Kubamba Luumuno Akuchita Kuti Mbungano Ikkale Kiisalala

MUNYAKA amunyaka bantu biingi balikwiinka kung’anda yaJehova yabukombi bwakasimpe alubo eezi zilikuzuzikizya businsimi buli muBbayibbele. (Mik. 4:1, 2) Kulatubotezya kuba ambabo ‘mumbungano yaLeza.’ (Mil. 20:28) Balakuyanda kukomba Jehova kabali andiswe alubo balabotelwa akaambo kabusalali aluumuno zijanika muparadayizi yamubukombi. Muuya uusalala waLeza amalayilile aajanika muJwi lyakwe, zitugwasya kuti tubambe luumuno akuchita kuti mbungano ikkale kiisalala.—Int. 119:105; Zek. 4:6.

² Kubelesya malayilile aazwa muBbayibbele kutugwasya kuti ‘tusame buntu bupya.’ (Kol. 3:10) Tatuzumizyi kuti kuba amaboneno aasiyene kupe kuti tuleke kumvwanana. Kubona zintu mbuli mbazibona Jehova kutugwasya kuti tuzunde lweeno luli munyika akuti tubelekelaamwi katuli bakwesu bamunyika yoonse.—Mil. 10:34, 35.

³ Nikuba boobo, chimwi chiindi kulakonzya kubuka zintu zikonzya kunyongania luumuno akujatana mumbungano. Niinzi zipa kuti kube oobo? Chiindi chiingi, kuba akaambo kakukachilwa kubelesya malayilile aazwa muBbayibbele. Alubo tatumaninide pe. Toonse tulabisya. (1 Joh. 1:10) Umwi mumbungano ulakonzya kutalijata kabotu naakuti kutachita kabotu mubukombi alubo eezi zilakonzya kusofwaazya mbungano. Tulakonzya kubisizya umwi kwiinda mukwaambuula amumichito. Alubo tulakonzya kulebwa akaambo kakuti umwi wakatwaambila naakuti wakatuchitila zintu zibi. (Rom. 3:23) Niinzi zikonzya kutugwasya kuti tubambulule zintu zitali kabotu?

⁴ Akaambo kaluyando ndwalaalo, Jehova wakatupa zintu zikonzya kutugwasya. Jwi lyakwe lilaamalayilile aakonzya kutugwasya kuti kwaba kutamvwanana. Baalu balaaluyando balakonzya kugwasya umwi awumwi. Kubelesya malayilile aazwa muMagwalo ngibatupa kutugwasya kuti tubambulule bweenzuma amuntu ngutwakabisizya akuti tube abweenzuma buli kabotu aJehova. Ikuti twapegwa lulayo naakuti kuchibulwa akaambo kachibi nchitwakachita, tweelede kuba achoonzyo chakuti lulayo oolu nchitondeezyo chakuti Taateesu uuli kujulu ulatuyanda.—Tus. 3:11, 12; Heb. 12:6.

KUBAMBULULA KUTAMVWANANA

⁵ Chimwi chiindi amwi maKristu alakonzya kutamvwanana mumbungano. Makani aaya ayelede kubambululwa chakufwambaana munzila yaluyando. (Ef. 4:26; Flp. 2:2-4; Kol. 3:12-14) Kubelesya malayilile akaambwa amwaapostolo Petro aakuti “amuyandane kapati, nkaambo luyando lulavwumba zibi zinji kapati,” kulakonzya kutugwasya kuti tubambulule kutamvwanana abamwi mumbungano. (1 Pet. 4:8) Bbayibbele litubuzya kuti “toonse tulalubizya ziindi zinji.” (Jak. 3:2) Kutobela mulawu waJesu wakuti tweelede kujata bamwi munzila njituyanda kuti batujate aayo kulakonzya kupa kuti tulekelele bamwi akuluba nzibakatubisizya.—Mt. 6:14, 15; 7:12.

