Ajanika Makani aKabbuku Kamuswaangano waBuumi Amulimu Wesu
February 6-12
LUBONO LUZWA MUJWI LYALEZA | ISAYA 47-51
“Kuswiilila Jehova Kweeta Zilongezyo”
ip-2 131 ¶18
Jehova Ulatuyiisya Kuti Tugwasigwe
‘Swiilila Milawo Yangu!’
18 Kazwide muuya uusalala, musinsimi wakati: “Lino sunu Mwami Jehova wandituma, alakwe Muuya wakwe wandituma. Mbuboobu mbwaamba Jehova, Munununi wako, Uusalala waIsrayeli. Ndime Jehova Leza wako. Ndime ukuyiisya kuti ugwasigwe. Ndime uukweenzya munzila njoelede kutola.” (Isaya 48:16b, 17) Majwi aaya atondeezya kuti Jehova ulaandaba abantu, akelede kusimya maIsrayeli kuti Jehova uyoobafutula kuBbabbiloni. Mufutuli wabo. (Isaya 54:5) Jehova uyanda kuti maIsrayeli abweede kulinguwe akuti baswiilile milawu yakwe. Bukombi bwakasimpe buyeeme mukuswilila malayilile aazwa kuli Leza. MaIsrayeli taakonzyi pe kutola nzila ilinjiyo kunze kwakuti Jehova abatondeezye ‘nzila njibeelede kutola.’
ip-2 131 ¶19
Jehova Ulatuyiisya Kuti Tugwasigwe
19 Chiyandisyo chaJehova chakuti bantu bakwe batanjili mumapenzi akuti babotelwe mubuumi chilaboneka mumajwi aaya: ‘Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.’ (Isaya 48:18) Eechi nchikumbilo chaMulengi chitondeezya luyando! (Deuteronomo 5:29; Intembauzyo 81:1) MaIsrayeli akali kuyoobotelwa luumuno lwiingi mbuli maanzi amulonga kutali kutolwa kubuzike. (Intembauzyo 119:165) Bululami bwabo, bwakali kuyoovula mbuli mayuwe aamulwizi. (Amosi 5:24) Jehova wakatondeezya luyando lwakwe kumaIsrayeli kwiinda mukubatondeezya nzila njibakeelede kutola. Kaansinga bakaswiilila kaka!
ip-2 132 ¶20-21
Jehova Ulatuyiisya Kuti Tugwasigwe
20 Nzilongezyoonzi nzibakali kuyoojana maIsrayeli kaansinga bakaleka kuchita zibi? Jehova wakati: “Lunyungu lwako nilwakaba mbuli musee, abana bazwa mumaala aako nibakavula mbuli tusengasenga. Izina lyabo nilyakatagonkwa nikuba kunyonyooka kubusyu bwangu.” (Isaya 48:19) Jehova ulikuyeezya bantu chisyomezyo nchaakachita kuli Abrahamu, chakuti lunyungu lwakwe lwakali kuyoovula ‘mbuli nyenyeezi zyakujulu ambuli musee wakunkomwe yalwizi.’ (Matalikilo 22:17; 32:12) Nikuba boobo, lunyungu lwaAbrahamu lwakali kupapila alubo teebakali acheelelo pe chakujana zilongezyo. Mpuwo yabo yakali mbi loko, zyakuti kweendelana aMulawu waJehova, zina lyabo mbuli chisi, lyakeelede kuzimwa. (Deuteronomo 28:45) Pesi, Jehova taakali kuyanda pe kubanyonyoona bantu bakwe naa kubatakata.
