Aajanika Makani aaKabbuku Kamuswaangano waBuumi Amulimu Wesu
SEPTEMBER 7-13
LUBONO LUZWA MUJWI LYALEZA | KULONGA 23-24
“Toyelede Kutobela Bantu”
Ulaazi Na Makani Woonse?
Uyandisya kutumizya beenzinyokwe na mameseji naakuti e-mail? Kuti wamvwa amwi makani muma-news naakuti wabala atala azimwi zyakachitika, ulakonzya kuyanda kuba wakusaanguna kwaamba makani aayo. Kutanatumizya meseji naakuti e-mail eeyo, libuzye kuti: ‘Makani ngindiyanda kutumizya ngachoonzyo na? Ndilizizi na zyoonse zili atala amakani aaya?’ Kuti kutakwe choonzyo atala angawo, zilapa kuti utumizye makani aakubeja kubakombinyokwe. Kuti kutakwe choonzyo, utayitumizyi pe meseji eeyo pesi idilite.
Kuli limwi penzi likonzya kuba kuti katufwambaana kutumizya bamwi mameseji naakuti e-mail. Muli zimwi zisi, mulimu wesu wakukambawuka ulakasigwa. Muzisi eezyo, basikukazya balakonzya kupupulula makani aatuyoosya naakuti aapa kuti tutasyomani. Atulange-lange zyakachitika muchiindi chaSoviet Union. Kabunga kamapulisa kategwa KGB, kakapupulula makani aakuti bakwesu bakali amikuli bawuzya bakombinyina. Bakamboni biingi bakaasyoma makani aaya aakubeja mpawo bakasiya mbunga yaJehova. Nzibakachita zilawusisya! Chibotezya nchakuti biingi bakaboola pesi bamwi taakwe nibakaboola. Lusyomo lwabo lwakamana. (1 Tim. 1:19) Tweelede kuchita biyeni kuti tutabi muchiimo chikozyenie achechi? Tatweelede kubuzya bamwi makani ngitutakwe choonzyo. Tutasyomi makani oonse ngitumvwa. Tweelede kubona kuti tulaazi makani oonse.
it-1 11 ¶3
Aroni
Kwaziindi eezi zitatu, Aroni taakwe naakambwa kuti nguwe wakabisya. Kulakonzeka kuti wakazumizya zyiimo naakuti bamwi bantu kuti bape kuti achite zintu zitali kabotu. Chiindi chakusaanguna naakabisya, wakeelede kuyeeya majwi aamulawu aakuti: “Toyelede kutobela buleya mukucita zibi.” (Ku 23:2) Nikuba boobo, zina lyakwe libelesedwe munzila iilikabotu muMagwalo alubo Mwana waLeza naakali aanyika wakatondeezya kuti ulabulemeka bupayizi bwaAroni.—In 115:10, 12; 118:3; 133:1, 2; 135:19; Mt 5:17-19; 8:4.
it-1 343 ¶5
Kofwaazigwa
Kutabeteka chabululami kwakali kukozyanisigwa akofwaala alubo Mulawu waMozesi teewakali kuzumizya zisinkamulomo, zipo naakuti kusaluula nkaambo zintu eezi zyakali kukonzya kofwaazya mubetesi akupa kuti abeteke munzila iitali yabululami. “Cisinkamulomo cilakonzya kupa babetesi kutabeteka kabotu.” (Ku 23:8) “Cisinkamulomo ciloofwaazya meso aabasongo.” (Dt 16:19) Nikuba kuti mubetesi wakali aabusongo naakuti wakali chenjede, pesi wakali kukonzya koongelezegwa kuti atabeteki munzila iilikabotu abantu bali aamulandu, nikuba kuti wazichita aachaali naakuti katakubwene. Mulawu waLeza wakali kutondeezya aantanganana kuti zisinkamulomo azipo teezyakali kuyandikana pe munkuta. Mulawu ooyu wakali kwaamba kuti: “Utasalululi mucete akuyanda buyo muvwubi.” (Le 19:15) Kuti mubetesi abe aampuwo mbotu kubantu takeelede kwaamba kuti muntu uunotede takwe mulandu nikuba kalaamulandu.—Ku 23:2, 3.