⁶ Ikuti wabona kuti umwi mukwesu wakakwaambila makani aatali kabotu naakuti wakakuchitila zintu zitali kabotu, weelede kufwambaana kubweza ntaamu yakubambulula kutamvwanana kwanu. Weelede kuyeeya kuti bweenzinyokwe mbulaabo aJehova bulakonzya kunyonganisigwa. Jesu wakabuzya basikwiiya bakwe kuti: “Lino ikuti uleta cipego cako kucipaililo kumane noli kooko wayeeya kuti munyoko ulaakaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.” (Mt. 5:23, 24) Chimwi chiindi kulakonzya kubuka kutamvwanana. Ikuti kakuli boobo, mweelede kukaambuula kaambo aako. Kwaambuuzyania kuli kabotu kulakonzya kutugwasya kuti kutabi kutamvwanana mumbungano akuti tubambulule mapenzi akonzya kweetwa akutamvwanana.

KUPA LULAYO LUYANDIKANA LUZWA MUMAGWALO

⁷ Chimwi chiindi baalu balakonzya kubona kuti kuleelela kuti umwi mumbungano apegwe lulayo. Kuchita oobu teekuuba pe. Nzizyo zyakapa kuti mwaapostolo Pawulu alembele maKristu aakuGalatiya kuti: “Bakwesu, nokuba kuti muntu umwi waleya katazyi walo, nywebo nomujisi zyeelelo zyakumuuya amusoleke kumululamika muntu ooyo amyoyo iibombede.”—Gal. 6:1.

⁸ Ikuti baalu bawuchita kabotu mulimu wabo wakweembela mumbungano, ziyoogwasya mbungano kuti itanyonganisigwi mubukombi akuti itanjili mumapenzi. Baalu balachizuzikizya chisyomezyo chakugwasya mbungano Jehova nchakaamba kabelesya Isaya chakuti: “Umwi aumwi uyooba mbuli busena bwakutijila muwo, busena bwakuyusila mvwula mpati yamuwo, uyooba mbuli tulonga twamaanzi mucisi cinyina maanzi, mbuli cimvwule camwala mupati kapati munyika yacimpayuma.”—Is. 32:2.

KUBONA BATALI KUCHITA KABOTU

⁹ Mwaapostolo Pawulu wakachenjezya atala abantu bakonzya kunyongania mbungano. Wakati: “Tumupa malailile . . . kuti mumutantamuke mukwesu uuli woonse weenda cakupilingana ikutali kweelana azilengwa nzyomwakatambula kulindiswe.” Alubo wakayungizya kubalembela kuti: “Ikuti naa umwi kataaswiilili majwi eesu aali mulugwalo oolu, amumucenjelele kapati ooyo alimwi amuleke kuyanzana anguwe, kutegwa afwe nsoni. Nokuba boobo, mutamuboni mbuli kuti ngusinkondonyoko, pele amuzumanane kumulaya mbuli munyoko.”—2 Tes. 3:6, 14, 15.

¹⁰ Chimwi chiindi muntu ulakonzya kuti kalikuchita chibi chitakonzyi kupa kuti agwisigwe mumbungano, pesi kuchita oobo kutondeezya kuti tazilemeki zyeelelo zyaLeza zyeelede kutobelezegwa amaKristu. Eezi ziswaanizya bukandu, kung’ung’una, bubeya naakuti “kulinjizya mumakani aatamujatikizyi.” (2 Tes. 3:11) Alubo, kulakonzeka kuti mumpelenge naakuti uyandisya zyakulikondelezya zitali kabotu. Kutalijata kabotu nkwachita kulakonzya kupa kuti bantu babe amaboneno mabi atala ambungano alubo kulakonzya kunyongania amwi maKristu.

¹¹ Baalu bayoosaanguna kugwasya muntu utali kuchita kabotu kababelesya malayilile aazwa muBbayibbele. Pesi kuti muntu ooyo wayinkilila kunembo kachita chibi nikuba kuti bakamupa lulayo ziindi zyiingi, baalu balakonzya kusala kuti bape nkani yakuchenjezya. Baalu beelede kulanga kuti zyakachitika zili kubanyongania na bamwi mumbungano kakutanapegwa nkani yakuchenjezya. Sikupa nkani eeyo uyoopa lulayo luyandikana atala azyakachitwa amuntu utali kuchita kabotu pesi tayelede kwaamba zina lyakwe. Nikuba kuti bamwi mumbungano balakonzya kutobelezya malayilile aambwa munkani eeyo kwiinda mukutantamuka kuliswaanizya amuntu wakabisya, pesi balakonzya kunoomugwasya muzintu zyabukombi ‘akumuchenjezya mbuli mukwesu.’