21 Malayilile ali mumajwi aaya alabeleka kubakombi baJehova nikuba mazubaano. Jehova Nkasensa kabuumi alimwi ulizi mbutweelede kupona. (Intembauzyo 36:9) Wakatupa malayilile kuti atugwasye kutali akuti tutabotelwi pe. MaKristu aachoonzyo alaswiilila kwiinda mukuyanda kuyiisigwa aJehova. (Mika 4:2) Malayilile aakwe alatukwabilila mubukombi akukwabilila bweenzinyina mbutulaabo anguwe kulweeno luzwa kuli Saatani. Ikuti twaziba bubotu bwamilawu yaLeza, tuyoobona kuti Jehova utuyiisya kuti tugwasigwe. Tuyoobona kuti “milazyo yakwe tiili miyumu.” Alubo tatukoyoonyonyoonwa.—1 Johane 2:17; 5:3.
Lubono Luzwa muJwi lyaLeza
w07 1/15 9 ¶8
Makani Aazwa Mubbuku lya Isaya—II
49:6—Nkamboonzi nikutegwa Mesiya “mumuni wabamasi” nikuba kuti wakakambawukila maIsrayeli luzutu? Kuli boobo, akaambo kazintu zyakachitika Jesu naakafwa. Bbayibbele litondeezya kuti Isaya 49:6 yaamba basikwiiya baJesu. (Incito 13:46, 47) Mazubaano, maKristu ananikidwe, kalikugwasigwa ankamu mpati, bali kubeleka kabali mbuli “mumuni wabamasi” kabali kugwasizya bantu ‘kusikila kumagolelo aanyika.’—Matayo 24:14; 28:19, 20.
it-1 643 ¶4-5
Kulekana
Kulekana Kwachikozyano. Lukwatano lulabelesegwa munzila yachikozyano muMagwalo. (Is 54:1, 5, 6; 62:1-6) Alubo kuli kulekana kwachikozyano naa kwaanda mukayintu.—Jer 3:8.
Bwaami bwaJuda bwakazundwa alubo Jerusalemu lyakanyonyoonwa mumunyaka wa 607 B.C.E., mpawo bantu bankuko bakatolwa kuBbabbiloni kubuzike. Kazitanachitika eezi, Jehova wakabuzya maJuda akali kuyootolwa kubuzike kuti: “Luli kuli lugwalo lwakulekana lwabanyoko ndundakamulesyanya alo.” (Is 50:1) ‘Banyina’ naa mbunga yanyika yoonse yakaandwa akaambo kakuti yakali yatyola chizuminano chaMulawu, ikutali kuti Jehova wakali watyola chizuminano akubaleka pe. Pesi maIsrayeli akaleka kuchita zibi alimwi bakakomba, kuchitila kuti babusilizye bweenzinyina mbubakalabo amulumaabo wachikozyano Jehova. Mumunyaka wa 537 B.C.E., niyakamana minyaka iili 70, Jehova wakabweedezya bantu bakwe kuli mbabo mbuli mbakasyomezezye, akaambo kazina lyakwe.—Int 137:1-9; bona lubo LUKWATANO.
FEBRUARY 13-19
LUBONO LUZWA MUJWI LYALEZA | ISAYA 52-57
“Kristu Wakapenzegwa Akambo Kandiswe”
w09 1/15 26 ¶3-5
Mubelesi waJehova—“Wakasampawulwa Alimwi Wakajayigwa Akaambo Kamilandu Yesu”
“Wakasampawulwa” Alubo ‘Taakalemekwa pe’
3 Bala Isaya 53:3. Amuyeeye kuti chakali kwambaanzi kumwana waLeza Simuzyalwa alikke kuti asiye buumi bunoneezya bwakubeleka kalaafwifwi awisi akuti aze anyika kuzopeda buumi bwakwe kuti anunune bantu kuchibi alufu! (Flp. 2:5-8) Chipayizyo chakwe chakali kuyoopa kuti bantu balekelelwe zibi zyabo chakumaninina, chakali kwimininwa azipayizyo zyabanyama mumulawu waMusa. (Heb. 10:1-4) Takeleede kutambulwa kabotu akulemekwa na amaJuda, bakali kulindila Mesiya wakasyomezedwe? (Joh. 6:14) Nikuba boobo “wakasampawulwa” amaJuda alimwi ‘tebakamulemeka pe’ mbuli mbakasinsima Isaya. Mwapostolo Johane wakalemba kuti: “Wakeza kubwami bwakwe mwini, pele bana bakwe tabakamuzuminide.” (Joh. 1:11) Mwapostolo Petro wakaambila maJuda kuti: “Leza wamatateesu, walemya Jesu Mwanaakwe, ngomwakaaba, mwakamukazya kubusyu bwa-Pilato, walo naakali kukanza kumwaangulula. Kwalo mwakamukazya Uusalala Uululeme.”—(Inc. 3:13, 14)
