Johane
4 Lino Mwami naakazyiba kuti ba Falisi bakamvwa kuti Jesu wakali kugwasya bantu banji kuba basikwiiya akubbapatizya kwiinda Johane— 2 nokuba kuti mubwini Jesu kumugama kunyina naakabbapatizya pele basikwiiya bakwe mbabakali kubbapatizya— 3 wakazwa mu Judaya akuunka ku Galilaya alimwi. 4 Pele kwakali kuyandika kuti ainde mu Samaliya. 5 Aboobo wakasika mumunzi waku Samaliya uutegwa Sukali munsi-munsi aamuunda ooyo Jakobo ngwaakapede Josefa mwanaakwe. 6 Alimwi aawo mpaakali mukalo wa Jakobo. Lino Jesu kakatede akaambo kalweendo, wakalikkede amukalo ooyo. Ciindi cakali afwaafwi kusika aawoola lyacisambomwi.*
7 Imukaintu umwi waku Samaliya wakaboola kukuteka maanzi. Jesu wakati kulinguwe: “Kondipa maanzi aakunywa.” 8 (Nkaambo basikwiiya bakwe bakaunkide mumunzi kuyooula zyakulya.) 9 Aboobo mukaintu muna Samaliya ooyo wakati kulinguwe: “Ino caba buti kuti yebo, nokuba kuti uli mu Juda undilomba maanzi aakunywa, kakuli mebo ndili mukaintu muna Samaliya?” (Nkaambo ba Juda tabalyatani abana Samaliya.) 10 Jesu mukwiingula wakati kulinguwe: “Ikuti nowalicizyi cipego cabuyo ca Leza ayooyo uukwaambila kuti, ‘Kondipa maanzi aakunywa,’ nowamulomba eelyo naakupa maanzi aapa buumi.” 11 Mukaintu wakati kulinguwe: “O Mwami, tojisi acakutesya maanzi alimwi mukalo mulamfwu. Aboobo ino ulaajana kuli maanzi aayo aapa buumi? 12 Sena uli mupati kwiinda taateesu Jakobo wakatupa mukalo ooyu alimwi walo antoomwe abana bakwe aŋombe zyakwe ibakali kunywa maanzi kuzwa mulinguwo?” 13 Jesu mukwiingula wakati kulinguwe: “Muntu woonse uunywa maanzi aaya uyoofwa nyota alimwi. 14 Kufwumbwa uunywa maanzi ngondiyoomupa takafwi limbi nyota naaceya, pele maanzi ngondiyoomupa ayooba kasensa kamaanzi aabbobboma akupa buumi butamani mulinguwe.” 15 Mukaintu ooyo wakati kulinguwe: “O Mwami, kondipa maanzi aayo kutegwa kanditacifwi nyota alimwi kanditabooli lyoonse kubusena oobu kukuteka maanzi.”
16 Jesu wakati kulinguwe: “Koya ukaite mulumi wako muboole okuno.” 17 Mukwiingula mukaintu wakati: “Tandijisi mulumi pe.” Jesu wakati kulinguwe: “Waingula kabotu kuti, ‘Tandijisi mulumi pe.’ 18 Nkaambo wakalijisi balumi bosanwe, pele mwaalumi ooyo ngomuli limwi lino tali mulumi wako. Eeci ncowaamba ncamasimpe.” 19 Mukaintu ooyo wakati kulinguwe: “O Mwami, ndazyiba lino kuti uli musinsimi. 20 Bamatata bakali kukombela mucilundu eeci; pele nywebo mwaamba kuti mu Jelusalemu mobeelede kukombela bantu.” 21 Jesu wakati kulinguwe: “Kondisyoma omukaintu kuti, Ciyoosika ciindi nywebo nomutakakombi Taata mucilundu eeci nomuba mu Jelusalemu. 22 Nywebo mukomba nzyomutazyi; pele swebo tukomba nzyotuzyi nkaambo lufwutuko lutalikila kuba Juda. 23 Nokuba boobo, ciindi ciyoosika alimwi ndilino, eelyo bakombi bakasimpe nobayookomba Taata mumuuya amukasimpe, nkaambo mubwini bali boobu Taata mbayandaula kuti bamukombe. 24 Leza Muuya, alimwi aabo bamukomba beelede kumukomba mumuuya amukasimpe.” 25 Mukaintu ooyo wakati kulinguwe: “Ndilizyi kuti Mesiya ulaboola, ooyo uutegwa Kilisito. Aakusika ooyo, uyootwaambila zyintu zyoonse caantangalala.” 26 Jesu wakati kulinguwe: “Mebo nendaambaula anduwe ndendime nguwe.”
