Tlan kitaxtu akxni lichuwinankan Dios ktiji
1. ¿La tlan natlawayaw chuna la xtlawa Jesús?
1 Jesús xkalitachuwinan latamanin xtachuwin Dios ktiji o niku xkatatanokglha (Luc. 9:57-61; Juan 4:7). Xla xkalitachuwinamputun lhuwa latamanin uma lu xlakaskinka tamakatsinin. La uku, na tlan nakamakgtayayaw latamanin akxni kalitachuwinanaw ktiji xlakata Dios chu nakatsinikgo xliskgala Dios (Pro. 1:20). Tlakg tlan nakinkakitaxtuniyan komo akinin natsukuyaw katachuwinanaw latamanin chu liwana nalakpuwanaw tuku nawanaw.
2. ¿Tuku xlakata talakaskin akinin namatsukiyaw takgalhchuwin akxni lichuwinanaw Dios ktiji?
2 Akinin natsukuyaw katachuwinanaw. Tlakg tlan komo nakatachuwinanaw latamanin akxni tlawamakgolh chu ni lakatum nakgalhkgalhitawilayaw pi xlakan natalakatsuwikgo niku akinin wilaw. Kakatalitsiyanti, kakalakaʼakxilhti, xatapaxuwan chu kachuwinanti liwana. Komo katapina tiku na lichuwinankgo Dios, kalakapastakti pi tlakg tlan komo minchatunukan nakatachuwinanatit. Na talakaskin pi ni chuntiya natamakgxtakgaw xlakata tlan tlakg nakatsini xlakata Dios. Akxni namakgalhsputuya takgalhchuwin tlan nakgalhskiniya la tlan nakatachuwinamparaya. Wilakgo tiku kaj akgtum tiji lichuwinankgo Dios, uma tlawa pi makglhuwa nakatachuwinankgo latamanin chu tlakg nakatsiputunkgo.
3. ¿La nalimasiyayaw pi liwana lakpuwanaw akxni lichuwinanaw Dios ktiji?
3 Liwana kalakpuwaw tuku natlawayaw. Liwana kalakpuwanti niku nalichuwinana Dios chu tiku nakalitachuwinana. Ni talakaskin nakatachuwinanaw putum tiku titaxtu. Kuenta katlawa la tasiyakgo latamanin. Akgtum liʼakxilhtit, komo wi tiku lakapalama tlakg tlan nawan komo ni namachokgoyaw. Komo lichuwinampat Dios xkilhtin niku stanankan ni katasiyalh pi lichuwinampat xlakata tiku pulalima niku stanankan ni namakgasitsiya. Tlakg tlan nakatachuwinana latamanin akxni taxtukgo chu ni akxni tanukgo niku stanankan. Akxni nakalakgtalakatsuwiniya latamanin kuenta katlawa pi ni nakamakgapekuana. Na lu xlakaskinka nakatsiniyaw tukuya likgalhtawakga namalaknuniyaw. Komo wi tiku tasiyay pi ni lu lakgati, tlan namaxkikan makgtum tratado chu ni revista.
4. ¿Tuku xlakata tlan kitaxtu chu lu paxuwakan akxni lichuwinankan Dios ktiji?
4 Akxni lichuwinanaw Dios ktiji kinkamaxkiyan talakaskin tlakg lhuwa latamanin nakamasiyaniyaw xaxlikana chu ni lhuwa kilhtamaku nalinaw (Ecl. 11:6). Max makgapitsi tiku kalitachuwinanaw ktiji wa tiku ni kamatekgsaw kxchikkan. ¿Tuku xlakata ni lakkaxwiliyaw kinkilhtamakujkan xlakata tlan nalipaxuwayaw chu liwana nalichuwinanaw Dios ktiji?