Kuyanduula Lubono muJwi lyaLeza
w16.10 9 ¶4
“Tweelede Kubafwida Luzyalo Beenzu”
Jehova wakalayilila malsrayeli kuti balemeke bantu bazwa kuli zimwi zisi akubafwida luzyalo. (Bala Kulonga 23:9.) ‘Bakalizi mbukubede kuba mweenzu.’ Nikuba kabatanayinka mubuzike, kulakonzeka kuti maHebrayo teebakali kukkala pe abantu bakuEgepita nkaambo bakali kusaluulwa akaambo kamusyobo wabo naakuti chikombelo nchibanjila. (Matl. 43:32; 46:34; Kul. 1:11-14) Nikuba kuti malsrayeli bakali kupenzegwa nibakali mubuzike, pesi Jehova wakabayilila kuti babone mweenzu ‘mbuli sichisinyina.’—Lev. 19:33, 34.
it-2 393
Mikkayeli
Kuli mungelo uusalala uuwambidwe muBbayibbele uutali Gabriyeli, mungelo ooyu nguwe alikke uyitwa kuti “silutwe wabangelo.” (Jud 9) Zina eeli lisaanguna kwaambwa muchaandaano 10 chabbuku lyaDaniyele. Muchaandaano eechi, Mikkayeli wakaambwa kuti, nguumwi “wabasilutwe bapati” alubo wakagwasya mungelo wakali kulwana aasilutwe “wabwami bwacisi ca Persia.” Mikkayeli wakali kwiitwa kuti ‘ngusilutwe wabantu baDaniyele,’ “silutwe mupati ooyo wiimvwi kuti agwasye bantu [baDaniyele].” (Da 10:13, 20, 21; 12:1) Eezi zibikka aantanganana kuti Mikkayeli ngumungelo wakazulwida malsrayeli munkanda. (Ku 23:20, 21, 23; 32:34; 33:2) Kaambo kasimya makani aaya nkakuti: “Mikayeli silutwe wabangelo [wakapambana] a Diabolosi alimwi [wakali] kukazyanya anguwe kujatikizya mubili wa Musa.”—Jud 9.
SEPTEMBER 14-20
LUBONO LUZWA MUJWI LYALEZA | KULONGA 25-26
“Chintu Chakali Kuyandikana Mutente Lyakukombela”
it-1 165
Bbokesi lyaChizuminano
Mbulyakeelede Kupangwa. Chiindi Jehova naakali kuyanda kuti kuyakwe tente lyakukombela, wakabuzya Mozesi mbaakeelede kupanga Bbokesi lyaChizuminano. Bbokesi eeli lyakali kuyandikana loko kumaIsrayeli alubo lyakali kuyoobikkwa mutente lyakukombela. Bbokesi eeli mboobu mbulyakapimidwe: Tukokola tubili achisela mubulamfwu akakokola kamwi achisela mubwaamba akakokola kamwi achisela kuya mujulu. Lyakapangidwe aazisamu zyamuunga mpawo lyakazilulwidwe aangolida iisalalisya mukati aanze. Bbokesi eeli lyakeelede ‘kuzilululwa aangolida mukati aanze’ alubo Mozesi wakeelede “kupanga moombe wangolida kuzinguluka mulomo wabbokesi.” Chivunisyo chaBbokesi eeli chakeelede kupangwa aangolida. Aachivunisyo eechi kwakali bakkerubbi babili bakafulidwe aansando yangolida, kerrubbi umwi wakali kumamanino aachivunisyo mpawo uumbi kumamanino aachivunisyo kabalangene alubo bakatandabikide mababa aabo mujulu mpawo mababa aayo akavumbide chivunisyo chaBbokesi. (Ku 25:10, 11, 17-22; 37:6-9) Chivunisyo eechi chakazibidwe kuti ‘ncivwunisyo chabbokesi chakumania zibi.’—Ku 25:17; Heb 9:5; langa PROPITIATORY COVER.
it-1 166 ¶2
Bbokesi lyaChizuminano
MuBbokesi lyaChizuminano mwakali kubambilwa zintu zisalala naakuti bumboni. Zintu eezi zyakali kuswaanizya Milawu yaMozesi iili 10. (Ku 25:16) MuBbokesi eelyo mwakabikkidwe “kabiya kangolida kakajisi mana alimwi amusako wa Aroni iwakasonsa,” zintu eezi zyakazoogwisigwa nikwakayakwa tempele lyaSolomoni. (Heb 9:4; Ku 16:32-34; My 17:10; 1Ba 8:9; 2Mk 5:10) Naakali waba aafwiifwi kufwa Mozesi, wakabweza “bbuku lya Mulawo” akulipa bapayizi maLevi mpawo wakabalayilila kuti balibikke ‘kumbali lyabbokesi lyachizuminano chaJehova Leza wabo, alimwi lyakali kuyooba kamboni wabo.’—Dt 31:24-26.
