Matayo
20 “Nkaambo Bwami bwakujulu buli mbuli muntu umwi, imwiniŋanda, iwakaunka mafwumofwumo kuyoonjizya basimilimo bakubeleka mumuunda wakwe wamisaansa. 2 Naakazuminana abasimilimo kuti abavwozye aumwi dinali abuzuba, wakabatuma kumuunda wakwe wamisaansa. 3 Naakaunka alimwi aciindi cawoola lyatatu,* wakabona bamwi baliimvwi amusika kabatakwe zyakucita, 4 eelyo kuli baabo wakati, ‘Anywebo kamuya mumuunda wamisaansa, ndilamuvwozya kufwumbwa ceelede.’ 5 Aboobo bakaunka. Alimwi wakaunka aciindi cawoola lyacisambomwi,* aawoola lyafwuka* akucita mbubonya oobo. 6 Mpoonya kumamanino, wakaunka aciindi cawoola lyakkumi alyomwe* akujana bamwi baliimvwi, eelyo wakabaambila kuti, ‘Nkaambo nzi ncomwiimvwi aano buzuba boonse kamutabeleki?’ 7 Bakamwiingula kuti ‘Nkaambo kunyina watunjizya mulimo.’ Wakabaambila kuti ‘Anywebo kamuya mumuunda wamisaansa.’
8 “Nokwakaba kumangolezya, mwinimuunda wamisaansa wakaambila mubanzi wakwe kuti, ‘Baite basimilimo ubavwozye, utalikile kuli bamamanino akumanizya kuli bakusaanguna.’ 9 Nobakasika baalumi ibakatalika aciindi cawoola lyakkumi alyomwe, aumwi wabo wakavwola dinali. 10 Aboobo bakusaanguna nobakasika, bakayeeya kuti balapegwa mali manji, pele abalo bakavwola aumwi dinali. 11 Nobakalitambula, bakatalika kumutongooka mwiniŋanda 12 akwaamba kuti, ‘Aaba bamamanino babeleka kwawoola lyomwe; pele wabeelanya andiswe notwabeleka canguzu buzuba boonse akubalwa zuba!’ 13 Pele wakaingula umwi wabo kuti, ‘Taaku musa ncindakubisizya. Twazuminana kuti ulavwola dinali, sena tabusyi oobo? 14 Bweza dinali lyako weende. Ndiyanda kumupa wamamanino ooyu mbubonya mbondapa nduwe. 15 Sena tandaangulukide kucita ncendiyanda azyintu zyangu? Sena wafwa munyono akaambo kakuti ndili mubotu?’ 16 Munzila eeyi, bakumamanino bayooba bakusaanguna, abakusaanguna bayooba bakumamanino.”
17 Lino mbwaakali kuyanda kutanta kuunka ku Jelusalemu, Jesu wakabweza basikwiiya bakwe bali kkumi ababili kumbali alimwi kabali munzila wakabaambila kuti: 18 “Amubone! Tulatanta kuya ku Jelusalemu, eelyo Mwana wamuntu uyooabwa kuli basilutwe babapaizi abalembi alimwi mane bayoomupa mulandu wakuti ajaigwe, 19 alimwi bayoomwaaba kubantu bamasi kuti bakamusampaule akumukwibbaula akumugagaila, eelyo mubuzuba bwatatu, uyoobusyigwa.”
20 Mpoonya banyina babana ba Zebedayo bakamusikila antoomwe abana babo, bakamufwugamina akumulomba cimwi cintu. 21 Wakababuzya kuti: “Ino muyanda nzi?” Bakati kulinguwe: “Kosyomezya kuti bana bangu aaba bobilo bakakkale umwi kujanza lyako lyalulyo aumwi kujanza lyako lyalumwensyi mu Bwami bwako.” 22 Jesu wakaingula kuti: “Nywebo tamuzyi ncomulomba. Sena mulakonzya kunywa nkomeki njeyanda kunywa?” Bakati kulinguwe: “Tulakonzya.” 23 Wakabaambila kuti: “Masimpe muyoonywa nkomeki yangu, pele aaya makani aakukkala kujanza lyangu lyalulyo alyalumwensyi tandili ndime ndipa pe, pele masena aaya ngabaabo mbaakabambila Taata.”
24 Ibali kkumi nobakaamvwa makani aaya, bakabanyemena ibabunyina bobilo aaba. 25 Pele Jesu wakabaita wabaambila kuti: “Mulizyi kuti baleli bamasi balabadyaaminina bantu, alimwi abapati akati kabo balabeendelezya calunya. 26 Oobu tabusyi mbocibede akati kanu, pele kufwumbwa uuyanda kuba mupati akati kanu weelede kuba mubelesi wanu, 27 alimwi kufwumbwa uuyanda kuba mutaanzi akati kanu weelede kuba muzike wanu. 28 Mbubonya Mwana wamuntu mbwaakaboola, ikutali kuzyoobelekelwa, pele kuzyoobeleka, akupa buumi bwakwe ikuba cinunuzyo cabanji.”
29 Lino nobakali kuzwa mu Jeliko, nkamu mpati yabantu yakamutobela. 30 Eelyo baalumi boofwu bobilo ibakakkede mumbali aanzila bakamvwa kuti Jesu wakali kwiinda, mpoonya bakoongolola kuti: “Mwami, tufwide luse, O Mwana wa Davida!” 31 Pele nkamu yabantu yakabaambila kuti baumune; pele balo bakoongololesya kabaamba kuti: “Mwami, tufwide luse, O Mwana wa Davida!” 32 Aboobo Jesu wakaima, wabaita akwaamba kuti: “Ncinzi ncomuyanda kuti ndimucitile?” 33 Bakati kulinguwe: “Mwami, tuyanda kuti meso eesu abone.” 34 Lino akaambo kakweetela, Jesu wakajata meso aabo, eelyo mpoonya aawo bakatalika kulanga alimwi bakamutobela.