¹² Ikuti bamumbungano babelekelaamwi amabambe aaya, ziyoogwasya muntu utachiti kabotu kuti abe abweeme atala azintu nzyaakachita alubo ziyoomugwasya kuti achinche. Ikuti twabona kuti muntu wakali kuchita zintu zitali kabotu wachincha, tatweelede kunoomutantamuka pe.

KUBAMBULULA KUTAMVWANANA KUPATI

¹³ Kulekelela bamwi takwaambi kuti tatukwe ndaba pe akubisya kwabo. Tazyaambi kuti chiindi choonse tubisya akaambo kakuti tatumaninide pe alubo takuli kabotu pe kutazibikkila maanu zibi zipati. (Lev. 19:17; Int. 141:5) Chizuminano chamulawu chakali kutondeezya kuti zimwi zibi nzipati kwiinda zimwi alubo eezi zilakozyania azichitwa mumbungano yachiKristu.—1 Joh. 5:16, 17

¹⁴ Jesu wakatuyiisya mbutweelede kuchita kuti katutachimvwanani awumwi mumbungano. Wakatuyiisya kuti: “ikuti munyoko wakubisizya, [1] koya ukamwaambile ncaalubizya kamuli nyobilo. Ikuti wakuswiilila, nkokuti wamupilusya munyoko. Pele kuti takuswiilili, [2] utolelezye muntu omwe naa bobilo, kutegwa kubumboni bwabakamboni bobilo naa botatwe makani oonse akasinizyigwe. Ikuti naa tabaswiilili, [3] ambila mbungano. Ikuti naa taiswiilili noiba mbungano, aabe kulinduwe mbubonya mbuli muntu wamasi alimwi ambuli simutelo.”—Mt. 18:15-17.

¹⁵ Chikozyano Jesu nchakaamba chili mulugwalo lwaMatayo 18:23-35, chitondeezya kuti zibi zyaambwa mulugwalo lwaMatayo 18:15-17, ziswaanizya makani ali atala amali, kukachilwa kubbadala chikwelete, kuchita zintu munzila yabumpelenge akunyongania mpuwo yamuntu kwiinda mukumubejelezya.

¹⁶ Ikuti umwi mumbungano wakubisizya, utafwambaani kukumbila baalu kuti bakugwasye. Mbuli mbakaamba Jesu, weelede kusaanguna ukaambuuuzyanie amuntu wakakubisizya. Mweelede kwaambuuzyania atala amakani aaya kamuli babili luzutu. Tweelede kuyeeya kuti Jesu taakati ‘uye, ukaambuuzyanie anguwe kamwi luzutu.’ Nkinkaako, kuti muntu wakakubisizya taazumina alubo katakumbili kulekelelwa, weelede kubamba bumwi buzuba kuti mukaambuulilane lubo. Ikuti mwaambuulilana munzila iili boobu, muntu wakakubisizya uyoolumba nkaambo teewakabuzya bamwi bamumbungano akuti teewakanyongania mpuwo yakwe mumbungano. Ikuti wachita oobo, unooli “wamupilusya munyoko.”

¹⁷ Ikuti muntu wakakubisizya wazumina akukumbila lulekelelo, akubambulula kubisya kwakwe, kaambo aako keelede kumanina mpawaawo. Nikuba chibi chakachitwa kachili chipati, pesi bantu bakabisizyania balakonzya kwaambuuzyania kabali babili.

¹⁸ Ikuti kubona kuti mweenzinyokwe takuswiilili pe ‘kamuli babili,’ ulakonzya kubelesya malayilile akaambwa aJesu akuti “utolelezye muntu omwe naa bobilo” kuchitila kuti mwaambuuzyanie lubo amweenzinyoko. Bantu mbutayinke abo beelede kuba amakanze akuti mumvwanane. Chimwi chiindi, kulakonzya kukugwasya kutola bantu bazi zyakachitika, pesi kuti kakutakwe bazizi, ulakonzya kukumbila muntu umwi naa babili kuti bazoomuswiilile chiindi nimwaambuuzyania. Balakonzya kuti balaaluzibo lwakubambulula kaambo aako alubo balakonzya kubona kuti zyakachitika tazili kabotu choonzyo na, naakuti pe. Ikuti mwaalu wakumbilwa kuti abe kamboni tazyaambi kuti wiiminina mbungano nkaambo taakasalwa akabunga kabaalu kuti akagwasye kubambulula nkani eeyo.