it-1 166 ¶3
Bbokesi lyaChizuminano
Lyakali kutondeezya kubawo kwaLeza. Bbokesi lyaChizuminano lyakali kutondeezya kuti Leza mpali. Jehova wakasyomezya kuti: “Ndiyoolitondezya kulinduwe akwaambaula anduwe atala aacivwunisyo. Kuzwa akati kabakerubi ibali atala aabbokesi lya Bumboni.” “Nkaambo mukkumbi ndiyoolibonya atala lyacivwunisyo.” (Ku 25:22; Le 16:2) Samuyele wakaamba kuti Jehova ukkede “acuuno cakwe atala aabakerubi.” (1Sa 4:4) Alubo makkerubbi bayiminina ‘nkalaki yaJehova yachikozyano.’ (1Mk 28:18) “Kufwumbwa ciindi Musa naakali kunjila mutente lyakuswaanganina kuti aambaule a Leza, wakali kumvwa jwi lyaambaula anguwe atala aacivwunisyo cabbokesi lya Bumboni, wakali kwaambaula anguwe kuzwa akati kabakerubi bobilo.” (My 7:89) Mukuya kwachiindi, Joshuwa aMupayizi Mupati Finiyasi bakaambuula aaJehova kunembo lyaBbokesi lyaChizuminano. (Jos 7:6-10; Bab 20:27, 28) Nikuba boobo, mupayizi mupati nguwe alikke wakali kuzumizigwa kunjila muBusena Busalalisya akubona Bbokkesi lyaChizuminano. Alubo wakali kunjila kamwi mumunyaka, muBuzuba Bwakumania Milandu.—Le 16:2, 3, 13, 15, 17; Heb 9:7.
Kuyanduula Lubono muJwi lyaLeza
it-1 432 ¶1
Kkerubbi
Mutente lyakukombela lyakayakwa munkanda kwakabikkidwe bakkerubbi bakukozyanisya. Kumamanino aachivunisyo chaBbokesi kwakali bakkerubbi babili bakapangidwe aangolida iifulidwe aansando. Bakalilangene alubo masyu aabo akalangide acivwunisyo. Bakkerubbi aaba bakatandabikide mababa aabo aabili mujulu mpawo mababa aayo akavumbide chivunisyo chaBbokesi. Eeyi yakali nzila yakukwabilila. (Ku 25:10:10-21; 37:7-9) Alubo milembo yakali kubelesegwa mutente lyakukombela akketeni lyakali kusiyanisya busena Busalala aBusena Busalalisya yakasuminidwe bakkerubbi bakukozyanisya.—Ku 26:1, 31; 36:8, 35.
it-2 936
Zinkwa Zyachitondeezyo
Zinkwa zili 12 zyakali kubikkwa mubusena Busalala mutente lyakukombela naakuti mutempele, zyakali kugwisigwa mubuzuba bwaSabata mpawo kwakali kubikkwa zimbi zipya. (Ku 35:13; 39:36; 1Ba 7:48; 2Mk 13:11; Ne 10:32, 33) Bbala lyachiHebrayo lyakasandululwa kuti zinkwa zyachitondeezyo lilakonzya kwaamba kuti “kumbele” lyaJehova. (2Ba 13:23) Nkinkaako zinkwa zyachitondeezyo zyakali kubikkwa kunembo lyaJehova chiindi choonse nikwakali kupegwa zipayizyo. (Ku 25:30) Alubo zinkwa zyachitondeezyo zilakonzya kwaambwa kuti “zinkwa zyakwiilika” (2Mk 2:4) naakuti ‘zinkwa zyacituuzyo’ (Heb 9:2).
SEPTEMBER 21-27
LUBONO LUZWA MUJWI LYALEZA | KULONGA 27-28
“Twiiyaanzi Kumajansi aaBapayizi?”
