sisi khathadzisegi guwugedwa hi tshanganidego nago, Pawulo ganede gu khuye hi nga tsaka. Khu ginani?

11. Khu ginani hi yedego gu dzi emiseya gu timiseya sigaradzo?

¹¹ Ethu hi ngu tsaka tepo hi tshanganago ni sigaradzo kholu si ngu hi phasa gu haguleya likhalelo nya lisima. Varoma 5:3 wari, khuye: “Sigaradzo hi emisanago naso si ngu velega gutimiseya.” Yatshavbo Makristo ma na tshangana ni sigaradzo, khu kharato ma yede gu dzi emiseya gu timiseya na ma si khathali khu sigaradzo ma na tshanganago naso. Khiso basi si na hi phasago gu wona gutadzisega nya gutumba gwathu. Ethu kha hi vbweti gu fana ni vale Jesu a va fananisidego ni dzimbewu dzi thegidego umo nya siwindri. Vathu vovo gupheyani va gu dzumeya lisine va bwe va tsaka khilo, ganiolu va “gu tshaniswa mwendro gu wugedwa”, va gu bweleleya hwane va diga gukhodwa. (Mat. 13:5, 6, 20, 21) Lisine gu guwugedwa ni gu tshangana ni sigaradzo kha si tsakise, ganiolu gu timiseya tepo yatshavbo gu ngu resa makategwa nya mangi. Khu ndziya muni?

12. Mihandro muni hi yi manago khu gu timiseya?

¹² Jakobe a di ganeya gu khuye gu timiseya sigaradzo gu ngu resa mihandro nya yadi. Uye a di lova gu khuye: “Digani gutimiseya gwanu gu vbedzisa thumo wanu gasi mu vbeleya, mu si manegi ni gisolo ni ga gevbini giemo mu bwe mu si keneledwi khu gilo.” (Jak. 1:2-4) Jakobe a di ganeya gu khuye gutimiseya gwathu gu na ni gighelo. Khu gevbini gighelo gyakone? Gutimiseya gu ngu hi phasa gu manega ni gu laphisa-monyo, gukhodwa ni gu tumba Nungungulu. Nigu gu nga hi ninga wumbe handro nya lisima.

13-14. Ginani gi giregago tepo hi timiseyago sigaradzo sathu, nigu gwa gu gimbileyana kharini ni gutumba gwathu? (Varoma 5:4)

¹³ Leri Varoma 5:4. Pawulo a di khuye gutimiseya gu ngu hi gira hi “tsakedwa khu Nungungulu.” Isoso so thula gu khiso wa gu timiseya u na tsakedwa khu Jehovha. Ganiolu, khandri so thula gu khiso tepo u wugedwago mwendro gu tshangana ni sigaradzo Jehovha a gu tsaka. Khu lisine Jehovha a ngu tsaka khuwe. Gutimiseya gwago khugo gu gu girago u tsakedwa khu Jehovha. Ayoyo makategwa nyo tsakise ngudzu. — Ndzi. 5:12.

¹⁴ Dundruga gu khuwe Abrahama a timisede sigaradzo nya singi nigu Jehovha a tsakide khu isoso. Jehovha a mu wonide nga pari yaye nigu nga muthu a lulamidego. (Gen. 15:6; Rom. 4:13, 22) Si nga hi giregeya silo sasimweso. Nungungulu kha hi tsakeyi khu kotani nya mithumo hi gu nayo mwendro hi mu gireyago. Uye a gu hi tsakeya kholu hi timiseyago khu gukhodwa. Na yi si khathadzisegi tanga hi gu nayo, giemo gyathu mwendro makodzelo hi gu nawo, hatshavbo hi nga si kodza gu timiseya. Ina olu u ngu timiseya gigaradzo nyo khaguri? Abari gu ina, dundruga gu khuwe u ngu tsakisa Nungungulu. Tepo hi tugulago gu khethu hi ngu tsakedwa khu Nungungulu, gutumba hi gu nago avbo nya situmbiso saye gu na engedzeya gu tiya.

GUTUMBA GWATHU GU NGA ENGEDZEYA GU TIYA

15. Ginani a ganedego Pawulo ga Varoma 5:4, 5, nigu giwudziso muni gi khugago?

¹⁵ Kha nga a ganedego Pawulo, ha gu tsakedwa khu Jehovha tepo hi tumbegago ni gu simama gu timiseya sigaradzo. Wona esi Pawulo a simamidego gu embeya Varoma, uye a di khuye: “Gutsakedwa gogo gu ngu hi ninga gutumba nigu gutumba gwathu kha gu hi thesi dzitshoni.” (Rom. 5:4, 5) Esi adzina saye si nga hi dzudzanyana mapimo. Khu ginani? Kholu kha nga si ganedwego ga Varoma 5:2, Pawulo a di ganeya gu khuye Makristo ya Roma ma diri ni gutumba, a gu “gutumba nyo hakhe wudhumo wu tago khiyo ga Nungungulu.” Khu kharato, muthu nyo khaguri a nga dzi wudzisa gu khuye: ‘Abari gu Makristo yoyo ma diri ni gutumba, khu ginani Pawulo a nga ganeya gambe khu gutumba?’

