GIHEVBULO 6

Thumisa milowo khu ndziya nya yadi

Johane 10:33-36

ESI U YEDEGO GU GIRA: U nga leri lowo basi u vbedza u vbindra u hongola ga gipandre gi landreyago. Tiyisega gu khuwe vaengiseyi vago va ngu gu wona guyelana gu gomogo avba nya lowo u leridego ni mahungu u ganeyago khayo gani.

MAGIRELO YAKONA:

Hatha malito ma seketeyago mahungu u ganeyago khayo. Hwane nyo leri lowo, tshingisa malito ma yelanago gwadi ni mahungu yago. U nga gira isoso khu gu wuyedzeya malito mwendro gu gira giwudziso gi na phasago vaengiseyi gu tugula malito nya litshina.

Wo thumisa malito nyo hambane gasi gu wuyedzeya gu ganeya esi lowo wu ganeyago iso, tiyisega gu khuwe vaengiseyi vago va na simama gu wona guyelana gu gomogo avba nya malito nya Bhibhiliya ni litshina nya mahungu u ganeyago khayo.
Tshingisa malito u vbwetago gu khuwe va ma dundruga. Wo ba u ganede gighelo gi gu girago u leri lowo nyo khaguri, tshamuseya edzi malito nya litshina nya lowo wowo ma seketeyago khidzo gighelo gyogyo.

Tepo u tshamuseyago lowo, u nga segi Bhibhiliya yago. Isoso so phasa vaengiseyi vago gu pwananisa malito yago ni livhesi u ngarigo gu leri.
Ganeya esi si vbwetegago basi. U nga tshamuseyi silo si gu mba yelana ni mahungu u ganeyago khayo. Nu gu dzi seketeya avba nya esi va si tigo khu mahungu yoyo, gu vbwetega uti pimo nya esi si vbwetegago gu tshamusedwa gasi gu vaengiseyi vago va ma pwisisa mahungu yago.