it-2 1143
Urimu aTumimu
Basikulanga-langa makani aamuBbayibbele biingi basyoma kuti mabala akuti Urimu aTumimu aamba zintu zyakali kubelesegwa kukusonda. Kweendelana abusanduluzi bwaJames Moffatt, muli Kulonga 28:30 mabala aaya asandulwidwe kuti “zintu zyakusondya zisalala.” Bamwi bakali kwaamba kuti zintu zyakusondya eezi zyakalembedwe kuti “iiyi,” zimwi zyakalembedwe kuti “peepe” mpawo zimwi teezyakalembedwe pe. Chiindi nibakali kujana zilembedwe kuti “iiyi” naakuti “peepe” zyakali kutondeezya kuti basandulwa pesi nibakali kujana chakatalembedwe zyakali kubikka aantanganana kuti teebasandulwa pe. Alubo bamwi bakali kuyeeya kuti akali mabwe aabili aapepelete, kulilimwi bbazu mabwe aayo akali kutuba alubo kubbazu limbi akali kusiya. Chiindi mabwe aayo naakali kuwaalwa aansi, kuti woonse alanga kujulu kaatuba akali kutondeezya kuti “iiyi,” kuti alanga kujulu woonse kaasiya akali kutondeezya kuti “peepe” alubo kuti limwi kalisiya alubo limwi kalituba akali kutondeezya kuti taakwe nsandulo pe. Mulichimwi chiindi, Sawulu naakakumbila mupayizi kuti amubuzye kuti wakeelede kuyoolwana amaFilisiti na, taakwe nsandulo njaakajana pe. Chiindi naakaziba kuti aakati kabantu bakwe kuli wakali wabisya, wakakombelezya Jehova kati: “O Leza wa Israyeli, kotupa bwiinguzi kwiinda mu Tumimu!” Sawulu aJonatani bakagwisigwa aakati kabantu bakaliwo mpawo kwakawaala zyakusondya kuti babone kuti ngwani wakali wabisya akati kabo kabali babili. Nikuba kuti majwi aakuti “kotupa bwiinguzi kwiinda mu Tumimu” abonekaanga alisiyene akuwaala zyakusondya pesi kulakonzeka kuti zintu eezi zibili zili aabulyidilano.—1Sa 14:36-42.
it-1 849 ¶3
Nkumu
Mupayizi Mupati wamalsrayeli. Muchiindi chamalsrayeli mulembo wakali kwaangwa aamupayizi mupati kumutwe wakali kubikkwa mpande yangolida aankumu. Mpande yangolida eeyi chakali “citondezyo cisetekene cakulyaaba alincico,” alubo mpande eeyo yakalembwe mbuli ‘mbukulembwa aachiganto’ majwi aakuti “Kusalala nkukwa Jehova.” (Ku 28:36-38; 39:30) Mbukunga mupayizi mupati nguwe wakali kuzulwida mubukombi bwaJehova, nkinkaako kwakali kweelela kuti aabusena mpaakali kubelekela kukkale kakusalala. Alubo majwi aakuti “Kusalala nkukwa Jehova” akali kuyeezya malsrayeli kuti bakeelede kukkala kabasalala chiindi choonse nibakali kuchita zintu zyabukombi. Mpande yangolida yakali kwiiminina Mupayizi Mupati, Jesu Kristu akulipeda nkwaakachita kuli Jehova kuti achite milimu yabupayizi iisumpula kusalala kwaLeza.—Heb 7:26.
w08 8/15 15 ¶17
Lemeka Jehova Munzila yaBulemu
Tweelede kulijata munzila yabulemu chiindi nitukomba Jehova. Lugwalo lwa Mukambausi 5:1 lwaamba kuti: “Kolilemeka lyoonse nounka kuŋanda ya Leza mwini-mwini.” Mozesi aJoshuwa bakapedwe mulawu wakuti kabagwisya nsangu chiindi nibakali kunjila mubusena busalala. (Kul. 3:5; Jos. 5:15) Kugwisya nsangu nkubakali kuchita, kwakali kutondeezya kuti balalemeka. Bapayizi bamuchiindi chamalsrayeli bakapedwe mulawu wakuti kabazwaata zibbudula “kutegwa kabavwumba mantanda aabo.” (Kul. 28:42, 43) Mabambe aaya, akali kupa kuti balemekeke chiindi nibakali kubelekela aachipayililo. Boonse bamumpuli yabapayizi bakali kutobelezya malayilile aasumpukide aakulijata munzila yabulemu.
Kuyanduula Lubono muJwi lyaLeza
w12 8/1 26 ¶1-3
Mwalizi Na?
Kuyeeyelwa kuti bakaajana kuli malsrayeli mabwe aakali aakalembo kakali kuzwaatwa aamupayizi mupati aakaango?
Chiindi malsrayeli nibakazwa muEgepita kabaya munkanda, Leza wakabalayilila kuti basume kalembo kamupayizi kakaango. (Kulonga 28:15-21) Kalembo aaka kakeelede kusumwa aabbwe lisalala pyu, lyatopazi, lyaemalodi, lyanofeki, lyasafilo, lyajasipa, lyaliguri, lyaagate, lyamutusito, lyakulusolito, lyaonikisi alyajade. Malsrayeli bakali kukonzya na kwaajana mabwe aaya?
