Wa xTachuwin Dios kgalhi litliwakga

1. ¿Tuku xlakata liwana katsiyaw pi xTachuwin Dios kgalhi litliwakga? (Kaʼakxilhti xapulana dibujo).

XTATAYANANIN Jehová liwana katsiyaw pi «xtachuwin Dios xtachuna ntu xastakna, na kgalhiy xlitliwakga» (Heb. 4:12). Akxilhnitaw pi xtamakatsinin Dios nema wi kBiblia, kgalhi litliwakga xlakata nalakgpali kilatamatkan chu xlatamatkan amakgapitsin. Akxni nina xtatayananin Jehová xwankgonit, makgapitsi xkgalhanankgo, xwakgo drogas o xtlawakgo talakgxtumit xalimaxana. Makgapitsin lu xkalakgapaskan o xkgalhikgo tumin, pero xmakgkatsikgo pi wi tuku xkatsankgani (Ecl. 2:3-11). Lhuwa tiku ni xkgalhikgo takgalhkgalhin pero la uku tekgskgonit xatlan tiji xla latamat, xlakata xlitliwakga Biblia. Lu lipaxuwayaw akxni likgalhtawakgayaw xlakata la lakgpalikgolh xlatamatkan, anta krevista Makatsinina niku wi sección «Biblia kalakgpalinilh xlatamatkan». Nachuna katsiyaw pi putum lakaskinaw xtamakgtay Biblia xlakata chuntiya tlan natalalinaw Jehová maski xtatayananin akinin.

2. ¿Xlakata xlitliwakga xTachuwin Dios, tuku talakgpalin tlawakgolh kstalaninanin Cristo kxapulana siglo?

² La uku kilhtamaku ni kaks lilakawanaw pi latamanin tlawakgo talakgpalin kxlatamatkan akxni likgalhtawakgakgo xTachuwin Dios. Chuna titaxtukgolh kstalaninanin Cristo kxapulana siglo, tiku xkgalhikgo takgalhkgalhin na’ankgo k’akgapun (kalikgalhtawakga 1 Corintios 6:9-11). Apóstol Pablo lichuwinalh tiku ni x’amakgolh tawilakgo kxTamapakgsin Dios chu alistalh kawanilh: «Chuna xwanitantit makgapitsin wixin». Pero kamakgtayalh xTachuwin Dios chu espíritu santo xlakata natalakgpalikgo. Asta tiku kstalanina Cristo xlitaxtu chuntiya xtlawakgo tuku nitlan chu nialh tlan talalinkgolh Jehová. Akgtum li’akxilhtit, lichuwinan Biblia xlakata chatum kstalanina Cristo tiku xatalaksakni xwanit chu tamakxtuka kcongregación. Pero tunkun tlawalh talakgpalin chu taspitpa kcongregación (1 Cor. 5:1-5; 2 Cor. 2:5-8). Kinkamakgpuwantiniyan pi lhuwa natalan tlan tlawakgonit talakgpalin xlakata kamakgtayalh xTachuwin Dios.

3. ¿Tuku na’akxilhaw k’uma artículo?

³ Xlakata Jehová kinkamaxkinitan xTachuwin, liwana maklakaskimputunaw (2 Tim. 2:15). K’uma artículo na’akxilhaw la pulaktutu tlan nalitamakgtayayaw xlitliwakga Biblia. Pulana, kkilatamatkan. Pulaktiy, akxni lichuwinanaw Dios. Chu xlipulaktutu, akxni mastayaw taʼakgchuwin. Uma nakinkamakgtayayan nalimasiyaniyaw tapaxkit chu paxtikatsinit xapaxkina kinTlatkan xalak akgapun, tiku kinkamasiyaniyan xlakata tlan nakinkakitaxtuniyan (Is. 48:17).

KKILATAMATKAN

4. 1) ¿Tuku kilitlawatkan komo lakaskinaw pi nakinkamakgtayayan xTachuwin Dios? 2) ¿La tlawaya xlakata nalikgalhtawakgaya Biblia?

⁴ Komo lakaskinaw pi nakinkamakgtayayan xTachuwin Dios, talakaskin chali chali nalikgalhtawakgayaw (Jos. 1:8). Xlikana pi kimputumkan kgalhiyaw lhuwa taskujut, pero ni namastayaw talakaskin pi uma natlawa nialh nalikgalhtawakgayaw Biblia (kalikgalhtawakga Efesios 5:15, 16). Tlan nalikgalhtawakgayaw Biblia akxni tsisa, kakuwani o katsisni. Nachuna makgkatsiyaw la tiku tsokgli Salmo: «Akit snun klakgati ktlawa tu wan milimapakgsin, wakg kilhtamaku wa klakapastakmaj» (Sal. 119:97).

5, 6. 1) ¿Tuku xlakata lu xlakaskinka nalilakpuwanaw tuku likgalhtawakgayaw? 2) ¿La tlan nalitamakgtayayaw tuku lilakpuwanaw? 3) ¿La makgtayanitan nalikgalhtawakgaya xTachuwin Dios chu nalilakpuwana?

