¿Kalimasiyanitata latamanin akxni xlimakgtumku kalakgpimpat la limakgalhtawakganankan Biblia?
Akxni kawaniyaw tiku katachuwinanaw pi kalimakgalhtawakgaputunaw Biblia, makgapitsi kinkawanikgoyan pi ni kgalhtawakgaputunkgo o wankgo pi kamakgalhtawakgamaka kxtakanajlakan. Xlakata xlakan kajwatiya katsikgo la makgalhtawakgankan kxtakanajlakan, ni katsikgo pi lhuwa chu lu tlan tuku nakatsinikgo kBiblia. Wa xlakata, ni tunkun nawaniya pi makgalhtawakgaputuna, wata tlakg tlan xwa pi pulana xlimasiyani la makgalhtawakgananakan. Kawiliw akgtum liʼakxilhtit: la akxni wi tiku wan, akit lu kgama ktlawa kiliwat chu wani pi nalimini liwat; ¿ni tlakg tlan pulana namakgalhwani? Kaʼakxilhti la tlan natlawaya chu ni lhuwa minutos namaklakaskina chuna la wan Nuestro Ministerio del Reino xla enero kata 2006 página 6:
«¿Lakpuwana pi namin kilhtamaku nakgantaxtu tuku wan uma texto? [Kalikgalhtawakgani Isaías 33:24, chu kamaxki talakaskin nakgalhtinan.] Kimaxki talakaskin nakmasiyaniyan tuku lu xlakaskinka xla uma tema.» Kamaxki tiku tachuwinampat libro ¿Tuku xlikana masiyay Biblia? chu kawani pi kaʼakxilhli kpágina 36, kpárrafo 22 xla uma libro. Kalikgalhtawakgani xtakgalhskinin uma párrafo chu kawani pi kaputsalh xtakgalhtin akxni nalikgalhtawakgatilhaya párrafo. Alistalh, katlawanipara takgalhskinin chu kakgaxpatti la nakgalhtiyan. Akxtum kalikgalhtawakgaparatit atanu texto. Kamakgxtakgni akgtum takgalhskinin nema nakgalhtiya akxni nalakgpimparaya chu katalakkaxla xlakata tlan nalakgpimparaya. Uma tuku tlawa, ¡matsuki akgtum takgalhtawakga!