Chiindi, mabwe aayandikana akali kuuzigwa. Muchikozyano, bantu bakuEgepita bakali kujana mabwe aaya kuchisi chiitwa kuti Iran mazubaano, kuAfghanistan alubo kuyeeyelwa kuti akuIndia. Kumamayini aakuEgepita kwakali kujanika misyobo yamabwe aayandikana iisiyene-siyene. Alubo balupati-pati bamuEgepita bakali aamasena aamamayini ngibakali kulangania. Jobu wakapandulula nzila nzibakali kubelesya bantu bakapona muchiindi chakwe nibakali kusya mbono zisisidwe. Mbono nzibakali kusya zyakaambwa aaJobu ziswaanizya mabwe aasafilo aatopazi.—Jobu 28:1-11, 19.
Lugwalo lwaKulonga lutondeezya kuti malsrayeli “bakabweza mbono zyabana Egepita” chiindi nibakazwa mubuzike. (Kulonga 12:35, 36) Zilaantanganana kuti malsrayeli bakasuma kalembo kamupayizi kakaango kababelesya mabwe ngibakazaawo kuEgepita.
it-1 1130 ¶2
Kusalala
Banyama Azilyo. Bapule bang’ombe, zigutu abapule bampongo bataanzi kuzyalwa, bakali kusalala kuli Jehova alubo banyama aaba bakeelede kujatwa munzila iilikabotu. Bakali kubelesegwa kukupayizya alubo imwi nyama yakali kusalazigwa aabapayizi. (My 18:17-19) Michelo mitaanzi azyakkumi zyakali kusalala alubo zyakali kubelesegwa kuti zibe zipayizyo mutente lyakukombela. (Ku 28:38) Zintu zyoonse Jehova nzyaakali kubona kuti zilasalala, teezyakeelede kuubaansigwa pe alubo teezyakeelede kubelesegwa muzintu zitakwe chakuchita abukombi. Atulange-lange atala amulawu wachakkumi. Muchikozyano, kuti muntu wabikka aambali chimwi chintu kuti azoope kachili chakkumi, mpawo umwi wamumpuli wabweza chipo eecho akuchibelesya katazi kuti chibambilidweenzi, muntu ulaachakkumi eecho wakali aamulandu wakutyola mulawu waLeza uli atala akulemeka zintu zisalala. Kweendelana aMulawu, munaachipo wakeelede kugwisya zipo zyiindulwidwe tubili kuchipo chakusaanguna, kutali kuti agwisye mbelele iilikabotu yachipayizyo luzutu. Kuchita oobu, kwakali kutondeezya kulemeka zintu zisalala zyaJehova.—Le 5:14-16.
SEPTEMBER 28–OCTOBER 4
LUBONO LUZWA MUJWI LYALEZA | KULONGA 29-30
“Kupa Jehova”
it-2 764-765
Kubalwa
KuSinayi. Kubalwa kwabantu kwakusaanguna kwakachitwa chiindi Jehova naakalayilila maIsrayeli nibakali kuSinayi, mumweezi wachibili kabali baba aaminyaka iibili kuzwa kabalongede kuEgepita. Kuti Mozesi awubilwe amulimu, kumusyobo umwi awumwi kwakasalwa muntu wakali kuyoozulwida kukubala bantu kweendelana amusyobo wakwe. MaIsrayeli bakapedwe mulawu wakuti baalumi bali aaminyaka iili 20 kaziya kujulu bakali kukonzya kuchita milimu yabusooja abantu bakabalwa boonse bagwisye hafu yasekeli naakuti mazubaano mali iili mbuli $1.10. Mali eeyi yakali kubelesegwa kumilimu yakali kuchitwa kutente lyakukombela. (Ku 30:11-16; My 1:1-16, 18, 19) Bantu bakabalwa bakali 603 550 katutaswaanizyi maLevi nkaambo teebakali kuyoojana lukono pe. MaLevi taakwe mali njibakeelede kugwisya pe naakuti kuyoonjila mumilimu yachisooja.—My 1:44-47; 2:32, 33; 18:20, 24.