4 Alubo, Isaya wakasinsima kuti Jesu wakelede ‘kubona machiswe.’ Kali mumulimu wakwe wakukambawuka aanyika, Jesu wakali kunga wakatala, pesi takwe alembedwe kuti wakalichisidwe pe. (Johane 4:6) Nikuba boobo, wakalikunonga wakumvwa kuchiswa kwabantu mbaakali kukambawukila. Wakali kubeetelela alimwi wakaponya bantu biingi. (Marko 1:32-34) Nkinkaako, Jesu wakazuzikizya businsimi butii: “Ncobeni wakalemenwa maciswe esu, wakatola mapenzi eesu.”—Isa. 53:4a; Mt 8:16, 17.
Kwakabaanga ‘Wakawuumwa aaLeza’
5 Bala Isaya 53:4b. Bantu biingi bakapona muchiindi chaJesu teebakali kumvwisisisya pe kuti nkamboonzi Jesu naakali kupenzegwa akuti wakafwidaanzi. Bakali kuyeeya kuti Leza ulikumusubula abulwazi buchisa loko. (Mt. 27:38-44) MaJuda bakamupa mulandu wakusampawula Leza. (Marko 14:61-64; Johane 10:33) Pesi simpe ndyakuti, Jesu taakali simuchita zibi alimwi taakamusampula pe Leza. Pesi akaambo kakuti wakali kumuyanda Wisi, kwakaambwa kuti wakamusampawula Wisi chiindi naakali kujayigwa alimwi eezi zyakapa kuti apenzegwe kali Mubelesi waJehova. Nikuba boobo, wakalilipedelede kuchita kuyanda kwaJehova.—Mt. 26:39.
w09 1/15 27 ¶10
Mubelesi waJehova—“Wakasampawulwa Alimwi Wakajayigwa Akaambo Kamilandu Yesu”
“Wakeenzegwa Mbuli Kabelele Kaya Kukujayigwa”
10 Bala Isaya 53:7, 8. Chiindi Johane Mubbabbatizi naakabona Jesu kazabuza, wakati: “Amubone, mwanaambelele wa-Leza, uugwisya cibi cenyika.” (Johane 1:29) Kali kwaambuula atala aJesu mbuli kabelele, amwi Johane wakali kuyeeya majwi aIsaya akuti: “Wakeenzegwa mbuli kabelele kaya kukujayigwa.” (Is. 53:7) Alubo, musinsimi Isaya wakasinsima kuti: “Nkaambo wazumina akutula buumi bwakwe.” (Is. 53:12) Mubusiku Jesu naakatalisya Chiyubulusyo chalufu lwakwe, wakapa baapostolo bakwe bali 11, basyomeka, nkomesi yawayini, akwaamba kuti: “Nkaambo mboobu bulowa bwangu bwamulongo butililwa bantu banji kuti balekelelwe milandu yabo.”—Mt. 26:28.
w09 1/15 28 ¶13
Mubelesi waJehova—“Wakasampawulwa Alimwi Wakajayigwa Akaambo Kamilandu Yesu”
Mubelesi “Uyoolulamika Bantu Banji”
13 Bala Isaya 53:11, 12. Jehova wakaamba majwi aatobela kuMubelesi wakwe ngwasalide: “Mulanda wangu Uululeme, uyoolulamika bantu banji.” Munzilaanzi? Majwi alikumamanino avesi 12, alatusandula. Aamba kuti: “[Mubelesi] wakatola zibi zyabantu banji, akukombela basimilandu.” Bana baAdamu bazyalwa kabali achibi, ‘mbasimilandu’ alubo “cakuvola cazibi ndufu.” (Rom. 5:12; 6:23) Bantu boonse bali achibi beelede kumvwanana aJehova. Chaandano 53, chaIsaya chipandulula Jesu ‘mbakatola zibi zyabantu’ bali achibi amajwi atii: “Kutugwasya iswe nciceeco ncaakakwabbawidwa, amibunda yakwe, njiituponya.”—Is. 53:5.
