Akxni wi tuku masputunan

«Xapulana, lu xaklipuwamaw. Akxni kachikin litatsamalh chuchut chu lhuwa putlun analh, masputulh putum tuku xakkgalhiyaw» (Andrew, Sierra Leona).

«Akxni xtitaxtunita unisen chu ktaspitwi kchiki, nialhtu xʼakgataxtunit. Ni xakkatsiyaw tuku naktlawayaw. Kintsumat tatsokgostalh chu tsukulh tasa» (David, islas Vírgenes).

¿MINIT kilhtamaku chuna titaxtunita? Komo chuna, katsiya tuku makgkatsikgo tiku lakgtaxtukgo akxni wi tuku masputunan: kaks lilakawankgo, lakgaputsakgo, ni kanajlaputunkgo tuku titaxtumakgo, ni katsikgo tuku natlawakgo chu asta lixkajni manixnankgo. Lhuwa tiku chuna titaxtukgonit taxlajwanikgo chu tlakgwankgo pi asta nialh latamaputunkgo.

Komo putum makgatsankganita xpalakata tuku masputunan, max na makgkatsiya pi nialh kgalhiya litliwakga. Max asta lakpuwampat pi nialh kgalhini kuenta nalatapaya. Pero Biblia wan pi tlanku nalipaxuwaya latamat chu anan tuku xlakata tlan nalipawana pi naʼanan tlakg xatlan kakilhtamaku.

NAKATSIYA TUKU WAN BIBLIA, NATLAWA PI NALATAPAPUTUNA

Eclesiastés 7:8 wan: «Tlakg tlan akxni wi tuku masputukan nixawa akxni matsukikan». Komo wix patinanita xpalakata tuku masputunan chu talakaskin namatsukiparaya milatamat, max namakgkatsiya pi nialhtu limakwan nalitsakgsaparaya. Pero komo naliskuja chu ni lakapala nasitsiya, tlan nakitaxtuniyan.

Biblia lichuwinan pi namin kilhtamaku akxni «nialh katitakgaxmatli [...] pi wi tiku tasama chu pi wi tiku patinama» (Isaías 65:19). Umakgolh tachuwin nakgantaxtu akxni xTamapakgsin Dios akgtum paraíso natlawa Katiyatni (Salmo 37:11, 29). Nikxni katianampa tuku masputunan. Putum takatsanajwat chu tuku kinkamakgapekuanan putum kilhtamaku nasputa. Dios tiku kgalhi putum litliwakga malaknu: “Tuku titaxtunit nialh katitalakapastakli, na nialh katitawilalh kkinakujkan” (Isaías 65:17).

Kalilakpuwanti uma: kiMalakatsukinakan wi tuku tlawanit xlakata tlan natawilayaw kilhtamaku nema aku mima chu “nakgalhiyaw akgtum takgalhkgalhin”, lakaskin pi kalatamaw akxni xla namapakgsinan chu naʼanan takaksni (Jeremías 29:11). ¿Tlan namakgtayayan uma takgalhkgalhin xlakata nalatapaputuna? Sally, tiku lichuwinaw kxapulana artículo, wan: «Lilakpuwankan xastlan kilhtamaku nema aku mima akxni namapakgsinan xTamapakgsin Dios, tlan namakgtayayan nialh nalilakpuwana tuku titaxtunita chu natayaniya tuku titaxtupat uku».

¿Tuku atanu natlawa xTamapakgsin Dios nialh makgas kilhtamaku? Kkawaniyan pi kakatsi. Chuna naʼakxilha pi tlanku nalipaxuwaya latamat maski lhuwa tuku nitlan titaxtunita chu pi nialh makgas tuku masputunan titaxtunita nawan. Xlakata nina min uma kilhtamaku, xatlan xtastakyaw Biblia tlan namakgtayayan xlakata natayaniya tuku nitlan titaxtunita.

Textos xalak Biblia nema tlan namakgtayayan

Kalitsakgsa najaxa

«Tlakg tlan jaxkan tsinu nixawa lu lhuwa naskujkan chu kaj naputsakan tuku la un litaxtu» (Eclesiastés 4:6).

Chuna la wan makgapitsi tuku putsananikanit, akxni titaxtunita tuku lu tuwa, «komo nila liwana lhtataya chu ni lhuwa lhtataya, tlawa pi tlakg nitlan namakgkatsiya chu tlakg lakapala nalipuwana». Wa xlakata, tlan kitaxtu liwana nalhtataya.

Kawanti tuku makgkatsiya

«Akxni xnaku chatum chixku wi tuku lilakgaputsa wa tuku makgalipuwan, pero akgtum tlan tachuwin makgapaxuwa» (Proverbios 12:25).

Katachuwinanti chatum tiku xalak mifamilia o chatum amigo tiku lipawana. Ni kajwatiya katikgaxmatnikgon, xlakan tlan namakgpuwantinikgoyan chu namakgtayakgoyan.a

Kalakpuwanti pi mima tuku tlakg tlan

«Likgalhkgalhiyaw xasasti akgapun, chu xasasti tiyat, xtachuna lantla nkinkawaninitan [Dios] mpi namin [niku] ntatlawa ntalulokgtat» (2 Pedro 3:13).

a Komo chatum lataman lhuwa tuku lilakgaputsa o lu makgas lipuwan, max talakaskin nalakgan makuchina.