Johane

3 Lino kwakali muntu umwi wankamu yaba Falisi uutegwa Nikodemo, imuleli waba Juda. 2 Ooyu wakaboola kulinguwe masiku akumwaambila kuti: “Labbi, tulizyi kuti uli mwiiyi wakazwa kuli Leza; nkaambo kunyina uunga wacita zitondezyo eezyi nzyocita ccita kuti Leza kali anguwe.” 3 Eelyo Jesu wakati kulinguwe: “Ncobeni ndikwaambila kuti, Muntu takonzyi kubona Bwami bwa Leza ccita kuti wazyalwa alimwi.”* 4 Nikodemo wakamubuzya kuti: “Ino muntu wakakomena kale inga wazyalwa buti? Sena inga ulakonzya kunjila mwida lyabanyina lwabili akuzyalwa alimwi?” 5 Jesu wakamwiingula kuti: “Ncobeni ndikwaambila kuti, Ccita kuti muntu wazyalwa mumaanzi amumuuya, takonzyi kunjila mu Bwami bwa Leza. 6 Cakazyalwa kumubili mubili, alimwi cakazyalwa kumuuya muuya. 7 Utagambwi akaambo kakuti ndakwaambila kuti, nywebo nobantu mweelede kuzyalwa alimwi. 8 Muwo ulaunga kufwumbwa nkuuyanda, alimwi ulaumvwa kuuvwuuma, pele tokuzyi nkuuzwida ankuuya. Oobo mbwabede muntu uuli woonse wazyalwa kumuuya.”

9 Mukwiingula Nikodemo wakamubuzya kuti: “Ino zyintu eezyi inga zyaba buti?” 10 Mukwiingula Jesu wakati kulinguwe: “Sena uli mwiiyi waba Isilayeli pele tozyi zyintu eezyi? 11 Ncobeni ndikwaambila kuti, Nzyotuzyi tulazyaamba alimwi tulapa bumboni kuzyintu nzyotwakabona, pele nywebo nobantu tamubutambuli bumboni mbotupa. 12 Ikuti ndamwaambila zyintu zyaanyika tamusyomi, ino mulasyoma buti ndamwaambila zyintu zyakujulu? 13 Kunze lyaboobo, kunyina muntu wakatanta kuya kujulu, pele buyo ooyo wakaseluka kuzwa kujulu, Mwana wamuntu. 14 Alimwi mbubonya Musa mbwaakasumpula nzoka munkanda, awalo Mwana wamuntu weelede kusumpulwa, 15 kutegwa muntu uuli woonse uumusyoma akabe abuumi butamani.

16 “Nkaambo Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani. 17 Nkaambo Leza tanaakatuma Mwanaakwe munyika kuti abeteke nyika, pele kuti nyika ifwutulwe kwiinda mulinguwe. 18 Ooyo uumusyoma teelede kubetekwa. Ooyo uutamusyomi wabetekwa kale, nkaambo tanaasyoma muzyina lya Mwana wa Leza simuzyalwaalikke. 19 Lino mpaawa mpoluyeeme lubeta, kuti mumuni wasika munyika; pele bantu bayanda mudima muciindi camumuni, nkaambo milimo yabo mibi. 20 Nkaambo ooyo uucita zyintu zibi uluusulide mumuni alimwi tabooli kumumuni, kutegwa atasinswi kumilimo yakwe mibi. 21 Pele ooyo uucita ziluleme uboola kumumuni kutegwa milimo yakwe iyubununwe kuti yakali kucitwa kweelana akuyanda kwa Leza.”

22 Naakamana aaya, Jesu abasikwiiya bakwe bakaunka muminzi yamu Judaya, alimwi ooko wakaakukkala ambabo kwaciindi cili mbocibede alimwi wakali kubbapatizya. 23 Pele Johane awalo wakali kubbapatizya ku Anoni kufwaafwi aku Salimu, nkaambo ooko kwakali maanzi manji, alimwi bantu bakazumanana kuboola akubbapatizyigwa; 24 nkaambo Johane tanaakaninga kubikkwa muntolongo.

25 Mpoonya basikwiiya ba Johane bakatalika kukazyanya amu Juda umwi kujatikizya makani aacilengwa cakusalazya. 26 Eelyo bakaboola kuli Johane akumwaambila kuti: “Labbi, imuntu uulya ngowakali anguwe mutala lya Jodano, uulya ngowakacitila bumboni, bona, awalo ulabbapatizya alimwi boonse baunka kulinguwe.” 27 Mukwiingula Johane wakati: “Imuntu takonzyi kutambula cintu nociba comwe ccita kuti wapegwa buya kuzwa kujulu. 28 Nywebo nobeni muli bakamboni bangu kuti ndakaamba kuti, Mebo tandili Kilisito pe, pele ndakatumwa kumbele lyakwe. 29 Ooyo uujisi nabwiinga ngusibwiinga. Nokuba boobo, imulongwe wasibwiinga naimikila munsi lyasibwiinga akumumvwa kaambaula, ulakondwa kapati nkaambo kajwi lyakwe. Aboobo kukondwa kwangu ooku kwazulila. 30 Walo weelede kuyaabukomena kumilimo, pele mebo ndeelede kuyaabuceya.”

31 Ooyo uuzwa kujulu uli atala lyabamwi boonse. Ooyo uuzwa anyika ngwaanyika alimwi waamba zyintu zyaanyika. Ooyo uuzwa kujulu uli atala lyabamwi boonse. 32 Izyintu nzyaakabona akumvwa nzyacitila bumboni, pele kunyina muntu uuzumina bumboni bwakwe. 33 Ooyo uuzumina bumboni bwakwe wabikka cisinizyo cakwe kuli mbubo cakuti Leza waamba zyamasimpe. 34 Nkaambo ooyo ngwaakatuma Leza waamba majwi aa Leza, nkaambo Leza tacesyi* kupa muuya wakwe. 35 Bausyi balamuyanda Mwana, alimwi zyintu zyoonse bazibikka mumaanza aakwe. 36 Ooyo uumusyoma Mwana uli abuumi butamani; pele ooyo uutaswiilili Mwana takabuboni buumi pe, pele bukali bwa Leza bulakkalilila alinguwe.