Kuyanduula Lubono muJwi lyaLeza
w06 3/15 11 ¶2
‘Chezyanisyo’ Chitugwasya
“Mwanakazi muzyale,” Sara amwanaakwe Izakka bayimininaanzi? Pawulo, wakatondeezya kuti Sara, mukayintu “musundi,” wiiminina mukayintu waLeza, chaamba mbunga yaLeza iili kujulu. Mukayintu ooyu wakujulu wakali musundi nkaambo, Jesu katanaza anyika, mukayintu ooyu taakalikwe “bana” bananikidwe amuuya uusalala, anyika. (BaGalatiya 4:27; Isaya 54:1-6) Nikuba boobo, mumunyaka wa Pentekoste lya 33 C.E., muuya uusalala wakapegwa kabunga kabaalumi abanakazi bakazyalwa lubo mbuli bana bamukayintu wakujulu. Bana bakazyalwa ambunga eeyi, bakazooba bana baLeza alimwi bakaba baswaana aJesu Kristu, kwiinda muchizuminano chipya. (BaRoma 8:15-17) Umwi mwana, mwaapostolo Pawulo wakalemba kuti: “Pele oyo Jerusalemu uuli kujulu muzyale, ngunyina wesu toonse.”—BaGalatiya 4:26.
w05 10/15 26 ¶3
Tondeezya Kulichesya Kwachoonzyo
Chikozyano Chiinda Zyoonse Chakulichesya
3 Jehova mupati alimwi ulisumpukide, pesi “meso aakwe alanga-langa moonse munyika, kuti aliyumye kukugwasya aabo balulama mumoyo kumeso aakwe.” (2 Makani 16:9) Alubo, Jehova nga wachitaanzi kuti wajana babelesi bakwe balibombya, bakataazikene mumoyo akaambo kamapenzi aasiyene-siyene? Jehova ‘ukkala’ abantu bali boobu nkaambo ulabagwasya amuuya wakwe uusalala ‘akubusya muuya wamuntu uubombede akukatalusya moyo wayooyo uupengede.’ (Isaya 57:15) Babelesi bakwe balakonzya kwiinkilila kunembo kumukomba akaambo kakuti ulabagwasya. Eezi zitondeezya kuti Leza ulalibomya.
FEBRUARY 20-26
LUBONO LUZWA MUJWI LYALEZA | ISAYA 58-62
“Kambawuka Makani Aamwaka Uutambulika waJehova”
ip-2 322 ¶4
Bululami Bwavula muZiyoni
“Mwaka Uutambulika”
4 Isaya wakalemba kuti: “Muuya wa-Mwami Jehova mpuli alindime, nkaambo Jehova wandinanika kuti nkambawukile bacete makani mabotu, wandituma kuzooanga batyokede mumyoyo, kuzoletela bazike mulao wabulubusi akujalwida baange intolongo.” (Isaya 61:1) Ngwani waambilidwe kwambilizya makani mabotu? Amwi kusanguna nguIsaya, wakabelesegwa aLeza kuti alembe makani mabotu kubazike bakali kuBbabbiloni. Nikuba boobo, Jesu wakatondeezya kumwi kuzuzikizigwa kupati chiindi naakaamba kuti majwi aIsaya aamba nguwe. (Luka 4:16-21) Nisimpe, kuti Jesu wakatumidwe kuti azozibisye makani mabotu kubantu babombe myoyo, kuti achite oobo wakananikwa amuuya uusalala chiindi naakabbabbatizigwa.—Matayo 3:16, 17.
