Jesús makuchinan sábado

Fariseos ni xakxilhputunkgo Jesús chu xlakputsakgo la nachipakgo. Xwankgo pi Jesús ni xlimakuchit xwanit tatatlanin sábado xlakata uma kilhtamaku xjaxkan. Akgtum sábado, Jesús akxilhli chatum lakgatsin tiku kskima tumin ktiji. Wa xlakata kawanilh kstalaninanin: “Kaʼakxilhtit la xlimakgatliwakga Dios namakgtaya uma chixku”. Jesús talakgtlawalh tiyat xchujut. Alistalh litlawalh tsinu xlakgastapu chu wanilh: “Kapit chu kalakgachakganti kxestanque Siloam”. Chixku chuna tlawalh chu xlimakgtumku tlan akxilhli.

Latamanin lu kaks lilakawankgolh chu wankgolh: “Wa uma chixku tiku kskiwawayan, ¿ni xlikana? ¿O atanu tiku xtachuna tasiya?”. Xla kakgalhtilh: “Akit tiku ni xlakawanan lata klakachilh”. Latamanin kgalhskinkgolh: “¿Chu tuku xlakata la uku tlan lakawanana?”. Xla kawanilh tuku xlanit. Wa xlakata linkgolh xlakata nakatachuwinan fariseos.

Chixku kawanilh fariseos: “Jesús litlawalh tiyat kilakgastapu chu kiwanilh pi xaklakgachakgalh. Chuna ktlawalh chu la uku tlan kakxilha”. Fariseos tsukulh wankgo: “Komo Jesús kuchinan sábado, xlitliwakga ni xla Dios”. Pero amakgapitsi xwankgo: “Komo xlitliwakga ni xla Dios, ¿tuku xlakata tlan kakuchi tatatlanin?”.

Fariseos tasanikgolh xnatlatni uma chixku chu kgalhskinkgolh: “¿Tuku xlakata minkgawasakan tlan akxilha uku?”. Xnatlatni xpekuankgo xlakata fariseos xwankgonit pi xʼamakgolh tamakxtukgo ksinagoga putum tiku xkanajlanikgolh Jesús. Xlakan kgalhtinankgolh: “Ni kkatsiyaw. Wixin kakgalhskintit”. Fariseos tlakg tlawanikgolh takgalhskinin chixku, chu xla kakgalhtilh: “Kkawaninitan putum tuku kkatsi. ¿Tuku xlakata chuntiyaku kilakgalhskinaw?”. Fariseos sitsikgolh chu tamakxtukgolh.

Alistalh, Jesús alh akxilha chixku chu kgalhskilh: “¿Kanajlaniya Mesías?”. Chixku kgalhtinalh: “Komo xakkatsilh tiku, xakkanajlanilh”. Jesús wanilh: “Akit Mesías”. ¿Ni xlikana pi Jesús tlan likatsinilh uma lakgatsin? Mapaksalh chu na makgtayalh xlakata xkgalhilh takanajla.