¹⁹ Ikuti mwakachilwa kumvwanana nikuba kuti mwaambuuzyania kwaziindi zyiingi kamuli babili naakuti kamulaamuntu uumwi naakuti babili mbuwakakumbila kuti bazookugwasye, pesi kuchibona kuti kaambo takamanide, ulakonzya kubuzya baalu bambungano. Utalubi kuti makanze aabo ngakubamba luumuno akuchita kuti mbungano ikkale kiisalala. Kubuzya baalu makani aaya kutondeezya kuti uyanda kuti bakugwasye kubambulula kaambo aaka akuti usyoma Jehova. Toyelede kuleka kukomba Jehova akaambo kakuti umwi muntu wakakubisizya.—Int. 119:165.

²⁰ Baalu bamumbungano bayoowalanga-langa makani aaya. Ikuti kwaboneka kuti wakakubisizya choonzyo, pesi katayandi kweempwa akukumbila lulekelelo, kkomiti yabaalu ilakonzya kugwisya muntu ooyo mumbungano. Kuchita oobo kutondeezya kuti balayikwabilila mbungano alubo bayanda kuti ikkale kiisalala.—Mt. 18:17.

KULANGANIA MAKANI ALI ATALA AZIBI ZIPATI

²¹ Zimwi zibi zipati zili mbuli bwaamu, bumambi, koonana kwabaalumi abaaluminyina naakuti kwabanakazi abanakazinyina, kusampawula Leza, kukomba zikozyano azimwi zibi zipati, tazimanini kukukumbila lulekelelo kumuntu ngwakabisizya. (1 Kor. 6:9, 10; Gal. 5:19-21) Zibi zipati zyeelede kubuzigwa baalu kuchitila kuti bazilange-lange nkaambo zilakonzya kunyongania mbungano muzintu zyabukombi akuti ikkale kiisalala. (1 Kor. 5:6; Jak. 5:14, 15) Bamwi balakonzya kubuzya baalu atala anzibakachita naakuti atala akubisya kwawumwi muntu. (Lev. 5:1; Jak. 5:16) Kuti baalu babuzigwa atala akubisya kwamuntu ubbabbatizidwe mumbungano, baalu babili balakonzya kukayanduulisisya kaambo aako kuti babaachoonzyo. Ikuti kwajanika kuti makani aaya ngachoonzyo, akuti bumboni butondeezya kuti kuli chibi chipati chakachitwa, kabunga kabaalu kayoobamba kuti kkomiti yakubeteka ilaabaalu batatu ilange-lange nkani eeyo.

²² Baalu balayilangania mbungano kuchitila kuti bayikwabilile kuzintu zikonzya kwiinyongania mubukombi. Alubo, babelesya Jwi lyaLeza kuchitila kuti bachibule muntu wakabisya akuti bamugwasye munzila yabupampu kuti abambulule bweenzinyina aLeza. (Jud. 21-23) Malayilile aaya aleendelana amakani mwaapostolo Pawulu ngaakalembela Timotewo kuti: “Ndakulailila canguzu kumbele lya Leza a Kristo Jesu, ooyo uuyoobeteka baumi abafwu. . . kosinsa, kokalalila, alimwi kokulwaizya cakukkazika moyo kapati aluzyibo mukuyiisya.” (2 Tim. 4:1, 2) Mulimu ooyu uchitwa abaalu mupati alubo utola chiindi. Bamumbungano balayilumba milimu iichitwa abaalu alubo babona kuti beelede “kupegwa bulemu kapati.”—1 Tim. 5:17.

²³ Ikuti umwi muntu mumbungano wabisya, baalu babweza ntaamu yakumugwasya kuti abambulule bweenzinyina mbwalaabo aJehova. Ikuti wachincha, baalu bayoomugwasya kwiinda mukumupa lulayo kalalikke naakuti kalabaabo baliwo kuti bazoope bumboni atala ankani eeyo alubo kuchita oobo kuyoomugwasya akupa kuti bamwi bayoowe kuchita zibi. (2 Sam. 12:13; 1 Tim. 5:20) Ikuti muntu wapegwa lulayo, kuli zimwi zintu nzyayimikizigwa kuchita. Kuchita oobo kulakonzya kugwasya sikubisya kuti ‘alulamike nzila zyamaulu aakwe.’ (Heb. 12:13) Ikuti wachincha nikwayinda chiindi ulabuzigwa kuti atalike kuchita zintu nzyaakali wayimikizigwa kuchita.