ip-2 326-327 ¶13-15
Bululami Bwavula muZiyoni
13 Kuzwa mumunyaka wa 33 C.E. kaziya kunembo, Leza wakabyala “misamu mipati yabululami,” kwaamba, maKristu masungu ananikidwe, muparadayizi yabukombi yachisi chakwe chipya, kwaamba “ba-Israyeli ba-Leza.” (BaGalatiya 6:16) Kwamyanda yaminyaka, “misamu” eeyi yakasika kumweelwe wa 144 000, kilikuzyala michelo kuti ibotye, naa kupa kuti Jehova Leza alumbayizigwe. (Ciyubunuzyo 14:3) “Misamu” eeyi yakumanisizya yakakomena muchiindi cha 1919, chiindi Leza nakabusilizya maIsrayeli akasyeede kuzwa mukutachita mulimu kwakaayindi. Kwiinda mukubapa maanzi aabagwasya mubukombi mangi, Jehova wapa kuti babe lusaka lwabululami, lwamisamu izyala michelo.—Isaya 27:6.
14 Katondeezya milimu yamisamu eeyi, Isaya wakeendelela kati: “Lino bayooyakulula matongo aakalekale akubukulusya masena aakataanguna kusaalwa; bayomamika minzi iimwayikide iibulide bantu ciindi cilamfu loko.” (Isaya 61:4) Nkaambo kamulawu wamwami waPesiya Kkoresi, maJuda basyomeka bakabweeda kuzwa kuBbabiloni kuyoyakulula Jerusalemu atempele lyalyo, lyakali lyalekelezegwa kuba tongo kwachiindi. Mulimu wakubweedezya wakali kuzobonwa muminyaka yakali kutobela ya 33 C.E. a1919.
15 Mumunyaka wa 33 C.E., basikwiiya baJesu bakali bamana manguzu akwaangwa kwakwe, kutongwa alufu lwakwe. (Matayo 26:31) Pesi chiindi naakabusigwa akuboneka kulimbabo, maboneno aabo akachincha. Alubo, chiindi muuya uusalala nwakatilwa alimbabo, bakajatikana mukukambawuka makani mabotu “mu-Jerusalemu, amu-Judaya moonse, amu-Samariya, mane kusikila kumamanino aanyika.” (Incito 1:8) Bakatalika kubweedezya bukombi bwakasimpe. Munzila ikozyene, kuzwa mu1919 kaziya kunembo, Jesu wakachita kuti bakachalila kubananike bakayakulule “minzi iimwayikide iibulide bantu ciindi cilamfu loko.” Kuzwa chiindi, bazikombelo zyakubeja bakakachilwa kupa bantu luzibo atala aJehova, pesi bazuzya njisyo zyachintu amaboneno abo atazwi muBbayibbele. MaKristu ananikidwe amuuya bakasalazya mbungano zyabo zyakali zyasiizigwa azikombelo zyakubeja, kuchitila kuti bukombi bwakasimpe bwiinkilile kunembo. Mpawo bakatalika kukambawuka kupati kutanabonwa pe.—Marko 13:10.
w12 12/15 25 ¶5-6
“Beenzu” Bajisini Mubukombi Bwakasimpe
5 Bamwi balakonzya kwaamba chaandano 61 chabbuku lyaIsaya, chili abusinsimi bulikuzuzikizigwa mumbungano zyamaKristu. Vesi 6 yachaandano eechi, yaamba aabo batazoobeleke kabali “bapaizi ba-Jehova.” Pesi vesi 5, yaamba “bazwakule” aabo bakalikuzobelekaamwi “ababetesi.” Zyaambaanzi eezi?