16. Gutumba gwathu gu na engedzeya khu ndziya muni? (Wona dzifotu.)

¹⁶ Ethu hi nga pwisisa esi Pawulo a ganedego tepo hi wonago gu khethu gutumba gwathu gilo gi dandrago. Khu giyeyedzo, u ngu dundruga litshigu nyo pheye u ngapwa Lito la Nungungulu na li gu ganeya khu gutumba nyo tsakise hi gu nago? Gupheyani, adzina saye u pimiside gu khuwe mahungu ma ganeyago khu gu vbanya paradhesini mafuni kala gupindruga kha ma na nga tadzisega. Ganiolu, tepo u nga simama gu hevbula khu Jehovha ni situmbiso saye nya Bhibhiliya u engedzede gu tiyisega gu khuwe gutumba gogo gu na tadzisega khu lisine.

17. Gutumba gwathu ga gu simama kharini gu dandra hwane nya gu ba hi dzi hendzeledzide ni gu bhabhatiswa?

¹⁷ Ambari hwane nyo ba u dzi hendzeledzide u bwe u bhabhatiswa, u na simama gu hevbula nya singi khu Jehovha ni gu engedzeya gu mu haladza. (Hebh. 5:13–6:1) Uwe u na dzumeleyana ni esi si gomogo umo ga Varoma 5:2-4. Adzina saye u tshanganide ni sigaradzo nya singi, ganiolu u si timisede u bwe u dzipwa na wu tsakedwa khu Nungungulu. Khu kotani nya olu hi dzitigo gu khethu Nungungulu a ngu hi haladza ni gu hi tsakeya, hi na ni gighelo nyo vireye gutadzisega nya situmbiso saye. Gutumba gwago gu engedzede gu tiya guvbindra tepo u ngati lisine. Gutumba gogo gilo nya lisine ni gu gilo nya lisima gwago. Ugo gu ngu kuha womi wago watshavbo. Gu ngu kuha gambe edzi u pharago khidzo ndranga yago, edzi u hungago khidzo makungo ni edzi u thumisago khidzo tepo yago.

18. Gitiyisegiso muni Jehovha a hi ningago?

¹⁸ Mupostoli Pawulo a gu ganeya khu gimbe gilo nya lisima gi ganeyago khu gutumba hi gu nago hwane nya gu ba hi tsakedwe khu Jehovha. A gu hi tiyisegisa gu khuye gutumba hi gu nago khu lisine gu na tadzisega. Khu ginani hi yedego gu tiyisega khu silo sesi? Pawulo tiyisegiside Makristo gu khuye: “Gutumba gwathu kha gu hi thesi dzitshoni, kholu lihaladzo la Nungungulu li guhudwe monyoni gwathu khu gu thumisa liphuvbo nya guage eli Nungungulu a hi ningidego.” (Rom. 5:5) Hi na ni satshavbo hi si vbwetago gasi gu khodwa avba nya gutumba ogu Jehovha a hi ningago.

19. U nga tiyisega khu ginani maningano khu gutumba gwago?

¹⁹ Dundrugeya khu gitumbiso egi Jehovha a giredego Abrahama ni edzi a nga mu tsakeya khidzo ni gu khala pari yaye. Abrahama kha vireya mahala. Bhibhiliya yari khiyo: “Hwane nya gu ba Abrahama a laphiside monyo, a di hakha gitumbiso gegi.” (Hebh. 6:15; 11:9, 18; Rom. 4:20-22) Abrahama kha khunguvanyega. Anuwe kha wu na nga khunguvanyega wa gu simama na wu tumbegide. Gutumba gwago gu na khala nya lisine, gu gu gira u tsaka gu bwe gu si gu khunguvanyisi. (Rom. 12:12) Pawulo a di lova gu khuye: “Nungungulu oyu a ningago guvireya a na mi tadzeni khu gutsaka ni gurula khu kotani nya olu mu mu tumbago, nigu gambe guvireya gwanu gu na tiyiswe ngudzu khu tshivba nya liphuvbo nya guage.”— Rom. 15:13.