Wa xTachuwin Dios lhuwa litliwakga kgalhi
1. ¿Tuku wanikan xtítulo lanka tamakxtumit xa akgtum kilhtamaku kata 2014?
1 Putum tuku tlawakgo latamanin nikxni tatalakxtumi xlitliwakga nema kgalhi xTachuwin Dios. ¿Tuku xlakata? Xlakata Biblia tlan lakgpali kintalakapastaknikan xlakata nalilatamayaw la Dios lakaskin. Pero, ¿lhuwa litliwakga kgalhi xTachuwin Dios? ¿La nalitamakgtayayaw? ¿La tlan namaklakaskinaw xlakata nakamakgtayayaw amakgapitsin? Uma takgalhskinin nakgalhtikan kxalanka tamakxtumit xa akgtum kilhtamaku kata 2014. Uma título wanikan «Wa xTachuwin Dios lhuwa litliwakga kgalhi» takilhtinit kHebreos 4:12.
2. ¿Tuku takgalhskinin liwana nakgaxmataw kʼuma tamakxtumit?
2 Takgalhskinin nema lu xlakaskinka. Chuna la kgaxpattilhapat taʼakgchuwin katsokgti xtakgalhtin xla uma takgalhskinin nema aku naʼakxilha.
• ¿Tuku xlakata nalipawana xTachuwin Jehová? (Sal. 29:4.)
• ¿Tuku natlawayaw xlakata xTachuwin Dios nakinkamakgtayayan kkilatamatkan? (Sal. 34:8.)
• ¿La tlan natlawayaw xlakata putum kilhtamaku namaklakaskinaw xlitliwakga Biblia akxni nalichuwinanaw Dios? (2 Tim. 3:16, 17.)
• ¿La natlawayaw xlakata Satanás ni nakinkaʼakgskgawiyan? (1 Juan 5:19.)
• Kamanan, ¿tuku nakamakgtayayan xlakata nikxni natamakgatliniyatit Jehová? (Jer. 17:7.)
• ¿Tuku nakinkamatliwakglhan maski namakgkatsiyaw pi ni kgalhiyaw litliwakga? (2 Cor. 12:10.)
• ¿Tuku nakinkamakgtayayan xlakata chuntiya nalakgpaliyaw nitlan talismanin nema kgalhiyaw? (Efes. 4:23.)
3. ¿Tuku atanu na nakinkamakgtayayan akxni naʼanaw kgaxmataw taʼakgchuwin klanka tamakxtumit xaʼakgtum kilhtamaku?
3 Kgaxmatkan uma lanka tamakxtumit xa akgtum kilhtamaku lu lhuwa nakinkamakgtayayan. Nachuna lanka tamakxtumit xaʼakgtiy chu xaʼakgtutu kilhtamaku kinkamaxkiyan talakaskin pi nakalakgapasaw natalan xalak alakatanu congregaciones chu akxtum nakatatawilayaw (Sal. 133:1-3; 2 Cor. 6:11-13). Wa xlakata kalimaxtuw kilhtamaku nakatachuwinanaw kiʼamigoskan tiku lu makgasa kalakgapasaw, nachuna kakalakgapaswi atanu natalan. Chu komo kkintamakxtumitkan minit akgchuwinan superintendente de distrito o betelita, komo tamakgaxtokgkgonit kakatachuwinanti xpuskatkan. Lu xatapaxuwan kakgalhkgalhiw tamakxtumit xaʼakgtum kilhtamaku nema aku mima.