6 Tumvwisisisya kuti “bapaizi ba-Jehova” maKristu ananikidwe balaalubazu “mububuke butaanzi” alubo bayooba “bapaizi ba-Leza aba-Kristo, bayooendelezya awe minyaka ili cuulu.” (Ciy. 20:6) Mukuyungizya waawo, kuli Kristu maangi loko alaabulangizi bwakupona aanyika. Nikuba kuti aba babeleka antomwe abaabo balaabulangizi bwakuyoopona kujulu, mbeenzu, mumambila mbali. Balabotelwa kubelekelaamwi akugwasizya “bapaizi ba-Jehova,” kababeleka mbuli “basikulima” naa “basimunda.” Bagwasizya kulimina michelo yabukombi kuchitila kuti Leza alumbayizigwe, kabagwasya kulimina akutebula bantu. Nisimpe kuti, boonse bananikidwe “[aba]mbelele zimbi” balayanduula akweembela bantu babombe myoyo, balachiyandisyo chakubelekela Jehova kukabe kutamani.—Johane 10:16.
Kuyanduula Lubono muJwi lyaLeza
w15 7/15 9-10 ¶14-17
Amugwasizye Kusumpula Paradayizi Yabukombi
14 Kwachiindi, bachipati mukati kambungano yesu bakalibonena kuchincha kwachitika mumbunga, kwakapa kuti imbunga yaJehova iili aanyika ibote munzila itaambiki. Bachiyeyeede chiindi mumbungano nikwakali mubelesi wambungano, kwiinda kuba akabunga kabaalu, chiindi munyika nikwakali mubelesi wamutabi kwiinda kuba aKkomiti Yamutabi, achiindi malayilile naakali kupegwa amweendelezi waWatch Tower Society kwiinda kuti apegwe aKabunga Keendelezya kaBakamboni baJehova. Nikuba kuti bakwesu aaba bakali abasikubagwasizya, pesi muntu uumwi ngwakaleelede kusala zyeelede kuchitwa mumbungano, kumawofesi amutabi, akumawofesi mapati. Kuma 1970, kwakabambululwa kuti mikuli eeyi ipegwe tubunga twabaalu, kutali muntu uumwi pe.
15 Kuchincha ooku kwakagwasya na? Iiyi, kutali zyakuzumbuzya. Nkamboonzi nitwaamba oobo? Nkaambo kubambulula ooku kuzwa muluzibo luyungizidwe luzwa mumakani aali mumagwalo. Kwiinda kuti muntu umwi kasala zyakuchita, imbunga ilagwasigwa abaalu boonse bali abube busiyene-siyene, “zipego mubantu” Jehova nzyapede.—Ef. 4:8; Tus. 24:6.
16 Alubo, atuyeeye akuchincha kwakachitika lino-lino, kuli mbuli kuchincha kwakuboneka kwaanze, zilimukati, anzila zyakumwaya mabbuku. Amuyeeye mbuchibotezya kupa mabbuku mabotu alimwi ayebeka mumulimu wakukambawuka! Alubo, chiindi nitubelesya nzila mpya kuzibya kasimpe, zili mbuli kubelesya webbusayiti yesu iitegwa jw.org, tutondeezya chiyandisyo chaJehova chakupa bantu malayilile anzibayandika kufumbwa nkubabede achiindi nibaziyanda.
17 Chimwi nchituteelede kuluba, mbusongo bwakuchincha kuti tukonzye kuba aKukomba Kwampuli kwagoko akuba achiiyo chesu atulikke. Alimwi, tulalumba kapati kuzwidilila kwachitwa kumiswaangano yamabazu ayabbooma. Chindi chiingi twaamba kuti ilayindiliila kubota munyaka amunyaka! Alubo, tulabotelwa akuyiisigwa nkutulokujana kuzikolo zyambunga. Kuboko kwaJehova kwalitondeezya kwiinda mukuchincha ooku. Ulikuzwidilila kubotya mbunga yakwe aparadayizi yabukombi njitulikubotelwa nikuba lino.
w07 1/15 11 ¶5
Makani Aazwa Mubbuku lya Isaya—II
Mibuzyo Iizwa Mumagwalo Yasandulwa:
61:8, 9—“Cizuminano citamani” niinzi alubo “lunyungu” niinzi? Eechi nchizuminano Jehova nchakachita amaKristu ananikidwe. “Lunyungu” “[mba]mbelele zimwi,” kwaamba, mamiliyoni batambula mulumbe wabo.—Johane 10:16.
