2 Timoteyo
4 Ndakulailila canguzu kumbele lya Leza a Kilisito Jesu, ooyo uuyoobeteka baumi abafwu kwiinda mukuyubunuka kwakwe amu Bwami bwakwe, 2 kuti kokambauka makani, koajatisya lyoonse muciindi cili kabotu amuciindi camapenzi, kosinsa, kokalalila, alimwi kokulwaizya cakukkazyika moyo kapati aluzyibo mukuyiisya. 3 Nkaambo ciindi ciyoosika nobayooleka kutobela njiisyo mbotu, pele akaambo kakutobela zisusi zyabo beni, bayooliyobolweda bamayi ibakubatekunya kumatwi.* 4 Bayooleka kuswiilila kasimpe akutalika kubikkila maano kutwaano twakubeja. 5 Pele yebo, kobateme muzyintu zyoonse, koliyumya mumapenzi, kocita mulimo wamukambausi,* uuzuzikizye cakumaninina mulimo wako.
6 Nkaambo ndatalika kale kutilwa mbuli cituuzyo cinyugwa acipaililo, alimwi ciindi cakuti ndaangununwe caswena afwaafwi. 7 Ndalwana nkondo mbotu, ndabalika mukusiyana mane kumamanino, ndalubamba lusyomo. 8 Kuzwa lino ndibambilidwe musini wabululami, ooyo Mwami, mubetesi uululeme, ngwayoondipa kabuli bulumbu mubuzuba oobo, nokuba boobo takapi buyo ndime ndelikke pe, pele alimwi uyoopa abaabo boonse ibali kuyanda kuyubunuka kwakwe.
9 Soleka kusikila mpogolela kuboola kokuno nkondibede lino-lino. 10 Nkaambo Dema wandilekelezya akaambo kakuyandisya bweende bwazyintu oobu, alimwi wakaunka ku Tesalonika; Kilesiko wakaunka ku Galatiya, alimwi Tito wakaunka ku Dalimatiya. 11 Luka alikke nguuli andime. Waboola umuletelezye a Maako, nkaambo ulandigwasya mumulimo. 12 Pele Tukiko ndakamutuma ku Efeso. 13 Waboola, uletelezye ajansi lyampeyo ndindakasiya ku Tulowa kuli Kapo, uletelezye amabbuku aakuvwunga, ikapati aalya aazisalu.
14 Alekizanda mufwuzi wamukuba wakandicitila zyintu zibyaabi zinji. Jehova uyoomupilusizya kweelana amicito yakwe. 15 Ayebo weelede kumucenjelela, nkaambo wakaukazya canguzu kapati mulumbe wesu.
16 Nindakali kulikwabilila mumulawo ciindi cakusaanguna kunyina wakandiiminina pe, pele boonse bakandilekelezya—lino Leza atabapi mulandu pe. 17 Pele Mwami wakali andime lyoonse alimwi wakandipa nguzu, kutegwa kwiinda mulindime mulimo wakukambauka uzuzikizyigwe cakumaninina akuti bamasi boonse baumvwe; alimwi ndakavwunwa kumulomo wasyuumbwa. 18 Mwami wangu uyoondivwuna kumulimo mubi uuli woonse alimwi uyoondifwutula, akanditole mu Bwami bwakwe bwakujulu. Kulinguwe akube bulemu lyoonse mane kukabe kutamani. Ameni.
19 Undaanzyizye Pulisika a Akula alimwi abamuŋanda ya Onesifolo.
20 Elasito wakasyaala ku Kolinto, pele Tulofimo ndakamusiya kacisidwe ku Melito. 21 Soleka kusikila mpogolela kusika okuno mupeyo kautanatalika.
Ebolo wakwaanzya, awalo Pude, Lino, Kulodiya alimwi abakwesu boonse bakwaanzya.
22 Mwami abe anduwe akaambo kamuuya ngotondezya. Luzyalo lwakwe alube andinywe.