Mbungano Yakabatondeezya Luyando

YOMARA abanyaanduumi bakwe, Marcelo aHiver, bakkala mukawunzi kaniini kamuGuatemala. Yomara nguwe wakasaanguna kwiiya Bbayibbili aBakamboni mpawo banyaandumi bakwe bakazooyiya ambabo. Pesi kwakali penzi. Boonse kabali batatu mboofu alubo tabakonzyi pe kubala mabbuku aaboofu aategwa braille. Nkinkaako, muntu wakali kubayiisya Bbayibbili wakali kubabalila chiiyo nchibakali kwiiya amavesi aakali muchiiyo eecho.

Chimwi chakali kubayumina nkwiinka kumiswaangano yambungano. Teebakali kukonzya pe kweenda musinzo weendwa mamineti aali 40 kuti bakasike kuNg’anda yaBwaami kabali aabalikke. Pesi bakwesu bamumbungano bakachita mabambe aakuti kabababweza akwiinkaabo kumiswaangano yoonse yambungano. Alubo nibakasaanguna kutola lubazu muzipanzi zyamiswaangano yaakati kamviki, bakwesu bakali kubagwasya kuti bajate zipanzi zyabo amutwe.

MuMay 2019, miswaangano yambungano yakasaanguna kuchitilwa nkubakali kukkala bana aaba. Kuzwa aachiindi eecho, umwi mukwesu amwanakazaakwe, bakali mapayona aachiindi choonse, bakalongela kuchilawu eecho. Nikuba kuti mapayona aaya taakali kukonzya pe kubala braille, bakakanza kuti bayiisye Yomara abanyaandumi bakwe kubala akulemba braille. Nkinkaako, bakayinka kulayibbulali kuti bakayanduule mabbuku aabraille kuchitila kuti bakonzye kubayiisya.

Nikwakayinda myeezi miche, Yomara abanyaandumi bakwe bakasaanguna kubala braille alubo eezi zyakapa kuti bayinkilile kunembo mubukombi.a Kwaamba oobu Yomara, Marcelo aHiver mapayona aachiindi choonse. Marcelo mubelesi wambungano. Boonse kabali batatu balikubeleka changuzu muzintu zyabukombi mviki amviki. Kubeleka chabusungu nkubalikuchita, kulikupa kuti bamwi bayande kutobelezya chikozyano chabo.

Yomara abanyaandumi bakwe balikulumba akaambo kaluyando ndubakatondeezegwa aambungano. Yomara wakati, “Kuzwa nitwakasaanguna kubonana aaBakamboni, bakatutondeezya luyando lwachoonzyo lwamaKkristu.” Marcelo wakati: “Tuli aabeenzuma balikabotu loko mumbungano yesu alubo tuli aakati kabakwesu abachizi bali munyika yoonse bali aaluyando.” Yomara abanyaandumi bakwe, bachilangilila aameso aasalala chiindi nibatazoobone nyika eeyi kayili kuchinchwa kuti ibe paradayizi.—Int. 37:10, 11; Is. 35:5.