CHIZIBISYO CHILI ATALA AKUCHIBULWA KWAMUNTU

²⁴ Ikuti bakkomiti yakubeteka babona kuti muntu wakabisya wachincha pesi kababona kuti nzyaakachita zyakazibikana mumbungano naakuti muchilawu mwakkala akuti kakuyandikana kuti bamumbungano bamutantamuke sikubisya, balakonzya kuzibisya mbungano chiindi nikuchitwa Muswaangano waBuumi aMulimu Wesu. Chizibisyo cheelede kwaamba kuti: “[Zina lyakwe] wakachibulwa.”

IKUTI KWAYANDIKANA KUTI MUNTU AGWISIGWE MUMBUNGANO

²⁵ Chimwi chiindi sikubisya ulakonzya kuzumanana kuchita chibi akukachilwa kubelesya malayilile ngabuzigwa abaalu. Alubo ulakonzya kutatondeezya ‘milimu yeendelana akusanduka’ chiindi napegwa lulayo. (Mil. 26:20) Niinzi zyeelede kuchitwa? Weelede kugwisigwa mumbungano kuchitila kuti atanoliswaanizyi ababelesi baJehova bachita zintu zili kabotu. Kumugwisya kupa kuti atayungi bamwi alubo kugwasya kuti mbungano ikkale kiisalala mubukombi amukulijata. (Dt. 21:20, 21; 22:23, 24) Mwaapostolo Pawulu wakachenjezya baalu bamumbungano yakuKkorinto atala ambubakeelede kuchenjelela muntu wamumbungano uutalijati kabotu aawo naakati “mukamwaabe kuli Saatani mwaalumi ooyo kutegwa. . . . muuya [wambungano] ukafwutulwe.” (1 Kor. 5:5, 11-13) Alubo, mwaapostolo Pawulu wakaamba atala akugwisigwa kwabamwi bakasiya kasimpe mumbungano yamumwaanda wamunyaka wakusaanguna.—1 Tim. 1:20.

²⁶ Ikuti kwaboneka kuti sikubisya weelela kugwisigwa, bakkomiti yakubeteka beelede kumuzibisya kababelesya malayilile ajanika muMagwalo atondeezya kuti weelela kugwisigwa. Ikuti bakkomiti yakubeteka babuzya sikubisya atala akusala kwabo, mpawo sikubisya katakkutisikene atala akusala kwabo, weelede kulemba lugwalo lutondeezya kuti kaambo kakwe uyanda kuti kaambuulwe lubo. Weelede kuchita oobo kakutanayinda mazuba ali 7 kuzwa nibakamubuzya atala akusala nkubakachita. Ikuti bakkomiti batambula lugwalo lwakwe, kabunga kabaalu kayoobuzya mulangizi wabbazu, mpawo uyoosala baalu beelela kuti bakakaambuule lubo kaambo aako. Kkomiti eeyi iyoochita mabambe akuti kaambo aako kaambuulwe lubo kakutanayinda mviki kuzwa niyakatambula lugwalo lwakwe. Ikuti kwachitwa mabambe akuti kaambo aako kaambuulwe lubo, chizibisyo chakumugwisya tacheelede kwaambwa pe. Sikubisya ulakonzya kuyimikizigwa kunosandula kumiswaangano, kupa nkombyo kumiswaangano akuchita imwi milimu mumbungano.

²⁷ Kuzumizya sikubisya kuti nkani yakwe yaambuulwe lubo nkumutondeezya luzyalo akumupa chiindi chakwaambuula nzyatamvwisisisyi. Pesi kuti sikubisya waleka kusika mubuzuba nikwaambuulwa nkani yakwe nikuba kuti baalu beezya kumuzibisya, chizibisyo chakumugwisya chilakonzya kwaambwa mumbungano.

²⁸ Ikuti sikubisya katayandi kuti nkani yakwe izoowambuulwe lubo, bakkomiti yakubeteka bayoomupandulwida kuti kuchincha kulayandikana akumubuzya zintu nzyakonzya kuchita kuchitila kuti mukuya kwachiindi azoobweedezegwe mumbungano. Kuchita oobo kulagwasya alubo chiindi baalu nibaambuulaawe, beelede kutondeezya kuti balangilila kuti mukuya kwachiindi ulakonzya kuzoochincha akuboola mumbunga yaJehova.—2 Kor. 2:6, 7.