⁵ Pero ni kaj watiya talakaskin nalikgalhtawakgayaw Biblia. Liwana nalilakpuwanaw tuku nalikgalhtawakgayaw (Sal. 1:1-3). Chuna tlan nalilatamayaw liskgalala nema natekgsaw kxTachuwin Dios. Maski kaj k’akgtum libro o kkicelularkan nalikgalhtawakgayaw Biblia, tuku xlakaskinka wa pi nachan kinakujkan.

⁶ ¿La tlan nalitamakgtayayaw akxni lilakpuwanaw tuku likgalhtawakgayaw? Lhuwa tiku likgalhtawakgakgo Biblia kakgalhskinkan: «¿Tuku kimasiyani uma xlakata Jehová? ¿Kliskujma kkilatamat uma tastakyaw? ¿Wi tuku chuntiya talakaskin nakliskuja?». Komo nalilakpuwanaw xTachuwin Dios chu natlawaniyaw oración, nalilatamaputunaw xtastakyaw. Chuna tlakg tlan nalitamakgtayayaw xlitliwakga xTachuwin Dios (2 Cor. 10:4, 5).

AKXNI LICHUWINANAW DIOS

7. ¿La tlan nalitamakgtayayaw xTachuwin Dios akxni anaw lichuwinanaw xtamakatsinin?

⁷ ¿La tlan nalitamakgtayayaw xTachuwin Dios akxni anaw lichuwinanaw xtamakatsinin chu akxni makgalhtawakgananaw? Pulaktum wa ankgalhin nalimaklakaskinaw. Chatum tala lichuwinalh: «Komo xtapi Jehová akgatunu chiki, ¿kaj watiya wix xchuwinanti o xmaxki talakaskin pi wa xchuwinalh?». ¿Tuku xwamputun? Akxni likgalhtawakganiyaw Biblia chatum lataman xtachuna la komo Jehová xmaxkiw talakaskin nachuwinan. Akxni liwana laksakaw akgtum versículo tlakg kgalhi litliwakga nixawa tuku akinin nawanaw kkintachuwinkan (1 Tes. 2:13). Wa xlakata natakgalhskinaw: «¿Kliskuja xlakata naklimaklakaskin Biblia akxni klichuwinan Dios?».

8. ¿Tuku xlakata ni kaj watiya talakaskin nakalikgalhtawakganiyaw textos xalak Biblia latamanin?

⁸ Xlikana, ni kaj watiya talakaskin nakalikgalhtawakganiyaw textos xalak Biblia latamanin. Chuna la kxapulana siglo, la uku lhuwa latamanin ni akgatekgskgo tuku wan Biblia (Rom. 10:2). Wa xlakata ni nalakpuwanaw pi na’akgatekgsnikgo akxni nakalikgalhtawakganiyaw akgtum texto. Talakaskin makglhuwa nawaniyaw tachuwin nema tlakg xlakaskinka chu tuku kilhchanima. Komo chuna natlawayaw, latamanin tlan nakalakgchan kxtalakapastaknikan chu kxnakujkan xTachuwin Dios (kalikgalhtawakga Lucas 24:32).

9. Akxni nakalikgalhtawakganiyaw akgtum texto latamanin, ¿la natlawayaw xlakata namaxkikgo kakni Biblia?

⁹ Akxni nakawaniyaw pi nakalikgalhtawakganiyaw akgtum texto, liwana kilikatsitkan la natlawayaw xlakata latamanin namaxkikgo kakni Biblia. Akgtum li’akxilhtit, tlan nawanaw: «Ka’akxilhwi tuku wan Dios xlakata uma». Pero komo natachuwinanaw tiku makgtapakgsi ktakanajla nema ni masiyakan xlakata Cristo, tlan nawanaw: «Ka’akxilhti tuku wan kxasanto libro». Pero komo lataman ni katsiputun xlakata takanajla, tlan nakgalhskinaw: «¿Kgaxpatnitata uma xamakgan tachuwin?». Xlakata tanu tanu tuku titaxtukgo latamanin, talakaskin pi tanu tanu la nakalitachuwinanaw Dios (1 Cor. 9:22, 23).

10. 1) Kalichuwinanti tuku titaxtulh chatum tala akxni xlichuwinama Dios. 2) Kalichuwinanti la akxilhnita pi xTachuwin Dios kamakgtaya latamanin akxni lichuwinana xtamakatsinin.

¹⁰ Lhuwa natalan akxilhkgonit pi maklakaskinkan xTachuwin Dios akxni lichuwinankan xtamakatsinin, lu kalakgchan kxnakujkan latamanin. Akgtum li’akxilhtit, chatum tala xlakgapaxialhnan chatum chixku tiku lina kata chu akglhuwata kata la xlikgalhtawakga revistas. Pero akgtum kilhtamaku, ni kaj watiya makgxtakgnilh xasasti revista Makatsinina, wata na likgalhtawakganilh akgtum texto nema xlimin revista. Wa 2 Corintios 1:3, 4, niku wan pi Jehová «xmakilhtsukina talakgalhaman, chu xmastana xlipaks ntakgsiyajni» chu xla wa «nti nkinkamakgtsiyajan lantla xlipaks kkintalakgaputsitkan». Uma chixku lakgchalh kxnaku chu skinilh tala pi xlikgalhtawakganipa uma texto. Alistalh, wa pi xla chu xpuskat lu xlakaskinkgo takgtsiyajni chu pi xla tlakg xkatsiputun xlakata Biblia. Chuna la akxilhaw, limaklakaskinkan xTachuwin Dios akxni lichuwinanaw xtamakatsinin lu kamakgtaya latamanin (Hech. 19:20).