FEBRUARY 27–MARCH 5
LUBONO LUZWA MUJWI LYALEZA | ISAYA 63-66
“Julu Pya Anyika Mpya Ziyoopa Kuti Kukabe Kubotelwa Kupati”
ip-2 383 ¶23
“Amubotelwe Akaambo Kazintu Nzindilikulenga”
23 Bbuku lyaChiyubunuzyo lipandulula chilengano chakabonwa amwaapostolo Johane, chakusika kwazuba lyaJehova, chiindi nyika yeendelezegwa aSaatani nitazonyonyoonwe. Kuzwa waawo, Saatani uyakwaangwa akuwaalilwa mumulindi. (Ciyubunuzyo 19:11–20:3) Naakamanisya kwaamba majwi aayo, mwaapostolo Johane wakajokelezya businsimi bwaIsaya, kalemba kuti: “Ndakabona ijulu ipya anyika impya.” Makani atobela mumavesi aaya mubusinsimi oobu, atubuzya atala achiindi Jehova Leza naatazochinche zintu munyika eeyi, kuti zibote. (Ciyubunuzyo 21:1, 3-5) Zili antanganana kuti, zisyomezyo zyaIsaya atala ‘ajulu pya anyika mpya’ ziyoozuzikizigwa munzila iigambya munyika mpya yaLeza. Ansi abwaami bwakujulu bupya, batazoopone ansi aano bazobotelwa paradayizi yabukombi ayakunyama. Chuumbulizya kapati nzisyomezyo zyakuti, “zintu zyakusaanguna [kuchiswa, mapenzi akataazya bantu] tazikooyooibalukwa limbi nikuba kuyeeyegwa.” Kufumbwa nchitutakayeye muchiindi eecho, tachikatupi machise aliikupa kuti bantu bakataazikane mazuba aano.
ip-2 384 ¶25
“Amubotelwe Akaambo Kazintu Nzindilikulenga”
25 Nikuba mazubaano, Jehova uliikupa kuti Jerusalemu ‘aakondwe.’ Ulikuzichita biyeni eezi? Mbuli mbutwabona, julu pya lyakaba mu 1914, liyooswaanizya abali 144 000, batazooyendelezye aJesu mumfulumende yakujulu. Aaba baambwa munzila yabusinsimi kuti ngu “Jerusalemu mupya.” (Ciyubunuzyo 21:2) Leza wakali kwaamba Jerusalemu mupya chiindi naakati: “Ndalenga Jerusalemu, ube cikondelezyo, abantu bawo babe cibotezyo.” Jerusalemu mupya uyoobelesegwa aLeza kuti ayete zilongezyo zyiingi kubantu bamuswiilila. Taakwe nikuyoomvwigwa kulila, nkaambo Jehova uyootupa ‘ziyandwa amyoyo yesu.’—Intembauzyo 37:3, 4.
w12 9/15 9 ¶4-5
Kuyooba Luumuno Kwaminyaka Iili Chuulu Akunembo
‘BAYOOYAKA MAANDA AKUBYALA MYUUNDA’
4 Ngwani uutayandi kuba amuunzi wakwe, mpakonzya kukkala kakwabilidwe ampuli yakwe? Nikuba boobo, mazubaano, maanda aakukkala ndipenzi pati. Bantu balisyanikizyene mumadolopo. Alubo, bamwi bapona akukkala mutwaanda twamapepa. Kuba ang’anda yabo lwabo, takukonzeki pe.