CHIZIBISYO CHAKUGWISIGWA KWAMUNTU MUMBUNGANO

²⁹ Ikuti sikubisya uutatondeezyi kuchincha wagwisigwa mumbungano, kuyoochitwa chizibisyo chakuti: “[Zina lyakwe] tachili Kamboni waJehova.” Eezi ziyoogwasya bambungano kuti bamutantamuke sikubisya.—1 Kor. 5:11.

KULYANZAANIA AMBUNGANO

³⁰ Bbala liti “kulyanzaania,” lyaamba muntu uubbabbatizidwe wakasala kuleka kuba muKristu alubo katachiyandi kuba Kamboni waJehova. Chimwi chiindi ulakonzya kulyanzaania ambungano kwiinda mukusala kuliswaanizya ayimwi mbunga yanyika iichita zintu ziteendelani anjiisyo zizwa muBbayibbele ziyoopa kuti akabetekwe aJehova Leza.—Is. 2:4; Ciy. 19:17-21.

³¹ Mwaapostolo Johane wakalemba atala abaabo bakaleka kuba maKristu muchiindi chakwe kuti: “Bakazwa akati kesu, pele tiibakali bamwi besu; nkaambo ikuti nobakali bamwi besu, nobakazumanana kuba andiswe.”—1 Joh. 2:19.

³² Kweendelana amaboneno aJehova, bukkale bwamuntu uulyanzaania ambungano bulisiyene abwamuntu uutachichiti kabotu mubukombi naakuti uutachiinki mumulimu wakukambawuka. Chimwi chiindi, muntu ulakonzya kuti tachichiti kabotu nkaambo wakaleka kubala Jwi lyaLeza chiindi choonse. Naakuti chimwi chiindi wakaleka kukomba Jehova akaambo kamapenzi naakuti kupenzegwa nkwaakaswaana. Baalu abamumbungano balakonzya kunoomugwasya mubukombi muntu uutachichiti kabotu.—Rom. 15:1; 1 Tes. 5:14; Heb. 12:12.

³³ Ikuti muKristu wasala kulyanzaania ambungano, kulakonzya kupegwa chizibisyo chakuti: “[Zina lyakwe] tachili Kamboni waJehova.” Muntu ooyu weelede kubonwa mbuli muntu wakagwisigwa mumbungano.

KUBWEEDEZEGWA KWAMUNTU MUMBUNGANO

³⁴ Ikuti muntu wakagwisigwa mumbungano naakuti wakalyanzaania ambungano watondeezya kuchincha akusiya zibi zyakwe kakuli kwayinda chiindi kuzwa naakagwisigwa mumbungano, ulakonzya kubweedezegwa. Alubo ulakonzya kutondeezya kuti uyanda kuba abweenzinyina buli kabotu aJehova. Kweendelana azyiimo zyasikubisya, baalu bayoomulindila kwamyeezi, kwamunyaka naakuti kwiindaawo kuchitila kuti babone kuti wachincha na choonzyo. Ikuti baalu batambula lugwalo lwamuntu ulikukumbila kubweedezegwa, bakkomiti yakubeteka bachita mabambe aakuti baambuule aamuntu ooyo. Kkomiti eeyo, iyoolanga-langa kuti uliikwiichita na ‘milimu iyelede kusanduka’ alubo iyoosala kuti uleelela na kubweedezegwa chiindi eecho naakuti pe.—Mil. 26:20.

³⁵ Ikuti muntu wakagwisigwa mumbungano wayanda kubweedezegwa kakuli unjila ayimwi mbungano, kkomiti yakubeteka yambungano njanjilaayo iyoochita mabambe aakuti yambuulaawe. Kuti baalu bali mukkomiti yakubeteka bamumbungano njanjilaayo babona kuti wakeelela kubweedezegwa mumbungano, nga bazibisya kabunga kabaalu kakajatikizigwa kubeteka nkani yakwe. Boonse bali mumakkomiti aaya, beelede kubelekelaamwi kuti bamvwisisisye woonse makani ayandikana kuchitila kuti basale kabotu. Nikuba boobo, kkomiti yakubeteka yambungano njaakali kunjilaayo njiyo yeelede kubona kuti muntu ooyo abweedezegwe mumbungano.