27 Lino aciindi eeci basikwiiya bakwe bakasika, eelyo bakagambwa akaambo kakuti wakali kwaambaula amukaintu. Pele kunyina iwakabuzya kuti: “Ncinzi ncoyanda?” naa kuti, “Nkaambo nzi ncoli mukwaambaula amukaintu?” 28 Aboobo mukaintu ooyo wakasiya nongo yakwe yamaanzi akuunka mumunzi waakwaambila bantu kuti: 29 “Kamuboola mubone muntu wandaambila zyintu zyoonse nzindakacita. Sena ooyu inga waba ngo Kilisito?” 30 Bakazwa mumunzi akuunka nkwaakabede.
31 Ciindi eeci nciconya basikwiiya bakali kumukombelezya balaamba: “Labbi, kolya.” 32 Pele wakati kuli mbabo: “Ndijisi cakulya ncendilya eeco ncomutazyi.” 33 Aboobo basikwiiya bakabuzyanya balaamba: “Sena kuli umwi wamuletela cakulya cili coonse?” 34 Jesu wakati kuli mbabo: “Cakulya cangu nkucita kuyanda kwayooyo wakandituma alimwi akumanizya mulimo wakwe. 35 Sena tamwaambi kuti kuceede myezi yone kuti kutebula kutalike? Amubone! Ndimwaambila kuti: Amuwaale meso aanu mubone myuunda, nkaambo yayuma kale kuti itebulwe. Lino 36 sikutebula utambula bulumbu alimwi uyobolola micelo yakubuumi butamani, kutegwa sikuminza asikutebula bakakkomanine antoomwe. 37 Ncobeni mumakani aaya, nkamasimpe kasimpi kakuti, Umwi ngusikuminza alimwi umbi mutebuzi. 38 Ndakamutuma kuyootebula nzyomwatakabelekela. Ibamwi bakabeleka eelyo nywebo mwajanina mpawo mpindu kumulimo ngobakabeleka.”
39 Lino bana Samaliya banji ibakazwa mumunzi ooyo bakamusyoma akaambo kamajwi aamukaintu iwakapa bumboni kuti: “Wandaambila zyintu zyoonse nzindakacita.” 40 Aboobo bana Samaliya nobakaboola kulinguwe, bakatalika kumulomba kuti akkale ambabo; eelyo wakakkala ooko mazuba obilo. 41 Alimwi ibamwi banji bakasyoma akaambo kazyintu nzyaakaamba, 42 eelyo bakaambila mukaintu ooyo kuti: “Tatucisyomi akaambo buyo kamajwi aako; nkaambo twalimvwida tobeni alimwi tulizyi kuti mubwini muntu ooyu mufwutuli wanyika.”
43 Nokwakainda mazuba obilo wakazwa ooko akuya ku Galilaya. 44 Pele Jesu lwakwe wakapa bumboni bwakuti mucisi cakwabo musinsimi talemekwi. 45 Nokuba boobo, naakasika mu Galilaya, bana Galilaya bakamutambula akaambo kakuti bakazibona zyintu zyoonse nzyaakacita mu Jelusalemu kupobwe, nkaambo abalo bakaluunkide kupobwe.
46 Aboobo wakasika alimwi ku Kana waku Galilaya, ooko nkwaakasandwide maanzi kuba waini. Lino kwakali mugwasyi wamwami umwi wakajisi mwana musankwa iwakali kuciswa ku Kapenauma. 47 Mwaalumi ooyu naakamvwa kuti Jesu wakazwa ku Judaya akuboola mu Galilaya, wakaunka kulinguwe akutalika kumulomba kuti aboole akuponya mwanaakwe musankwa, nkaambo wakalicisidwe calufwu. 48 Pele Jesu wakati kulinguwe: “Nywebo nobantu tamusyomi naaceya ccita mane mwabona zitondezyo azyintu zigambya.” 49 Mugwasyi wamwami ooyu wakati kulinguwe: “O Mwami, atweende natanafwa mwanaangu.” 50 Jesu wakati kulinguwe: “Koya buyo; mwanaako wapona kale.” Mwaalumi ooyu wakaasyoma majwi ngaakamwaambila Jesu, eelyo wakaunka. 51 Pele kali kale munzila bazike bakwe bakamuyaanya akumwaambila kuti mwanaakwe mulombe wakapona. 52 Aboobo wakatalika kubabuzya ciindi naakapona. Eelyo bakamwaambila kuti: “Ijilo awoola lyaciloba* mubili wakwe wakaleka kupya.” 53 Aboobo bausyi bakazyiba kuti cakali ciindi nciconya Jesu naakabaambila kuti: “Mwanaako wapona.” Eelyo balo abamuŋanda yabo boonse bakasyoma. 54 Lino eeci cakali citondezyo cabili Jesu ncaakacita naakazwa ku Judaya akuboola mu Galilaya.