5 Mubweendelezi bwaBwaami, muntu woonse uyooba ang’anda yakwe mbuli mbaakasinsima Isaya kuti: “Lino bayooyaka maanda aakukala mulingao, bayoobyala myuunda yamisaansa akulya michelo yayo.” (Is. 65:21) Nikuba boobo, kuba ang’anda teenchicho pe achilikke chilongezyo nchibayoojana bantu. Nikuba mazubaano, bamwi bakkala mumaanda aabo, alubo bamwi bakkala mumaanda mapati, mabotu. Pesi kuli penzi lyakuyowela kuti maanda aayo alakonzya kubasweekela naa kupazigwa ababbi. Zili kuchitika lino zinoosiyene kule loko ambuzitanobede mubweendelezi bwaBwaami. Musinsimi Mika wakalemba kuti: “Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya, nkaambo aya makani azwa kumulomo wa-Jehova wamakamu makamu.”—Mik. 4:4.
Lubono Luzwa muJwi lyaLeza
w07 1/15 11 ¶6
Makani Aazwa Mubbuku lya Isaya—II
63:5—Leza ugwasigwa biyeni abukali bwakwe? Leza utondeezya bukali bwakwe munzila iili kabotu alimwi iiluleme. Alubo bukali bwakwe bumugwasya kuti kabeteka chabululami.
w13 6/15 25 ¶3-5
Zumizya Jehova Kuti Akubumbe
MUBUMBI MBATONDEEZYA KUTI ULI AMANGUZU
3 Lugwalo lwaIsaya 64:8 lupandulula kuti Jehova ulakonzya kubumba bantu azisi, munzila yachikozyano. Lwaamba kuti: “Nduwe Tateesu, O Jehova. Ndiswe bulongo, nduwe mubumbi wesu, toonse tuli zilenge zyamaanza aako.” Mubumbi ulakonzya kubelesya bulongo kubumba chintu kufumbwa mbaayanda. Bulongo tabukwe nguzu pe kumubumbi. Mbuzibede kuli Leza amuntu. Bantu tabakonzyi kukaka kubumbwa aLeza mbuli bulongo mbubutakonzyi kukaka kubumbwa.—Bala Jeremiya 18:1-6.
4 KumaIsrayeli, Jehova wakachita mbuli mbaachita mubumbi chiindi nabumba nongo. Pesi kuli musiyano mupati uliwo. Mubumbi ulakonzya kubumba kufumbwa nchayanda kabelesya bulongo. Pesi chiindi Jehova nabumba bantu, upa kuti bamwi babe bantu bali kabotu na akuti bamwi babe bantu batali kabotu? Bbayibbele lyaamba kuti teembukubede pe. Jehova wakapa bantu lwaangunuko lwakulisalila. Tabelesyi manguzu aakwe munzila iipa kuti aanyonganie lwaangunuko oolu. Bantu beelede kusala kubumbwa aMulengi, Jehova.—Bala Jeremiya 18:7-10.
5 Pesi atuti bantu bakaka kubumbwa aMubumbi Mupati? Leza waabelesya biyeni manguzu aakwe? Yeeya chichitika kuti bulongo kabutachiti kubumba chilongo chiyandikana. Mubumbi ulakonzya kubumba chimwi chilongo naa kubusowa. Bantu balasola mubumbi ikuti chilongo kachili chibi. Pesi teembukubede pe aMubumbi wesu. (Dt. 32:4) Ikuti umwi muntu taazumina kubumbwa aJehova, chaamba kuti nguwe mubi. Jehova ubelesya manguzu aakwe akubumba bantu kwiinda mukuchincha mabelekelo aakwe ambabo, kaziya akuti balikuzumina na kubumbwa anguwe. Bantu bazumina kubumbwa anguwe balagwasigwa. Muchikozyano, maKristu aananikwe ‘nzilongo zyeelelwa luse’ alubo bakabumbwa akuba ‘chilongo chibotu.’ Kuli lumwi lubazu, aabo batazumini kubumbwa aLeza nga baba ‘zilongo zyeelelwa bukali akubambilwa bunyonyoono.’—Rom. 9:19-23.