CHIZIBISYO CHAKUBWEEDEZEGWA

³⁶ Ikuti kkomiti yakubeteka yabona kuti muntu wakagwisigwa mumbungano naakuti wakachibulwa wachincha alubo kwayandikana kuti abweedezegwe, kuyoopegwa chizibisyo kumbungano njaakali kunjilaayo chiindi naakagwisigwa. Alubo kuti muntu wakagwisigwa mumbungano kanjila ayimwi mbungano, chizibisyo cheelede kupegwa lubo kumbungano ooko nkwabede. Chizibisyo eecho cheelede kwaamba kuti: “[Zina lyakwe] wabweedezegwa kuba Kamboni waJehova.”

IKUTI KWABISYA MWANA WAKABBABBATIZIGWA

³⁷ Kuti mwana uubbabbatizidwe wachita chibi chipati, baalu beelede kubuzigwa. Bazyali bamwana wakachita chibi chipati beelede kubawo chiindi baalu nibalanga langa chibi chakachitwa amwanaabo. Beelede kubelekelaamwi akkomiti yakubeteka alubo tabeelede kuvuninina mwanaabo kuti atapegwi lulayo lweelede. Makanze abakkomiti yakubeteka ngakumupa lulayo akumugwasya kuti abweede mumbungano mbuli mbubachita kumuntu mupati wakabisya. Pesi kuti mwana ooyo katatondeezyi kuchincha, weelede kugwisigwa mumbungano.

IKUTI KWABISYA SIKUPUPULULA UUTANABBABBATIZIGWA

³⁸ Niinzi cheelede kuchitwa kuti kwabisya sikupupulula uutanabbabbatizigwa? Mbukunga tanabbabbatizigwa, takoyoogwisigwa pe mumbungano. Zilakonzeka kuti chimwi chiindi tanazimvwisisisya kabotu njiisyo zyamuBbayibbele, nkinkaako, weelede kupegwa lulayo lweelede kuchitila kuti ‘alulamike nzila zyamaulu aakwe.’—Heb. 12:13.

³⁹ Ikuti sikupupulula uutanabbabbatizigwa wakabisya katatondeezyi kuchincha, nikuba kuti baalu babili bakeezya kumugwasya balakonzya kuzibisya mbungano. Kulakonzya kupegwa chizibisyo chaamba kuti: “[Zina lyakwe] tachili sikupupulula uutabbabbatizidwe.” Bamumbungano bayoomubona mbuli muntu wanyika. Nikuba katagwisidwe mumbungano, maKristu bayootantamuka kuliswaanizya anguwe. (1 Kor. 15:33) Uyooyimikizigwa kunoolemba lipoti yamulimu wakukambawuka.

⁴⁰ Mukuya kwachiindi muntu wakayimikizigwa kuba sikupupulula, ulakonzya kuyanda kuba sikupupulula lubo. Ikuti kwaba boobo, baalu babilli bayoochita mabambe akuti baambuuzyanie anguwe kuchitila kuti babone kuti wachincha na choonzyo. Ikuti keelela, kulakonzya kupegwa chizibisyo chaamba kuti: “[Zina lyakwe] wabweedezegwa lubo kuba sikupupulula uutabbabbatizidwe.”

JEHOVA ULABULONGEZYA BUKOMBI BULI ALUUMUNO ALUBO BUSALALA

⁴¹ Boonse baliswaanizya ambungano yaLeza mazubaano, balakonzya kubotelelwa abukombi buli kabotu oobo Jehova mbwapede babelesi bakwe. Tujana chakulya chiingi chitugwasya mubukombi alubo tunywa maanzi mabotu akasimpe. Alubo Jehova ulatukwabilila kabelesya mabambe aali mumbunga yakwe yeendelezegwa aKristu. (Int. 23; Is. 32:1, 2) Tulikubotelwa kuti tuli muparadayizi yamubukombi nikuba kuti tupona mumazubaano aakataazya.

⁴² Kuba aluumuno abamwi akuchita kuti mbungano ikkale kiisalala, kuyoopa kuti mumuni wakasimpe kaBwaami umwekesye. (Mt. 5:16; Jak. 3:18) Alubo tuyoojana chilongezyo chizwa kuli Leza chakubona bantu biingi kabayiya atala aJehova akuyanda kuliswaanizya andiswe mukuchita kuyanda kwakwe.