AKXNI MASTAYAW AKGTUM TAʼAKGCHUWIN

11. ¿Tuku lu xlakaskinka lakgayakgo natalan tiku matitaxtikgo taʼakgchuwin?

¹¹ Putum akinin lu lakgatiyaw anaw ktamakxtumit chu klaklanka tamakxtumit. Anaw xlakata namaxkiyaw kakni Jehová. Pero nachuna anaw xlakata nalitamakgtayayaw tuku anta masiyakan. Xlikana pi natalan tiku mastakgo taʼakgchuwin kgalhikgo akgtum lanka talakgalhaman chu lu xlakaskinka tuku lakgayakgolh (Sant. 3:1). Wa xlakata liwana xlikatsitkan pi putum tuku masiyakgo takilhtinit kBiblia. Komo wix na matitaxtiya taʼakgchuwin, ¿tuku natlawaya xlakata xTachuwin Dios tlan nakalimakgtayaya tiku kgaxmatnikgoyan?

12. ¿La natlawa tiku matitaxti taʼakgchuwin pi wa Biblia tlakg xlakaskinka nalitaxtu?

¹² Kuenta natlawayaw pi wa Biblia tlakg xlakaskinka nalitaxtu akxni namastayaw akgtum taʼakgchuwin (Juan 7:16). Ni namastayaw talakaskin pi liʼakxilhtit nema limaklakaskinaw o chuna la mastayaw taʼakgchuwin natlawa pi nialh xlakaskinka na’akxilhaw textos xalak Biblia. Nachuna, kalakapastakwi pi ni watiya wamputun nalikgalhtawakgayaw Biblia chu namasiyayaw tuku xalak Biblia. Nachuna latamanin ni katilakapastakgkgolh komo lhuwa textos nalimaklakaskinaw. Wa xlakata liwana kalaksakwi textos chu kalimaxtuw kilhtamaku nalikgalhtawakgayaw, liwana nalichuwinanaw, nawiliyaw li’akxilhtit chu nawanaw la nalilatamakan (Neh. 8:8). Komo taʼakgchuwin takilhtinit k’akgtum bosquejo, liwana kalikgalhtawakgaw tachuwin chu textos nema limin chu liwana ka’akgatekgswi la tatalakxtumi uma pulaktiy. Chu alistalh kalaksakwi tuku textos namaklakaskinaw xlakata namasiyayaw tuku lichuwinan bosquejo (tlakg natekgsaw tamakgtay klibro Benefíciese de la Escuela del Ministerio Teocrático klecciones 21 asta 23). Pero tuku tlakg xlakaskinka wa naskiniyaw xtamakgtay Jehová xlakata namasiyayaw xTachuwin (kalikgalhtawakga Esdras 7:10 chu Proverbios 3:13, 14).

13. 1) ¿La makgtayalh chatum tala la limaklakaskinka Biblia ktamakxtumit? 2) ¿La makgtayanitan la limaklakaskinkan Biblia ktamakxtumit?

¹³ Ka’akxilhwi la chatum tala xalak Australia lu lakgchalh kxnaku xlakata la limaklakaskinka Biblia ktamakxtumit. Nitlan tuku titaxtulh akxni aktsujku xwanit, pero makglhtinalh tamakatsinin xalak Biblia chu tamakamastanilh Jehová. Maski chuna, ni xkanajla pi Jehová xpaxki. Akgtum kilhtamaku anta ktamakxtumit kgaxmatli texto nema lakgchalh kxnaku. Akxni lu lilakpuwa chu likgalhtawakgalh amakgapitsi textos, liwana katsilh pi Jehová lu xpaxki.a Chu wix, ¿minit kilhtamaku kgaxpatnita akgtum texto k’akgtum tamakxtumit o klanka tamakxtumit nema lu lakgchalh minaku? (Neh. 8:12).

14. ¿La nalimasiyayaw pi lhuwa xtapalh li’akxilhaw xTachuwin Dios?

¹⁴ ¿Ni xlikana pi lu paxtikatsiniyaw Jehová xlakata xTachuwin? Ni kaj watiya xatapaxuwan kinkamaxkin wata nachuna makgantaxtilh xtamalaknun pi namakgapala (1 Ped. 1:24, 25). Wa xlakata, ankgalhin kalikgalhtawakgaw, katlawaw tuku wan, chu kalimaklakaskiw xlakata nakalimakgtayayaw amakgapitsin. Chuna nalimasiyayaw pi paxkiyaw chu lhuwa xtapalh li’akxilhaw. Pero tuku tlakg xlakaskinka, wa nalimasiyayaw pi paxkiyaw tiku tsokgli, Jehová.