Akxni lakgchinan xasnun tajatat

«Akxni kiwanika pi xakkgalhi cáncer de pulmón chu de colon, xtachuna la xkiwanika pi xakama niy. Pero akxni kchalh kchiki, klakpuwa: “Ni wa tuku xakkgalhkgalhima, pero talakaskin naklakputsa la naktayani”» (Linda, 71 kata).

«Kkgalhi akgtum tajatat kkilakpin nema lu kimakatsanajwi. Min kilhtamaku, takatsanajwat lu taliwaka chu uma lu kimakgalipuwan. Makglhuwa kmakgkatsi pi kiʼakstu kwi chu asta klakpuwanit kiʼakstu nakimakgnikan» (Elise, 49 kata).

Chatum chixku tiku tatatla wi ksilla de ruedas chu akxtum tawilakgo tiku xalak xfamilia

KOMO wix o chatum tiku paxkiya wanikanit pi kgalhi akgtum tajatat nema ni kgalhi xalikuchun, katsiyata pi uma lu malakgaputsinan. Ni kajwatiya tajatat militatayanit, nachuna, lu malakgaputsi mintalakaspastakni. Tapekua chu talakgaputsit taliwaka makgatunu pina kpumakuchin, akxni ni kgalhiya tuku nalixokgoya likuchun chu akxni lakgalhiyan tuku likuchumpat. Talipuwan nema makgkatsi talakapastakni xlakata tajatat, lu makgatlakgwanan.

¿Tuku tlan namakgtayanan akxni chuna titaxtukan? Lhuwa latamanin kamakgtayanit oración chu akxni likgalhtawakgakgo textos xalak Biblia nema makgpuwantininan. Atanu tuku tlan mamakgkatsininan, wa xtamakgtay chu xtapaxkit familia chu amigos.

TUKU MAKGAPITSI LATAMANIN TLAWAKGONIT

Robert, chatum chixku tiku kgalhi 58 kata, wan: «Xlakata tlan natayaniya mintajatat, kalipawanti Dios chu xla namakgtayayan. Katlawani oración Jehová chu kawani tuku makgkatsiya. Kaskini xʼespíritu chu kaskini kamakgtayan tliwakga nawana xlakata namakgtayaya mifamilia chu tlan natayaniya mintajatat».

Robert wampara: «Lu xlakaskinka pi mifamilia tlan namamakgkatsiniyan, pi akxtum natatawilakgoyan. Chali chali kintachuwinan chatum xalak kifamilia xlakata nakinkgalhskin la kwi. Na kimakgpuwantinikgo kiʼamigos xalak alakatanu. Uma lu tlan kimamakgkatsini chu kimakgtaya ni naktaxlajwani».

¿Kgalhiya wix chatum amigo tiku tatatla chu lakpuwampat nalakgapaxialhnana? Kaʼakxilhti tuku wan Linda: «Tiku kgalhi tajatat latamaputun chuna la makgapitsi latamanin chu max ni putum kilhtamaku lichuwinamputun xtajatat. Wa xlakata, kalichuwinantit tuku chali chali tlawayatit».

Litliwakga nema Dios masta, takgoxamixit nema masta Biblia chu xtapaxkit mifamilia chu miʼamigos, tlan namakgtayayan naʼakxilha pi kgalhini kuenta nalatapaya maski kgalhiya tajatat.

Textos xalak Biblia nema tlan namakgtayayan

Kalipawanti Dios

«Akit kmakgskilh kakimakgtayalh Dios y xla kinkgaxmatli, y kilakgmaxtulh lata lhuwa tu xakjikuanimaj. Akit snun kgoxita xaklama akxni kkilhanilh Dios y xla kinkgaxmatli» (Salmo 34:4, 6, SXP).

Linda wan: «Ni kskini Dios pi kakimapaksalh. Kskini pi kakimakgtayalh tliwakga nakwan chu naktayani kintajatat».

Kalikgalhtawakga Biblia xlakata nalitatliwakglha

«Ni chatum lataman nawan: “Ktatatlay”» (Isaías 33:24).

Kalilakpuwanti tuku Dios natlawa kilhtamaku nema aku mima. Uma namatliwakglha takgalhkgalhin nema kgalhiya chu namakgtayayan natayaniya.

Kaputsa xtamakgtay mifamilia chu miʼamigos

«Xaxlikana amigo putum kilhtamaku paxkinan, chu litaxtu la chatum tala akxni anan talakgaputsit» (Proverbios 17:17).

Elise wan: «Ni kakatamakgatlini amakgapitsin. Kamasta talakaskin pi miʼamigos kamakgtayakgon. Namin kilhtamaku namakgkatsiya pi miʼakstu wila chu nalakpuwana pi Dios ni kgaxmatniman, pero ni katamakgatli».