it-1 502
Kupa
MuMulawu kwakalembedwe kuti kuli zipo zyakeelede kupegwa. Chiindi Mozesi naakabala namba yamaIsrayeli, wakaamba kuti mwaalumi umwi awumwi ulaaminyaka iili 20 kaziya kujulu weelede kugwisya “cisela casyekeli [mali iili mbuli $1.10 mazubaano] kweelana acipimyo casyekeli lyamubusena busalala” kuti afutule buumi bwakwe. “Cisela casyekeli ncakusanga kuli Jehova” alubo chakali chakumania milandu kunununa buumi bwabo. Mali yakali kusangwa kuli Jehova yakali kubelesegwa “kumilimo yaatente lyakuswaanganina.” (Ku 30:11-16) Umwi sikulanga-langa makani azyachiindi wachiJuda uutegwa Josephus wakaamba kuti “mutelo uusetekene” naakuti uusalala wakali kubbadalwa munyaka amunyaka.—The Jewish War, VII, 218 [vi, 6], 2Mk 24:6-10; Mt 17:24; langa TAXATION.
w11 11/1 12 ¶1-2
Mwalizi Na?
Mali yakali kubelesegwa kumilimu yakali kuchitwa mutempele kuJerusalemu yakali kuzwa kuli?
Mali yamitelo ayazyakkumi njiyo yakali kugwasilizya kusumpula milimu yakali kuchitwa kutempele. Alubo mali yayimwi mitelo yakali kubelesegwa. Muchikozyano, chiindi nikwakali kuyanda kuyakwa tente lyakukombela, Jehova wakalayilila Mozesi kuti abelesye hafu yasekeli yakagwisigwa aamaIsrayeli boonse bakabalwa kuti ibe ‘chakusanga chaJehova.’—Kulonga 30:12-16.
Mukuya kwachiindi, chakazooba chiyanza chamaJuda kuti bagwisye mali yamutelo eeyi munyaka amunyaka kuti ibelesegwe kutempele. Jesu wakalayilila Petro kuti abweze mali mumulomo wamuswi kuti akabbadele mutelo ooyo kutempele wakali kugwisigwa munyaka amunyaka.—Matayo 17:24-27.
Kuyanduula Lubono muJwi lyaLeza
it-1 1029 ¶4
Kuboko
Kubikka Maboko Mumutwe. Bantu bakali kubikka maboko aabo mumutwe wamuntu naakuti wachimwi chintu akaambo katwaambo tusiyene-siyene. Chiindi chiingi, kuchita oobo kwakali kutondeezya kuti chintu chabikkwa maboko naakuti muntu wabikkwa maboko wasalwa naakuti wachita chimwi chintu chipa kuti azibikane. Chiindi nikwakachitwa pobwe lyakubikka bapayizi, Aroni abana bakwe bakabikka maboko aabo aamutwe wamupule wang’ombe aamitwe yambelele zibili zyakali kuyanda kupayizigwa. Eezi zyakali kutondeezya kuti banyama aaba bakali kuyanda kupayizigwa akaambo kakuti we abana bakwe bakali baba bapayizi baJehova Leza. (Ku 29:10, 15, 19; Le 8:14, 18, 22) Chiindi Mozesi naakabuzigwa aaLeza kuti wasala Joshuwa kuti abe sikumulida zina, Mozesi wakabikka maboko aakwe mumutwe waJoshuwa ooyo “wakazwide muuya wabusongo” alubo wakali kukonzya kuzulwida maIsrayeli. (Dt 34:9) Alubo maboko akali kubikkwa mumutwe wamuntu wakeelede kujana chilongezyo. (Mtl 48:14; Mk 10:16) Jesu Kristu wakali kubikka maboko aakwe mumitwe yabantu mbaakali kuponia. (Mt 8:3; Mk 6:5; Lk 13:13) Muli chimwi chiindi, baapostolo bakali kubikka maboko aabo aamitwe yabantu kuti bantu aabo bajane muuya uusalala.—Mil 8:14-20; 19:6.
it-1 114 ¶1
Kunanikwa, Kunanika
MuMulawu Jehova ngwakapede Mozesi, wakaamba mbaakeelede kupangwa mafuta aakunanika. Wakaamba kuti baswaanizye mafuta aanunkilila aamuro, sinamoni, kkalamasi, kkasiya amafuta aamawolifa. (Ku 30:22-25) Wakali mulandu mupati loko kuti muntu waswaanizya mafuta aaya akwaabelesya katalayililidwe kuti achite oobo. (Ku 30:31-33) Eezi zyakali kutondeezya kuti mafuta aaya akali kusalala akuti akali kuyandikana loko nkaambo akali kubelesegwa kukusala bantu bakali kuchita milimu iiyandikana loko.