La tlan napaxtikatsiniyaw lanka tamaskiwin nema kinkamaxkinitan Dios
1. ¿Tuku xlakata lu paxtikatsiniyaw Jehová?
1 Jehová kinkamaxkinitan «xlipaks wa ntlan tatakin» pero tuku tlakg xlakaskinka nema kinkamaxkinitan wa xKgawasa tiku lu paxki nema kinkalilakgmaxtun (Sant. 1:17). Uma tlawa pi tlan nakgalhiyaw lhuwa tasikulunalin chu nachuna nakinkatapatikanan kintalakgalhinkan (Efe. 1:7). ¡Lu paxtikatsiniyaw Dios! Wa xlakata, tlakg limasiyayaw tapaxtikatsinit kilhtamaku akxni natalakapastaka akxni tinilh Jesús, xlakata limaxtuyaw kilhtamaku nalakapastakaw uma lu xlakaskinka tamaskiwin nema kinkamaxkinitan.
2. ¿Tuku tlan natlawayaw xlakata tlakg napaxtikatsiniyaw talakgmaxtut chu xlakata kifamiliajkan nachuna natlawakgo?
2 Tlakg kapaxtikatsiniw. Uma kata, 30 xla marzo natalakapastaka akxni tinilh Jesús. Xlakata tlakg napaxtikatsiniyaw Jehová, tlan nalimaklakaskinaw Kilhtamaku akxni Kakninanikan Dios kFamilia xlakata nalikgalhtawakgayaw tuku lichuwinan xlakata talakgmaxtut. Nachuna tlan nalikgalhtawakgaya chali chali textos nema lichuwinan xlakata Jesús nema lakgchan semana akxni natalakapastaka akxni tinilh. Chatunu chatunu nalakpuwan la makgtayanit xtamakamastan Jesús, xlakata la akxilha Jehová, la akxilhkana wix, la kaʼakxilha amakgapitsi chu la akxilha kilhtamaku nema aku mima. Nachuna, na tlan xlimakgatawakga xalaksasti takilhtlin 8 chu 109 nema natamaklakaskin akxni natalakapastaka akxni tinilh Jesús (Sal. 77:12).
3. ¿La tlan nalimasiyayaw pi paxtikatsiniyaw Jehová?
3 Kalimasiw pi paxtikatsiniyaw. Lu paxtikatsiniyaw talakgmaxtut, wa xlakata tlawa pi lu nakalitachuwinanaw amakgapitsi xlakata Jehová chu lanka tapaxkit nema kinkalimasiyanin akxni malakgachalh xKgawasa (Sal. 145:2-7). Wa xlakata, marzo, abril chu mayo makgapitsi familias lakkaxwilikgo xlakata maski chatum xalak xfamilia naliskuja la precursor auxiliar. Komo nila naliskuja la precursor auxiliar, ¿tlan “nalimakgataxtiya nkilhtamaku” xlakata tlakg nalichuwinana Dios? (Efe. 5:16.) Xlakata paxtikatsininanaw xlikana naputsayaw la nakamakgtayayaw amakgapitsi xlakata na naʼankgo akxni natalakapastaka akxni tinilh Jesús (Apo. 22:17). La uku katsuku tsokgwiliya tiku nakawaniya; tlan nakawaniya tiku nakalakgpimparaya, tiku kamakgalhtawakgeya, mi familia, tiku kataskuja chu mintalakatsu xlakata nataʼankgo akxni nalakapastakaw akxni tinilh Jesús. Alistalh, na lhuwa kamakgpitsi invitación.
4. ¿Tuku tlan natlawayaw xlakata liwana namaklakaskinaw kilhtamaku akxni nalakapastakaw akxni tinilh Jesús?
4 Akxni natalakapastaka akxni tinilh Jesús kinkamakgtayayan xlakata nalimasiyaniyaw Jehová la xlilhuwa paxtikatsiniyaw xlakata tuku kinkamaxkinitan. Tlan namaklakaskinaw uma kilhtamaku xlakata tlakg napaxtikatsiniyaw chu nalimasiyayaw pi paxtikatsiniyaw talakgmaxtut chu «xlitlanka xlakatsukut ntu nkgalhi nCristo» (Efe. 3:8).